Matiyu 8 - The Keyagana NT and 25 OT books

Lepolosi kaitaʼmo hauʼniya vekamo alino hageno ateʼniya gemae

¹ Yesuʼa avelefatiʼmo emineʼnigeʼapaeʼmo asole vayaʼmo akame huʼa emiʼeʼnae.

² Inagi lepolosi kaitaʼmo hauʼniya vekamo agaetegamo eno aleʼya faiʼnenoʼaeʼmo, Ala kava nene, huno, kahauʼnisiyana afaʼa alika nahageka nategane, huno huʼniye.

³ Huʼnigeno Yesuʼa ayaʼmo alino ataleno agufaleʼmo maleʼnenoʼaeʼmo, Nahauʼniyanagi alagepa huka afaʼa maiyo, huno nehigenoʼaeʼmo lepolosi kaitaʼamo malage huno hageʼniye.

⁴ Yesuʼa ha painoʼaeʼmo, kateʼmo neʼukaeʼmo mago vayaʼaifeʼmo hapa opaika mono huno neʼapateya vekalegageʼmo uka aliʼna kahageʼna kateʼnova kagufamo alika ave liyo. Apakaemo lepolosi kaitaʼamo ago hageʼniye, huʼa kagesayafeʼmo kagufamo alika ave liteka akeyaʼvilagamo Moseseʼa amiyo, huno huʼniya ofalinimo amiyo, huno ha paiʼniye.

Ati vayaʼaiteʼmo yagaino neʼapateya vekaeʼmo huʼniya gemae

⁵ Yesuʼa Kapeneyamu taonifiʼmo uno nehaigenoʼaeʼmo mago Lomu nofi vekamo ati vayaʼaiteʼmo yagaino neʼapateya vekamoʼmo ha maesiyafeʼmo ge huno afi geʼniye.

⁶ Ala kava nene, huno, aliʼyaʼnimo neʼaliya vekamo noʼnifiʼmo lusi kava huno agafu kiʼnigeno alagi kanage kanaga osuno havaeno maiʼniye, huno ha paiʼnigenoʼaeʼmo,

⁷ Uʼna afaʼa aliʼna hageʼna ategauve, huno ha paiʼniye.

⁸ Yagaino neʼapateya vekamoʼmo hunoʼaeʼmo, Ala kava nene, huno, Kagaemo noʼnifiʼmo eka haikeka maisana agufa kava huʼna oʼmaiʼnovanagi keʼageʼmo hugenoʼao aliʼyaʼnimo neʼaliya vekamo hagesigeno he tino alagepa huno maigiye.

⁹ Mago vayaʼmogi yagaiʼa nateʼnageʼna nagaemo ati vayaʼaiteʼmo yagaiʼna neʼapatove. Mago vekaeʼmo uvo, huʼna nehugenoʼaeʼmo neʼviye. Mago vekaeʼmo eno, huʼna nehugenoʼaeʼmo neʼe. Aliʼyaʼnimo neʼaliya vekaeʼmo huʼnaeʼmo, ani aliʼyaʼmo aliyo, huʼna nehugenoʼaeʼmo ani aliʼyaʼmo afaʼa neʼaliye, huno ha paiʼniye.

¹⁰ Yesuʼa ani gemo afitenoʼaeʼmo hau aiʼniye. Agaemo akame nehaya vayaʼaifeʼmo, Lama ge lapa nepauve, huno, Nagaemo muki Isaleli vayaʼai apaipafiʼmo ani agufa lokiya apakesa afiʼa fatago huʼnaya kavaʼapimo oʼapakeʼnove.

