Napa 25 - The Keyagana NT and 25 OT books

Isaleli vayaʼmogimo aigofe goti agiʼamo Melitefeʼmo mono huʼnaya gemae

¹ Isaleli vayaʼmo Sitimi kagoʼmu kotegamo maiʼneʼapaeʼmo ani haopalegamo maiʼnaya Movapu aʼne anagaʼeʼmo aepa faiʼa kumai kavaʼmo huʼnae.

² Ani aʼne anagaʼmogimo Isaleli vayaʼmo eʼa apakaeʼeʼmo mono nehaya aigofe gotigitefeʼmo ofalinimo hisayafeʼmo keya aeʼa ge huʼnageʼa eʼnae. Mukiʼamogimo ofalini huʼnaya neʼyaʼmo magokepi neteʼa ani gotigitefeʼmo mono huʼnae.

³ Isaleli vayaʼmogi ani kavatetiʼmo Movapu vayaʼeʼmo magokepiʼmo Meliʼmo Piyo aveleʼmo aigofe gotitefeʼmo mono huʼnageno Ala kava neʼmoʼa Isaleli vayaʼaifeʼmo aipamo leno apateʼniye.

⁴ Ala kava neʼmoʼa Mosesefeʼmo ha painoʼaeʼmo, Kagaemo Isaleli vayaʼmogitapaleʼmo muki neʼyagaiya vayaʼaifeʼmo hukaeʼmo, Hosu kavaʼmo huʼnaya vayaʼmo apatafautapa kamitimo apamagitetapa Ala kava neʼmo aulagaleʼmo yegefiʼmo yosalemo aeta asaigeʼapao muki vayaʼmogi apakegayanagi. Hisageʼna nagaemo magoʼe huʼna muki vayaʼaifeʼmo naipamo leʼna afaʼa oʼapatesuvafeʼmae, huno ha paiʼniye.

⁵ Inagi Moseseʼmo Isaleli vayaʼmogi agoti gemo neʼafiya vayaʼaifeʼmo hapa painoʼaeʼmo, Mukiʼamogitapamo magoke magoke vayaʼmogitapamo muki lapakae vayapatiʼmo Movapu vayaʼeʼmo Piyo aveleʼmo aigofe gotiʼmo Melitefeʼmo mono nehaya vayaʼmo kamitimo apamagiyo, huno hapa paiʼniye.

⁶ Moseseʼe muki Isaleli vayaʼaʼeʼmo seli mono noʼmo kipaʼmo haopaleʼmo maiʼneʼa aviʼyaʼmo nehuʼapaeʼmo agayana mago Isaleli vekamo mago Mitiyani a kanomo avalelino eno seli noʼafiʼmo uno haiʼnigeʼa ageʼnae.

⁷ Finiyasiʼmo, Eliyesa mafaʼnemo mono huno neʼapateya vekamo Eloni aginago vekamoʼmo ani kavaʼmo agetenoʼaeʼmo he tino vayaʼmo apataleno uno hayoʼmo aliteno seli noʼafiʼmo uno haiʼniya vekamo akame huno uno haiʼniye.

⁸ Agaemo seli nopiʼmo uno haino hayoʼaletiʼmo magokepiʼmo ve kanoʼe a kanoʼeʼmo anakufafiʼmo aeno haniʼnigeʼana faliʼnaʼae. Ani kavatetiʼmo ani alopa kaitaʼmo hano huʼniye.

⁹ Ani alopa kaita kayotetiʼmo tuveti fo tauseniʼa vayaʼmo alino hosu huno apateʼnigeʼa faliʼnae.

¹⁰ Inagi Ala kava neʼmoʼa Mosesefeʼmo ha painoʼaeʼmo,

¹¹ Finiyasiʼmo Eliyesa mafaʼnemo mono huno neʼapateya vekamo Eloni aginago vekamoʼmo Isaleli vayaʼaifeʼmo naipamo leʼna apateʼnova kavaʼmo alino hano huno ataleʼniye. Nagaemo Isaleli vayaʼaifeʼmo kaino faiʼnova kava huno nagaetefeʼmo kaino faiʼniye.

¹² Huʼniyaʼmofeʼmo kagaemo Finiyasifeʼmo ina ge huka ha paiyo. Afiyo, huʼna, nagaemo agaeʼeʼmo mago kotalakemo laʼagaemo magokepiʼmo alagepa hutaʼa maisuʼafeʼmo hu maleʼnove.

¹³ Agaemo Gotiʼamotefeʼmo kaino faiteno Isaleli vayaʼai hosu kavaʼapimo aliʼna atalesuvafeʼmo kaʼmo valino nateʼniyaʼmofeʼmo agaegi aginago mafaʼne anaganagi huʼna kotalakemo hu malegauve. Apakaemo mono huʼa apatesaya vayaʼmo muki afinaʼmo maige maige huʼa maigae.

¹⁴ Finiyasiʼmo kamitimo amagiʼniya Isaleli vekamo agiʼamo Simaliʼae. Simaliʼmo Salu mafaʼnemo maiʼnigeno Saluʼmo mago Simiyoni nofi vayaʼmo magoke kola vayaʼaiteʼmo yagaino apateʼniye.

¹⁵ Finiyasiʼmo kamitimo amagiʼniya Mitiyani a kanomo agiʼamo Kosamiʼae. Kosami afoʼamoʼmo Suliʼmo mago Mitiyani nofi vayaʼaiteʼmo yagaino apateʼniya vekamae.

¹⁶ Ala kava neʼmoʼa Mosesefeʼmo ha painoʼaeʼmo,

^17-18 Mitiyani vayaʼmogi Piyo aveʼmo alita hosu hutapa lapateʼnae. Apakaemo lapakaemo kumai kavaʼmo hisayafeʼmo humi lapateʼnae. Ani afinaʼmo Mitiyani a kanomo agiʼamo Kosamiʼmo yagaino apateʼniya vekamo a mafaʼnemo maiʼneno hosu kavaʼmo huʼnigeno Finiyasiʼmo kamitimo amagiʼniye. Ani agufa hanagekeyaʼmo lapamiʼniyaʼmofeʼmo lapakaemo uta Mitiyani vayaʼeʼmo kame hutetapa alita hosu hutapa apataleyo.