Matiyu 4 - The Keyagana NT and 25 OT books

Sataniʼa Yesuʼmo amalageka huʼniya gemae

¹ Yoniʼa Yesuʼmo aniʼmo faleno atetegenoʼaeʼmo Goti aote Aunemeʼamoʼmo Yesuʼmo avalelinuno Nevoʼa amalageka hisiyafeʼmo kaʼme kotegamo ateʼniye.

² Agaemo fotiʼa felugaʼe haniʼilagaʼeʼmo neʼyaʼmo oʼneno maiʼnigeno aga teʼnigeno maiʼniye.

³ Apamalageka nehiya vekamoʼmo agaetegamo eno avaʼyi huteno, Goti mafaʼneʼamo maiʼnisanana mani yafafeʼmo, peleti mayamo alika hamalo, huka huvo, huno ha paiʼniye.

⁴ Yesuʼa geʼaleʼmo aeno atagaina huno ha painoʼaeʼmo, Goti mukufiʼmo avoʼmo kae maleʼniya gemoʼmo hunoʼaeʼmo, vayaʼmogimo peleti mayaʼageʼmo neʼnisayana alagepa huʼa oʼmaigayaʼmonanafa Gotiʼa avayafatiʼmo muki huʼniya geʼamo afiteʼapaeʼmo alagepa huʼa maigae, huno ha paiʼniye.

⁵ Nevoʼa aote taonifiʼmo avalelinuno alopa aote yatala mono noʼmo nokatoʼmuleʼmo avalelino uno haino alino he tino ateʼnenoʼaeʼmo,

⁶ Goti mafaʼneʼamo maiʼnisanaʼmoʼmo aeka lako aika asagauka aiyo. Mukufiʼmo avoʼmo kae maleʼniya gemoʼmo hunoʼaeʼmo, Gotiʼa enisole vayaʼaeʼmo, yagaitapa ateyo, huno hapa paiteno alino apatesigeʼa emi eʼa katafausageno yafateʼmo kaiyafiʼmo okahaegaiye, huno huʼniyaʼmofeʼmae, huno ha paiʼniye.

⁷ Ha paiʼniyaʼmonanafa Yesuʼa, magoʼe huno mukufiʼmo avoʼmo kae maleʼniya gemoʼmo hunoʼaeʼmo, Ala kava neʼmo Gotitapimofeʼmo amalageka osiyo, huno avoʼmo kae maleʼniye, huno ha paiʼniye.

⁸ Nevoʼa halate yatala avefiʼmo avalelinuno haino ateʼnenoʼaeʼmo muki ma mopafi haneʼniya yaʼamogi ala kini vayaʼai konagi mopagi konali yaʼapimogi huno alino ave liʼniye.

⁹ Ave liteno ha painoʼaeʼmo, nagaeteʼmo kaleʼyamo faiʼneka mono hisanaʼmoʼmo muki mani yaʼamo afaʼa kamiguve, huno ha paiʼniye.

¹⁰ Yesuʼa hunoʼaeʼmo, Sataniyo, huno, ataleka kaune ho. Mukufiʼmo avoʼmo kae maleʼniya gemoʼmo hunoʼaeʼmo, Ala kava netapimo Gotitapimofekeʼmo mono hutetapa agaekeʼmo akame hiyo, huno avoʼmo kae maleʼniye, huno ha paiʼnigeno

¹¹ Nevoʼa ataleno uʼnigeʼapaeʼmo enisole vayaʼmogimo emiʼeʼa ha maeʼnae.

Yesuʼa Galeliya kotegamo uno aliʼyaʼamo aepa faino aeno hakalo huno hapa paiʼniya gemae

¹² Mago vayaʼmogimo huʼapaeʼmo, Yoniʼa ago kalavusi huʼa ateʼnae, huʼa huʼnageno Yesuʼa afitenoʼaeʼmo ani haopalegatiʼmo ataleno Galeliya kotegamo uʼniye.

¹³ Agaemo Nasalasa taonifiʼmo uno oʼmaiʼnifa Galeliya kotega ani kotu agiʼnaleʼmo haneʼniya taonimo Sepalani koteʼe Nafatalai koteʼeʼmo haneʼniya taonimo Kapeneyamu taonifiʼmo uno maiʼniye.

