Napa 16 - The Keyagana NT and 25 OT books

Kolaʼagi Netaniʼagi Amailamiʼagi huʼa Mosese geʼamo amagiʼa ataleʼnaya gemae

¹ Kolaʼmo Isahali mafaʼnemo mafaʼneʼamo Kohatiʼmo Livai nofi vekagi Lumeni nofi vayapatiʼmo loleʼe magoʼe vayanagi huʼa Mosese geʼamo oʼafi kavaʼmo huʼnae. Ani loleʼe magoʼe vayaʼmogi apakiʼapimo Netaniʼagi Amailamiʼagi Eliyapi lole mafaʼneʼalanagi Oniʼmo Peleti mafaʼnegi huʼa maiʼnae.

² Ani foʼa vayaʼe Isaleli vayaʼaiteʼmo yagaiʼa neʼapataya vayaʼmo tu hataleti fifitiʼa vayaʼeʼmo Moseseʼmo agoti huʼa atesayafeʼmo Mosese aulagaleʼmo aliʼa anupa huʼa he tiʼnae. Isaleli vayaʼmogi ani neʼyagaiya vayaʼmo lekana paiʼa apateʼnageno vayaʼmogi apaulagaleʼmo ala apakiʼapimo haneʼniye.

³ Apakaemo eʼa Mosesetegaʼe Elonitegaʼeʼmo aliʼa anupa huʼneʼapaeʼmo, Lanakaemo lusi kava hutana lanakitanileʼmo alitana asaga huʼnaʼae. Mukiʼamogitamo Goti aote vayaʼamo maiʼnone. Ala kava neʼmoʼa lagaeʼeʼmo magokepi lokaeno maiʼniye. Haiya kava higetanaeʼmo ala lanakimo alitetana lagaeteʼmo yagaitana latesaʼafeʼmo nehaʼae, huʼa huʼnae.

⁴ Inagi Moseseʼa ani gemo afitenoʼaeʼmo augosalegatiʼmo mopafiʼmo asagauno aiʼniye.

⁵ Moseseʼa Kolaʼagi akame huʼnaya vayaʼaifenagi huno hapa painoʼaeʼmo, Ega netepiʼmo Ala kava neʼmoʼa agaiʼa aote vekaʼamo alino apave liteno ani vekamo agaiʼa haopaleʼmo avalelino egaiye. Ani lekana paino atesiya vekamo agaiʼa haopaleʼmo avalelino egaiye, huno hapa paiʼniye.

^6-7 Ina kavaʼmo hiyo. Ega netepiʼmo Kolagaʼe muki kakame nehaya vayaʼenagi hutapa yuvapamo alitetapa alagepa atumo neʼaiya laʼnefamo alitetapa aise atagi alagepa atumo neʼaiya laʼnefagi hutapa ani yuvapafiʼmo maletetapa alinita eyo. Etapa seli mono noteʼmo Ala kava neʼmo aulagaleʼmo he titapa maiyo. Ala kava neʼmoʼa lagae folagapatiʼmo lekana paino ateʼniya vekamo alino laveligiye. Lekana paino ateʼniya vekamo aote vekamo maiʼniye. Livai nofi vayaʼmogitapae, huʼna, lapakaemo ala lapakitapimo alitetapa Ala kava neʼmoʼa olapamiʼniya aliʼyaʼmo alisayafeʼmo lapauʼniye.

⁸ Inagi Moseseʼa Kolafeʼmo hunoʼaeʼmo, Livai nofi vayaʼmogitapae, huʼna, Afiyo.

⁹ Isaleli vayaʼmogita Gotitimoʼmo Isaleli vayapatiʼmo lapavaleno alino lapaote lapateteno agaiʼa haopaleʼmo lapavalelino eʼnigetapa Ala kava neʼmo seli mono noʼmo aliʼyaʼmo alitetapa Isaleli vayaʼai aliʼyaʼapimo alisayafeʼmo ina agufa aliʼyane, hutapa lapakesamo neʼafifiye.

¹⁰ Agaemo agaiʼa haopaleʼmo kagaegi muki konaga vayakamo Livai nofi vayanagi huno lapavalelino eʼniyaʼmonanafa mono hutapa apatesaya vayaʼeʼmo maisayafeʼmo nehafiye.

¹¹ Lapakaemo alita anupa hutapa maiʼnetapaeʼmo Ala kava netegamo hosu kavaʼmo nehae. Eloniʼa ina laʼmo maiʼnifi hutetapa ge hauʼnae.

