Matiyu 3 - The Keyagana NT and 25 OT books

Yoniʼa aniʼmo faleno apateʼniya vekamoʼmo aeno hakalo huno hapa paiʼniya gemae

¹ Ani afinaʼmo aniʼmo faleno apateʼniya vekamo Yoniʼa eno Yutiya kotegamo kaʼme koteʼmo maiʼneno aepa faino aeno hakalo huno hapa paiʼniye.

² Hapa painoʼaeʼmo, Gotiʼa vayaʼaiteʼmo yagaino apatesiya afinaʼmo alagi ago hogo huʼniyanagi lapaipamo alita afe leyo, huno hapa paino maiʼniye.

³ Aiyeyaʼa Gotitegati gemo alinineno aeno hakalo huno hapa nepaiya vekamoʼmo Yonifeʼmo ava gemo hunoʼaeʼmo, Mago vekamo eno kaʼme kotega maiʼnenoʼaeʼmo, Ala kava neʼmo esiya kaʼmo valita ateyo. Esiya kaʼmo api kaʼmo valita ateyo, huno keya aeno ge nehiye, huno avoʼmo kae maleʼniye.

⁴ Yoniʼa kukenaʼamo kamolu afumo ayokatetiʼmo alo huʼnaya kukenamo vaiteno kamolu agufaletiʼmo alo huʼnaya mapalumo afafaleʼmo aeteno akenuʼe lumemo anuʼeʼmo neno maiʼniye.

⁵ Asole vayaʼmo alopa taonimo Yulusalemu taonifatiʼmo agaetegamo ege muki Yutiya kotega aluga aluga haopalegatiʼmo ege Yoneni aniʼmo uno nelamiya haopalegatiʼmo ege huʼnae.

⁶ Apakaemo eʼa hosu kavaʼapieʼmo aeʼa hakalo huʼa ha paiʼnageno Yoneni anipiʼmo aniʼmo faleno apateʼniye.

⁷ Asole Falasi mono vayanagi Satiyusi mono vayanagi huʼa aniʼmo faleno apatesiyafeʼmo agaetegamo eʼnageno apaketenoʼaeʼmo, Nagaloʼyave vayaʼmogitapae, huno, Gotiʼa aipamo leno lapatesiya afinaʼmo ago afole aigefeʼmo nehiyanagi ina laʼmo, afaʼa faita kasalo paegae, huno lapa paiʼniye.

⁸ Lapaipamo alita afe leʼnisayana saufa kavaʼmo hutapa nave liyo.

⁹ Lapakaemo hutapaeʼmo, Emalehamuʼa lagaiti laginago vekatimo maiʼniye, hutapa lapakesamo oʼafiyo. Gotiʼa mani yafapatiʼmo Emalehamu aginagoʼamo afaʼa alino hamaleno apategaiye.

¹⁰ Koʼneletiʼmo yosamo hafuʼyaʼaʼeʼmo heno halagatino atalesiyafeʼmo ago alo huno maleʼniye. Agaemo muki yosamoʼmo alagepa alagamo noʼaesiyana koʼneletiʼmo heʼya aino atafiʼmo kaegaiye.

¹¹ Nagaemo lapaipamo alita afe leʼnaya kavatefeʼmo aniʼaletikeʼmo faleʼna nelapatovanageno nagae nakame huno esiya vekamoʼmo Goti Aote Aunemeʼaletiʼe ataletiʼeʼmo aniʼmo faleno lapategaiye. Agaemo lokiyaʼamoʼmo nagaemo lokiyaʼnimo ago aeno naga seʼniyaʼmofeʼmo afa vekamo maiʼneʼna aliʼyaʼamo neʼaluva agufa vekaʼagana huʼna maiʼnovanageʼna suʼamo aliniʼna visuva kavaʼmo huʼna afaʼa oʼmaiʼnove.

¹² Agaemo sipetiʼamo ayapiʼmo aliʼniyanageno vitimo haletiʼyaʼamo sipetiletiʼmo haleteno neʼyaʼamo alino noʼafiʼmo anupa huno maleteno haletiʼyaʼamo alino yu oseno neleya atafiʼmo kaegaiye, huno hapa paiʼniye.

Yoniʼa Yesuʼmo aniʼmo faleno ateʼniya gemae

¹³ Ani afinaʼmo Yesuʼa Galeliya kotegatiʼmo Yoniʼa aniʼmo faleno atesiyafeʼmo Yoneni anitegamo eʼniye.

¹⁴ Eʼniyaʼmonanafa Yoniʼa ge huno atafauno atesiyafeʼmo hunoʼaeʼmo, Kagaekeʼmo aniʼmo faleka nateganaʼmonanafa kagaemo nagaetegamo eʼnane, huno ha paiʼnigenoʼaeʼmo

¹⁵ Yesuʼa hunoʼaeʼmo, he, ani kavaʼmo haneʼniyaʼmonanafa hemenimo kagaemo geʼnimo afa akame hugetaʼao. Muki Goti fatago kavaʼamo alitaʼa afole aitaʼa ategauʼae, huno ha paiʼnigenoʼaeʼmo Yoniʼa hunoʼaeʼmo, he kanalene, huno huʼniye.

¹⁶ Yoniʼa Yesuʼmo aniʼmo faleno atetegenoʼaeʼmo Yesuʼa anipatiʼmo haineneʼegenoʼaeʼmo kokuʼnaʼmo aino akaka vaeʼnigeno ageyana Goti Aunemeʼamo kaugoʼyave namagana huno agaeteʼmo emineʼnigeno ageʼniye.

¹⁷ Kokuʼnapatiʼmo mago gemo hunoʼaeʼmo, ani vekaeʼmo nagaiʼni nahau nayamopafiʼmo nahauʼniya mafaʼneʼnimo maiʼniye. Agaefeʼmo lusi kava huʼna amuse huʼna neʼatove, huno huʼniye.