¹⁴ Aiyeyaʼa Gotitegati gemo alinineno aeno hakalo huno hapa nepaiya vekamoʼmo huʼniya gemo afole aisiyafeʼmo uno maiʼniye. Aiyeyaʼa hunoʼaeʼmo,

¹⁵ Alopa kaniʼamoʼmo Sepalani koʼe Nafatalai koʼeʼmo haneʼniya haopalegamo solovala aniʼmo mugagayaga faliga Yoneni aniʼmo uno nelamiya haopalega Galeliya kotega alu nofi vayaʼmo maiʼnaya vayaʼaitegamo aeno ha leʼnigeʼa ageʼnae.

¹⁶ Ha le yaʼmoʼmo hani huʼniya yapiʼmo maiʼnaya vayaʼaitegamo aeno ha leʼnigeʼa ageʼnae. Nefaliya aune kavaʼmoʼa apakenopaleʼmo kino apati kaeʼnigeʼa hani huʼniya yapiʼmo maiʼnaya vayaʼaitegamo aeno ha leʼniye, huno avoʼmo kae maleʼniye.

¹⁷ Yesuʼa ani haopalegamo uno aepa faino aeno hakalo huno hapa painoʼaeʼmo, Gotiʼa vayaʼaiteʼmo yagaino apatesiya afinaʼmo ago hogo huʼniyanagi lapaipamo alita afe leyo, huno hapa paino maiʼniye.

Yesuʼa loleʼe loleʼe vayaʼaifeʼmo ge huʼniya gemae

¹⁸ Yesuʼa Galeliya kotega ani kotu agiʼnaleʼmo uneno nehunoʼaeʼmo anakeyana lole konagalaʼmo noyame neʼaliʼa vekalaʼmo maiʼnaʼageno anakeʼniye. Mago vekamo agiʼamo Saimoniʼmo mago alu agiʼamo Pitaʼe konagaʼamo agiʼamo Eʼnaluʼeʼmo umenimo ani kotupiʼmo yaga auʼana neʼmalaʼageno anakeʼniye.

¹⁹ Yesuʼa hunoʼaeʼmo, Noyamemo neʼaliʼa kava hutana vayaʼmo apavalelitana nagaetegamo esaʼafeʼmo aliʼna lanaya malegauvanagi etana nakame hiʼao, huno hana paiʼniye.

²⁰ Malage huʼana umeniʼanimo ataleʼeʼana akame huʼnaʼae.

²¹ Akame huʼnaʼageno Yesuʼa uno anakeyana mago alu lole konagalaʼmo Sepeti mafaʼnelaʼmo Yemisiʼe aganaʼamoʼmo Yoniʼeʼmo sipifiʼmo maiʼnaʼageno anakeʼniye. Anakaemo afoʼanimoʼeʼmo umenimo aliʼana alagepa nehaʼageno

²² Yesuʼa keya aeno ge huʼnigeʼanaeʼmo malage huʼana sipiʼe afoʼanimoʼeʼmo ataleʼeʼana akame huʼnaʼae.

Yesuʼa kaita hapauʼniya vayaʼmo alino hapageno apatege Goti gemo aeno hakalo huno hapa paige huno maiʼniya gemae

²³ Yesuʼa Galeliya haopalegamo umenitata huno muki Yu vayaʼai mono nopiʼmo alino apaya malege Gotiʼa yagaino apatesiya kavafeʼmo alagepa faigoko gemo aeno hakalo huno hapa paige muki alu kaita alu kaitaʼmo hapauʼniya vayaʼmo alino hapageno apatege muki hosu apakufamo kaliʼniya vayaʼmo alino alagepa huno apatege huno maiʼniye.

²⁴ Ani kavaʼmo huʼniya ava gemoʼmo muki Siliya kotegamo aino atagu faeno uneno huʼnigeʼa afiteʼapaeʼmo muki alu kaita alu kaitaʼmo hapauʼniya vayanagi lusi kava huno apakafu nekiya vayanagi hosu apaune vayaʼmo apaipafiʼmo maiʼnaya vayanagi hafosa neʼapamagiya vayanagi kanage kanaga osuʼa neʼmaiya vayanagi huʼa agaetegamo apavaleli eʼa apateʼnageno alino hapageno apateʼniye.

²⁵ Muki asole vayaʼmo Galeliya haopalegatiʼmo ege Nekapolisi haopalegatiʼmo ege Yulusalemu taonifatiʼmo ege Yutiya haopalegatiʼmo ege Yoneni aniʼmo mugagayaga faliga haopalegatiʼmo ege huʼa eʼa akame huʼnae.