Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Neniyo 11 - The Keyagana NT and 25 OT books

1 Kini veka Naliyasiʼmo Mitiya nofi vekamoʼmo hogote kafugaʼamo Mamiloni kote neʼyagaiya afinaʼmo alagepa huno maisiyafeʼmo he tiʼna yagaiʼna ateteʼna lokiya vaiʼna ateʼnove.

2 Inagi ani vekamoʼmo magoʼe gemo naha painoʼaeʼmo, Afiyo, huno, alagi lama gemo kaha pauve. Loleʼe magoʼe kini vayaʼmo magoʼe huʼa afole aiteʼa Pesiya koteʼmo yagaigae. Henagaʼamo napa fo kini vekamo Pesiya kotetiʼmo afole aigiye. Agaemo muki kini vayaʼaina magoʼe huno aeno apaka seno alopa kagemiyaʼamo hanegaiye. Agaemo lokiyaʼaletiʼe kagemi yaʼaletiʼeʼmo Galiki vayaʼaitegamo kame hisayafeʼmo alino he tino apategaiye.

3 Inagi mago lokiya kini vekamo afole aiteno lokiya vaino yagaino apatetenoʼaeʼmo muki hauʼnisiya kavaʼmo afaʼa hugiye.

4 Hugiyaʼmonanafa yagaisiya kopatiʼmo aliʼa fako hisageno loleʼe loleʼe koʼmo hanegaiye. Mafaʼne anagaʼamogi ani koteʼmo oʼyagaigayaʼmonanafa alu vayaʼmogimo yagaigae. Agaemo alopa lokiyaʼaletiʼmo yagaisiya kava huʼa oʼyagaigae.


Isipi kini vekamoʼmo Siliya kini vekaʼeʼmo kamemo hisiya kavafeʼmo huʼniya gemae

5 Inagi lamaga haopalega Isipi koteʼmo yagaisiya kini vekamo lokiyaʼamoʼmo kosino alopa hanegaiyaʼmonanafa mago hogote aliʼya vekaʼamoʼmo magoʼe huno alopa lokiyaʼamo hanesigeno Isipi kini vekamo aeno aga seno alopa koteʼmo yagaigiye.

6 Mago kafugamo utesigeʼana kotalakemo hu malesaʼafeʼmo Isipi kini vekamoʼmo aʼmafaʼneʼamo alino atesigeno uno hoga haopalega Siliya kotega kini vekaleʼmo maigiye. Maigiyaʼmonanafa ani a kanomo lokiyaʼamo ohanesigeno anauʼamoʼeʼmo lokiyaʼamo hano hugiye. Kame vayaʼmogi ani aʼmafaʼne avaleliʼa eʼnaya vayanagi lokiya vaiʼa ateʼnaya vayanagi huʼa kamitimo apamagigae.

7 Apakaemo ani a kanomo kamitimo amagigayaʼmonanafa mago vekamo ani afamo anaga vayapatiʼmo afole aiteno ami vayaʼeʼmo eno Siliya vayaʼeʼmo kamemo huno aeno apaka segaiye.

8 Agaemo aigofe gotiʼapimogi apauneʼamo goliletiʼe siluvaletiʼeʼmo alo huʼnaya yaʼeʼmo alinino Isipi kotegamo ugiye. Siliya kini vekamo hogoteno falitesigeno Isipi kini vekamo faligiye.

9 Henagaʼamo Siliya kotega kini vekamo Isipi kotega uno kamemo huteno halate atagi neno koʼalegamo egaiye.

10 Henagaʼamo Siliya kotega kini vekamo mafaʼne anagaʼmogimo asole ati vayaʼmo apavaleʼa aliʼa anupa huteʼa uʼa alopa aniʼmo neheya agufa kava huʼa aeʼa apaka segae.

11 Inagi Isipi kini vekamoʼmo lusi kava huno aipamo leʼnisigeno kamemo hugiyaʼmofeʼmo Siliya kini vekamoʼmo asole ami vayaʼmo alino anupa huteno kamemo hugiyana Isipi kini vekamoʼmo ago kame huno aeno apaka seteno kalavusi huno apategaiye.

12 Agaemo kalavusi huno apateteno apavalelino neʼunoʼaeʼmo agaiʼa agufamo alino asagauno ategaiye. Agaemo asole tauseniʼa ati vayaʼmo kamitimo hapaegiyaʼmonanafa afaʼa aise afinaʼmo hogote vekamo maigiye.

