Napa 13 - The Keyagana NT and 25 OT booksMoseseʼa Kenani kotegamo uʼa kame hisayafeʼmo mago vayaʼmogi uʼa ageʼa alagepa hisayafeʼmo alino apateʼnigeʼa uʼnaya gemae 1 Ala kava neʼmoʼa Mosesefeʼmo ha painoʼaeʼmo, 2 Kagaemo Kenani kotegamo uʼa ageʼa alagepa hisayafeʼmo mago ve anagaʼmo alika apato. Nagaemo ani mopamo aliʼna Isaleli vayaʼaina apamiguve. Kagaemo magoke magoke Isaleli nofi vayapatiʼmo yagaiʼa apateʼnaya vayaʼmo alika apato. 3 Inagi Moseseʼa Ala kava neʼmo geʼamo akame huno Pelani yahaofilagatiʼmo Isaleli vayaʼaiteʼmo yagaiʼa apateʼnaya vayaʼmo alino apateʼnigeʼa uʼnae. 4 Apakiʼapimo Lumeni nofi vekamo Samuva mafaʼnemo Yakaʼae. 5 Simiyoni nofi vekamo Holai mafaʼnemo Sefatiʼae. 6 Yuta nofi vekamo Yefuna mafaʼnemo Kelepiʼae. 7 Isaka nofi vekamo Yosefe mafaʼnemo Aigaliʼae. 8 Ifalemi nofi vekamo Nani mafaʼnemo Hoseyaʼae. 9 Menisemani nofi vekamo Lafu mafaʼnemo Palataiʼae. 10 Sepaluni nofi vekamo Sotai mafaʼnemo Ganiyoʼae. 11 Yosefe nofi vekamo Susai mafaʼnemo Gaʼnaiʼae. 12 Nani nofi vekamo Gemalai mafaʼnemo Amiyoʼae. 13 Asa nofi vekamo Maika mafaʼnemo Setuʼae. 14 Napatali nofi vekamo Vafasai mafaʼnemo Namaiʼae. 15 Gati nofi vekamo Mekai mafaʼnemo Geyuvoʼae. 16 Moseseʼmo Kenani kotegamo uʼa ageʼa alagepa hisayafeʼmo alino apateʼnigeʼa uʼnaya vayaʼmogi apakiʼapimo haneʼniye. Moseseʼmo Hoseyaʼa Nani mafaʼneeʼmo Yasuvaʼae huno agi aeʼniye. 17 Inagi Moseseʼmo ani vayaʼmogimo uʼa Kenani kotegamo ageʼa alagepa hutesageʼa Isaleli vayaʼmo uʼa kame hisayafeʼmo alino apateʼnigeʼa uʼnae. Moseseʼmo hapa painoʼaeʼmo, Lapakaemo hoga haopalegamo uʼniya kateʼmo uta haitetapa lamaga haopalega Kenani ave koteʼmo uta haiyo. 18 Lapakaemo haiya agufa koʼmo haneʼnigeʼa na magi vayaʼmo maiʼnafi, hutapa ageta alagepa hutetapa lokiya nofi vayaʼmo maiʼnafi oʼmaiʼnafi, hutapa kahauya hutapa apakeyo. 19 Ani koteʼmo alagepa mopamo haneʼnifi ohaneʼnifi, hutapa agetetapa taonifiʼmo maiʼnaya vayaʼmo afa taonifiʼmo maiʼnafi lokiya kegiʼyamo haneʼniya taonifiʼmo maiʼnafi, hutapa ageyo. 20 Ani mopaʼmo lanitani mopamo haneʼnifi ohaneʼnifi, hutapa ageta alagepa huge yahaoʼmo haneʼnifi ohaneʼnifi, hutapa agege hiyo. Koli osutapa lokiya vaitapa maiyo. Mago yosa alagamofi nofi alagamofi hutapa alinita eyo, huno hapa paiʼniye. Moseseʼmo nofi alagamo aepa faino afu neleya afinaʼmogenoʼaeʼmo ani gemo hapa paiʼniye. 21 Inagi ani vayaʼmo uʼa muki haopalega mopamo lamaga haopalega Yini kaʼme kotetiʼmo aepa faiʼa ageteʼa ageliʼuʼa Lihopi taonimo Hemati taonilegamo uʼniya ka avayaleʼmo hoga haopalegamo uʼnae. 22 Apakaemo hogoteʼa lamaga haopalegamo uteʼa Hipaloni taonifiʼmo uʼa avaʼyi huʼnae. Enaki aginago vayaʼmo Ahaimani nofi vayanagi Sisei nofi vayanagi Talamei nofi vayanagi huʼa Hipaloni taonifiʼmo maiʼnae. Apakaemo alopa alopa vayakefakefamo Enaki nofi vayane, huʼa apaki aeʼnae. Mago vayaʼmogimo Hipaloni taonimo kitagenoʼaeʼmo seveniʼa kafugamo ago utegeʼa Isipi vayaʼmogimo Yovani taonimo kiʼnae. 