Napa 31 - The Keyagana NT and 25 OT books

Isaleli vayaʼmogimo Mitiyani vayaʼeʼmo kamemo huʼnaya gemae

¹ Ala kava neʼmoʼa Mosesefeʼmo ina ge huno ha paiʼniye,

² Kagaemo Mitiyani vayaʼmogi Isaleli vayaʼmogitapalegamo huʼnaya hosu kavaʼmo anonaʼapilefeʼmo aeka atagaina huka kayoʼmo apamiyo. Kagaemo ani kavaʼmo hutekaeʼmo kagaemo faligane.

³ Inagi Moseseʼmo Isaleli vayaʼaifeʼmo ina ge huno hapa painoʼaeʼmo, Lapakaemo kame hisaya yaʼmo alitetapa uta Mitiyani vayaʼeʼmo kamemo hiyo. Ala kava netefeʼmo apakaemo lapakaetegamo huʼnaya hosu kavaʼapimo anonaʼapilefeʼmo aetapa atagaina hutapa kayoʼmo apamiyo.

⁴ Lapakaemo muki magoke magoke Isaleli nofi vayapatiʼmo vani tauseni vani tauseniʼa vayaʼmo lekana paitapa apatetetapa alita apategeʼa kameleʼmo viyo.

⁵ Inagi apakaemo muki magoke magoke Isaleli nofi vayapatiʼmo vani tauseni vani tauseniʼa vayaʼmo lekana paiʼa apavaleʼnageʼa muki vayaʼamogimo tuolofu tauseniʼa vayaʼmogi kamemo hisayafeʼmo alo huʼnae.

⁶ Moseseʼmo kame hisayafeʼmo alino apateʼnigeʼa uʼnageno Finiyasiʼmo mono huno neʼapateya vekamo Iliyesa mafaʼnemoʼmo apakaeʼeʼmo magokepi lokaeno uʼniye. Finiyasiʼmo seli mono nopatiʼmo aote yaʼmo alige lole pikulimo alige huteno uʼniye. Apakaemo pikuli huʼa ge hisageʼa Isaleli kame vayaʼmogi afiteʼa akame hugae. Pikulimo huʼa na agufa agemo aisafi huʼa ani agufa kavaʼmo hugae.

⁷ Ala kava neʼmoʼa Mosesefeʼmo ha paiʼniya gemo akame huʼa muki Mitiyani vayaʼeʼmo kamemo huteʼa muki ve anagaʼmogi naipeletiʼmo apaiʼnageʼa faliʼnae.

⁸ Apakaemo Mitiyani ve anagaʼmogiʼeʼmo faefuʼa Mitiyani kini vayaʼmo Ivaiʼagi Likeniʼagi Suʼagi Huʼagi Limaʼagi huʼa kamitimo apaiʼnae. Apakaemo Melamiʼmo Miyo mafaʼneʼeʼmo naipeletiʼmo kamitimo aiʼnageno faliʼniye.

⁹ Isaleli vayaʼmogimo Mitiyani vayaʼmogi aʼne anagaʼe aise mafaʼne anagaʼapiʼeʼmo apatafauʼa kalavusi huʼa apateteʼa apavaleliʼa uʼnae. Apakaemo muki pulumaka anagaʼapimo apavalege sipisipi anagaʼapimo apavalege muki yaʼapimo alige huliʼa uʼnae.

¹⁰ Apakaemo Mitiyani vayaʼmogi muki noʼapiʼe muki maiʼnaya taoniʼapiʼeʼmo ata kaeʼa ataleʼnae.

¹¹ Apakaemo muki ani vayaʼmogi muki yaʼapimo alige afu anagaʼapimo apavalege huʼnae.

¹² Apakaemo muki kalavusi huʼa apateʼnaya vayaʼmo apavalege muki yaʼapimo alige huliʼa Mosesetegagi mono huno neʼapateya vekamo Iliyesategagi Isaleli vayaʼaitegagi huʼa eʼnae. Isaleli vayaʼmogi Movapu otu koteʼmo Yoneni ani haigileʼmo Yeliko taonimo haopaleʼmo seli noʼapimo aliʼa he tiʼa ateʼnaya yategaʼeʼmo eʼnae.

