Matiyu 28 - The Keyagana NT and 25 OT books

Yesuʼa he tiʼniya gemae

¹ Sapati afinaʼmo ago hano hutegeno hogote afinaʼmo afole aiʼnigeʼanaeʼmo kotilamiyapiʼmo Maliyaʼa Maganala kotega aʼe mago hamoʼamo Maliyaʼeʼmo kanoluleʼmo agesaʼafeʼmo uʼnaʼae.

² Ala kava neʼmo enisole vekaʼamo kokuʼnapatiʼmo emineno avayale yafaʼmo alino heleve hulinuno maleteno ani yafateʼmo fai maiʼniyaʼmofeʼmo lusi imimamo aliʼniye.

³ Uʼana agaʼana alino alave nehiya yakana agufa vekamo fai maiʼnigeno kukenaʼaletiʼmo yaveyaveʼage huʼnigeʼana ageʼnaʼae.

⁴ Kanoluleʼmo yagaiʼa maiʼnaya ati vayaʼmogimo ageteʼapaeʼmo lusi kava huʼa koli huteʼa atete huteʼapaeʼmo mopafiʼmo apagoʼya faiteʼa faliʼnaya vayakana huʼa maiʼnae.

⁵ Enisole vekamoʼmo lole atalafeʼmo, koli osiʼao. Malipu yosaleʼmo nili aiteʼa aliʼa he tiʼa ateʼnaya vekamo Yesuʼmo agesaʼafeʼmo neʼaʼae, huʼna lanakeʼnove.

⁶ Manifiʼmo oʼmaiʼnifa ago he tino uʼniye. Hogoteno ofalino afaʼa maiʼnenoʼaeʼmo, alino he tino nategaiye, huno lapa paiʼniya kavaʼmo ago afole aiʼniyanagi etana havaeʼniya yaʼamo ageʼao.

⁷ Agetetana malage hutana utana geʼamo neʼafiya vayaʼaifeʼmo, kanolufatiʼmo ago alino he tino ateʼniyanageno Galeliya kotegamo uno hogo netegaiyanagetapa mugaʼnilegamo agegae, hutana hapa paiʼao. Alagi lama gemo lahana nepauve, huno hana paiʼniye.

⁸ Inagi kanolulegatiʼmo malage huʼana ataleʼana koli nehuʼanaeʼmo anamogaga aime aime neʼuʼanaeʼmo geʼamo neʼafiya vayaʼaifeʼmo hapa paisaʼafeʼmo nagu nagu huʼana uʼnaʼae.

⁹ Uʼanaeʼmo malage huʼana Yesuʼeʼmo katega fotu huteʼapaeʼmo Yesuʼa ge anamamaeʼniye. Agaetegamo uʼana aiyafiʼmo anagoʼya faiteʼana aiyaleʼmo atafauʼneʼana mono huʼnaʼae.

¹⁰ Yesuʼa, utana naganaʼnimogifeʼmo, muga Galeliya kotegamo viyo. Muganilegamo nagegae, hutana hapa paiʼao, huno hana paiʼniye.

Ati vayaʼmogimo faigoko gemo huʼnaya gemae

¹¹ Lole atalaʼmo neʼvaʼageʼapaeʼmo kanoluʼaleʼmo yagaiʼa maiʼnaya ati vayapatiʼmo mago vayaʼmogimo Yulusalemu taonimo alopa taonifiʼmo uʼa mono huʼa neʼapataya vayaʼaiteʼmo yagaiʼa neʼapataya vayaʼaifeʼmo muki afole aiʼniya kavafeʼmo faigoko gemo huʼa hapa paiʼnae.

¹² Ani gemo afiteʼapaeʼmo vayatama vayaʼaifeʼmo ge huʼnageʼa eʼa aliʼa anupa huʼa maiʼneʼapaeʼmo mago gemo hu maleʼnae.

¹³ Apakaemo ati vayaʼmo alopa monimo apamiteʼa hapa paiʼapaeʼmo, ago lau kaleʼnonageʼapaeʼmo geʼamo neʼafiya vayaʼmogimo eʼa aliniʼa uʼnae, hutapa hapa paiyo.

¹⁴ Yagaino neʼapateya gamani vekamoʼmo ani faigoko gemo afitenoʼaeʼmo aipamoʼmo falu hisiya agufa gemo ha paisunageno hanageke yaʼmo olapamigiye, huʼa hapa paiʼnae.

¹⁵ Inagi ati vayaʼmogimo monimo aliteʼapaeʼmo uʼa ina gemo hiyo, huʼa huʼnaya agufa gemo huʼnae. Mani faigoko gemoʼa Yu vayaʼaitegatiʼmo aino atagu faeno uneno hume hume eno hemeniʼeʼmo haneʼniye.

Yesuʼa geʼamo neʼafiya vayaʼai apaulagaleʼmo afole aiʼniya gemae

¹⁶ Leveniʼa vayaʼmo geʼamo neʼafiya vayaʼmogimo Yesuʼa viyo, huno hapa paiʼniya avelegamo Galeliya kotega uʼnae.

¹⁷ Ageteʼapaeʼmo apagoʼya faiʼneʼa mono huʼnayaʼmonanafa mago vayaʼamogimo lole apakesamo afiʼnae.

¹⁸ Yesuʼa apakaetegamo enoʼaeʼmo, muki himamuʼamo kokuʼnapinagi ma mopafi kavatenagi vayaʼaitenagi huʼna yagaisuva himamuʼamo ago namiʼniye.

¹⁹ Namiʼniyaʼmofeʼmo uta muki alu nofi alu nofi vayaʼmo alita apaya malegeʼapao geʼnimo afisaya vayaʼmo hamaleyo. Hamalesagetapaeʼmo Afoʼnimo agiʼaletinagi mafaʼneʼamoʼna nagiʼniletinagi aote Aunemeʼamo agiʼaletinagi hutapa aniʼmo faleta apateyo.

²⁰ Aniʼmo faleta apatetetapaeʼmo muki ma kavaʼmo hiyo ina kavaʼmo hiyo, huʼna lapa paiʼnova gemo akame hiyo, hutapa alita apaya maleyo. Lama gemo lapa nepauve, huno, nagaemo lapakaeʼeʼmo magokepi lokaeʼna maime maime neʼvisugenoʼaeʼmo ma mopaʼe kokuʼnaʼeʼmo hano hisiya afinaʼmo afole aigiye, huno hapa paiʼniye. He, lama ge.