Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Neniyo 6 - The Keyagana NT and 25 OT books


Apakaemo Neniyoʼmo laiyoni anagaʼmogi kelifiʼmo asagauʼa yaga autalageno uno lamino maiʼniya gemae

1 Naliyasiʼa kini vekamo maiteno muki yagaiʼniya koʼaleʼmo vani hataleti tuvetiʼa vayaʼmogimo polovenesileʼmo yagaisayafeʼmo lekana paino apateʼniye.

2 Agaemo muki polovenesileʼmo yagaisaya vayaʼaiteʼmo yagaiʼa apatesayafeʼmo Neniyoʼagi mago lole vekalanagi huno lekana paino apateʼniye. Polovenesileʼmo yagaisaya vayaʼmogi aliʼyaʼapilefeʼmo Neniyoʼe lole vekalaʼmoganiʼeʼmo hapa paisageno kini vekamo aliʼyaʼamo alagepa huno afole aisiyafeʼmae.

3 Neniyo aipafiʼmo alagepa aunemeʼamo maiʼniyaʼmofeʼmo muki ani yagaiʼnaya vayaʼaina ago aeno apaka seʼnigeno kini vekamoʼa Neniyoʼmo lekana paino atesigeno muki Mamiloni kote yagaisiyafeʼmo agesamo afiʼniye.

4 Agesamo afiʼniyaʼmofeʼmo ani kavafeʼmo ohapauʼnigeʼa lole hogote vekalanagi polovenesile yagaiʼnaya vayanagi huʼa Neniyoʼmo gamani aliʼyaʼafiʼmo mago afole aiʼnisiya hosu kavaʼamo ageteʼa agoti huʼa atesayafeʼmo amalageka huʼa kahauya huʼnayaʼmonanafa mago hosu kavaʼamo oʼageʼnae. Muki afinaʼmo alagepa aliʼyaʼmo aliʼniyaʼmofeʼmo mago kayagi kayaga kavaʼamofi hosu kavaʼamofi huʼa oʼageʼnae.

5 Inagi apakaemo huʼapaeʼmo, Lagaemo Neniyoʼmo agoti huta atesuna kavaʼamo alagi oʼagegaunaʼmonanafa gotiʼamo keʼaepa geʼamo akame nehiya kavatetiʼmo agoti huta ategaune.

6 Inagi ani lole hogote vekalanagi polovenesileʼmo yagaiʼnaya vayanagi huʼa uʼa kini vekamo aulagaleʼmo aliʼa anupa huʼnae. Apakaemo, kini vekamo Naliyasio, huʼa, muki afinaʼmo alagepa huka maiyo, huʼa huteʼa aliʼa aulena ateʼnae.

7 Lagaemo hogote vekalanagi yagaiʼnaya vayanagi kanisole vayanagi napa tu vayanagi huta mukiʼamogitamo kavayafatiʼmo mago lokiya keʼaepa gemo hu malesunafeʼmo vege huʼnone. Tetiʼa afinaʼmo muki vayaʼmogimo mago gotigifeʼmo nunumuʼmo osuge mago vayaʼaifeʼmo ge huʼa apafi okege hugae. Alagi haʼao, mago yaʼmo alisayafeʼmo huʼapaeʼmo kagaefekeʼmo ge huʼa kafi gegae. Ina lagimo ani gemo amagiʼa atalesafi laiyoni anagaʼmogi kelifiʼmo apasagauʼa yaga auʼa apatalesageʼa uʼa lamigae.

8 O kini vekamogae, huta, mani keʼaepa gemo afole aisiyafeʼmo hapa paigeʼa ani keʼaepa gemo avoʼmo kaeyo. Avoʼmo kaetesagekaeʼmo alika lokiya vaika atesanafeʼmo kagaika kagimo avoʼmo kaetesanageʼa muki vayaʼmogimo akame hugae. Ani keʼaepa gemo lagaemo Mitiya vayaʼe Pesiya vayaʼeʼmo magoke keʼaepa getimo hanesigeno mago vekamoʼmo alu gemo afaʼa osugiye.

