Napa 20 - The Keyagana NT and 25 OT books

Moseseʼmo Kenesi kotegamo hosu kavaʼmo huʼniya gemae

¹ Vani kaileʼmo muki Isaleli vayaʼmo Yini kaʼme kotegamo uʼa avaʼyi huteʼa Kenesi taonifiʼmo uʼa maiʼnagenoʼaeʼmo Miliyamuʼmo Eloniʼe Moseseʼeʼmo anasaʼanimoʼmo faliʼnigeʼa kiʼa ateʼnae.

² Isaleli vayaʼmo Yini kaʼme kotegamo maiʼnageno ani haopalega nesaya aniʼmo alagi ohaneʼniyaʼmofeʼmo ve aʼnemo Mosesetegaʼe Elonitegaʼeʼmo uʼa aliʼa anupa huʼnae.

³ Apakaemo Moseseʼeʼmo geletiʼmo kaveta huʼapaeʼmo, Lagaemo konagatimogiʼeʼmo Ala kava neʼmo aulagaleʼmo magokepiʼmo faliʼnonesinana kanale huʼniyesine, huʼa huʼnae.

⁴ Na kavaʼmo higekaeʼmo mani kaʼme kotegamo lavalelika eʼnane. Lagaeʼe afu anagatiʼeʼmo mani koteʼmo falisunafeʼmo lavalelika eʼnapiye.

⁵ Na kavaʼmo higekaeʼmo Isipi kotegatiʼmo lavalelika eʼnanageta mani hosu kotegamo eʼnone. Mani koteʼmo vitimo ohanege fiki yosamo alagamo ohanege nofi alagamo ohanege pamagalanati yosa alagamo ohanege huʼnigeno aniʼeʼmo alagi ohaneʼniye.

⁶ Moseseʼe Eloniʼeʼmo ani gemo afiteʼanaeʼmo anakaemo vayaʼmo apataleʼana uʼana Goti seli mono noʼamo kipateʼmo he tiʼneʼana mopafiʼmo anaugosalegatiʼmo asagauʼana aiʼnaʼae. Ala kava neʼmo hale konali yaʼamoʼmo anaulagaleʼmo afole aiʼniye.

⁷ Inagi Ala kava neʼmoʼa Mosesefeʼmo ina gemo huno ha painoʼaeʼmo,

⁸ Hayopa kayokamo aliyo. Kagaeʼe nepukamo Eloniʼeʼmo muki vayaʼmo alitana anupa hutana apateʼao. Kagaemo apaulagaleʼmo mani alopa yafapifeʼmo ge nehugenoʼa aniʼmo afole aino. Ge hisanageno aniʼmo afole aisigeʼapaeʼmo muki vayanagi pulumaka anaganagi sipisipi anaganagi huʼa negae.

⁹ Inagi Moseseʼmo Ala kava neʼmo geʼamo akame huno uno kotalake kesimo haopaleʼmo haneʼniya hayopa kayoʼmo aliʼniye.

¹⁰ Moseseʼe Eloniʼeʼmo ani yafaʼmo haopaleʼmo vayaʼmo aliʼana anupa huʼana apateʼneʼanaeʼmo Moseseʼmo ina ge huno hapa paiʼniye. Gemo amagitapa neʼatalaya vayanagi afiyo. Laʼagaemo lapakae aniʼmo mani yafapatiʼmo alitaʼa afole aita atesuʼafiye, huno huʼniye.

¹¹ Inagi Moseseʼmo kayoʼmo alino asagauliʼneno lole kanaleʼmo ani yafapiʼmo amagiʼnigeno alopa aniʼmo emineʼnigeʼa muki vayaʼmogiʼe muki afu anagaʼmogiʼeʼmo neʼnae.

¹² Inagi Ala kava neʼmoʼa Moseseʼe Eloniʼefeʼmo hana painoʼaeʼmo, Lanakaemo nagaefeʼmo lanakesamo afitana fatago osuʼnaʼaʼmofeʼmo Isaleli vayaʼmogi apaulagaleʼmo naote Gotiʼnamo maiʼnove, hutana alitana naote oʼnateʼnaʼaʼmofeʼmo ani vayaʼmo apamiʼnova mopaleʼmo apavalelitana oʼugaʼae, huno hana paiʼniye.

¹³ Isaleli vayaʼmogimo Ala kava neʼeʼmo geletiʼmo kaveta huʼnayaʼmofeʼmo aniʼmo agiʼamo Melima anine huno ateʼniye. Melimae agimo aepaʼamo geletiʼmo kaveta nehae. Ani afinaʼmo Gotiʼa naote Gotiʼnamo maiʼnove, huno alino apaveliʼniye.

Iʼnomu kini vekamoʼmo Isaleli vayaʼaifeʼmo hunoʼaeʼmo, Mopatileʼmo eta umenitata osiyo, huno huʼniya gemae

¹⁴ Isaleli vayaʼmo Kenesi taonifiʼmo maiʼnagenoʼaeʼmo Moseseʼmo mago apa vayaʼmo Kenesi kotegatiʼmo alino apateʼnigeʼa Iʼnomu kini vekalegamo uʼnae. Apakaemo uʼa agaefeʼmo huʼapaeʼmo, Lagaemo Isaleli vayaʼmo kagae konaga vayaʼmae. Kagaemo ago afiʼnanana lagaetegamo alu kana kava alu kana kavaʼmo afole aiʼniye.

