Napa 22 - The Keyagana NT and 25 OT books

Movapu kini vekamoʼmo vayaʼmo alino apateʼnigeʼa uʼa Melamiʼmo avaleliʼa eʼnaya gemae

¹ Inagi Isaleli vayaʼmogi ani haopalegamo ataleʼa uʼa Movapu otu koteʼmo seli noʼapimo aliʼa he tiʼa ateʼnae. Yoneni aniʼmo yegemo uno lamino nefaleya haopalegamo hanetegeno mugagayagamo Yeliko taonimo haneʼniye.

² Melakiʼmo Sipo mafaʼnemoʼmo Isaleli vayaʼmogimo eʼa Emo vayaʼeʼmo kame huʼnaya kavafeʼmo ava gemo afiʼniye.

³ Agaeʼe Movapu vayaʼmogiʼeʼmo Isaleli vayaʼmo apakeʼnayana asole nofi vayaʼmo maiʼnayaʼmofeʼmo muki vayaʼmogimo Isaleli vayaʼaifeʼmo lusi kava huʼa koliʼapimo huʼnae.

⁴ Inagi Movapu vayaʼmogimo Mitiyani vayaʼaiteʼmo yagaiʼa apateʼnaya vayaʼaifeʼmo huʼapaeʼmo, Hemenimo ani nofi vayaʼmogimo muki lagae haopalegamo haneʼniya yaʼmo ve pulumakamoʼmo kahaumo neʼniya agufa kavaʼmo huʼa aliʼa hano huʼa atalegae. Ani afinaʼmo Melakiʼmo Sipo mafaʼnemoʼmo Movapu vayaʼai kini vekamo maiʼniye.

⁵ Inagi Melakiʼmo Melamifeʼmo ge hisayafeʼmo vayaʼmo alino apateʼnigeʼa uʼnae. Melamiʼmo Miyo mafaʼnemoʼmo Pito taonifiʼmo Yufaletisi aniʼmo haopaleʼmo maiʼniye. Ani kotegamo afoʼamo koʼmo haneʼniye. Melakiʼmo ani apa vayaʼaifeʼmo hapa painoʼaeʼmo, Melamifeʼmo ha paitapaeʼmo, Afiyo, hutapa, Mago nofi vayaʼmo Isipi kotegatiʼmo ataleʼa eʼa muki haopalegamo aiʼa atagu faeʼa maiʼnae. Hemenimo lahaopaleʼmo eʼa maiʼnae.

⁶ Apakaemo kame huʼa afaʼa aeʼa naga segayaʼmofeʼmo malage huka eka naha maeka aeʼa oʼnagasesayafeʼmo lifanamo huka apategane. Nagaemo ago afiʼnovana aulena gemo hapa paiʼnana vayaʼmo aulena vayaʼmo maiʼnae. Kagaemo lifana huka apateʼnana vayaʼmo lifana vayaʼmo maiʼnae, huʼna ago apakeʼnovaʼmofeʼmo naha maesanageʼna kame huʼna aeʼna apakasesufiye, huno ha paiʼniye.

⁷ Inagi Movapu koteʼmo neʼyagaiya vayaʼe Mitiyani koteʼmo neʼyagaiya vayaʼeʼmo lifana hisigeʼapaeʼmo miyaʼamo amisayafeʼmo Melamitegamo aliniʼa uʼnae. Apakaemo uʼa avaʼyi huteʼapaeʼmo Melakiʼmo huʼniya gemo ha paiʼnae.

⁸ Melamiʼmo hapa painoʼaeʼmo, Manileʼmo haniʼilagamo havaetesageʼnaeʼmo egamo Ala kava neʼmoʼa naha paisiya gemo lahapa paiguve. Inagi ani vayaʼmo Melamiʼeʼmo magokepiʼmo maiʼnae.

⁹ Haniʼilagamo Gotiʼa Melamitegamo eno Melamifeʼmo ina ge huno ge huno afigeʼniye, Ani vayaʼmo kagaeʼeʼmo magokepiʼmo maiʼnaya vayaʼmo haiya vayane.