9 Kini vekamo Naliyasiʼmo ani gemo afitenoʼaeʼmo avoʼmo kaeʼniya apepaleʼmo agaiʼa agimo avoʼmo kaeʼniye.

10 Mago vayaʼmogi Neniyofeʼmo ha paiʼapaeʼmo, kini vekamoʼmo ani keʼaepa gemo apepaleʼmo agaiʼa agimo ago avoʼmo kaeʼniye, huʼa huʼnageno afitenoʼaeʼmo noʼalegamo uʼniye. Agaemo anagamo aeno hanagi maleʼniya yapilagamo uno haino Yulusalemu taonifiʼmo aulu heno neʼageya yasi kaʼmo haopaleʼmo aleʼyamo faiʼneno hogoteno nehiya agufa kavaʼmo huno ani afinaʼmo loleʼe magoʼe kanaleʼmo nunumuʼmo huʼniye.

11 Inagi ani gamani vayaʼmogimo gemo ago huʼa hayae maleʼnayaʼmofeʼmo uʼa ageʼnayana Neniyoʼmo Gotiʼamofeʼmo nunumuʼmo huge ge huno afige nehigeʼa ageʼnae.

12 Apakaemo kini vekalegamo uʼa kini vekamoʼmo hu maleʼniya keʼaepa gelefeʼmo huʼapaeʼmo, kagaemo hukaeʼmo, Tetiʼa afinaʼmo maiʼnetapaeʼmo nagaefeʼmo ge hutapa nafi geyo. Mago vekamoʼmo mago gotifeʼmofi mago vekaeʼmofi huno afi gesigeʼapaeʼmo asagauʼa laiyonimogi kelifiʼmo yaga auʼa atalegae, huka osuʼnapiye, huʼa ge huʼa afi geʼnageno kini vekamoʼmo hapa painoʼaeʼmo, He, ani gemo lama gemo huʼnae. Nagaemo hu maleʼnova keʼaepa gelefeʼmo Mitiya vayaʼmogitaʼe Pesiya vayaʼmogitaʼeʼmo keʼaepa getimo hanesigeno mago vekamoʼmo alu gemo afaʼa osugiye. Lagae keʼaepa gemo muki vayaʼaifeʼmo hapa paiʼnove.

13 Inagi apakaemo kini vekaeʼmo ani gemo ha paiʼnae. Neniyoʼmo Yuta kotegatiʼmo kalavusi huʼa ateteʼa avaleliʼa eʼnaya vekamoʼmo ala kagikalefeʼmo agesamo oʼafino kaiyafiʼmo oʼmaiʼniye. Keʼaepa gemo apepaleʼmo kagimo avoʼmo kaeʼnana keʼaepa gemo akame nosiyaʼmonanafa magoke afinaʼmo loleʼe magoʼe kanaleʼmo gotiʼamofeʼmo ge huno afi geʼniye, huʼa ha paiʼnae.

14 Kini vekamoʼmo ani gemo afitenoʼaeʼmo agaiʼamo huʼniya kavafeʼmo lusi kava huno ohauʼnigeno Neniyoʼmo agufamo alino katino atesiya kavafekeʼmo agesa afime afime neʼvigeno yegemo uno lamino faleʼniye.

15 Apakaemo halate eʼa kini vekaeʼmo huʼapaeʼmo, O kini vekae, huʼa, Mitiya vayaʼmogita kavaʼe Pesiya vayaʼmogita kavaʼeʼmo haneʼniyana kini vekamo keʼaepa gemo hu malesiya gemo ataleʼa alu gemo afaʼa osugae, huka kagesamo afiyo.

16 Inagi kini vekamoʼmo vayaʼaifeʼmo hapa paiʼnigeʼa Neniyoʼmo avaleliʼa eʼa asagauʼa laiyoni anagaʼmogi kelifiʼmo yaga auʼnae. Kini vekamoʼmo Neniyofeʼmo hunoʼaeʼmo, Gotikamo muki afinaʼmo aliʼyaʼamo neʼalina Gotikamoʼmo kagufamo alino katino kategaiye, huno huʼniye.

17 Inagi alopa yafaʼmo aliʼa keli avayaleʼmo aiʼa akani maleʼnageno kini vekamo liniletiʼe ala vayaʼamogi liniletiʼeʼmo yafateʼmo alagena yaʼmo hu maleʼniye. Vayaʼmogimo Neniyoʼmo ha oʼmaesayafeʼmae.