13 Halate Siliya Kini vekamoʼmo asole ati vayaʼmo hogoteʼa uʼa kamemo huʼnaya agufa ati vayaʼmo ago aeno agaseno apavaleno alino anupa huno hisigeʼa kamemo hisaya yaʼmo asole yaʼmo aliniʼa uʼa Isipi kini vekaʼeʼmo kamemo hugae.

14 Ani afinaʼmo asole vayaʼmogimo Isipi kini vekalegamo kame hugae. Kagae nofi vayapatiʼmo mago afela vayaʼmogi apaya mukiki hisaya vayaʼmo alagamuna gemo huʼniya kavaʼmo huʼa apakaiʼapimo apakufamo apavaleliʼa haigayaʼmonanafa kamefatiʼmo afaʼa asagauʼa aigae.

15 Siliya kini vekaʼe ati vayaʼaʼeʼmo eʼa lokiya yafa kegiʼyaʼmo haneʼniya taonileʼmo faiʼa vego huteʼa mopamo kafili eʼa maleʼa havaite maleʼneʼa kamemo huteʼa ani taonimo aligae. Apakaemo Isipi ami vayaʼaina aeʼa apaka segae. Isipi vayaʼmogi alagepa lokiya ati vayaʼapimogimo kamemo hisaya lokiyaʼapimo ohanegaiye.

16 Siliya kini vekamoʼmo agaiʼamo hauʼnisiya kavaʼmo nehisigenoʼaeʼmo mago vekamoʼmo afaʼa atafauno oʼategaiye. Agaemo ha le konali mopaleʼmo maiʼnenoʼaeʼmo alino hosu huno atesiya lokiyaʼamo aligiye.

17 Ani Siliya kini vekamoʼmo, muki ami vayaʼnimo apavaleliʼna uguve, huno hutenoʼaeʼmo apavalelinuno Isipi vayaʼeʼmo kamemo osisiya kotalakemo hu malegaiye. Agaemo Isipi kini vekamo aeno agasesiyafeʼmo aʼmafaʼneʼamo alino atesigeno uno Isipi kini vekaleʼmo maigiye. Aʼmafaʼneʼamo uno maigiyaʼmonanafa ani kavaʼmo hisiya kavaʼmoʼa ha oʼmagaiye.

18 Inagi agaemo solovala ani haigileʼmo haneʼniya kotegamo uno kamemo huno aeno apaka seno asole koʼmo aligiye. Aligiyaʼmonanafa mago ati vayaʼaiteʼmo neʼyagaiya vekamoʼmo kamemo huno aeno aga seno himamuʼamo alino hano huno ateteno agaetegamo lokiya kavaʼmo hugiye.

19 Inagi Siliya kini vekamo halate koʼalegamo uno lokiya yafa kegiʼyamo haneʼniya taonifiʼmo maigiyaʼmonanafa agaemo alagi asagauno aiteno hosusigeʼa vayaʼmogimo magoʼe huʼa oʼagegae.

20 Inagi ani kini vekamo aimuʼyaleʼmo mago yagaisiya vekamo afole aiteno ha le konali kotega maiʼnaya vayaʼaifeʼmo takesi monimo namiyo, huno hugiye. Ani kini vekamo afaʼa aise afinaʼatomo maiteno faligiye. Agaemo kamefatiʼmo ofalige vayaʼmogi ge hauteʼa kamitimo amagisageno ofalige hugiye.

21 Ani vekamo falitesigenoʼaeʼmo alagi hosu vekamoʼmo agae aimuʼyaleʼmo maigiye. Siliya vayaʼmogimo agaefeʼmo kini vekamo maiʼniye, huʼa osugayaʼmonanafa kamemo huno aeno apaka oseno apakesamo faiteno agaiʼamo Siliya kotega kini vekamo alino hamaleno ategaiye.

22 Alopa aniʼmoʼa aniʼmo heteno muki yaʼmo hulinino neʼviya agufa kavaʼmo huno kamemo huno asole ami vayaʼmo aeno apaka seno ami vayaʼe kotalakemo hu maleʼniya vayaʼaiteʼmo yagaiʼniya vekaʼeʼmo alagi alino hano huno apatalegaiye.

23 Agaeʼeʼmo kotalakemo hu malegaiyaʼmonanafa kotalakeʼamo ago amagino ataleteno aigofe gemo hugiye. Aise vayaʼatomogimo akame hugayaʼmonanafa ala kini vekamo hamalegaiye.

24 Agaemo alopa kagemi yaʼmo haneʼniya kotegamo apao vekagana huno uteno kagemi yaʼapimo alino akame hisaya vayaʼmo fako huno apamigiye. Ani kava huno muki aginago vayaʼmo aeno apaka seno magoʼe huno ala kini vekamo maigiye. Agaemo lokiya yafa kegiʼyamo haneʼniya taonimo alisiyafeʼmo agesamo afigiyaʼmonanafa ma mopafiʼmo maisiya afinaʼamo hano hugiye.

