Napa 12 - The Keyagana NT and 25 OT books

Miliyamuʼe Eloniʼeʼmo Mosesefeʼmo hosu gemo huʼana ge hauʼnaʼa gemae

¹ Moseseʼmo Itiyopiya kotegatiʼmo mago a kanomo aliʼniyaʼmofeʼmo ani kavatefeʼmo Miliyamuʼe Eloniʼeʼmo Mosesefeʼmo hosu gemo huʼana ge hauʼnaʼae.

² Anakaemo ina gemo huʼanaeʼmo, Ala kava neʼmoʼa Mosese avayaletikeʼmo gemo aeno hakalo huno hapa paiʼnifiye. Haʼao. Agaemo laʼagae laʼavayaletiʼeʼmo gemo aeno hakalo huno hapa opaiʼnifiye, huʼana huʼnaʼae. Ala kava neʼmoʼa ani gemo afiʼniye.

³ Ani vekamo Moseseʼmo agaiʼamo lusi kava huno alino afepiʼmo neʼateya agufa kavaʼmo huʼa muki ma mopafi vayaʼmogimo osuʼnae.

⁴ Ala kava neʼmoʼa malage huno Mosesefenagi Elonifenagi Miliyamufenagi huno hapa painoʼaeʼmo, Lapakaemo seli mono notegamo eyo, huno hapa paiʼnigeʼa eʼnae.

⁵ Eʼa maiʼnagenoʼaeʼmo Ala kava neʼmoʼa hiyapiʼmo maiʼneno emineno seli no kipateʼmo he tino maiʼneno Eloniʼe Miliyamuʼefeʼmo keya aeno ge huʼniye. Anakaemo agaetegamo eʼnaʼae.

⁶ Ala kava neʼmoʼa hunoʼaeʼmo, Lanakaemo geʼnimo afiʼao. Mago vekamoʼmo nagaetegati gemo alinineno aeno hakalo huno hapa nepaiya vekamo Isaleli vayaʼmogi folagapiʼmo maiʼnisiyaʼmoʼmo nagaemo alagamunagana yaʼmo aliʼna avelige nagesiyafeʼmo aliʼna avelige alagamuna gemo ha paige nehuve.

^7-8 Nehuvaʼmonanafa aliʼyaʼnimo neʼaliya vekamo Mosesetegamo ani agufa kavaʼmo nosuve. Agaemo noʼnifiʼmo afamo anaga vayaʼnilefeʼmo aliʼyaʼamo oʼataleno alagepa aliʼyaʼmo alino afole aino atesiya vekamo augosafiʼmo ageʼnogeno naugosafiʼmo nageʼnigeʼnaeʼmo ge nehuve. Nagaemo aeʼna kalafefa agufa gemo huʼna ha nopaufa huʼna halenageʼmo ha nepauve. Ha nepaugenoʼaeʼmo agaemo nageʼniye. Ani kavaʼmo Mosesetegamo nehuvaʼmofeʼmo na agufa kava higetanaeʼmo koli osutana aliʼyaʼnimo neʼaliya vekamo Mosesepikeʼmo gemo alitana faitana ateʼnaʼae.

⁹ Ala kava neʼmoʼa aipamo leno anateteno anataleno uʼniye.

¹⁰ Ani hiyaʼmo seli noʼmo agotofuleʼmo haneʼniyatetiʼmo ataleno neʼvigenoʼaeʼmo malage huno Miliyamuʼa lepolosi kaitaʼmo hauʼnigeno agufamo alino yaveyaveʼage agufamo hamaleʼniye. Eloniʼa aino afe leno Miliyamuʼmo ageyana lepolosi a kanomo alino hamaleʼniye.

¹¹ Inagi Eloniʼmo Mosesefeʼmo hunoʼaeʼmo, Ala vekae, huʼna, Laʼagaemo hosu kavatiʼamo anonatiʼalefeʼmo olaʼamiyo. Negi nagi kavaʼmo hutetaʼa hosu kavaʼmo huʼnoʼae.

¹² Kahaoke huve, huʼna, afaʼa oʼategenoʼa faliʼniya vekagana huno maigiye. Hosu kavaʼmoʼa itaʼapimogi aliʼa apateʼnaya mafaʼnemo apakufamo aino akauʼniya mafaʼnegana huno maigiye.

^13-14 Moseseʼa Ala kava nefeʼmo alopa gefatiʼmo hunoʼaeʼmo, O Gotiyo, huno, Kahaoke hovanagi alika hageka ato, huno nunumuʼmo nehigenoʼaeʼmo Ala kava neʼmoʼa Mosesefeʼmo hunoʼaeʼmo, Afoʼamo augosafiʼmo avenatuʼnamo heniyesinana seveniʼa afinaʼmo avagage osuʼniyesipiye. Lapakaemo seli notetiʼmo alita ha faitalegenoʼao malaga seveniʼa afinaʼmo ago utesigeno halate hainegaiye, huno ha paiʼniye.

¹⁵ Inagi Isaleli vayaʼmogimo Miliyamuʼmo aliʼa seli noteʼmo malagamo ateʼnageno seveniʼa afinaʼmo maiʼniye. Maiʼnigeʼapaeʼmo Isaleli vayaʼmo he tiʼa alu haopalegamo oʼuʼnae.

¹⁶ Henagaʼamo apakaemo Hayeloti kotetiʼmo ataleʼa uʼa hau huʼniya koʼmo Palani yahaofilagamo seli noʼapimo aliʼa he tiʼa ateʼnae.