¹¹ Lapa nepauve, huno, asole vayaʼmo Yu nofi vayapatiʼmo oʼmaiʼnaya vayaʼmo yegemo haine neʼeya kotegatiʼmo ege yegemo uno lamino nefaleya kotegatiʼmo ege huʼa Gotiʼa yagaino neʼapateya kopiʼmo uʼa haiʼa Emalehamuʼagi Aisikiʼagi Yekopuʼagi huʼa magokepi lokaeʼa maiʼneʼa neʼyaʼmo neʼa maigayaʼmonanafa

¹² Gotiʼa yagaino neʼapateya kotetiʼmo mafaʼneʼamo hani kopiʼmo alino yaga auno apatalesigeʼapaeʼmo malaga maiʼneʼa aviʼyaʼmo huge apavepiʼmo haniʼa agafu kige huʼa maigae, huno huteno

¹³ yagaino neʼapateya vekaeʼmo, Naha maegaiye, huka kagesamo afika fatago huʼnanaʼmofeʼmo kaha maegauvanagi afaʼa uvo, huno ha paiʼnigeno ani afinaʼmo aliʼyaʼamo neʼaliya vekamo kaitaʼamo hageʼnigeno he tino alagepa huno maiʼniye.

Yesuʼa asole vayaʼmo kaitaʼmo alino hapageno apateʼniya kavafeʼmo huʼniya gemae

¹⁴ Yesuʼa Pita nopiʼmo uno haino ageyana Pita ayemoʼamoʼmo amuko kaitaʼmo hauʼnigeno havaeno maiʼnigeno ageʼniye.

¹⁵ Agaemo ageteno ayateʼmo ayaʼmo maleʼnigeno amuko kaita hauʼniya kaitaʼamo ago hageʼnigeno he tino neʼyaʼmo yagita huno apamiʼniye.

¹⁶ Uneʼamo Yesutegamo asole hosu apaune vayaʼmo vayaʼai apaipafiʼmo maiʼnaya vayaʼmo apavaleliʼeʼa apateʼnae. Yesuʼa geʼaletiʼmo hosu apaune vayaʼmo vayaʼai apaipafatiʼmo alino hapa faino apatalegeʼa uʼnagenoʼaeʼmo muki alu kaita alu kaitaʼmo hapauʼniya vayaʼeʼmo alino hapageno apateʼniye.

¹⁷ Agaemo Aiyeyaʼa Gotitegati gemo alinineno aeno hakalo huno hapa nepaiya vekamoʼmo mani kavafeʼmo huʼniya kavaʼmo afole aisiyafeʼmo huʼniye. Aiyeyaʼa hunoʼaeʼmo, Agaemo alu kaita alu kaitaʼmo lahauʼniya kaitaʼmo laha maeno alininuno ataleʼniye, huno avoʼmo kae maleʼniye.

Yesuʼa akame hisaʼa vekalaʼanifeʼmo hana paiʼniya gemae

¹⁸ Yesuʼa apakeyana asole vayaʼmogi eʼa faiʼa vego huʼa ateʼnageno apaketenoʼaeʼmo geʼamo neʼafiya vayaʼaifeʼmo, mugagayaga faligamo lakaeta vigetao, huno hapa paiʼniye.

¹⁹ Mago vekamo keʼaepa gemo avoʼmo kaeno alino apaya neʼmaleya vekamoʼmo agaetegamo eno ha painoʼaeʼmo, Tisao, huno, haiya kotegamo visapigeʼna afaʼa kakame huʼna uguve, huno ha paiʼnigenoʼaeʼmo

²⁰ Yesuʼa geʼaleʼmo aeno atagaina huno ha painoʼaeʼmo, Afela kalamogi nehavaya kelimo hanege namamogi apanoʼmo hanege huʼniyaʼmonanafa Vemo mafaʼnemo havaesiya noʼmo ohaneʼniye, huno ha paiʼniye.

²¹ Mago alu vekamo geʼamo neʼafiya vekamoʼmo hunoʼaeʼmo, Ala kava nene, huno, kanalene, huka hugeʼnao hogoteʼna uʼna afoʼnimoʼmo aliʼna kiʼna ateteʼnae, huno huʼnigenoʼaeʼmo,

²² faliʼnaya vayaʼmogimo falisaya vayaʼapimo aliʼa kiʼa apategayanagi kagaemo atalekeka nakame huvo, huno ha paiʼniye.

Yesuʼa yasiʼe aniʼefeʼmo afaʼa maiʼao, huno huʼniya gemae

²³ Yesuʼa sipifiʼmo uno haino maiʼnigeʼa geʼamo neʼafiya vayaʼmo akame huʼa haiʼa sipifiʼmo maiteʼa uʼnae.

