Napa 9 - The Keyagana NT and 25 OT books

¹⁴ Mago vekamo alu kotegatiʼmo eno lapakaeʼeʼmo lokaeno maiʼnisiya vekamoʼa Ala kava neʼmo Pasova kavaʼmo hisiyafeʼmo hauʼnisiyaʼmoʼmo afaʼa hugiyaʼmonanafa muki Pasova keʼaepa gemo akame hugiye. Ko aepa vayaʼe alu kotegatiʼmo eʼa maiʼnaya vayamogiʼeʼmo magoke keʼaepa gegeʼmo akame hugae.

Hiyaʼmoʼa Goti seli mono noʼaleʼmo kino ati kaeʼniya gemae

¹⁵ Isaleli vayaʼmogi Ala kava neʼmo seli mono noʼamo ago aliʼa he tiʼa ateʼnaya felugamo mago hiyaʼmo emineno seli mono noteʼmo kino aino ati kaeʼniye. Apakaemo haniʼilagamo ina kava huʼa hiyaʼmoʼa mono noʼmo anagamo atagana huno leʼnigeʼa ageʼnae.

¹⁶ Muki afinaʼaeʼmo felugamo hiyaʼmoʼa seli mono noteʼmo kino aino ati kaeno haneʼniye. Haniʼilagamo apakaemo hiyaʼmo ageʼnayana atagana agufa kava huno leʼnigeʼa ageʼnae.

¹⁷ Hiyaʼmoʼa seli mono noʼmo ataleno uʼniya afinaʼmo Isaleli vayaʼmogimo kagemi yaʼapimo aliteʼa akame huʼa uʼnae. Inagi hiyaʼmo mago haopalegamo he tino haneʼnigeʼapaeʼmo inagi apakaemo ani haopalegamo seli noʼapimo aliʼa he tiʼa ateʼnae.

¹⁸ Ala kava neʼmoʼa hunoʼaeʼmo, Viyo, huno ge huʼniya afinaʼmo inagi apakaemo Isaleli vayaʼmogimo mago koteʼmo ataleʼa uʼnae. Ala kava neʼmoʼa hunoʼaeʼmo, Maiyo, huno ge huʼniya afinaʼmo apakaemo seli noʼapimo aliʼa he tiʼa ateʼnae. Hiyaʼmoʼa seli mono noʼmo anagamo afaʼa haneʼnigeʼapaeʼmo inagi vayaʼmo he tiʼa oʼuʼa afaʼa maiʼnae.

¹⁹ Hiyaʼmoʼa seli mono noʼmo anagamo yatala afinaʼmo haneʼnigeʼapaeʼmo vayaʼmogimo Ala kava neʼmo geʼamo akame huʼa alu haopalegamo oʼuʼnae.

²⁰ Mago afinaʼmo hiyaʼmo aupa afinaʼmo seli mono noʼmo anagamo haneteno uʼniye. Hiyaʼmo yatala afinaʼmo haneʼnifi aupa afinaʼmo haneʼnifi huʼnigeʼapaeʼmo Isaleli vayaʼmogimo visafi maisafi Ala kava neʼmo geʼamo akame huteʼa hiyaʼmoʼa alino apave liʼniya agufa kavaʼmo huʼnae.

²¹ Mago afinaʼmo hiyaʼmoʼa uneʼmo uno mago koteʼmo he tino hanelinuno netepiʼmo ani kotetiʼmo ataleno uʼniye. Inagi apakaemo hiyaʼmo ageteʼapaeʼmo he tiʼa akame huʼa uʼnae. Hiyaʼmoʼa felugamo uʼnifi haniʼilagamo uʼnifi nehigeʼapaeʼmo vayaʼmogiʼeʼmo ani afinaʼatogeʼmo he tiʼa uʼnae.

²² Na magi afinaʼmo hiyaʼmoʼa seli mono noʼmo anaʼaleʼmo haneʼnifi lole afinaʼmo haneʼnifi magoke kaileʼmo haneʼnifi mago kafugamo haneʼnifi huʼnigeʼapaeʼmo Isaleli vayaʼmo oʼuʼa seli noʼapifiʼmo maiʼnae. Maiʼnayaʼmonanafa hiyaʼmo uno haiʼnigeʼapaeʼmo apakaeʼeʼmo ani koteʼmo uʼnae.

²³ Ala kava neʼmoʼa apakaefeʼmo hunoʼaeʼmo, Maiyo, huno huʼniya afinaʼmo afaʼa maiʼnae. Agaemo hunoʼaeʼmo, Viyo, huno huʼniya afinaʼmo apakaemo muki yaʼapimo aliteʼa he tiʼa alu haopalegamo uʼnae. Ala kava neʼmoʼa ani gemo Mosesefeʼmo ha paiʼnigeno Moseseʼa ve aʼneʼaifeʼmo aeno hakalo huno hapa paiʼnigeʼa akame huʼnae.