¹⁰ Melamiʼmo Gotifeʼmo hunoʼaeʼmo, Melakiʼmo Movapu kini vekamoʼmo ani vayaʼmo alino apateʼnigeʼa eʼa ina ge huʼa naha paiʼnae.

¹¹ Afiyo, huʼa, Mago nofi vayaʼmo Isipi kotegatiʼmo ataleʼa ago eʼa ma mopafiʼmo aiʼa ati kaeʼa maiʼnae. Eka naha maesanafeʼmo lifana huka apato. Ani kavaʼmo hisanana nagaemo apakaemo aeʼna apaka seʼna aliʼna hapa faisufiye, huno ha paiʼniye.

¹² Inagi Gotiʼa Melamifeʼmo hunoʼaeʼmo, Kagaemo ani vayaʼeʼmo magokepi lokaeka oʼugane. Ani eʼnaya vayaʼmo aulena vayaʼmo maiʼnayaʼmofeʼmo lifana huka oʼapato, huno ha paiʼniye.

¹³ Inagi Melamiʼmo netepiʼmo he tino Melaki vayaʼaifeʼmo hapa painoʼaeʼmo, Ala kava neʼmoʼa apakaeʼeʼmo oʼuvo, huno naha paiʼniyaʼmofeʼmo kotapilegamo viyo, huno hapa paiʼniye.

¹⁴ Movapu koteʼmo yagaiʼnaya vayaʼmogimo afiteʼapaeʼmo Melakitegamo uʼapaeʼmo ina ge huʼa ha paiʼnae. Melamiʼmo lagaeʼeʼmo magokepi lokaeno esiyafeʼmo ohauʼniye.

¹⁵ Melakiʼmo halate yagaiʼa neʼapataya vayaʼmo ala apaki vayaʼmo alino apateʼnigeʼa uʼnaya vayaʼmogi ala apakimo aeno apaka seʼniya vayaʼmo magoʼe huno asole vayaʼaifeʼmo ge huʼnigeʼa uʼnae.

¹⁶ Apakaemo Melamitegamo eʼa ha paiʼapaeʼmo, Melakiʼmo ina ge huno huʼniye. Kahaoke hovanagi, huno, mago yaʼmoʼa kagaemo katafauno katesiyafeʼmo kagesamo oʼafiyo.

¹⁷ Kagaemo esanageʼna nagaemo ala kagimo kamiteʼna muki kahausiya kavaʼmo alagi huguve. Huguvaʼmofeʼmo eka ani vayaʼaifeʼmo lifana huka apato, huno huʼniye.

¹⁸ Huʼniyaʼmonanafa Melamiʼmo ani Melaki aliʼyaʼamo neʼaliya vayaʼaifeʼmo hunoʼaeʼmo, Melakiʼmo noʼafiʼmo siluvaʼe goliʼeʼmo havai teʼnisiya yaʼmo namisiyana nagaemo Ala kava neʼmo Gotiʼnimo geʼamo mago kavatefeʼmo amagiʼna oʼatalegauve.

¹⁹ Oʼatalegauvaʼmofeʼmo alu vayaʼmogimo huʼnaya agufa kavaʼmo hutapa nagae nopiʼmo haniʼilagamo havaetesageʼnaeʼmo Ala kava neʼmoʼa mago gemo naha paisiya gemo afiguve, huno hapa paiʼniye.

²⁰ Ani haniʼilagamo Gotiʼa Melamitegamo eno ha painoʼaeʼmo, Ani vayaʼmo eʼa apakaeʼeʼmo magokepiʼmo visanafeʼmo ge hisayana he tika apakaeʼeʼmo uvo. Afaʼa uganaʼmonanafa nagaemo kaha paisuva geʼageʼmo afaʼa hugane, huno ha paiʼniye.

