Napa 21 - The Keyagana NT and 25 OT books

⁴ Isaleli vayaʼmo Ho aveletiʼmo ataleʼa Haesa Solovala anitegamo uʼniya kateʼmo Itomi vayaʼai mopamo aliʼa ataleʼa visayafeʼmo uʼnae. Uge uge huʼa maiʼnagenoʼaeʼmo lusi kava huno alagaʼmo hapaeʼnigeno apaipamoʼmo kana huʼniye.

⁵ Apakaemo Gotiʼe Moseseʼefeʼmo ge hanauteʼa huʼa faipa huʼa anateteʼapaeʼmo, Na kava hugefeʼmo Isipi kotegatiʼmo mani kaʼme koteʼmo falisunafeʼmo lavalelika eʼnane. Neʼyaʼmo ohanege aniʼmo ohanege huʼnigeno mani lamu nosiya neʼyafeʼmo olahauʼniye, huʼa ha paiʼnae.

⁶ Ala kava neʼmoʼa huʼnaya gemo afitenoʼaeʼmo Isaleli vayaʼaitegamo haesa nagaloʼyave anagaʼmo alino apateʼnigeʼa eʼa hapaeʼnageʼa asole vayaʼmo faliʼnae.

⁷ Inagi Isaleli vayaʼmogimo Mosesetegamo eʼa ha paiʼapaeʼmo, Lagaemo hosu gemo huʼnone. Ala kava netegaʼe kagaetegaʼeʼmo hosu kavaʼmo huʼnone. Ala kava nefeʼmo nunumuʼmo huka lategenoʼao lagaetegatiʼmo nagaloʼyave anagaʼmo alino hapa faino apataleno, huʼa ha paiʼnae. Inagi Moseseʼmo nunumuʼmo huno apateʼniye.

⁸ Nunumuʼmo huno apateʼnigenoʼaeʼmo Ala kava neʼmoʼa Mosesefeʼmo ha painoʼaeʼmo, Mago haesa nagaloʼyavemo auneʼamo alo huteka yatala posi yosaleʼmo maleka nofi kiteka alika he tika ato. Ani kavaʼmo hisanageʼapaeʼmo nagaloʼyave anagaʼmogimo hapaesaya vayaʼmogi nagaloʼyavemo auneʼamo aliʼa maku huʼa agesayaʼmoʼmo ofaliʼa afaʼa maigae, huno ha paiʼniye.

⁹ Inagi Moseseʼa haesa aeniletiʼmo mago nagaloʼyavemo auneʼamo alo huteno yatala posi yosaleʼmo maleno nofi kiteno alino he tino ateʼniye. Inagi nagaloʼyave anagaʼmogimo hapaeʼnaya vayaʼmogimo aliʼa maku huʼa nagaloʼyavemo auneʼamo ageteʼapaeʼmo ofaliʼa afaʼa maiʼnae.

³¹ Inagi Isaleli vayaʼmogimo Amo vayaʼmogi mopamo aliteʼa ani mopaleʼmo maiʼnae.

³² Maiʼneʼapaeʼmo Moseseʼmo mago vayaʼmo alino apateʼnigeʼa uʼa Yesa taonimo ageʼa alagepa hisayafeʼmo alino apateʼnigeʼa uʼa Yesa vayaʼeʼmo kame huteʼa ani taoniʼe haopaleʼmo haneʼniya taoniʼeʼmo aliteʼa Amo vayaʼmo ani koteʼmo maiʼnaya vayaʼmo aliʼa hapa faiʼa apataleʼnae.

³³ Inagi Isaleli vayaʼmo aiʼa atagineʼa Mesani kotegamo uʼniya kateʼmo akame huʼa uʼnae. Apakaemo uʼa avaʼyi huʼnagenoʼaeʼmo Mesani kini vekamo Agiʼmo ati vayaʼaʼeʼmo eʼa Isaleli vayaʼmo Eʼnae taonifiʼmo kamemo hapaeʼnae.

³⁴ Ala kava neʼmoʼa Mosesefeʼmo ina gemo huno ha painoʼaeʼmo, Nagaemo lapa maesugetapa agaeʼe vayaʼaʼeʼmo kame hutapa aeta apaka setetapa mopaʼapimo aligayaʼmofeʼmo kini vekamo Agifeʼmo koli osiyo. Lapakaemo Amo kini vekamo Saiyoniʼmo Hesimoni taonifiʼmo maiʼniya kini vekamo alita hosu hutapa ataleʼnaya kava hutapa alita hosu hutapa atalegae.

³⁵ Inagi Isaleli vayaʼmogimo ani agufa kavaʼmo huʼa kini vekamo Agiʼe ati vayaʼaʼenagi muki mafaʼne anagaʼaʼenagi huʼa kamitimo hapaeʼnageno magoke vekamo alagi oʼmaiʼnigeʼa apakae mopamo aliʼnae.