¹⁵ Laginago vayaʼmo uʼa Isipi kotegamo asole kafugamo maiʼnageʼapaeʼmo Isipi vayaʼmogimo laginago vayaʼaitegaʼe lagaetegaʼeʼmo asole hosu kavaʼmo huʼnae.

¹⁶ Inagi lagaemo Ala kava neʼmoʼa laha maesiyafeʼmo ge huʼnonageno afitenoʼaeʼmo mago enisole vekaʼamo alino ateʼnigeno emineno Isipi kotegatiʼmo lavalelino eʼniye. Hemenimo lagaemo Kenesi taonifiʼmo kagae koʼmo hakuteʼmo haneʼniya taonifiʼmo eta maiʼnone.

¹⁷ Kahao ke hone. Kagaemo afaʼa latesanageta kagae koteʼmo uta haitetaeʼmo alagi ugune. Lagaemo viti hoyatapifiʼe nofi hoyatapifiʼeʼmo aeta haleta oʼugune. Lagaemo lapakae ani keli kotupatiʼmo oʼnegaune. Lagaemo alopa kaʼmo oʼataleta ani katekeʼmo akame huta uta kagae koʼmo alita ataleta ugune, huʼa huʼnae.

¹⁸ Ani gemo huʼnayaʼmonanafa Iʼnomu kini vekamoʼmo Isaleli vayaʼaifeʼmo hunoʼaeʼmo, haʼao, huno hapa paiʼniye. Lapakaemo lagae koteʼmo umenitata osiyo. Hosu kavanageta lagaemo lapakaeʼeʼmo kame hugune, huno hapa paiʼniye.

¹⁹ Inagi Isaleli vayaʼmogimo ha paiʼapaeʼmo, Lagaemo alopa katekeʼmo akame huta ugune. Lagaemofi afutimogimofi huta anitapimo nesunaʼmoʼmo lagaemo miya faigune. Lagaemo umenitata hulituta kotilegageʼmo alagi ugune, huʼa ha paiʼnageno.

²⁰ Agaemo hapa painoʼaeʼmo, Haʼao, lapakaemo alagi oʼviyo, huno huʼnigeʼapaeʼmo asole ati vayaʼmo kame hisayafeʼmo eʼnae.

²¹ Apakaemo Iʼnomu vayaʼmogimo Isaleli vayaʼmo koʼapileʼmo oʼvisayafeʼmo haʼao, huʼa apateʼnayaʼmofeʼmo Isaleli vayaʼmo Iʼnomu kotetiʼmo ataleʼa alu kateʼmo akame huʼa uʼnae.

Eloniʼmo faliʼniya gemae

²² Muki Isaleli vayaʼmo Kenesi kotegatiʼmo ataleʼa uʼa Ho aveʼmo Iʼnomu koʼmo agiʼnaleʼmo avayi huʼnae.

²³ Ani aveleʼmo maiʼnagenoʼaeʼmo Ala kava neʼmoʼa Moseseʼe Eloniʼefeʼmo hana painoʼaeʼmo,

²⁴ Lanakaemo Eloniʼe Moseseʼeʼmo Melima anitegamo geʼnimo amagitana ataleʼnaʼaʼmofeʼmo Isaleli vayaʼaina apamiʼnova mopaleʼmo Eloniʼmo oʼugifa faligiye.

²⁵ Mosesegae, huʼna, Kagaemo Eloniʼe mafaʼneʼamo Iliyesaʼeʼmo anavaleteka lapakaemo Ho aveleʼmo uta haiyo.

²⁶ Kagaemo Eloniʼmo vailiʼneno mono huno neʼapateya kukena yaʼamo asagika mafaʼneʼamo Iliyesaʼmo vaika ato. Eloniʼmo ani aveleʼmo faligiyaʼmofeʼmae.

²⁷ Inagi Moseseʼmo Ala kava neʼmo geʼamo akame huno muki Isaleli vayaʼmogi apaulagaleʼmo Eloniʼe Iliyesaʼeʼmo anavaleteno avefiʼmo uʼa haiʼnae.

²⁸ Apakaemo uʼa avaʼyi huteʼapaeʼmo Moseseʼa Eloniʼmo vailiʼneno monoʼmo huno neʼapateya kukena yaʼamo asagino Iliyesaʼmo Eloni mafaʼnemo vaino ateʼniye. Eloniʼmo avefiʼmo maiʼneno faliʼniye. Inagi Moseseʼe Iliyesaʼeʼmo aveletiʼmo ataleʼana emiʼeʼnaʼae.

²⁹ Muki vayaʼmogimo ageʼnayana Eloniʼmo ago faliʼnigeʼa ageteʼapaeʼmo tetiʼa afinaʼmo hapau huʼa aviʼyaʼmo huʼnae.