Napa 11 - The Keyagana NT and 25 OT books

Isaleli vayaʼmogimo asole gemo huteʼa ge neʼnagenoʼaeʼmo Gotiʼa apamagiʼniya gemae

¹ Isaleli vayaʼmogimo apakaetegamo afole aiʼniya hanageke yafeʼmo asole gemo huteʼa ge neʼnagenoʼaeʼmo Ala kava neʼmoʼa afiteno ohauʼnigeno lusi kava huno aipamo leʼniye. Aipamo leʼnigenoʼaeʼmo seli noʼapileʼmo maiʼnageno Ala kava neʼmo atamoʼmo mago haopaʼalega afelagaʼamo leno apasagaliʼnigeʼa faliʼnae.

² Inagi ve aʼnemogimo Mosesefeʼmo keya aeʼa ge huʼnageno Moseseʼa Ala kava nefeʼmo nunumuʼmo huʼnigeno atamo yu heʼniye.

³ Moseseʼa ani kotefeʼmo agiʼamo Tamela kotene, huno ateʼniye. Ala kava neʼmo atamoʼmo apaleʼniyaʼmofeʼmo ani agimo ateʼniye.

⁴ Muki asole alu nofi vayaʼmo Isaleli vayaʼeʼmo magokepiʼmo uʼnaya vayaʼmogimo ameʼamo mago nesayafeʼmo lusi kava huno hapauʼnigeno hapaʼye huʼnigeʼa Isaleli vayaʼeʼmo halate aviʼyaʼmo huteʼa huʼa faipa huʼapaeʼmo, ina laʼmo ameʼamo lamigiye. Lagaemo Isipi koteʼmo maiʼnetaeʼmo lamu paesiya agufa noyamemo afa neʼnone.

⁵ Lagaemo konogi melenigi anianinagi galikigi huta neʼnonanageta hemenimo nesunafeʼmo lusi kava huta lagesamo neʼafune.

⁶ Alagepa neʼyaʼmo neʼnonaʼmonanafa hemenimo muki lagufafatiʼmo lokiyatimo ago uʼniye. Neʼyatimo alagi ohaneʼniyaʼmonanafa mani mana neʼyaʼagekeʼmo haneʼniye, huʼa huʼnae.

⁷ Manamo mago aise vego vego yaʼmo namuyasoʼmoʼa lenoʼaeʼmo afu neleya agufa yakana huno haneʼniye.

⁸ Haniʼilagamo seli noʼmo aliʼa he tiʼa ateʼnaya yateʼmo lao yaʼmo emineʼnigenoʼaeʼmo manaʼeʼmo magokepiʼmo asagauno aiʼniye. Netepiʼmo ve aʼnemo he tiʼa uʼeʼa huʼa manamo aliʼnae. Aliteʼapaeʼmo magoʼamogimo yafatetiʼmo lata paige magoʼamogimo yosa atupaletiʼmo amagiʼa lata paige huʼnageno falaovamo alino hamaleʼniye. Aliʼa samofiʼmo kaeteʼa miseketiʼmo alo huʼnae. Apakaemo neʼnagenoʼaeʼmo peleti mayamo olivi kalisifiʼmo kaeʼnaya peleti mayamoʼmo nehiya agufa hagamo huʼniye.

⁹ Haniʼilagamo seli noʼapilegamo lao yaʼmo asagauno aiʼnigenoʼaeʼmo manaʼeʼmo magokepi asagauno aiʼniye.

¹⁰ Inagi ve aʼnemogimo afamo anagaʼapiʼe anagaʼapiʼeʼmo seli noʼapimo kipateʼmo maiʼneʼa lusi kava huʼa aviʼyaʼmo huʼnageno Moseseʼmo afiʼniye. Ala kava neʼmoʼa lusi kava huno aipamo leno apateʼnigeno Moseseʼeʼmo ani kavafeʼmo ohauʼniye.

¹¹ Ala kava nefeʼmo ina ge huno ha paiʼniye. Kagaemo na agufa kavaʼmo higekaeʼmo lusi kana yaʼmo namiʼnane. Kagaemo na agufa kavaʼmo higekaeʼmo nagaefeʼmo nahaoke oseka muki mani vayaʼaiteʼmo yagaiʼna apatesuvafeʼmo ani kana yaʼmo namiʼnane.

¹² Nagaemo akanogana huʼna naipaguʼeʼmo maiʼnogeʼa muki ani ve aʼnemo afole aiʼnafiye. Nagaemo itaʼapimoʼnamo maiʼneʼna aliʼna apateʼnofiye. Aliʼna oʼapateʼnovaʼmofeʼmo kagaemo naha paikaeʼmo, Kagaemo itaʼapimogagana huka yagaika apateteka aise mafaʼnegana huka kayateʼmo apavalelika apakinago vayaʼaifeʼmo ani mopamo lapamiguve, huʼna polomasi gemo huʼnova mopaleʼmo uvo, huka afaʼa naha opaigane.