25-26 Agaemo asole ami vayaʼmo apavaleno alino anupa huteno koli osuno magoʼe huno lokiyaʼamo aliteno Isipi kini vekamo asole lokiya ami vayaʼaʼeʼmo kamemo hugiye. Isipi kini vekamoʼmo ani kavaʼmo huno asole lokiya ami vayaʼmo apavaleno alino anupa huteno kamemo hugiye. Isipi kini vekamo vayaʼmogi haga neʼyaʼageʼmo neʼnaya vayaʼmogimo agaefeʼmo vege hugayaʼmofeʼmo kamemo hugiyana afaʼa aeno apaka osegaiye. Siliya ami vayaʼmogi kamemo huʼa Isipi kini vekamo vayaʼmo aeʼa apaka sesageʼa asole Isipi ami vayaʼmo faligae.

27 Ani lole kini vekalaʼmoganimo ge vaisaʼafeʼmo anaipafiʼmo afaʼa haneʼnigeʼana magokepi maiʼneʼana hiʼyalamuteʼmo neʼyaʼmo neʼneʼanaeʼmo anavayaʼaletikeʼmo gege huʼana maigaʼaʼmonanafa hosu kavaʼanimo ani folagapiʼmo afole oʼaigiye. Gotiʼa hano hisiya afinaʼmo lekana pai maleʼniyaʼmofeʼmo anaipafiʼmo haneʼnisiya kavaʼmo afaʼa afole oʼaigiye.

28 Siliya kini vekamoʼmo muki kamefatiʼmo alisiya kagemi yaʼmo halate alinino koʼalegamo ugiye. Neʼunoʼaeʼmo Gotiʼa aote kotalakemo hu maleʼniya geleʼmo kame hisiyafeʼmo agesamo afiteno alino hosu hu maleno koʼalegamo uno avaʼyi hugiye.


Siliya kini vekamo hosu kavaʼaeʼmo huʼniya gemae

29 Gotiʼa lekana pai maleʼniya afinaʼmo Siliya kini vekamoʼmo halate Isipi kotegamo uno Isipi vayaʼeʼmo kamemo hugiyaʼmonanafa akeyaʼvilagamo huʼniya agufa kava huno aeno oʼapaka segaiye.

30 Yegemo uno lamino nefaleya haopalega maiʼnaya vayaʼmogimo sipifi eʼa agaeʼeʼmo kamemo hisagenoʼaeʼmo lokiyaʼamo ohanesigeno afaʼa ataleno maigiye. Aipamo lesigenoʼaeʼmo halate atagi neno Gotiʼa aote kotalakemo hu maleʼniya geleʼmo kame huno alino hosu huno ategaiye. Agaemo Gotiʼa aote kotalakemo hu maleʼniya gemo atalesaya vayaʼaifeʼmo hapaoke hegaiye.

31 Ati vayaʼamogimo lokiya yafa kegiʼyafiʼmo haneʼniya mono noʼamo heʼa halagape vaige muki afinaʼae afinaʼaeʼmo Gotiʼa amiʼnaya ofalini kavafeʼmo haʼao osiyo, huʼa huteʼa alino hosu huno atesiya yaʼmo avenatuʼna heno atalegekana nehiya yaʼmo mono nopiʼmo alino he tino ategaiye.

32 Agaemo Gotiʼa hu maleʼniya kotalakemo amagiʼa ataleʼnaya vayaʼaifeʼmo aigofe geletiʼmo huno amuse huno apateʼniya geletiʼmo huno alino hosu huno apategaiyaʼmonanafa Gotiʼapimoʼmo ageʼnaya vayaʼmogi lokiyaʼapimo afaʼa haneʼnisigeʼa alagepa kavaʼmo afaʼa hugae.

33 Afiteʼa ageʼnaya vayaʼmogimo asole vayaʼaina aliʼa apaya malesageʼa kame vayaʼapimo naipeletiʼmo apaige atafiʼmo kaege kalavusi huʼa apatege kagemiyaʼapimo kumayaʼmo alige hugae.

