Napa 24 - The Keyagana NT and 25 OT books

¹ Melamiʼmo ani afinaʼmo ageʼniyana Ala kava neʼmoʼa Isaleli vayaʼmo alino auleno apatesiyafeʼmo hauʼniye, huno agetenoʼaeʼmo alu afinaʼmo hosu aune kavaʼmo hisiyafeʼmo huʼniyaʼmonanafa ani afinaʼmo aino afeleno hau huʼniya kotegamo aulu heno ageno maiʼniye.

² Agaemo ageʼniyana Isaleli vayaʼmo alu nofi vaya alu nofi vayaʼmogi seli noʼapimo apaote apaote huno haneʼnigeno Goti Aunemeʼamoʼa agaeteʼmo emineʼniye.

³ Agaemo aune gemo aeno hakalo hunoʼaeʼmo, Mani geʼnimo afiyo. Nagaemo Melamiʼnamo Miyo mafaʼnemae. Naulagamo haleʼnigeʼna alagepa huʼna ageʼnove.

⁴ Ani gemo Goti gemo afiʼniya vekamoʼmo aeno hakalo nehiya gemae. Agaemo alagamuna agegekana huno ageʼniyana lokiyaʼaʼe Gotiʼa agetenoʼaeʼmo aulagamo haleʼnigeno asagauno aiʼniye.

⁵ O Yekopu vayane, huno, Seli notapimo lusi kava huno alagepa apaulagamo neʼagaya seli notapimo haneʼniye. O Isaleli vayane, huno, alagepa apaulagamo neʼagaya notapimo haneʼniye.

⁶ Maiʼnayategamo alagepa yatala kagoʼmufilagagana huno hanege hagifeʼmo haneʼniya hoyagana huno hanege Ala kava neʼmoʼa fai maleʼniya alagepa yosagana huno hanege lokiya Sita yosamo ani haigifiʼmo haneʼniya yosagana huno hanege huʼniye.

⁷ Isaleli vayaʼmogi koteʼmo asole koʼmo aisigeʼapaeʼmo alagepa mopafiʼmo avina yaʼmo hakalegae. Isaleli kini vekamoʼmo kini vekamo Egakiʼmo aeno agasegaiye. Isaleli kini vekamoʼmo asole nofi vayaʼaiteʼmo yagaino apategaiye.

⁸ Gotiʼa Isipi kotegatiʼmo apavalelino eʼniye. Isaleli vayaʼmogimo lokiya afela ve pulumakagana huʼa kame huteʼa kame vayaʼapimo alu nofi vaya alu nofi vayaʼmo kame huʼa aliʼa hano huʼa apatalegae. Apakaemo kame vayaʼapimogi apayamufamo aiʼa lo aegae. Hapaesageno keveʼapimoʼmo apakufafiʼmo hanigiye.

⁹ Isaleli vayaʼmo laiyonigana huʼa havaeʼa maiʼnisageʼapaeʼmo mago vayaʼmogimo afaʼa aliʼa he tiʼa oʼapategae. Isaleli vayaʼmogitapae, huʼna, alino auleno lapatesiya vekamo aulena vekamo maigiye. Lifana huno lapatesiya vekamo lifana vekamo maigiye, huno huʼniye.

¹⁰ Melakiʼmo ani gemo afitenoʼaeʼmo agaemo aipamo leʼnigeno ayaʼmo amagiʼniye. Agaemo Melamifeʼmo ha painoʼaeʼmo, Nagaemo kame vayaʼnimo lifana huka apatesanafeʼmo kagaefeʼmo keya aeʼna ge huʼnovaʼmonanafa kagaemo loleʼe magoʼe afinaʼmo lusi kava huka alika auleka apateʼnane.

¹¹ Inagi kagaemo hemenimo ataleka kokalegamo kaune heka uvo. Nagaemo kaha paiʼnaeʼmo, Alopa yaʼmo kamisugeka ala kagikamo aligane, huʼna kaha paiʼnovaʼmonanafa Ala kava neʼmoʼa alisanafeʼmo haʼao, huno kaha paiʼniye.

