Napa 23 - The Keyagana NT and 25 OT books

¹ Aveleʼmo maiʼnenoʼaeʼmo Melamiʼmo Melakifeʼmo hunoʼaeʼmo, Kagaemo mani haopalegamo seveniʼa ofalini yafa hiʼyalamuʼmo huteka seveniʼa ve pulumakagi seveniʼa ve sipisipigi huka apavalelika eno.

² Inagi Melakiʼmo Melamiʼa ha paiʼniya kavaʼmo huʼnigeʼanaeʼmo agaeʼe Melamiʼeʼmo muki yafa hiyalamuʼaleʼmo magoke magoke huʼana magoke pulumakagi magoke sipisipigi huʼana ofalinimo huʼnaʼae.

³ Inagi Melamiʼmo Melakifeʼmo hunoʼaeʼmo, Kagaemo atamoʼmo leno sagalisiya ofalini yaʼmo haopaleʼmo he tika maiʼnegeʼna nagaemo mugalegamo vino. Ala kava neʼmoʼa emineno nagaeʼeʼmo fotu hisifi osisifigeʼna agegauve. Agaemo emineno mago kavaʼmo alino nave lisigeʼnaeʼmo kaha paiguve, huno huteno vayaʼmo oʼmaiʼnaya avefiʼmo uno haiʼniye.

⁴ Gotiʼa Melamiʼeʼmo fotu huʼnigeno Melamiʼmo Gotifeʼmo ha painoʼaeʼmo, Nagaemo seveniʼa ofalini yafa hiʼyalamuʼmo huteʼna magoke ve pulumakagi magoke ve sipisipigi huʼna muki magoke magoke ofalini yafa hiʼyalamuteʼmo ofalinimo huʼnove, huno ha paiʼniye.

⁵ Ala kava neʼmoʼa Melamiʼmo hisiya gemo ha paiteno magoʼe gemo hunoʼaeʼmo, Kagaemo halate atagineka uka ani kaha paiʼnova gemo Melakifeʼmo ha paiyo, huno ha paiʼniye.

⁶ Inagi agaemo halate ataginenuno ageyana Melakiʼmo Movapu koteʼmo yagaiʼnaya vayaʼeʼmo magokepi he tiʼa atamoʼmo leno asagalisiya ofalinimo haopaleʼmo maiʼnageno apakeʼniye.

⁷ Melamiʼmo ani agufa aune gemo aeno hakalo huno hapa painoʼaeʼmo, Melakiʼmo Movapu kini vekamoʼmo yegemo haine neʼeya haopalegamo Siliya kotega aveletiʼmo navaleʼnigeʼna eʼnove. Agaemo naha painoʼaeʼmo, Kagaemo eka nagaetefeʼmo Isaleli vayaʼaifeʼmo lifana huka apato. Lifana vayane, huka huvo, huno naha paiʼniye.

⁸ Naha paiʼniyaʼmonanafa Gotiʼa lifana huno oʼapateʼniyaʼmofeʼmo haiya kava huʼna lifana huʼna apategauve. Ala kava neʼmoʼa, Lifana vayaʼmo maiʼnae, huno osuʼniyaʼmofeʼmo haiya kava huʼna lifana vayaʼmo maiʼnae, huʼna huguve.

⁹ Nagaemo avefiʼmo yafateʼmo he tiʼna maiʼneʼnaeʼmo ave kotetiʼmo apakeʼnove. Alu vayaʼeʼmo oʼmaiʼa apaoteʼmo maiʼnae. Ma mopafi nofi vayakana huta oʼmaiʼnone, huʼa apakesamo neʼafiye.

¹⁰ Yekopu nofi vayaʼmo asole vayaʼmo mumusopagana huʼa maiʼnayanagi ina laʼmo apakaemo afaʼa lekana paigiye. Ina laʼmo magokayaga vayaʼamo lekana paigiye. Fatago vayaʼmo alagepa huʼa nefaliya kava huʼna natesanageʼna faligesuve. Kaʼapimo atupaleʼmo alagepa huʼa uʼa avaʼyi nehayanageʼna kaʼnimo atupaleʼmo alagepa huʼna uʼna avaʼyi hugesuve.

¹¹ Melakiʼmo ani gemo afitenoʼaeʼmo Melamifeʼmo hunoʼaeʼmo, Nagaetegamo na agufa kavaʼmo huʼnane. Kagaemo kame vayaʼnimo lifana huka apatesanafeʼmo kavaleliʼna eʼnovaʼmonanafa lusi kava huka alika auleka apateʼnane, huno ha paiʼniye.

¹² Melamiʼmo geʼaleʼmo aeno atagaina hunoʼaeʼmo, Ala kava neʼmoʼa naha paiʼniya gemo afiteʼna hapa opaisufiye.

Melamiʼmo napa tu aune gemo huʼniya gemae

¹³ Inagi Melakiʼmo Melamifeʼmo ha painoʼaeʼmo, Kahaoke hovanagi kagaemo egetaʼa laʼagaemo alu kotegamo agesanafeʼmo uguʼae. Muki Isaleli nofi vayaʼmo oʼapakeganaʼmonanafa haopatoleʼmo apakegane. Ani haopaleʼmo lifana huka apato, huno ha paiʼniye.

¹⁴ Inagi agaemo Melamiʼmo avalelino anaga Pisika ave koteʼmo uno haiʼnigeno Sofimi mopaleʼmo seveniʼa ofalini yafa hiʼyalamuʼmo huteno magoke ve pulumakagi magoke ve sipisipigi huno muki magoke magoke ofalini yafa hiʼyalamuteʼmo ofalinimo huʼniye.