34 Kame vayaʼapimogi hapaesaya afinaʼmo aise vayaʼmo hapa maesageʼa asole aigofe vayaʼmo eʼa anifi lokaeʼa maigae.

35 Alagi alino alagepa huno apatege hosu kavaʼapimo aeno kalo paeno atalege yaveyave vayaʼmo alino hamaleno apatege huteno hapa maesiyafeʼmo mago afiteʼa ageʼnaya vayaʼmo faligae. Hapa maelino neʼvisigenoʼaeʼmo atupa afinaʼmo Gotiʼa lekana pai maleʼniya afinaʼmo afole aigiye.


Mago kini vekamoʼmo agaiʼa agiʼaleʼmo alino asagauno ateʼniya kavefeʼmo huʼniya gemae

36 Mago kini vekamoʼmo hauʼnisiya kavaʼmo hugiye. Agaemo muki gotigimo aeʼna apaka seʼnove, huteno agaiʼa agiʼaleʼmo alino asagauno ategaiye. Agaemo alagi anaga Gotifeʼmo huno faipa huno ategaiye. Agaemo aliʼyaʼamo alime alime neʼvisigenoʼaeʼmo Gotiʼa aipamo leno apatesiya afinaʼmo hano hugiye. Gotiʼa afole aigiye, huno lekana pai maleʼniya kavaʼmo afole aigiyaʼmofeʼmae.

37 Ani kini vekamoʼmo aginago vayaʼmogi Gotiʼapimofeʼmo agesamo afige aʼne anagaʼmogi hapaʼye nehiya mafaʼneʼapieʼmo agesamo afige muki gotigifeʼmo agesamo afige osuno mukiʼamo ago aeʼna apaka senove, huno hugiye.

38 Agaemo aginago vayaʼai Gotiʼapimofeʼmo mono osuno aginago vayaʼmogi oʼageʼnaya gotiʼa lokiya yafa kegiʼyafi haneʼniya taonifiʼmo yagaiʼniya gotifeʼmo mono huteno siluvagi goligi kanale yafanagi alu alagepa alu alagepa yanagi huno fikumo ofalinimo amigiye.

39 Agaemo lokiya yafa kegiʼyamo haneʼniya taonigoʼmo alisiyafeʼmo ani alu nofi vayaʼmogi gotigimo ha maesiyafeʼmo mono huteno ge huno afi gegaiye. Agaemo akame hisaya vayaʼai apakiʼapileʼmo alino asaga huno apateteno asole vayaʼaiteʼmo yagaiʼa apatesaya vayaʼmo alino hamaleno apategaiye. Agaemo akame hisaya vayaʼmogi miyaʼapimo mago mopamo apamigiye.


Siliya kini vekamoʼmo kamemo huno aeno apaka seʼniya gemae

40 Atupa afinaʼmo hogo nehisigenoʼaeʼmo Isipi kini vekamoʼmo eno agaeʼeʼmo kamemo hugiye. Ani kava huno Siliya kini vekamoʼmo lusi yasigana huno kame talalaʼagi hosiʼagi sipiʼagi huno malage huno aliteno agaetegamo eno kamemo hugiye. Ani lole kini vekalaʼmoganimo kamemo haesaʼageno agaemo alopa aniʼmo neheya agufa kava huno asole nofi vayaʼai kotegamo kamemo huno aeno apaka selino ugiye.

41 Ani kini vekamoʼmo aote ha le konali kotegamo uno kamemo huteno asole vayaʼaina huno aeno apaka segaiyaʼmonanafa Itomi nofi vayanagi Moapu nofi vayanagi Emoni nofi vayanagi huʼa ani kamefatiʼmo huʼa faiʼa kasalo pagae.

42 Agaemo alu nofi vaya alu nofi vayaʼeʼmo kamemo hisigeʼa Isipi vayaʼeʼmo faiʼa kasalo opagae.

43 Agaemo Isipi vayaʼai siluvalenagi golilenagi kagemi yatenagi huno yagaiʼninageʼa Limiya nofi vayaʼe Itiyopiya nofi vayaʼeʼmo aiyafi maiteʼa akame hugae.

44 Yegemo haine neʼeya haopalegatiʼe hoga haopalegatieʼmo afole aiʼniya kavafeʼmo vayaʼmogi ava gemo huʼa ha paisagenoʼaeʼmo lusi kava huno agesa alaʼamo afigiye. Inagi agaemo lusi kava huno aipamo lesigeno aya mukiki huno kamemo huno asole vayaʼaina hapaesiyafeʼmo ugiye.

45 Agaemo seli no koʼamo alopa solovala anitalaʼmo folagapi aote konali avefiʼmo alino he tino ategaiyaʼmonanafa faligefeʼmo hisiya afinaʼmo mago vayaʼmogi alagi ha oʼmaesageno faligiye.

© 2013, Wycliffe Bible Translators, Inc. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