²¹ Ha paiʼniyaʼmofeʼmo Melamiʼmo netepiʼmo nokiʼaleʼmo fai maiteno Movapu koteʼmo neʼyagaiya vayaʼeʼmo magokepiʼmo uʼniye.

Melamiʼmo noki afuʼaeʼmo ge hauʼniya gemae

²² Melamiʼmo uʼniyaʼmofeʼmo Gotiʼa aipamo leno ateʼniye. Inagi Ala kava neʼmo enisole vekaʼamoʼmo kateʼmo he tino maiʼneno kame vekagana huno kaʼmo akaniʼniye. Melamiʼmo noki afuʼaleʼmo fai maiteno uʼnigeʼanaeʼmo aliʼyaʼamo neʼaliʼa vekalaʼeʼmo magokepiʼmo uʼnae.

²³ Noki afumoʼmo Ala kava neʼmo enisole vekamoʼmo naipemo aliteno kateʼmo he tino maiʼnigeno agetenoʼaeʼmo kaʼmo ataleno agiʼnalegamo uʼnigeno Melamiʼmo nokimo halate kateʼmo visiyafeʼmo amagiʼniye.

²⁴ Ala kava neʼmo enisole vekamoʼmo uno lole nofi hoyalaʼmo hanetegeno folagapi aise kateʼmo he tino maiʼniye. Ani haopalegamo lole ka agiʼnalateʼmo yafa kegiʼyamo haneʼnigeno kaʼmo oyakiʼniye.

²⁵ Nokimoʼa ageyana Ala kava neʼmo enisole vekamo he tino maiʼnigeno agetenoʼaeʼmo uno kegiʼyafiʼmo faino kili paetenoʼaeʼmo Melami aiyamo aeno lata paiʼniyaʼmofeʼmo Melamiʼmo halate nokimo amagiʼniye.

^26-27 Inagi Ala kava neʼmo enisole vekamoʼmo uno aise kaʼatoleʼmo he tino maiʼniye. Nokimoʼmo hoga haopalega visiya kaʼmo ohanege lamaga haopalega visiya kaʼmo ohanege huʼnigeno nokimoʼmo ageyana Ala kava neʼmo enisole vekamo agetenoʼaeʼmo aeno aga sesiya agufa kavaʼmo afaʼa osugiyaʼmofeʼmo nokiʼmo kapiʼmo havaeʼniye. Inagi Melamiʼmo aipamo leʼnigenoʼaeʼmo kayoʼaletiʼmo nokiʼmo amagiʼniye.

²⁸ Inagi Ala kava neʼmoʼa nokimoʼmo age aino ge hisiya kavaʼmo huʼnigenoʼaeʼmo nokiʼmoʼmo Melamifeʼmo hunoʼaeʼmo, Nagaemo kagaetegamo na agufa kavaʼmo huʼnogekaeʼmo loleʼe magoʼe afinaʼmo namagiʼnane, huno ha paiʼnigeno

²⁹ Melamiʼmo nokieʼmo hunoʼaeʼmo, Kagaemo humi nateʼnanaʼmofeʼmo kamagiʼnove. Nagaemo naipeeʼmo nagesamo afiʼnove. Nagaemo naipemo aliʼnovesinana kamitimo aesugeka faliʼnanesine, huno ha paiʼniye.

³⁰ Inagi nokimoʼmo Melamifeʼmo hunoʼaeʼmo, Nagaemo kagaika nokimo maiʼnogekaeʼmo neya vekamo maiʼnana afinatetiʼmo nagaeteʼmo faika maime maime eka hemenimo maiʼnane. Nagaemo hemenimo kagaetegamo huʼnova agufa kavaʼmo mago afinaʼmo huʼnofiye, huno ha paiʼnigeno Melamiʼmo hunoʼaeʼmo, haʼao, huno huʼniye.