¹² Inagi Moseseʼa mago vekamo alino ateʼnigeno uno Ilai mafaʼnelaʼmo Netaniʼe Amailamiʼefeʼmo keya aeno ge huʼniyana, Haʼao, huʼana laʼagaemo oʼuguʼae, huʼana huʼnaʼae.

¹³ Kagaemo alagepa mopamo haneʼniya koʼmo Isipi kotegatiʼmo lavalelika mani kaʼme koteʼmo falisunafeʼmo eʼnane. Ani hosu kavakamo aise hosu kavaʼmo haneʼnifiye. Kagaemo ani kavaʼmo hutekaeʼmo hemenimo magoʼe huka hosu kavaʼmo huka yagaika latesanafeʼmo nehapiye.

¹⁴ Kagaemo alagepa mopamo haneʼniya koteʼmo lavalelika oʼuge alagepa neʼya hoyaʼe nofi hoyaʼeʼmo o lamige huʼnane. Kagaemo ani vayaʼmogi apaulagamo alika katika atalesapiye. Kagaetegamo oʼuguʼae, huʼana huʼnaʼae.

¹⁵ Moseseʼa ani gemo afitenoʼaeʼmo lusi kava huno aipamo leʼnigeno Ala kava nefeʼmo ha painoʼaeʼmo, Mani vayaʼmogimo ofalini yaʼmo kamisagekaeʼmo oʼaliyo. Nagaemo magoke nokiʼapimo oʼavalege magoke vekamo aliʼna hosu huʼna oʼatege huʼnove.

¹⁶ Moseseʼa kolafeʼmo hunoʼaeʼmo, Egamo kagaeʼe muki vayakaʼeʼmo eta Ala kava neʼmo aulagaleʼmo he tiyo. Kagaegi apakaegi Eloniʼagi huʼa maigae.

¹⁷ Mukiʼamogitapamo magoke magoke yuvapatapimo tu hataleti fifitiʼa yuvapatapimo alitetapa alagepa atumo aisiya laʼnefamo maleta alinita Ala kava netegamo eyo.

¹⁸ Inagi mukiʼamogi yuvapaʼapimo aliteʼa atafiʼmo kaesageno alagepa atumo aisiya laʼnefamo yuvapafiʼmo maleʼa aliteʼa seli mono notegamo eʼa kipateʼmo Moseseʼe Eloniʼeʼmo lokaeʼa he tiʼa maiʼnae.

¹⁹ Kolaʼa muki Isaleli vayaʼmo alino anupa huno apateʼnigeʼa Mosesetegaʼe Elonitegaʼeʼmo eʼa hanaopaleʼmo seli mono no kipateʼmo he tiʼa maiʼnae. Maiʼnagenoʼaeʼmo Ala kava neʼmo hale konali yaʼamo maiʼnayayateʼmo afole aiʼnigeʼa ageʼnae.

²⁰ Ala kava neʼmoʼa Moseseʼe Eloniʼefeʼmo hana painoʼaeʼmo,

²¹ Nagaemo mani vayaʼmo malage huʼna aliʼna hano huʼna apatalesuvafeʼmo apataletana viʼao.

²² Inagi Moseseʼe Eloniʼeʼmo mopafiʼmo anaugosalegatiʼmo asagauʼana aiteʼanaeʼmo, O Gotiyo, huʼana muki apauneʼapameʼe vayaʼmogi Gotiʼapimogamo maiʼnane. Magoke vekamoʼmo hosu kavaʼmo nehisiyaʼmoʼmo kagaemo muki Isaleli vayaʼaifeʼmo kaipamo leka apategapiye, huʼana huʼnaʼageno.

²³ Ala kava neʼmoʼa Mosesefeʼmo ha painoʼaeʼmo,

²⁴ Muki vayaʼaifeʼmo hapa paikaeʼmo, Kolaʼagi Netaniʼagi Amailamiʼagi huʼa seli noʼapiletiʼmo ataletapa viyo, huka hapa paiyo.

²⁵ Inagi Moseseʼa Netanitegaʼe Amailamitegaʼeʼmo uʼnigeʼa Isaleli vayatama vayaʼmo akame huʼa uʼnae.

²⁶ Agaemo muki vayaʼaifeʼmo hapa painoʼaeʼmo. Hemenimo lapakaemo mani hosu vayaʼai seli noʼapiletiʼmo ataletapa viyo. Kagemiyaʼapileʼmo ame oʼaliyo. Fiku yanagetapa apakaeʼeʼmo lokaetapa maisayana muki hosu kavaʼapifiʼmo faligae.

