Napa 14 - The Keyagana NT and 25 OT books

Isaleli vayaʼmogimo Gotifeʼmo ge hauʼnaya gemae

¹ Inagi muki Isaleli vayaʼmogimo kage kage huʼa aviʼyaʼmo hume hume neʼvageno uno kotiʼniye.

² Mukiʼamogimo Moseseʼe Eloniʼeʼmo ge hanauteʼapaeʼmo, Lagaemo Isipi kotegamofi kaʼme kotegamofi huta faliʼnonesinana kanale huʼniyesine.

³ Na kava higenoʼaeʼmo Ala kava neʼmoʼa apakaemo kamefatiʼmo lahaeteʼapaeʼmo aʼne mafaʼnetimo kalavusi huʼa apatesayafeʼmo mani koteʼmo lavalelino eʼniye. Lagaemo Isipi kotegamo halate visunaʼmoʼmo kanale hugiye.

⁴ Apakaemo apakaiʼapimo ge huge afige huʼapaeʼmo, Lagaemo yagaino latesiya vekamo lekana paita atesunageno Isipi kotegamo lavalelino ugiye, huʼa huʼnae.

⁵ Inagi Moseseʼe Eloniʼeʼmo muki Isaleli vayaʼai apaulagaleʼmo anaugosalegatiʼmo mopafiʼmo asagauʼana aiʼnaʼae.

⁶ Yasuvaʼmo Nani mafaʼnemoʼe Kelepiʼmo Yefune mafaʼnemoʼeʼmo anakaemo ani vayaʼmogimo uʼa Kenani mopamo agesayafeʼmo uʼnageʼanaeʼmo kukena yaʼaniʼmo aliʼana apake aiʼnaʼae.

⁷ Anakaemo muki Isaleli vayaʼaifeʼmo hapa paiʼanaeʼmo, Uta ani mopamo folagapiʼmo ageʼnonana alagi kanale huʼniye.

⁸ Ala kava neʼmoʼa lagaefeʼmo amogaga aisiyaʼmoʼmo ani kotegamo lavalelinuno ani kanale asole mopamo haneʼniyanageno lamigiye.

⁹ Lavalelinuno lamigiyaʼmonanafa akame hisaya Gotiʼa geʼamo amagitapa oʼataleyo. Ani haopalegamo maiʼnaya vayaʼmo lagae neʼyakana huʼa maisageta alita hano huta apatalegaunaʼmofeʼmo ani vayaʼaifeʼmo koli osiyo. Hapa maesaya gotiʼapimogimo oʼmaiʼnayaʼmonanafa Ala kava neʼmoʼa lagaeʼeʼmo magokepiʼmo lokaeno maiʼniye. Apakaefeʼmo koliʼapimo osiyo, huʼana hapa paiʼnaʼae.

¹⁰ Inagi muki Isaleli vayaʼmogi Kelepiʼe Yasuvaʼeʼmo huʼnaʼa gemo oʼafiʼa ina gemo huʼapaeʼmo, Yafa kayotetiʼmo kamitimo anamagisunageʼana faligaʼae, huʼa huʼnageno Ala kava neʼmo ha le konali yaʼamo apaulagaleʼmo seli mono nopatiʼmo aeno ha leʼnigeʼa ageʼnae.

Moseseʼmo Isaleli vayaʼaifeʼmo nunumuʼmo huno apateʼniya gemae

¹¹ Inagi Ala kava neʼmoʼa Mosesefeʼmo ha painoʼaeʼmo, Na magi afinaʼmo ani vayaʼmogi apakameʼyamo namigae. Nagaemo apakae folagapiʼmo asole noʼagaya agufa naune kavaʼmo huʼnovaʼmonanafa na magi afinaʼmo nagaefeʼmo apakesamo afiʼa fatago osugae.

¹² Nagaemo alopa hosu kaita kayotetiʼmo apamagiʼna aliʼna hano huʼna apatalegauve. Nagaemo apakae apaimuʼyaleʼmo alopa lokiya Isaleli vayaʼmo maiʼnaya vayaʼmo aeʼa apaka seʼa maisayafeʼmo alo huʼna apatesugeʼa vayakamo maigae, huno ha paiʼniye.

