Neniyo 12 - The Keyagana NT and 25 OT books

Atupa afinafeʼmo huʼniya gemae

¹ Ma mopafi vayakana agufa vekamoʼmo nagaemo Neniyoʼnaeʼmo magoʼe gemo naha painoʼaeʼmo, Ani afinaʼmo hogote enisole vekamo Maikoʼa lapakaemo Isaleli vayaʼmogitapaleʼmo yagaino nelapateya ala vekamo he tigiye. Ani afinaʼmo alagi alopa kana yaʼmo afole aigiye. Akeyaʼvilaga aepa faiʼniya afinatetiʼmo mago afole oʼaiʼniya agufa kana yaʼmo afole aigiye. Ani afinaʼmo Gotiʼa kagae nofi vayaʼmogi apakiʼapimo mukuʼafiʼmo avoʼmo kae maleʼnisiya vayaʼai apakufamo alino katino apategaiye.

² Ma mopafiʼmo asole vayaʼmo apau kaleʼa maiʼnaya vayaʼmo apaupatiʼmo he tigae. Mago vayaʼamo he tiʼa alagepa huʼa maige maige huʼa maigae. Mago vayaʼamo he tiʼa apavagage yaʼmo aliteʼa maige maige huʼa maisageʼapaeʼmo hosu vayane, huʼa huteʼa apakameʼyamo apamigae.

³ Kokuʼnaʼmoʼa aeno ha neleya kava huʼa afiteʼa ageʼnaya vayaʼmogimo aeʼa ha legae. Kanefiʼmoʼa aeno ha neleya kava huʼa fatago kavaʼmo hisayafeʼmo vayaʼai apaipamo aliʼa afe leʼa neʼapataya vayaʼmogimo muki afinaʼaeʼmo aeʼa ha lege lege huʼa maigae.

⁴ Inagi hemenimo kagaemo Neniyogamo mani gemo haneʼniya mukumo aika akaniyo. Ani mukumo aino akanino haneʼnisigeno atupa afinaʼmo afole aigiye. Asole vayaʼmo nagu nagu huʼa u eʼa hisageʼa magoʼe huʼa afiteʼa agegae, huno naha paiʼniye.

⁵ Naha paitegeʼnaeʼmo nagaemo Neniyoʼnamo anakeʼnovana mago alu lole vekalaʼmo he tiʼana maiʼnaʼageʼna anakeʼnove. Anakaemo ani haigileʼmo he tiʼana maiʼnaʼae. Mago vekamo magayaga faliga he tino maiʼnigeno mago vekamo mugagayaga faliga he tino maiʼniye.

⁶ Anakaepatiʼmo mago vekamoʼmo mago alagepa yaveyave kukenamo vaiteno animo anaga maiʼniya vekaeʼmo ina ge huno ge huno afi geʼniye. Hainu afinaʼmo mani afole aiʼnigeʼapaeʼmo ageteʼa hapau neʼaiya kavaʼmo alagi hano hugiye, huno ge huno afi geʼniye.

⁷ Alagepa yaveyave kukena vaino aliteno aniʼmo anagamo maiʼniya vekamoʼmo lole ayatalaʼmo alino asagaulino kokuʼnatega uno nehaino agoʼyamo ataletenoʼaeʼmo muki afinaʼmo neʼmaiya Goti agiʼaletiʼmo alagi lama gemo huʼnaeʼmo mani aeto agufa kavaʼmo afole neʼaiya kavaʼmo loleʼe magoʼe kafugaʼe sigisiʼa kaiʼeʼmo hano hugiye. Apakaemo apaote vayaʼai lokiyaʼapimo alagi hano hisigeʼa ho sisaya afinaʼmo mani kavaʼeʼmo alagi hano hugiye, huno naha paiʼniye.

⁸ Nagaemo ani gemo afiʼnovaʼmonanafa alagepa huʼna afiʼna ha oleʼnove. Nagaemo ina ge huʼna ge huʼna afi geʼnove. Ala vekae, huʼna, mani kavapatiʼmo hano hisiyafeʼmo mago haiya kavaʼmo afole aigiye, huʼna afi geʼnogenoʼaeʼmo

⁹ Neniyo, huno, hemenimo afaʼa ato. Hemenimo mukumo ago aino akaniʼniyanageno vaka olegaiyaʼmofeʼmo atupa afinaʼmo afole aigiye.

¹⁰ Gotiʼa asole vayaʼmogi hosu kavaʼapimo aeno kalo paeno atalege yaveyave vayaʼmo alino hamaleno apatege alino alagepa huno apatege hugiyaʼmonanafa hosu vayaʼmogi hosu kavaʼmo hugae. Hosu vayaʼmogimo alagepa huʼa afiteʼa ageʼa ha olegayaʼmonanafa afiteʼa ageʼnaya vayaʼmogi alagepa huʼa afiteʼa ageʼa ha legae.

¹¹ Apakaemo kame vayaʼapimogimo huʼapaeʼmo, gotitapimoʼmo muki afinaʼae afinaʼaeʼmo ofalini neʼamiya kavaʼmo magoʼe osiyo huʼa huge hosu yaʼmoʼa alino hosu huno neʼateya yaʼmo avenatuʼnaʼmo heno neʼataleya yakana huno haneʼniya yaʼmo aliʼa he tiʼa atege hisaya afinatetiʼmo vani tauseni tu hataleti naetiʼa afinaʼmo uno hano hutesigenoʼaeʼmae.

¹² Apakaemo vani tauseni tali hataleti teti faefuʼa afinaʼmo Gotifeʼmo agava maiʼnisaya vayaʼmo aulena vayaʼmo maiʼnae.

¹³ Kagaemo Neniyogamo mailika neʼugenoʼao atupa afinaʼmo afole aino. Kagaemo maika falu huka atupa afinaʼmo he tika Gotiʼa lekana paino kateʼniya yaʼmo aliteka maika haga legane, huno naha paiʼniye.