Neniyo 5 - The Keyagana NT and 25 OT books

Kini vekamo Melisasaʼmo alopa neʼya yagitamo huʼniya gemae

¹ Kini vekamo Melisasaʼa vani tauseniʼa ala vayaʼeʼmo neʼyaʼmo nesayafeʼmo alopa neʼyaʼmo yagita huʼniye. Agaemo ala vayaʼaeʼmo ge huʼnigeʼa ani neʼyateʼmo eʼa agaeʼeʼmo magokepi nofi alagafati aniʼmo neʼnae.

² Melisasaʼmo nofi alagafati aniʼmo neno afigenoʼaeʼmo aliʼyaʼamo neʼaliya vayaʼaifeʼmo hapa painoʼaeʼmo, goli kapuʼe siluva kapuʼeʼmo alinitapa eyo, huno huʼniye. Lotoʼamo Nepukanesaʼmo ani kapumo Yulusalemu mono nopatiʼmo alinino eʼniye. Kini vekamo agaiʼagi ala vayaʼagi aʼne anagaʼagi fikumo aliʼniya aʼne anagaʼagi huʼa ani kapufatiʼmo nofi alagafati aniʼmo nesayafeʼmo hauʼnigenoʼaeʼmo ani kapumo alinitapa eyo, huno ge huʼniye.

³ Inagi muki ani asole kapumo Yulusalemu taonifi Goti mono noʼafiʼmo haneʼniya kapumo aliniʼa eʼnaya kapufiʼmo kini vekagi ala vayaʼagi aʼne anagaʼagi fikumo aliʼniya aʼne anagaʼagi huʼa ani kapufatiʼmo aniʼmo neʼnae.

⁴ Apakaemo nofi alagafati aniʼmo neʼneʼapaeʼmo goliletiʼmo alo huge siluvaletiʼmo alo huge haesa aeniletiʼmo alo huge afa aeniletiʼmo alo huge yosaletiʼmo alo huge yafatetiʼmo alo huge huʼnaya gotigi apakiʼapileʼmo aliʼa asaga huʼnae.

⁵ Neʼnagenoʼaeʼmo mago vekamo ayaʼmo afole aiteno kini vekamo noʼafiʼmo kaleso yosale latapa yaʼmo maleʼnaya yateʼmo avoʼmo kaeʼniye. Ani yateʼmo lamumoʼmo alagepa huno aeno ha leʼnigeno kini vekamoʼmo ani avoʼmo kaeʼniya ayaʼmo ageno alagepa huʼniye.

⁶ Inagi kini vekamoʼmo agetenoʼaeʼmo aeto agufa augosamo kaliteno agesa neʼafigenoʼaeʼmo lusi kana yaʼmo aipafiʼmo afole aitegeno aumiʼyalaʼmo hatu maeʼnigeno aiyamoʼa lusi atete huʼnigeno aiyalaʼmo alino salukiʼniye.

⁷ Kini vekamoʼmo alopa gefatiʼmo kanefiʼmo ageʼa aiyaka neʼaliya vayanagi Kalatiya vayanagi afole aisiya kavafeʼmo ava gemo nehaya vayanagi huʼa apavaleliʼa esayafeʼmo keya aeno ge huʼniye. Kini vekamoʼmo ani afiteʼa ageʼnaya vayaʼaifeʼmo hapa painoʼaeʼmo, ina laʼmo mani gemo lekana paiteno aepaʼamo naha paisifi nagaemo kini vayaʼmogi neʼvaiya agufa haesa kukena yaʼmo vaiʼna ateteʼna goli seli nofiʼmo lugoʼafiʼmo huʼna atesugeno napa tali gamani vekamo yagaino apatesiya vekamo maigiye, huno huʼniye.

⁸ Inagi kini vekamo muki afiteʼa ageʼnaya vayaʼamo ani nopiʼmo uʼa haiʼa maiʼnayaʼmonanafa avoʼmo kaeʼniya gemo lekana paige aepaʼamo afiteʼa kini vekaeʼmo ha paige osuʼnae.

⁹ Inagi kini vekamo Melisasaʼmo lusi kana yaʼmo aipafiʼmo afole aiʼnigeno aeto agufa augosamo kaliʼnigeʼa ala vayaʼamogi apakesa alaʼamo afiyaʼmonanafa mago ha maesaya kaʼmo oʼageʼnae.

¹⁰ Kini vekamo itaʼamoʼmo kini vekaʼe ala vayaʼaʼeʼmo apano aeʼa maiʼnaya gemo afiteno aeʼa hanagi maleʼneʼa neʼyaʼmo neʼnaya yapiʼmo uno haiʼniye. Agaemo hunoʼaeʼmo, kini vekae, huno, muki afinaʼmo alagepa huka maiyo. Kagaemo ani kavaʼmo afaʼa ateʼnegenoʼa kagesa alaʼamo afisana yaʼmo kamiteno kaipamo alino hosu huno okateno.