³¹ Inagi Ala kava neʼmoʼa Melamiʼmo aulagamo alino ayakeno ateʼnigeno agaemo ageʼniyana Ala kava neʼmo enisole vekaʼamo naipemo aliteno kateʼmo he tino maiʼnigeno ageʼniye. Agetenoʼaeʼmo ape huno augosalegatiʼmo mopafiʼmo asagauno aiʼniye.

³² Ala kava neʼmo enisole vekamoʼmo agaefeʼmo hunoʼaeʼmo, Kagaemo na agufa kavaʼmo higekaeʼmo nokikamo loleʼe magoʼe afinaʼmo amagiʼnane. Afiyo, huno, Kagaemo naulagaleʼmo oʼnahauʼniya kavaʼmo nehanaʼmofeʼmo visana kaʼmo akanisuvafeʼmo eʼnove.

³³ Nokikamoʼmo nagetenoʼaeʼmo loleʼe magoʼe afinaʼmo alu kateʼmo uʼniye. Alu kateʼmo oʼuʼniyesinana nagaemo ago kamiti kamagiteʼna nokimo afaʼa atesugeno maiyesine, huno ha paiʼniye.

³⁴ Melamiʼmo Ala kava neʼmo enisole vekaeʼmo hunoʼaeʼmo, Kagaemo visuva kateʼmo natafauka nateʼnane, huʼna oʼageʼnovaʼmofeʼmo hosu kavaʼmo huʼnove. Nagaemo visuvafeʼmo okahauʼnisiyaʼmoʼmo halate atagineʼna uguve, huno ha paiʼniye.

³⁵ Inagi Ala kava neʼmo enisole vekamoʼmo Melamifeʼmo hunoʼaeʼmo, Ani vayaʼeʼmo afaʼa uvo. Afaʼa uganaʼmonanafa kaha paisuva geʼageʼmo hugane, huno ha paiʼniyaʼmofeʼmo Melamiʼmo Melaki koteʼmo neʼyagaiya vayaʼeʼmo uʼniye.

Melakiʼmo Melamiʼa eʼniya kavafeʼmo amogaga aiʼniya gemae

³⁶ Melakiʼmo Melamiʼa neʼe, huʼa huʼnaya gemo afitenoʼaeʼmo Melamiʼeʼmo fotu hisaʼafeʼmo Movapu taonimo Anoni aniʼmo haopaleʼmo Movapu koʼmo hakuteʼmo uʼniye.

³⁷ Melakiʼmo Melamifeʼmo ha painoʼaeʼmo, Afiyo, huno, Nagaemo vayaʼmo aliʼna apateʼnogeʼa kavaleliʼa esayafeʼmo uʼnae. Na agufa kavaʼmo higekaeʼmo nagaetegamo oʼmeʼnane. Alopa yaʼmo afaʼa okamisufiye, huno huʼnigeno

³⁸ Melamiʼmo Melakifeʼmo hunoʼaeʼmo, Nagaemo kagaetegamo ago eʼnovaʼmonanafa. Nagaemo muki agufa gemo afaʼa hisufiye. Haʼao, nagaemo Gotiʼa naha paisiya geʼageʼmo huguve. Alu gemo hisuva himamuʼnimo ohaneʼniye, huno ha paiʼniye.

³⁹ Inagi Melamiʼmo Melakiʼeʼmo Kaiyati-Husoti taonifiʼmo uʼnaʼae.

⁴⁰ Melakiʼmo ofalinimo hisiyafeʼmo mago pulumakagi sipisipigi huno amagiteno mago ameʼamo Melamiʼe agaeʼeʼmo magokepi lokaeʼa eʼnaya vayaʼeʼmo apamiʼniye.

Melamiʼmo hogote aune gemo huʼniya gemae

⁴¹ Melakiʼmo ega netepiʼmo Melamiʼa avalelino avefiʼmo Meliʼmo aigofe gotitefeʼmo mono nehaya koteʼmo uno haiʼniye. Melamiʼmo muki Isaleli nofi vayaʼmo afepilagamo maiʼnageno apakesiyafeʼmo avalelinuno haiʼniye.