¹³ Mani vayaʼmogimo aviʼyaʼmo nehuʼapaeʼmo, nesuna ameʼamo lamiyo, ameʼamo lamiyo, huʼa nehae. Nagaemo muki asole vayaʼaina apamisuvafeʼmo asole ameʼamo haiyaʼaletiʼmo aliguve.

¹⁴ Lusi kana yaʼmo haneʼniyanageʼna nagaemo magokeʼamoʼnamo mani muki vayaʼmo nagiʼniletiʼmo alagi yagaiʼna apateteʼna afaʼa apavaleliʼna oʼuguve.

¹⁵ Kaulagaleʼmo fiku naha maeka namisana kavaʼmo ageteʼna aliʼnisuvana kamitimo namagiyo. Alagi hosu kavaʼmo huʼna oʼmaiguvanagi.

Sevetiʼa vayatama vayaʼaifeʼmo apava gemo huʼniya gemae

¹⁶ Inagi Ala kava neʼmoʼa Mosesefeʼmo hunoʼaeʼmo, kagaemo sevetiʼa vayatama vayaʼmo apavalelika seli mono noteʼmo nagaetegamo eno. Kagaemo ago apakeʼnanageʼa yagaiʼa neʼapataya vayatama vayaʼmo apavalelika seli noʼnileʼmo egeʼa kagaeʼeʼmo magokepi he tiʼa maigae.

¹⁷ Inagi nagaemo emiʼneʼna kagaeʼeʼmo gege huguʼae. Nagaemo kagaeteʼmo maiʼniya Aunemeʼamo kamiʼnova Aunemepatiʼmo mago aliʼna apamiguve. Apamisugeʼa kaha maeʼa aliʼnana kana yapatiʼmo alisageka kagaikageʼmo muki kana yaʼamo oʼaligane.

¹⁸ Inagi kagaemo Isaleli vayaʼaifeʼmo ina ge huka hapa paiyo. Lapakaemo lapakaitapimo alita lapaote lapateyo. Egamo alo hutapa maiʼnetapa ameʼamo alita negae. Ala kava neʼmoʼa lapakaemo ameʼaeʼmo aviʼyaʼmo huʼnaya gemo ago afiʼniye. Aulagaleʼmo aviʼyaʼmo hutetapa ge hutapaeʼmo, Lagaemo Isipi kotegamo alagepa huta maiʼnonaʼmofeʼmo ina laʼmo ameʼamo lamigiye, hutapa huʼnae. Huʼnayaʼmofeʼmo Ala kava neʼmoʼa ameʼamo lapamigiyanagetapa lapakaemo negae.

^19-20 Lapakaemo ameʼamo magoke afinaʼmofi lole afinaʼmofi faefuʼa afinaʼmofi teniʼa afinaʼmofi tuvetiʼa afinaʼmofi hutapa oʼnegayaʼmonanafa magoke kaileʼmo ameʼamo neme neme neʼvisagenoʼaeʼmo ameʼamo nesayafeʼmo alagaʼmo lahapaeteno muʼmo valisaya lapaipamo kaligiye. Lapakae folagapiʼmo maiʼniya Ala kava neʼmo lapakameʼyamo amitetapaeʼmo aulagaleʼmo aviʼyaʼmo hutetapaeʼmo, na kava higetaeʼmo lagaemo Isipi kotegatiʼmo ataleta eʼnone, hutapa huʼnae.

²¹ Inagi Moseseʼa hunoʼaeʼmo, Ala kava nene, huʼna, nagaemo sigisi hataleti tauseniʼa vayaʼaiteʼmo yagaiʼnovana kagaemo magoke kaileʼmo nesayafeʼmo ameʼamo apamiguve.

²² Lagaemo muki pulumakagi sipisipigi huta amagita hano hisunagenoʼaeʼmo ani ameʼamoʼmo alagi kanale hapaugifiye. Muki noyamemo solovala anipiʼmo maiʼnaya noyamemo aliʼa anupa huʼa apatesayana alagi kanale ohapaugiye.

²³ Ala kava neʼmoʼa Mosesefeʼmo ha painoʼaeʼmo, Nagaemo lokiyaʼnimo hano huʼnifiye. Hemenimo kaha paiʼnova kavaʼmo afole aisifi oʼaisifigeka agegane.

