Napa 17 - The Keyagana NT and 25 OT books

Gotiʼa Eloniʼmo lekana paiʼna ateʼnove, huno vayaʼaina alino apave liʼniya gemae

¹ Ala kava neʼmoʼa Mosesefeʼmo ina ge huno ha paiʼniye

² Isaleli vayaʼaifeʼmo hapa paigeʼa tuolofuʼa hayopa kayoʼapimo kagaemo kamiyo. Muki magoke magoke nofi vayapatiʼmo yagaiʼa neʼapataya vayaʼmogi hayopa kayoʼapimo aliyo. Kagaemo muki magoke magoke huʼa yagaiʼa neʼapataya vayaʼmogi apakimo magoke magoke hayopa kayoteʼmo avoʼmo kae malo.

³ Livai nofi vayaʼai hayopa kayoteʼmo Eloni agimo avoʼmo kae malo. Magoke magoke nofi vayaʼaiteʼmo yagaiʼa neʼapataya vayaʼmogimo hayopa kayoʼapimo kamiyo.

⁴ Aliteka tuolofuʼa hayopa kayoʼmo seli mono nopiʼmo kotalake kesimo haopaleʼmo alitaʼa anupa hutaʼa maiʼnoʼa yategamo malo.

⁵ Inagi nagaemo lekana paiʼna ateʼnova vekamo hayopa kayopatiʼmo ausasiʼmo aegaiye. Ani kavatetiʼmo nagaemo Isaleli vayaʼmogi kagaefeʼmo ge kahauʼnaya vayaʼai apavayamo aliʼna akani malegauve.

⁶ Inagi Moseseʼmo Isaleli vayaʼaifeʼmo hapa paiʼnigeʼa magoke magoke huʼa yagaiʼa neʼapataya vayaʼmogimo hayopa kayoʼapimo amigae. Magoke magoke kayoʼmo magoke magoke huʼa tuolofuʼa nofi vayaʼmogi kayone. Apakaemo Eloni hayopa kayoʼe alu hayopa kayoʼeʼmo magokepiʼmo haneʼniye.

⁷ Inagi Moseseʼmo kayoʼapimo alino seli mono nopiʼmo Ala kava neʼmo kotalake kesiʼamo haneʼniya haopaleʼmo maleʼniye.

⁸ Moseseʼa egaʼamo seli mono nopiʼmo uno haino ageʼniyana Eloniʼmo Livai nofi vekamo hayopa kayoʼafatiʼmo ausasi aeteno ausemo heteno Amoni alagamo aeteno ago afu leʼniye.

⁹ Moseseʼa Ala kava netegatiʼmo muki hayopa kayoʼmo kumatega alinino lamino Isaleli vayaʼmo apave liʼnigeʼa ageteʼapaeʼmo magoke magoke vayaʼmogi hayopa kayoʼapimo aliʼnae.

¹⁰ Ala kava neʼmoʼa Mosesefeʼmo ha painoʼaeʼmo, Eloni hayopa kayoʼmo halate seli mono nopiʼmo alinika haika kotalake kesimo haopaleʼmo malo. Gemo amagiʼa neʼatalaya vayaʼmogimo apakesamo afisaya alagena yaʼmo hanegaiye. Apakaemo ofalisayafeʼmo magoʼe huʼa ge oʼnegae.

¹¹ Inagi Moseseʼmo Ala kava neʼmoʼa ha paiʼniya kavaʼmo huʼniye.

¹² Isaleli vayaʼmogimo Mosesefeʼmo huʼapaeʼmo, Vaehae, huʼa, Alagi faligune. Mukiʼamogitamo falita lageso hugune,

¹³ Haiya vekamoʼmo Ala kava neʼmo seli mono noʼamo haopaleʼmo visiyana falino. Mukiʼamogita alagi falisupiye, huʼa huʼnae.