¹² Melamiʼmo geʼaleʼmo aeno atagaina hunoʼaeʼmo, Kagaemo alika apateʼnanageʼa nagaetegamo eʼnaya vayaʼaifeʼmo hapa paiʼnaeʼmo,

¹³ Melakiʼmo noʼafiʼmo siluvaʼe goliʼeʼmo havai teʼnisiya yapatiʼmo namisiyana nagaemo Ala kava neʼmo geʼamo magoke kavatefeʼmo amagiʼna oʼatalegauve. Nagaiʼni nahauʼnisiya kavaʼmo alagepa kavaʼmofi hosu kavaʼmofi huʼna afaʼa osuguve. Nagaemo Ala kava neʼmoʼa naha paiʼniya geʼageʼmo hapa paigesuve.

¹⁴ Hemenimo nagaemo vayaʼnilegamo halate alagi uguve. Uguvaʼmonanafa kagaemo egeʼnao, nagaemo hogoteʼna ani vayaʼmogimo henagaʼamo kagae nofi vayaʼaitegamo hisaya kavafeʼmo kaha pai malegauve.

Melamiʼmo napa fo aune gemo huʼniya gemae

¹⁵ Inagi agaemo ani aune gemo aeno hakalo hunoʼaeʼmo, Mani geʼnimo afiyo. Nagaemo Melamiʼnamo Miyo mafaʼnemae. Naulagamo haleʼnigeʼna alagepa huʼna ageʼnove.

¹⁶ Ani gemo Goti gemo afiʼniya vekamoʼmo aeno hakalo huʼniya gemae. Agaemo muga anaga vekamo muki vayaʼaina aeno apaka seʼniya Gotiʼa neʼage. Agaemo alagamuna agegekana huno lokiyaʼage Gotiʼa agetenoʼaeʼmo aulagamo haleʼnigeno asagauno aiʼniye.

¹⁷ Nagaemo eminesiya vekamo ageʼnovaʼmonanafa hemenimo emiʼnoʼmegaiye. Nagaemo ageʼnovaʼmonanafa afagitegamo maiʼniye. Agaemo kanefigana huno Yekopu vayapatiʼmo afole aigiye. Agaemo kini vekamo maiʼnenoʼaeʼmo Isaleli vayapatiʼmo afole aigiye. Agaemo Movapu vayaʼaiteʼmo yagaiʼnaya vayaʼeʼmo kame huno alino afepiʼmo apategaiye. Agaemo Seti nofi vayaʼmo alino hosu huno apatalegaiye.

¹⁸ Agaemo Itomu vayaʼmo aeno apaka sege Siya koteʼmo maiʼnaya kame vayaʼamo aeno apaka sege huteno apatesigeʼapaeʼmo Isaleli vayaʼmogi lokiya vaiʼa kame hugae.

¹⁹ Yekopu vayapatiʼmo mago yagaisiya vekamo afole aiteno taonifiʼmo magokayaga vayaʼamo alino hosu huno apatalegaiye, huno huʼniye.

²⁰ Melamiʼmo Amaleki nofi vayaʼmo apaketenoʼaeʼmo ina ge huno aune gemo aeno hakalo hunoʼaeʼmo, Amaleki vayaʼmo hogote vayaʼmo maiʼnayaʼmonanafa henaga vayaʼmo maime maime uʼa hano hugae.

²¹ Inagi agaemo Keni vayamo apaketenoʼaeʼmo ina ge huno aune gemo aeno hakalo huno hapa paiʼniye. Keni vayaʼmogitapae, huʼna, hakikiʼmo anoʼmo avefiʼmo yafapiʼmo alagepa huno haneʼniya kava hutapa maiʼnae.

²² Maiʼnayaʼmonanafa Asiliya vayaʼmogimo eʼa apakaeʼeʼmo kame huteʼa aliʼa hosu huʼa apatege apavaleliʼuʼa kalavusi huʼa apatege hugae.

²³ Agaemo magoʼe aune gemo aeno hakalo huno hapa painoʼaeʼmo, Vae, huno, Gotiʼa ani kavaʼmo hisigeʼapaeʼmo ina lagimo afaʼa maigae.

²⁴ Saipalusi vayaʼmogimo koʼapilegatiʼmo sipimo aliniʼeʼa Asiliya vayaʼe Imo vayaʼeʼmo kame huteʼa huʼa aeʼa apaka segayaʼmonanafa Saipalusi vayaʼeʼmo alagikeʼmo asagauʼa aigae.

²⁵ Melamiʼmo geʼamo huno hano hutenoʼaeʼmo agaemo he tino halate koʼalega uʼnigeno Melakiʼmo koʼalegamo uʼniye.