Ati vayaʼmo halate atagineʼa eʼnaya gemae

¹³ Moseseʼe Iliyesaʼenagi muki Isaleli vayaʼaiteʼmo neʼyagaiya vayaʼenagi huʼa ati vayaʼeʼmo fotu hisayafeʼmo seli noʼapileʼmo ataleʼa malaga uʼnae.

¹⁴ Apakaemo ago fotu huteʼapaeʼmo inagi Moseseʼmo ati vayaʼmo kamelegatiʼmo ago atagineʼa eʼnagenoʼaeʼmo tauseni tauseniʼa ati vayaʼaiteʼmo hataleti hataletiʼa ati vayaʼaiteʼeʼmo neʼyagaiya vayaʼaifeʼmo ge hapauʼniye.

¹⁵ Agaemo ina ge huno ge huno apafigeʼniye. Lapakaemo muki aʼne anagaʼmo oʼapaeʼnafiye.

¹⁶ Afiyo, huno, Mani aʼne anagaʼmogimo Melamiʼmo hiyo, huno huʼniya gemo akame huʼa vayatimogi, lagaemo Piyo kotega maiʼnona afinaʼmo Ala kava netegamo hosu kavaʼmo hisayafeʼmo Isaleli vayaʼai apayateʼmo aliʼnae. Alopa hosu kavaʼmo huʼnayaʼmofeʼmo Ala kava vayaʼalegemo alopa hosu kaitaʼmo afole aiʼniye.

¹⁷ Inagi hemenimo lapakaemo muki ve mafaʼne anaganagi muki veʼeʼmo lokaeʼa havaeʼnisaya aʼne anaganagi hutapa kamitimo apamagiyo.

¹⁸ Apamagigayaʼmonanafa muki a mafaʼne anagaʼmogimo mago vekaʼeʼmo lokaeʼa ohavaeʼnaya a mafaʼne anagaʼmo afaʼa apateʼnetapa lapakaitapimo afaʼa aligae.

¹⁹ Lapakaemo mago vayaʼmo kamitimo apamagiʼnisageʼa faliʼnisafi ago faliʼnisiya vekamo agufaleʼmo ame aliʼnisafi huʼnisaya vayaʼmo notapimo malagamo seveniʼa afinaʼmo maiyo. Napa tali afinaʼe seveni afinaʼeʼmo lapakaeʼe kamefatiʼmo aliʼnisaya a mafaʼne anagaʼeʼmo yaveyave kavaʼmo akame hutapa alita hamaletapa lapategenoʼa lapakaemo Goti aulagaleʼmo yaveyave vayaʼmo hamaleyo.

²⁰ Lapakaemo kamefatiʼmo muki aliʼnisaya yaʼmo muki kukena yanagi pulumakamo agufaletiʼmo alo huʼnaya yanagi mememo ayokatetiʼmo alo huʼnaya yanagi yosaletiʼmo alo huʼnaya yanagi hutapa Goti aulagaleʼmo yaveyave kavaʼmo akame hutapa alita hamaleta ateyo.

⁴⁸ Tauseni tauseniʼa ati vayaʼaiteʼe hataleti hataletiʼa ati vayaʼaiteʼeʼmo neʼyagaiya vayaʼmogimo Mosesetegamo eʼnae.

⁴⁹ Mosesefeʼmo huʼapaeʼmo, Lagaemo aliʼyakamo neʼaluna vayaʼmogitamo muki ati vayatimo yagaita neʼapatona vayaʼmogi lekana paiʼnonageno magoke vekamo afela oseʼniyaʼmonanafa mukiʼamo afaʼa maiʼnae.

⁵⁰ Maiʼnayaʼmofeʼmo lagaemo Ala kava netefeʼmo ofalini hisuna yaʼeʼmo aliʼneta eʼnone. Muki ati vayaʼmogi goli yafatetiʼmo alo huʼnaya konali yaʼmo kame vayaʼaitegatiʼmo aliʼnae. Apayateʼmo vaige linimo vaiʼa alige lugoʼapifiʼmo huʼa alige apakesafiʼmo vaige huʼa neʼaliya konali yaʼmo aliʼniteta Ala kava neʼmoʼa hosu kavatimo aeno ati kaesiyafeʼmo ofalinimo amigesune, huʼa huʼnae.

⁵¹ Inagi Moseseʼe Iliyesaʼeʼmo ani golitetiʼmo alo huʼnaya yaʼmo ofalini hisayafeʼmo aliʼnaʼae.