²⁴ Neʼvagenoʼaeʼmo malage huno ani kotuteʼmo lusi kava huno yasimo aliʼnigeno aniʼmoʼa aino holakau holakau huno uno haino sipifiʼmo havaiteteno aeno lapanegefeʼmo huʼniyaʼmonanafa Yesuʼa aukeʼmo kaleno maiʼniye.

²⁵ Geʼamo neʼafiya vayaʼmogimo uʼa hau neʼa ateteʼapaeʼmo, Ala kava nene, huʼa, hogoʼamo ago aniʼmo nesuna agufa kavaʼmo nehunagi he tika lagufamo alika katika lato, huʼa huʼnagenoʼaeʼmo,

²⁶ Aiseʼatoʼamo lapakesamo afita fatago huʼnaya vayanagi na kava higetapaeʼmo koli nehae, huno hapa paitenoʼaeʼmo he tino yasiʼe aniʼefeʼmo afaʼa maiʼao, huno ke hanauʼnigeʼana yasiʼe aniʼeʼmo alagi afaʼa haneʼnaʼae.

²⁷ Muki vayaʼamogimo ani kavaʼmo ageteʼapaeʼmo hapau aiteʼa, Vae, huʼa, yasimoʼe aniʼmoʼeʼmo geʼamo afiteʼana afaʼa maiʼnaʼagi ani vekamo na agufa vekamo maiʼniye, huʼa huʼnae.

Yesuʼa lole vekalaʼani anaipafatiʼmo hosu apaune vayaʼmo alino hapa faino apataleʼniya gemae

²⁸ Yesuʼa ani kotuʼmo lakaeno mugagayaga faliga Gegasini vayaʼai haopalega uno avaʼyi nehigeʼanaeʼmo lole vekalaʼmo faliʼnaya vayaʼmo kiʼa neʼapataya yafa no kapatiʼmo eʼana Yesuʼeʼmo fotu huʼnaʼae. Anaipafiʼmo hosu apaune vayaʼmo maiʼnayaʼmofeʼmo lusi kava huʼana negi maleteʼana afela kavaʼmo nehaʼa vekalaʼmo maiʼnaʼaʼmofeʼmo muki vayaʼmo ani haopalegamo oʼuʼnae.

²⁹ Anakaemo eʼana Yesuʼeʼmo fotu huteʼanaeʼmo, Goti mafaʼneʼamogae, huʼa, lagaetegamo na agufa kava huka latesanafeʼmo neʼane. Kayoʼmo lamisana afinaʼmo afole oʼaiʼniyanagi lagafu yaʼmo alika lamisanafeʼmo neʼapiye, huʼa afi geʼnae.

³⁰ Asole afu anagaʼmo aise afagiʼaleʼmo kahaumo neʼa maiʼnae.

³¹ Hosu apaune vayaʼmogimo Yesufeʼmo, Alika laha faika latalegefeʼmo hukaeʼmo asole afu anagaʼai apaipafiʼmo alika laha faitalegeta faletuta haita maino, huʼa ha paiʼnagenoʼaeʼmo,

³² afaʼa viyo, huno hapa paiʼnigeʼa lole vekalaʼani anaipafatiʼmo ataleʼa apaune heʼa uʼa afu anagaʼai apaipafiʼmo faleʼa uʼa haiʼnae. Faleʼa uʼa haiʼnageʼapaeʼmo muki afu anagaʼamo aulafilegatiʼmo nagu nagu huʼa uʼa lamiʼa anipiʼmo asagauʼa aiteʼa aniʼmo neteʼa faliʼnae.

³³ Ani afu anagaʼaiteʼmo yagaiʼa neʼapataya vayaʼmo apaune hetaleʼuʼa taonifilagamo muki huʼniya kavafeʼmo ava gemo huʼa hapa paige Yesuʼa ani lole vekalaʼani anaipafiʼmo hosu apaune vayaʼmo maiʼnaya vekalaʼanitegamo huʼniya kavafeʼmo ava gemo huʼa hapa paige huʼnae.

³⁴ Muki taonifiʼmo maiʼnaya vayaʼmogimo uʼa Yesuʼmo ageteʼapaeʼmo, kahao ke honanagi, lagae kotetiʼmo ataleka uvo, huʼa ha paiʼnae.