¹⁵ Agaemo Melakifeʼmo hunoʼaeʼmo, Kagaemo ani atamoʼmo leno sagalisiya ofalini yaʼmo haopaleʼmo he tika maiʼnegeʼna nagaemo mugalegamo uʼna Gotiʼeʼmo fotu huguve.

¹⁶ Inagi Ala kava neʼmo Melamiʼeʼmo fotu huteno Ala kava neʼmoʼa Melamiʼmo hisiya gemo ha paiʼniye. Agaemo hunoʼaeʼmo, Kagaemo Melakitegamo halate ataginekuka ani kaha paiʼnova gemo ha paiyo, huno ha paiʼniye.

¹⁷ Inagi agaemo halate uno apakeyana Melakiʼe Movapu kotega yagaiʼnaya vayaʼeʼmo ani atamoʼmo leno sagalisiya ofalini yateʼmo he tiʼa maiʼnageno apakeʼniye. Melakiʼa ha painoʼaeʼmo, Ala kava neʼmoʼa na agufa gemo kaha paiʼniye, huno ge huno afigeʼniye.

¹⁸ Agaemo ani aune gemo hunoʼaeʼmo, Melakigamo Sipo mafaʼnemogamo, he tika geʼnimo afiyo.

¹⁹ Gotiʼa vayalafakana huno oʼmaiʼniyaʼmofeʼmo aigofe gemo nosiye. Gotiʼa vayalafaʼmogi mafaʼnegana huno oʼmaiʼniyanageno alu aipa agesamo oʼafigiye. Agaemo mago gemo huʼnisiyana ani agufa kavaʼmo osisifiye. Haʼao, afaʼa hugiye. Mago kavafeʼmo hapa paiʼnisiyana ani kavaʼmo alino afole aino oʼatesifiye. Haʼao, afaʼa alino afole aino ategaiye.

²⁰ Afiyo, huno, Gotiʼa hisuva gemo naha paiʼniye. Kagaemo alika auleka apato. Agaemo alino auleno apateʼniyaʼmofeʼmo alu gemo afaʼa osuguve.

²¹ Agaemo Yekopu vayaʼaitegamo hosu kavaʼmo oʼageʼniye. Agaemo Isaleli vayaʼaitegamo hanageke kavaʼmo oʼageʼniye. Ala kava neʼmo Gotiʼapimoʼmo apakaeʼeʼmo magokepiʼmo lokaeno maiʼniye. Apakaemo alopa gefatiʼmo kini vekaʼapieʼmo ge nehae. Ala kava neʼmo Gotitimoʼa kini vekatimo maiʼniye, huʼa nehae.

²² Gotiʼa vayaʼamo Isipi kotegatiʼmo apavalelino eʼniye. Agaemo kame hisiyafeʼmo afela ve pulumakamo lokiyaʼaletiʼmo kame nehiye.

²³ Kame vayaʼapimogimo Isaleli vayaʼaitegamo analisamo hapaege sakuma kavaʼmo huge hisayana ani kavaʼmoʼa alino hosu huno oʼapategaiye. Oʼapategaiyaʼmofeʼmo hemenimo alu nofi vayaʼmogimo Isaleli vayaʼaifeʼmo ina ge hugae. Apakeyo, huʼa, Gotiʼa lusi kavaʼmo huno Isaleli vayaʼaina hapa maeʼniye, huʼa hugae.

²⁴ Apakeyo, huno, Isaleli nofi vayaʼmo lokiya laiyonigana huʼa maiʼneʼa maiʼa haga olegae. Hogoteʼa hapaeteʼa apameʼamo nege kolaʼapimo nege huteʼapaeʼmo afaʼa maiʼa haga legae.

²⁵ Melakiʼmo ani gemo afitenoʼaeʼmo Melamifeʼmo ha painoʼaeʼmo, Kagaemo alagi lifana huka oʼapatege alagi alika auleka oʼapatege huteka afaʼa maiyo, huno huʼnigeno

²⁶ Melamiʼmo geʼaleʼmo aeno atagaina hunoʼaeʼmo, Nagaemo kagaefeʼmo huʼnaeʼmo, Ala kava neʼmoʼa naha paisiya geʼageʼmo nagaemo kaha paiguve, huno ha paiʼniye.

Melamiʼmo loleʼe magoʼe afinaʼmo aune gemo huʼniya gemae

²⁷ Inagi Melakiʼmo Melamifeʼmo hunoʼaeʼmo, Kahaoke hovanagi kagaemo egetaʼa laʼagaemo alu kotegamo uguʼae. Gotiʼa hauʼnisiyana ani haopalegatiʼmo lifana huka apategane, huno ha paiʼniye.

²⁸ Melakiʼmo Melamiʼa avalelino anagamo Piyo avefiʼmo uno haiʼniye. Ani avefiʼmo uno haino he tisiya vekamoʼmo hau huʼniya kotegamo afaʼa agegaiye.

²⁹ Inagi Melamiʼmo agaefeʼmo ha painoʼaeʼmo, Kagaemo mani koteʼmo seveniʼa ofalini yafa hiʼyalamuʼmo huteka seveniʼa ve pulumakagi seveniʼa ve sipisipigi huka apavalelika nagaetegamo eno.

³⁰ Melakiʼmo ani gemo afitenoʼaeʼmo muki magoke magoke ofalini yafa hiʼyalamuʼaleʼmo magoke ve pulumakagi magoke ve sipisipigi huno ofalinimo huʼniye.