²⁴ Inagi Moseseʼa afitenoʼaeʼmo kumatega uno lamino Ala kava neʼmoʼa huʼniya gemo Isaleli vayaʼaifeʼmo hapa paiteno sevetiʼa vayaʼmo yagaiʼa apateʼnaya vayaʼmo alino anupa huno apateʼneno seli noteʼmo alino he tino faino vego huno apateʼniye.

²⁵ Maiʼnagenoʼaeʼmo Ala kava neʼmo ani hiyapiʼmo maiteno emineno Mosesefeʼmo ha paiʼniye. Agaemo Moseseʼeʼmo maiʼniya Aunemeʼafatiʼmo alino sevetiʼa vayatama vayaʼaina apamiʼnigeʼa Gotitegati gemo aliniʼeʼa aeʼa hakalo huʼa hapa paiʼnae. Huʼnayaʼmonanafa henagaʼamo halate ani kavaʼmo osuʼnae.

²⁶ Lole vekalaʼmogani anakiʼanimo Elanatiʼe Minatiʼeʼmo oʼuʼana seli noʼapilegamo maiʼnaʼageno Aunemeʼamo emineno anakaeteʼmo maiʼnigeʼanaeʼmo Gotitegati gemo aliniʼeʼana aeʼana hakalo huʼnaʼae. Anakaemo sevetiʼa vayatama vayaʼeʼmo anakiʼanimo haneʼniyaʼmonanafa seli mono noteʼmo oʼuʼnaʼae. Oʼuʼnaʼaʼmonanafa seli noteʼmo Goti gemo aeʼana hakalo huʼnaʼae.

²⁷ Mago neya vekamoʼmo nagu nagu huno uno Mosesefeʼmo ina ge huno ha paiʼniye. Elinatiʼe Minatiʼeʼmo seli noteʼmo maiʼneʼanaeʼmo Gotitegati gemo aliniʼeʼana aeʼana hakalo nehaʼae, huno ha paiʼniye.

²⁸ Yasuvaʼmo Nani mafaʼnemo Moseseʼa lekana paino ateʼnigeno ha maeʼniya vekamoʼmo Mosesefeʼmo hunoʼaeʼmo, Ala vekae, huno, Lole vekalafeʼmo ge osutana afaʼa maiʼao, huka hana paiyo,

²⁹ huno huʼniyaʼmonanafa Moseseʼa hunoʼaeʼmo, Nagaetefeʼmo kagesamo afiʼnekaeʼmo ke nefaipiye. Haʼao, Ala kava neʼmoʼa muki vayaʼaina Aunemeʼamo apamisigeʼa agaetegati gemo aliniʼeʼa aeʼa hakalo hisayafeʼmo nahauʼniye.

³⁰ Inagi Moseseʼe Isaleli vayatama vayaʼeʼmo seli notegamo atagi neʼa uʼnae.

Ala kava neʼmoʼa seli noʼapileʼmo asole nama anagaʼmo alino apataleʼnigeʼa eʼnaya gemae

³¹ Inagi Ala kava neʼmoʼa alopa solovala anipatiʼmo yasimo alino ateʼnigeno aliteno asole nama anagaʼmo apavalelino eʼnigeʼa mopa afafaleʼmo magoke mitamo haleliʼa eʼnae. Seli noʼapimo haneʼniya yateʼmo hapaku aige aige huʼa maige malaga mopaleʼeʼmo maige huʼnae. Seli noʼapileʼmo uʼeʼa huʼa mago kilomitamo mopaleʼmo aiʼa ati kaeʼnae.

³² Apakaemo ve aʼnemogimo asole nama anagaʼmo felugagi haniʼilagagi egagi huʼa apatafauʼnae. Mago vayaʼmogi teniʼa talamu agufa nama apatafauge mago vayaʼmogi magoʼe huʼa apatafauge huʼnae. Apakaemo nama anagaʼmo apafa kaiʼa mopafiʼmo yegeleʼmo hau huʼnageno ameʼamo leno vaiʼniye.

³³ Apakaemo aepa faiʼa namamo ameʼamo neʼnagenoʼaeʼmo inagi Ala kava neʼmo malage huno aipamo leno apateteno alopa hosu kaitamo alino ateʼnigeno apakaetegamo eʼnigeʼa asole ve aʼnemo faliʼnae.

³⁴ Apakaemo ani koteʼmo ani ve aʼnemogi apakufaʼamo kiʼa apateteʼapaeʼmo ani koʼmo agiʼamo ve aʼnemogimo ameʼaeʼmo lusi kava huno hapauʼniya kanoluve, huʼa ateʼnae.

³⁵ Inagi Isaleli vayaʼmo ani kotetiʼmo ataleʼa uʼa Hayeloti koteʼmo seli noʼapimo aliʼa he tiʼa ateʼnae.