¹¹ Mago vekamo kagaemo yagaiʼnana koteʼmo apaote gotigi apauneʼapameʼamo aipafi maiʼnaya vekamo maiʼniye. Lotokamoʼmo kini vekamo Nepukanesaʼmo maiʼniya afinaʼmo agaemo ani alagepa huno afiteno ageʼniya vekamo ageʼniyana agaemo ageʼniya kavaʼamoʼmo alagepa huʼnigeʼa gotigi ageʼnaya kavakana huno haneʼniye. Lotokamoʼmo Nepukanesaʼmo ani vekamoʼmo lekana paino ateʼnigeno apaune vayaʼaitenagi kanefiʼmo ageʼa aiyaka neʼaliya vayaʼaitenagi Kalatiya vayaʼaitenagi afole aisiya kavafeʼmo ava gemo nehaya vayaʼaitenagi huno yagaino apateʼniye.

¹² Ani vekamo agiʼamo Neniyoʼmae. Kini vekamo Nepukanesaʼmo Melitesasaʼae huno agi ateʼniye. Nepukanesaʼmo ageʼniyana alagepa aunemeʼamo aipa agesafi mukufi gemo alagepa huno afige alagepa agesa afi yaʼmo hanege alagamuna gemo aepaʼamo alagepa huno afige aune gemo afige fala kiʼniya gemo afige huʼnigeno ageʼniye. Maiʼniyaʼmofeʼmo agaefeʼmo ge huʼnigeno eno ani gemo aepaʼamo kaha paino.

¹³ Inagi apakaemo Neniyoʼmo avaleliʼa eʼnageno kini vekamo aulagaleʼmo uno haino he tiʼniye. Kini vekamoʼmo ha painoʼaeʼmo, Lotoʼnimoʼmo Yuta kotegati apavalelino eʼniya kalavusi vayapati vekamo Neniyogamo maiʼnapiye.

¹⁴ Nagaemo kava gemo afiʼnovana kagaemo gotigi apauneʼapameʼmo kaipafiʼmo maiʼnageka alagepa huka agege mukufi gemo alagepa huka afige alagepa huka afiteka agege huʼnane.

¹⁵ Afiteʼa ageʼnaya vayaʼmo kanefi ageʼa aiyaka neʼaliya vayaʼmogi avoʼmo kaeʼniya gemo lekana paiteʼa aepaʼamo naha paisayafeʼmo apavaleliʼa eʼnayaʼmonanafa afaʼa naha opaiʼnae.

¹⁶ Vayaʼmogi kagaefeʼmo huʼapaeʼmo, agaemo gemo aepaʼamo afige fala kiʼniya yaʼmo agege huno maiʼniye, huʼa huʼnageʼna afiʼnove. Kagaemo ani gemo lekana paiteka aepaʼamo naha paisanana kini vayaʼmogi neʼvaiya agufa haesa kukenamo vaiʼna kateteʼna goli seli nofiʼmo lugokafiʼmo huʼna katesugeka napa tali gamani vekamo yagaika apatesana vekamo maigane, huno ha paiʼniye.

¹⁷ Neniyoʼa geʼaleʼmo aeno atagaina huno ha painoʼaeʼmo, Haʼao, huno, fikumo namisana yaʼmo kagaikamo afaʼa aligane. Kagaemo ani miyaʼmo alu vekamo amiganaʼmonanafa nagaemo ani gemo afaʼa lekana paiteʼna aepaʼamo kaha paiguve.

¹⁸ O kini vekamogae, huʼna, Aeno apaka seno alagi anaga Gotiʼa lotokamo Nepukanesaʼmo yagaino apatesiya kini vekamo alino hamaleno ateteno kini vayaʼmogi afaʼa neʼaliya lokiyaʼamo amige konali yaʼamo amige ala agiʼamo amige huʼniye.

¹⁹ Gotiʼa himamuʼamo amiʼniyaʼmofeʼmo muki kotega vayanagi muki nofi vayanagi muki alu apake alu apake neʼaiya vayanagi huʼa agaefeʼmo lusi kava huʼa koliʼamo huteʼa atete huʼnae. Agaemo mago vekamo kamitimo amagisugeno faligiye, huno hutenoʼaeʼmo ago alagi amagiʼniye. Agaemo mago vekamo afaʼa atesugeno maigiye, huno hutenoʼaeʼmo afaʼa ateʼnigeno maiʼniye. Agaemo mago vekamo agiʼaleʼmo aliʼna asaga huʼna ategauve, huno hutenoʼaeʼmo ani kavaʼmo afaʼa huʼniye. Agaemo mago vekamo aliʼna afepi ategauve, huno hutenoʼaeʼmo ani kavaʼmo afaʼa huʼniye.