²⁷ Inagi muki vayaʼmogimo Kolaʼagi Netaniʼagi Amailamiʼagi huʼa seli noʼapiletiʼmo ataleʼa uʼnae. Netaniʼe Amailamiʼeʼmo emi eʼana seli noʼanimo kipateʼmo aʼne mafaʼneʼaniʼeʼmo hetiʼana maiʼnaʼae.

²⁸ Moseseʼa hapa painoʼaeʼmo, Afole aisiya kavaʼmo agetetapaeʼmo Ala kava neʼmoʼa muki ani kavaʼmo hisuvafeʼmo alino nateʼnigeʼna eʼnove. Nagaiʼnimo nahauʼniya kavatetiʼmo osuʼnove.

²⁹ Hemenimo mani vayaʼmo faligayaʼmonanafa Gotiʼa mago hanageke yaʼmo oʼapamisigeʼa afaʼa falisagetapaeʼmo Ala kava neʼmoʼa aliʼyaʼamo alisuvafeʼmo lekana paino oʼnateʼniye, hutapa nagegae.

³⁰ Hiyaʼmonanafa Ala kava neʼmoʼa mago aeto agufa kavatetiʼmo hanageke yaʼmo apamisigeno mopamo aino akaka vaesigeʼa apakaemo afaʼa maiʼneʼapaeʼmo muki yaʼapiʼeʼmo faliʼnaya vayaʼai kotegamo lamisagetapaeʼmo ani vayaʼmo Ala kava neʼmo apakameʼyamo amiʼnae, hutapa apakegae.

³¹ Moseseʼa ani gemo hutegenoʼaeʼmo malage huno maiʼnaya mopamo aino akaka vaeʼnigeno alopa kelimo afole aiʼniye.

³² Mopamo aino akaka vaeteno alino nakaiʼnigeʼa apakaegi muki afamo anagaʼapigi Kolaʼeʼmo maiʼnaya vayanagi kagemiyaʼapigi huʼa asagauʼa aiʼnae.

³³ Apakaeʼe muki magokepi lokaeʼa maiʼnaya vayaʼeʼmo afaʼa maiʼneʼapaeʼmo yatala kelifiʼmo uʼa lamiʼnageno mopamoʼmo aeno apati kaeʼnigeʼa Isaleli vayapatiʼmo apataleʼa faliʼnae.

³⁴ Ani kelifiʼmo uʼa nelamiʼapaeʼmo lusi kava huʼa kage kage huʼnageʼapaeʼmo muki Isaleli vayaʼmogimo apaune neheʼapaeʼmo, Fiku yanageno mopamo aino akaka vaesigeta lagaeʼeʼmo asagauta aigune, huʼa huʼnae.

³⁵ Ala kava neʼmoʼa atamo alino ataleʼnigeno emineno tu hataleti fifitiʼa ve anagaʼmogi alagepa atumo neʼaiya ofalinimo nehaya vayaʼmo apaleno apasagaliʼniye.

³⁶ Inagi Ala kava neʼmoʼa Mosesefeʼmo ina ge huno ha paiʼniye.

³⁷ Mono huno neʼapateya vekamo Eloni mafaʼnemo Iliyesafeʼmo ha paikaeʼmo, Atafatiʼmo haesa aeni yuvapaʼapimo alinika eno. Aote yuvapamo haneʼniyaʼmofeʼmae. Haneʼniya atamo aika atagu faeka afagitegamo atalo.

³⁸ Hosu kavaʼapilefeʼmo faliʼnaya vayaʼmogi ata kaeʼnaya yuvapamo aliʼa amagiʼa latapa huteʼa ofalini hiʼyalamuteʼmo aiʼa ati kaegae. Apakaemo ani yuvapafiʼmo Goti aulagaleʼmo ofalinimo huʼnayaʼmofeʼmo aote yuvapamo haneʼniye. Isaleli vayaʼmogimo ageteʼapaeʼmo alagena yaʼmo haneʼniye, huʼa huteʼa ani afole aiʼniya kavafeʼmo apakesamo afigae.

³⁹ Inagi mono huno neʼapateya vekamo Iliyesaʼa ani haesa aeni yuvapamo atamoʼmo apaleno apasagaliʼniya vayaʼmogi ofalini huʼnaya yuvapamo aliʼnigeʼa mago vayaʼmogi amagiʼa aliʼa ofalini hiʼyalamuteʼmo aiʼa atikae maleʼnae.