Gotiʼa laiyoni anagaʼmogi apavayafatiʼmo Neniyo agufamo alino katino ateʼniya gemae

18 Kini vekamo alopa noʼalegamo uno haniʼilagamo neʼyaʼmo oʼneno afaʼa mosino maiteno ve aʼneʼaifeʼmo ge huʼnigeʼa eʼa apamogaga aiʼa oʼatege au okalege huno maiʼniye.

19 Gotilamiyapiʼmo kini vekamoʼmo he tino malage huno laiyoni anagaʼmogi kelileʼmo uʼniye.

20 Agaemo uno kelileʼmo avaʼyi nehunoʼaeʼmo hausoli huʼnigeno ge hunoʼaeʼmo, Neniyo, huno, muki afinaʼmo neʼmaiya Goti aliʼyaʼamo neʼalina vekamogae, Gotikamoʼmo laiyoni anagaʼmogi apavayafatiʼmo kagufamo ago alino katino kateʼnifiye, huno huʼnigeno

21 Neniyoʼa hunoʼaeʼmo, O kini vekae, huno, muki afinaʼmo alagepa huka maiyo, huno huteno alino auleno ateʼniye.

22 Gotiʼnimoʼa enisole vekaʼamo alino ateʼnigeno emineno laiyoni anagaʼmogi apavayaleʼmo alino akanigeʼa nahaeʼa oʼneʼnae. Agaemo nageʼniyana aulagaleʼmo mago hosu kavaʼmo osuge kagaetegaʼeʼmo mago hosu kavaʼmo osuge huʼnovaʼmofeʼmae.

23 Kini vekamo lusi kava huno amogaga aiteno vayaʼaifeʼmo ge huʼnigeʼa laiyonimogi kelifatiʼmo avayu huliʼa hai eʼnae. Neniyoʼa Gotiʼamofeʼmo agesamo afino fatago huʼniyaʼmofeʼmo ageʼnayana mago agufa hanageke yaʼmo alagi oʼaliʼniye.


Kini vekamo Naliyasiʼmo Gotina ala agi amiʼniya gemae

24 Inagi kini vekamoʼmo huʼnigeʼa Neniyoʼmo agoti huʼa ateʼnaya vayaʼe muki aʼne mafaʼneʼapiʼeʼmo apavaleliʼeʼa apasagauʼa laiyoni anagaʼmogi kelifiʼmo yaga auʼa apataleʼnageʼa lamiʼa mopale asagauʼa oʼaiʼnageʼapaeʼmo laiyoni anagaʼmogimo aeʼa apaka seʼa apakufamo haniʼa katali katalu huʼnae.

25 Inagi Kini vekamo Naliyasiʼmo ani kava huno avoʼmo kaeʼniyana; Muki kotega vayaʼaifenagi muki nofi vayaʼaifenagi muki alu apake alu apakemo neʼaiya vayaʼaifenagi huʼna hapa paiʼnaeʼmo, Alagepa hutapa maiyo, huʼna lapa nepauve.

26 Hemenimo mago keʼaepa gemo hu malovanagi muki yagaiʼna neʼapatova vayaʼmogimo Neniyo Gotiʼamofeʼmo koli huteʼa atete huʼa aiyafi maiyo. Agaemo afaʼa neʼmaiya Gotiʼa muki afinaʼmo maige maige huno maigiye. Muki afinaʼae afinaʼaeʼmo kini vekamo maiʼniyanageno neʼyagaiya lokiyaʼamo alagi hano osugiye. Agaemo yagaino apateme apateme neʼvisigenoʼaeʼmo atupa afinaʼmo afole aigiye.

27 Agaemo hosu kavategatiʼmo apavalelino ege apakufamo alino katino apatege nehiye. Agaemo kokuʼnapiʼe ma mopaleʼeʼmo alagena aune kavaʼmo huge ageteʼa hapau neʼaiya kavaʼmo huge nehiye. Ani Gotiʼmo Neniyoʼa laiyoni anagapatiʼmo agufamo alino katino ateʼniye.

28 Kini vekamo Naliyasiʼmo yagaino apateʼniya afinaʼe Sailasiʼmo Pesiya nofi kini vekamoʼmo yagaino apateʼniya afinaʼeʼmo Neniyoʼmo aliʼyaʼamoʼmo alagepa huno afole aiʼniye.

© 2013, Wycliffe Bible Translators, Inc. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