¹³ Gotiʼa ha paiʼnigenoʼaeʼmo Moseseʼmo Ala kava nefeʼmo ina ge huno ha paiʼniye. Kagaemo lokiyakaletiʼmo ani vayaʼmo Isipi kotegatiʼmo apavaleteka ago apavalelika eʼnanaʼmofeʼmo vayakamo apamagisanaʼmoʼmo Isipi vayaʼmogimo ani kavafeʼmo ava gemo afigae.

¹⁴ Afiteʼa ani mopaleʼmo maiʼnaya vayaʼaifeʼmo hapa paigae. Ani vayaʼmogimo afiteʼapaeʼmo kagaemo Ala kava neʼmogamo lagaeʼeʼmo magokepiʼmo lokaeka maiʼnane. Kagaemo Ala kava neʼmogamo laugosafiʼmo lageʼnanageta kaugosafiʼmo kageʼnone. Hiyakamoʼmo lagaeteʼmo haneʼnigekaeʼmo felugamo posigana agufa hiyapiʼmo maiteka uka hogotege haniʼilagamo posigana agufa ata vaipiʼmo maiteka uka hogotege huʼnane, huʼa afiʼnae.

¹⁵ Inagi kagaemo muki vayakamo kamitimo apamagisanaʼmoʼmo alu nofi vaya alu nofi vayaʼmogimo ala kagikalefeʼmo afiʼnaya vayaʼmogimo afiteʼapaeʼmo,

¹⁶ Ala kava neʼmoʼa agoʼyamo ataleno apamiguve, huno huʼniya koteʼmo vayaʼamo afaʼa apavalelino oʼukiyaʼmofeʼmo kaʼme kotegamo apamagiʼniye, huʼa hugae.

¹⁷ Inagi Ala kava nene, huʼna, Kagaemo alopa lokiyakamo alika laveliteka ani kavaʼmo huguve, huka hu maleʼnana kavakamo huvo, huʼna nunumuʼmo nehuve. Kagaemo ina ge huka huʼnane.

¹⁸ Nagaemo Ala kava neʼmoʼnamo malage huʼna naipamo olege lusi kava huʼna nahau huʼna apatege hosu kavaʼapiʼe geʼnimo amagiʼa neʼatalaya kavaʼapiʼeʼmo aliʼna atalege nehuve. Neʼatalovaʼmonanafa vaiʼapimo haneʼniya vayaʼmo afaʼa apakegeʼna oʼapategauve. Nagaemo afoʼapimogimo huʼnaya hosu kavaʼapiletiʼmo mafaʼne anagaʼapigi lotoʼapimogiʼenagi apakinago vayaʼenagi huʼna kayoʼmo apamiguve, huka huʼnane.

¹⁹ Nunumuʼmo huʼnaeʼmo, Lusi kava huka kahau huka neʼapatana kavakalefeʼmo hosu kavaʼapimo alika atalo. Kagaemo Isipi koʼmo ataleʼnaya afinaʼmo hosu kavaʼapimo alika ataleteka alika ataleme ataleme eka hemeniʼeʼmo alika neʼatalana agufa kavaʼmo huka alika atalo, huʼna nehuve.

²⁰ Inagi Ala kava neʼmoʼa Moseseʼmo huʼniya gemo afitenoʼaeʼmo, Naha paiʼnana gelefeʼmo hosu kavaʼapimo aliʼna ataleʼnovaʼmonanafa

²¹ nagaemo afaʼa maiʼnova kava huʼna lama gemo nehuʼnaeʼmo, Ala kava neʼmoʼna ha le konali yaʼnimoʼmo muki haopalegamo ma mopafiʼmo aino atagu faeno hanelinuneno huno haneno havaitegaiye.

²² Muki mani vayaʼmogimo ha le konali yaʼnimo agege Isipi kotegaʼe kaʼme kotega hau huʼniya kotegaʼeʼmo noʼagaya agufa naune kavaʼmo huʼnogeʼa agege huʼnayaʼmonanafa naya loleʼa afinaʼmo geʼnimo oʼafiʼa namalageka huʼnae.