⁴⁰ Ani aiʼa ati kae maleʼnaya kavaʼmoʼmo Isaleli vayaʼmo apakesa afi yaʼmo apamisiya kavaʼmo huʼnae. Ageteʼapaeʼmo Eloni nofi vayaʼamogigeʼmo alagepa atumo aisiya laʼnefamo Ala kava neʼmo aulagaleʼmo ofalini hiʼyalamuteʼmo afaʼa kaegae. Mago alu nofi vekamoʼmo ani ofalini kavaʼmo nehisigenoʼaeʼmo Ala kava neʼmoʼa Kolaʼe akame huʼnaya vayaʼaitegaʼeʼmo huʼniya agufa kavaʼmo hugiye. Ala kava neʼmoʼa Mosese avayaletiʼmo ha paiʼniya kavaʼamo huʼniye.

Eloniʼmo falisaya kavategatiʼmo apakufamo alino katino apateʼniya kavafeʼmo huʼniya gemae

⁴¹ Egaʼamo muki Isaleli vayaʼmogimo Moseseʼe Eloniʼefeʼmo ge hanauʼnaʼae. Ge hanauʼanaeʼmo, Lanakaemo Ala kava neʼmo vayaʼamo kamitimo apamagiʼnaʼae, huʼa huʼnae.

⁴² Muki Isaleli vayaʼmogimo Mosesetegaʼe Elonitegaʼeʼmo aliʼa anupa huʼa maiʼneʼapaeʼmo aiʼa afeleʼa ageʼnayana malage huno hiyaʼmoʼmo seli mono noteʼmo kino ati kaeʼnigeno Ala kava neʼmo hale konali yaʼamo aeno ha leʼnigeʼa ageʼnae.

⁴³ Inagi Moseseʼe Eloniʼeʼmo eʼana seli mono noʼmo kipaʼaleʼmo he tiʼana maiʼnaʼae.

⁴⁴ Ala kava neʼmoʼa Mosesefeʼmo ha painoʼaeʼmo,

⁴⁵ Lanakaemo mani vayaʼaitegatiʼmo ataletana viʼao. Malage huʼna aliʼna hano huʼna apatalegauvanagi. Ani gemo afiteʼanaeʼmo anaugosalegatiʼmo mopafiʼmo anakoʼya faiʼnaʼae.

⁴⁶ Inagi Moseseʼa Elonifeʼmo ha painoʼaeʼmo, Alagepa ofalini yuvapamo aliteka ani yuvapafiʼmo ofalini hiʼyalamutetiʼmo atamo aeka maleka alinika eno. Mago alagepa atumo aisiya laʼnefamo ani ataleʼmo alika maleteka alinika malage huka muki vayaʼai folagapiʼmo uvo. Muki vayaʼai hosu kavaʼapilefeʼmo ofalinimo hugeʼapao Goti aulagaleʼmo alagepa huʼa maigae. Ala kava neʼmoʼa apakaefeʼmo aipamo leno apateteno alopa kaita kayotetiʼmo aepa faino apamagiʼniye, huno ha paiʼniye.

⁴⁷ Inagi Eloniʼa Mosese huʼniya gemo akame huno alagepa atumo aisiya laʼnefamo kaesiya yuvapamo alinino nagu nagu huno vayaʼai folagapimo uno laʼnefamo kaeteno vayaʼai hosu kavaʼapilefeʼmo ofalinimo huʼniye. Ala kava neʼmo alopa kaita kayotetiʼmo aepa faino apamagiʼniyaʼmofeʼmae.

⁴⁸ Agaemo faliʼnaya vayaʼe afaʼa maiʼnaya vayaʼmogi folagapiʼeʼmo he tino maiʼnenoʼaeʼmo alopa kaitaʼmo alino hano huno ataleʼniye.

⁴⁹ Ani afinaʼmo fotini tauseni seveni hataletiʼa vayaʼmo alopa kaita kayotetiʼmo apamagiʼnigeʼa faliʼnae. Hogoteʼa Kolaʼa huʼniya kavatetiʼmo magoʼe huʼa alu vayaʼmo faliʼnae.

⁵⁰ Inagi kaitaʼmo hano huʼnigeno Eloniʼmo Mosese seli mono no kipateʼmo maiʼniyategamo atagi neno eʼniye.