²⁰ Huʼniyaʼmonanafa lotokamoʼmo agaiʼamo alino asaga huno atege ge oʼafige huʼnigenoʼaeʼmo Gotiʼa alino hafaino ataleteno ayapatiʼmo konali yaʼamo alino ataleʼniye.

²¹ Gotiʼa afu anagaʼmogi apaipa apakesagana huno alino hamaleno ateʼnigeʼapaeʼmo vayaʼmogi apakaepatiʼmo aliʼa hafaiʼa ataleʼnageno uno afela noki anagaʼeʼmo magokepi lokaeno maiʼniye. Pulumakamogi nehaya kava huno kahaumo neno maiʼniye. Kokuʼnapatiʼmo lao yaʼmo emineno agufamo alino lanitani huʼniye. Ani kavaʼmo huno maime maime neʼunoʼaeʼmo ageʼniyana aeno apaka seno alagi anaga Gotiʼa kini vayaʼaiteʼmo yagaino neʼapate, huno ageʼniye. Agaiʼageʼmo kini vayaʼmo lekana paino apateteno yagaiʼa apatesayafeʼmo alino neʼapate, huno agetenoʼaeʼmo halate he tino kini vekamo hamaleʼniye.

²² Kagaemo Melisasagae, huʼna, mafaʼneʼamo maiʼnananageka agaete afole aiʼniya kavaʼmo ago ageʼnanaʼmonanafa kagaemo kagaikamo alika afepi okateʼnane.

²³ Kagaemo kokuʼnapi Ala kava netegamo hosu kavaʼmo huka kagikaleʼmo alika asaga huka kateʼnane. Kagaemo aliteyo, huka hapa paiʼnanageʼa Ala kava neʼmo kapumo noʼafatiʼmo kumayaʼmo alini eʼa maleʼnaya kapufiʼmo kagaegi ala vayakagi aʼne anagakagi fikumo aliʼnana aʼne anagakagi hutapa ani kapufatiʼmo nofi alagafati aniʼmo neʼnae. Neʼnetapaeʼmo gotitapimogimo goliletinagi siluvaletinagi haesa aeniletinagi afa aeniletinagi yosaletinagi yafatetinagi huʼa alo huʼnaya gotigi apakiʼapileʼmo alitapa asaga huʼnae. Ani gotigimo apaulaga oʼagege gemo oʼafige apakesamo ohanege huʼniya gotigi apakiʼapileʼmo alika asaga huʼnanana kagae kavamusaʼmo ayapi aliteno afaʼa maisana kavateʼmo yagaino kateʼniya Goti agiʼaleʼmo alika asaga huka oʼateʼnane.

²⁴ Agiʼaleʼmo alika asaga huka oʼateʼnanagenoʼaeʼmo Gotiʼa mago vekamo ayaʼmo alino ateʼnigeno emineno ani gemo avoʼmo kaeʼniye.

²⁵ Ani gemo huno avoʼmo kaeʼniye. MENE MENE TEKEL UPHARSIN, huno avoʼmo kaeʼniye.

²⁶ Magoke magoke avoʼmo aepaʼamo haneʼniyana MENE gemo aepaʼamo Gotiʼa kagaemo na magi afinaʼmo yagaika apategapi huno lekana pai maleʼniyana hemenimo ago alino hano huno ataleʼniye.

²⁷ TEKEL gemo aepaʼamo haneʼniyana Gotiʼa kana yakamo asaino ageʼniyana metaleʼnane, huno ageʼniye.

²⁸ PERES gemo aepaʼamo haneʼniyana Gotiʼa yagaika apateʼnana vayapatiʼmo alino fako huno Mitiya vayaʼaitegamo apatege Pesiya vayaʼaitegamo apatege huʼniye, huno ha paiʼniye.

²⁹ Ha paiʼnigeno Melisasaʼmo ge huʼnigeʼa kini vayaʼmogi neʼvaiya agufa kukenamo aliniʼeʼa Neniyoʼmo ge vaiʼa atege goli seli nofiʼmo lugoʼafiʼmo huʼa atege huteʼa uʼa alopa gefatiʼmo huʼapaeʼmo, Hemenimo Neniyoʼa napa tali gamani vekamo maiʼniye, huʼa huliʼuʼeʼa huʼnae.

Mitiya ati vayaʼmogi eʼa kini vekamo Melisasaʼmo kamitimo amagiʼnageno faliʼniya gemae

³⁰ Ani haniʼilagamo mago Mitiya ati vayaʼmogimo eʼa Mamiloni vayaʼai kini vekaʼapimo Melisasaʼa kamitimo amagiʼnageno faliʼniye.

³¹ Ani afinaʼmo Mitiya nofi vekamo agiʼamo Naliyasiʼa Melisasa aimuʼyaleʼmo kini vekamo maiteno Mamiloni vayaʼaiteʼmo yagaino apateʼniye. Ani afinaʼmo Naliyasiʼa sigisiti tuʼa kafugamo maiʼniya afinaʼmae.