²³ Alagi lama gemo nehuve. Apakaemo mani vayapatiʼmo alagi magoke vayaʼmo ani kotefeʼmo apakinago vayaʼaifeʼmo lapamiguve, huʼna nagoʼyamo ataleteʼna hapa paiʼnova koteʼmo uʼa oʼagegae. Muki apakameʼyamo namiʼnaya vayaʼmo alagi uʼa oʼagegae.

²⁴ Oʼagegayaʼmonanafa aliʼyaʼnimo neʼaliya vekamo Kelepiʼmo aeto agufa aunemeʼamo haneʼnigeno ago nakame huno hano huʼniyaʼmofeʼmo nagaemo uʼniya kotegamo avaleliʼna visugeno uno ageteno maigiye. Aginago nofi mafaʼne anagaʼmogimo ani mopamo aliteʼa maigae.

²⁵ Hemenimo Amaleki vayaʼe Kenani vayaʼeʼmo ani kagoʼmu koteʼmo maiʼnae. Egamo lapakaemo mani haopalegatiʼmo ataletapa ataginetapa kaʼme kotega haesa solovala anitegamo uʼniya kateʼmo viyo, huno hapa paiʼniye.

Ala kava neʼmoʼa, Nagaefeʼmo ge nahauʼnaya vayaʼmo apamagisugeʼa faligae, huno huʼniya gemae

²⁶ Ala kava neʼmoʼa Moseseʼe Eloniʼefeʼmo hana painoʼaeʼmo,

²⁷ Muki Isaleli vayaʼmogi nagaefeʼmo ge nahauʼnae. Na magi afinaʼmo magoʼe huʼna apakeʼna apataleme apataleme visugeʼa afaʼa maigae. Isaleli vayaʼmogimo nagaefeʼmo ge nahauʼnaya gemo afiʼnove.

²⁸ Lanakaemo mani geʼnimo apakaefeʼmo hapa paiʼao. Ala kava neʼmoʼnamo lama gemo huʼnaeʼmo, Afaʼa maiʼnove, huʼna huʼnova kava huʼna naha paiʼnaya kavaʼmo lapakaetegamo huguve.

²⁹ Nagaefeʼmo muki ge nahauʼnaya vayaʼmo falisageno ani kaʼme koteʼmo apakufaʼamo hanegaiye. Mukiʼamogitapamo tuvetiʼa kafugamo aeta aga seta maiʼnisaya vayaʼmo mani koteʼmo alagi faligae.

³⁰ Nagaemo uta lapamisuva mopaleʼmo maigae, huʼna polomasi gemo lama gemo nagoʼyamo ataleʼna hu maleʼnovaʼmonanafa lapakaemo muki vayaʼamo afaʼa oʼugae. Kelepiʼmo Yefune mafaʼneʼe Yasuvaʼmo Nani mafaʼneʼekeʼmo afaʼa ugaʼae.

³¹ Muki vayaʼamo mani kaʼme koteʼmo faligayaʼmonanafa kame vayatimogimo aise mafaʼne anagatimo kalavusi huʼa apategae, hutapa huʼnaya mafaʼne anagatapimo alagepa koteʼmo apavaleliʼna uguve. Apakaefeʼmo lapakaemo hutapaeʼmo, hosu koʼmo haneʼniye, hutapa huʼnaya koʼmo uʼa haiʼa ageteʼa alagepa huʼa oʼmaigae.

³² Agegayaʼmonanafa lapakaemo mani kaʼme koteʼmo faligae.

³³ Aʼne anagaʼmogimo anauʼapimogimo apataleʼa uʼa kumai kavaʼmo nehaya agufa kavaʼmo hutapa lapakaemo nataleʼnayaʼmofeʼmo mafaʼne anagatapimogimo hosu kavaʼmo anonatapilefeʼmo kana yaʼmo aligae. Apakaemo fotiʼa kafugamo fikumo umenitata nehisagetapaeʼmo lapakaemo alagi falita hano hugae.