23 Inagi apakaemo Esakoli kagoʼmu koteʼmo uʼa avaʼyi huteʼapaeʼmo nofiʼmoʼa asole alagamo aeʼniya akopamo magokeʼageʼmo hatagauʼnae. Lole vekalaʼmoganimo ani akopamo kayoteʼmo maleʼana nofi kiteʼana aliniʼana eʼnaʼae. Aliteʼapaeʼmo fiki yosa alagamo lagiʼa alige pamagalanati yosa alagamo lagiʼa alige huliʼa uʼnae. 24 Isaleli vayaʼmogimo ani nofi akopamoʼmo asole alagamo aeʼniya akopamo hatagauʼnayaʼmofeʼmo ani kagoʼmu kofeʼmo Esakoli kone, huʼa agi aeʼnae. Esakoli kone agimo aepaʼamo asole neʼyaʼmo haneʼniya kotene. 25 Apakaemo fotiʼa afinaʼmo ageʼa umenitata huteʼa aiʼa atagi neʼa eʼnae. 26 Apakaemo ataleʼa Mosesetegagi Elonitegagi muki Isaleli vayaʼaitegagi huʼa halate eʼnae. Mukiʼamo Kenesi taonimo haopaleʼmo Pelani koʼmo hau huʼniya koteʼmo maiʼnae. Apakaemo ageʼnaya kavafeʼmo hapa paiteʼa ani aliniʼa eʼnaya neʼyaʼmo aliʼa apave liʼnae. 27 Apakaemo Mosesefeʼmo ina ge huʼa ha paiʼnae. Kagaemo utapa ageyo, huteka ani alika lateʼnana kotegamo ago uta ageʼnone. Kanale mopamo asole mopamo haneʼniye. Ago, huʼa, lagaemo ani kotetiʼmo mago neʼyaʼmo alinita eʼnone. 28 Eʼnonaʼmonanafa ani kote vayaʼmo lusi kava huʼa lokiya vaiʼnageno taoniʼapimo alopa taonimo haneʼnigeno lokiya yafa kegiʼyamo haneʼniye. Lagaemo apakeʼnonana Enaki nofi vayaʼmogi apakinago mafaʼne anagaʼmo maiʼnageta apakeʼnone. Apakaemo alopa alopa vayakefakefamo maiʼnae. 29 Amaleki vayaʼmo lamaga haopalegamo maiʼnageʼa Hiti vayanagi Yemusi vayanagi Emo vayanagi huʼa ave koteʼmo maiʼnageʼa Kenani vayaʼmo alopa Metaleniyani solovala aniʼmo haopaleʼe Yoneni ani haigifiʼeʼmo maiʼnae, huʼa ha paiʼnae. 30 Mago vekamo agiʼamo Kelepiʼmo Mosese aulagaleʼmo muki maiʼnaya vayaʼaifeʼmo, ge osiyo, huteno, lagaemo uta kame hapaeteta mopaʼapimo afaʼa aligunaʼmofeʼmo hemenitomo uta haita mopaʼapimo aligune, huno hapa paiʼniye. 31 Hapa paiʼniyaʼmonanafa Kelepiʼeʼmo magokepi uʼnaya vayaʼmogimo huʼapaeʼmo, Apakaemo lusi kava huʼa lokiya vaiʼnaya vayaʼmo maiʼnayaʼmofeʼmo aeʼa laga seʼnaya vayaʼmogeta kame huta afaʼa aeta oʼapakasegaune, huʼa huʼnae. 32 Huʼa huteʼa ani uʼa ageʼnaya kotegaeʼmo Isaleli vayaʼaifeʼmo aigofe gemo huʼnae. Apakaemo huʼapaeʼmo, Lagaemo uta ageʼnona koʼmoʼa ani koteʼmo maiʼnaya vayaʼmo hapaeno neʼniye. Lagaemo muki vayaʼmo apakeʼnonana lusi yatala vayaʼmo maiʼnageta apakeʼnone. 33 Uta apakeʼnonana Enaki nofi vayaʼmo alopa alopa vayakefakefamo maiʼnageta apaketetaeʼmo lagaemo ina agufa yaʼmo akenukana hutageʼmo maiʼnone, huta lagesamo afiʼnone. Apakaeʼeʼmo lagaefeʼmo akenukana hutapageʼmo maiʼnae, huʼa lageʼnae, huʼa hapa paiʼnae. |
© 2013, Wycliffe Bible Translators, Inc. All rights reserved.
Wycliffe Bible Translators, Inc.