³⁴ Lapakaemo ani kotegamo uta mopamo agesayafeʼmo fotiʼa afinaʼmo umenitata huʼnaya kava hutapa fotiʼa kafugamo kaʼme kotegamo umenitata nehutapaeʼmo faligae. Magoke afinatefeʼmo magoke kafugamo hosu kavatapilefeʼmo kana yaʼmo alita kofilitapa utapaeʼmo oʼnahauʼniya kavaʼmo huʼnayaʼmofeʼmo kametapimo maisugetapaeʼmo alita lapamalagigae.

³⁵ Nagaemo Ala kava neʼmoʼnamo ani gemo nehuve. Nagaemo ani hosu vayaʼmogi kame huʼa natesayafeʼmo aliʼa anupa huʼa maiʼnaya vayaʼaitegamo ani kavaʼmo huguve, huʼna huʼnova kavaʼmo alagi huguve. Nagaemo mani kaʼme koteʼmo aliʼna hano huʼna apatalesugeʼa faligae.

^36-37 Apakaemo ani mopamo ageteʼa esayafeʼmo Moseseʼmo alino apateʼnigeʼa uteʼa atagineʼa eʼa aigofe gemo huʼnageʼapaeʼmo muki Isaleli vayaʼmogi Ala kava nefeʼmo ge hauʼnayaʼmofeʼmo Ala kava neʼmo mopaeʼmo aigofe gemo huʼnaya vayaʼmo alopa kaita kayoʼmo apamiʼnigeʼa faliʼnae.

³⁸ Faliʼnayaʼmonanafa Yasuvaʼmo Nani mafaʼneʼe Kelepiʼmo Yefune mafaʼneʼeʼmo uʼa Kenani mopamo ageʼnaya vayapatiʼmo ofaliʼana afaʼa maiʼnaʼae.

Isaleli vayaʼmo uʼa haiʼa kamemo huʼnayaʼmonanafa kame vayaʼapimogimo huʼa aeʼa apaka seʼnaya gemae

³⁹ Moseseʼmo Ala kava neʼmoʼa ha paiʼniya gemo Isaleli vayaʼaifeʼmo hapa paiʼnigeʼa lusi kava huʼa yulagefa aiʼnae.

⁴⁰ Inagi egamo gotilamiyapiʼmo apakaemo he tiʼa avelegamo visayafeʼmo uʼa Mosesefeʼmo ha paiʼapaeʼmo, Lagaemo hosu kavaʼmo huʼnonaʼmofeʼmo hemenimo manileʼmo maiʼnonanageta Ala kava neʼmoʼa lapamiguve, huno huʼniya kotegamo ugune, huʼa ha paiʼnae.

⁴¹ Moseseʼmo hapa painoʼaeʼmo, Na kava higetapaeʼmo Ala kava neʼmo geʼamo amagitapa neʼatalae. Uta haigayana kametapimo afaʼa aeta apaka osegae.

⁴² Ala kava neʼmo lapakaeʼeʼmo magokepi lokaeno oʼmaiʼniyanagi uta ohaiyo. Fiku yanageʼa kame vayatapimogimo kamemo huʼa aeʼa lapaka segae.

⁴³ Lapakaemo visageʼapaeʼmo Amaleki vayaʼmogiʼe Kenani vayaʼmogiʼeʼmo kame lahapaesagetapa faligae. Lapakaemo Ala kava neʼmo ago ataleʼnayanageno lapakaeʼeʼmo magokepi lokaeno oʼmaigiyaʼmofeʼmo kamemo huʼa aeʼa lapaka segae, huno hapa paiʼniye.

⁴⁴ Hapa paiʼniyaʼmonanafa geʼamo oʼafiʼa fikumo ave kotegamo uʼa haiʼnae. Haiʼnayaʼmonanafa Moseseʼmo seli noʼmo aliʼa he tiʼa ateʼnaya yategamo afaʼa maiʼnigeno Ala kava neʼmo kotalake kesiʼamo aliniʼa oʼuʼnageno afaʼa haneʼniye.

⁴⁵ Inagi Isaleli vayaʼmo uʼa haiʼnageʼapaeʼmo Amaleki vayaʼe Kenani vayaʼeʼmo ave kotetiʼmo ataleʼa emiʼeʼa kamemo huteʼa huʼa aeʼa apaka seteʼa apavegala aeliʼa uʼa Homa taonifilagamo apataleʼnae.