Matiyu 24 - The Keyagana NT and 25 OT books

Yesuʼa Yulusalemu taonifiʼmo alopa mono noʼmo heʼa halagape vaigae, huno huʼniya gemae

¹ Yesuʼa alopa mono nopatiʼmo ataleno neʼvigeʼapaeʼmo geʼamo neʼafiya vayaʼmo agaetegamo eʼa alopa mono nokofeʼmo, ago, huʼa huʼnagenoʼaeʼmo,

² muki nokoʼamo ageʼnafiye. Lama ge lapa nepauve, huno, magoke yafateʼmo akalo akalo huno ohanegaifa heʼa halagape vaiʼa ataleteʼa muki yafaʼamo aliʼa akoliʼa aote aote huʼa atalegae, huno hapa paiʼniye.

Hano hisiya afinaʼmo aune kavaʼmo alino apave lisiya kavafeʼmo huʼniya gemae

³ Yesuʼa Alifiʼaepa avefiʼmo itopaleʼmo maiʼnigeʼapaeʼmo geʼamo neʼafiya vayaʼmo apakaiʼapigeʼmo agaetegamo eʼapaeʼmo, ina afinaʼmo afole aigiye, huka laha paiyo. Emikegefeʼmo hisana afinaʼe hano hugefe hisiya afinaʼeʼmo na agufa alagena kavaʼmo afole aigiye, huʼa ge huʼa afi geʼnae.

⁴ Yesuʼa, humi olapatesayafeʼmo alagepa hutapa yagaita lapateyo.

⁵ Asole vayaʼmogi nagiʼnimo aeliʼa neʼeʼapaeʼmo, Kalaisiʼnamo maiʼnove, huʼa huteʼa asole vayaʼmo humi apategayaʼmofeʼmae.

⁶ Lapaopaleʼmo kamemo hisaya kavafeʼmo ava gemo hisagetapa afige afagi kotegamo kamemo hisaya kavafeʼmo ava gemo hisagetapa afige hutetapaeʼmo atete huteta koli osiyo. Ani kavaʼmo afole aigiyaʼmonanafa hano hugefe hisiya afinaʼmo afole oʼaigiyaʼmonanafa henagaʼamo atupa afinakeʼmo afole aigiye.

⁷ Mago nofi vayaʼmogi alu nofi vayaʼeʼmo kamemo huge mago gamani vayaʼmogi alu gamani vayaʼeʼmo kame huge muki haopalega kafu hu kavaʼmo afole aige imimaʼmo alige hugiye.

⁸ Aʼnemogimo mafaʼnemo aliʼa atesayafeʼmo aepa faino apakafu nekiya kava huno saufa afinaʼmo aepa faino ani agufa kavaʼmo afole aigiye.

⁹ Ani agufa kavaʼmo afole aisigeʼapaeʼmo kalavusi huʼa lapateteʼa lapavaleli uʼa vayaʼai apayapiʼmo lapatesageʼa kayoʼmo lapamiteʼa kamitimo lapamagigae. Apakaemo muki nofi vayaʼmogi nagiʼnilefeʼmo apaini huʼa lapategae.

¹⁰ Ani afinaʼmo afole aisigeʼapaeʼmo muki asole vayaʼmo apakesamo afiʼa fatago huʼnaya kavaʼapimo ataleteʼa konagaʼapimogi kutulu yaʼmo neteʼa apakaefeʼmo apaini hugae.

¹¹ Asole aigofe gemo alini eʼa aeʼa hakalo huʼa hapa paisaya vayaʼmo afole aiteʼa asole vayaʼaifeʼmo humi apategae.

¹² Muki vayaʼmogimo magoʼe huʼa hosu kavaʼmo hugayaʼmofeʼmo asole vayaʼmogi hapau apayamopafiʼmo nehapaiya kavafeʼmo ohapausigeʼa apayalo falo hugae.

¹³ Hugayaʼmonanafa oʼataleʼa atafauʼa alagi huʼa maime maime uʼa atupa afinaʼmo afole aisagenoʼaeʼmo apakufamo alino katino apateteno hapau vaigiye.

¹⁴ Mago vayaʼmogimo muki alu nofi alu nofi vayaʼmogi afisayafeʼmo mani gemo Gotiʼa yagaino neʼapateya kavafeʼmo alagepa faigoko geʼamo aeʼa hakalo huʼa hapa paisageno muki ma mopafiʼmo aino atagu faeno uneno nehisigenoʼaeʼmo hano hisiya afinaʼmo afole aigiye.

¹⁵ Gotitegati gemo alinineno aeno hakalo huno hapa nepaiya vekamo Naniyoʼa alagi hosu faipa yaʼmoʼa alino hosu huno atesiya kavafeʼmo ava gemo huno avoʼmo kae maleʼniye. Lekana nepaiya vayaʼmogitapamo afiyo. Ani faipa yaʼmo aote mono nopiʼmo hanesigeta

¹⁶ agetetapaeʼmo Yuta kotega maiʼnaya vayaʼmo lapaune hetapa avelegamo uta haiyo.

¹⁷ Kumatega maiʼnisaya vayaʼmogimo kagemi yaʼapimo alisayafeʼmo noʼapifiʼmo uʼa ohaiyo.

¹⁸ Hoyaʼapilega maiʼnisaya vayaʼmogimo kukena yaʼapimo alisayafeʼmo noʼapilegamo atagi neʼa oʼviyo.

¹⁹ Vaehae, huʼna, ani afinaʼmo apaipaguʼeʼmo maiʼnisaya aʼne anagaʼe mafaʼnemo nu neʼapamisaya aʼne anagaʼefeʼmo nahau huve.

²⁰ Yasi afinaʼe sapati afinaʼeʼmo lapaune osesayafeʼmo nunumuʼmo hiyo.

²¹ Ani afinaʼmo afole aisiya hanageke yaʼmoʼa hogote hanageke yaʼmo ma mopamo alo huʼniya afinatetiʼmo afole aite afole aite huʼniya hanageke yaʼmo aeno aga seno muki afole aisiya hanageke yaʼeʼmo alagi aeno aga seno afole aigiye.

²² Ani agufa hanageke yaʼmo afole aisiya afinaʼmo alino hogo huno oʼateʼniyesinana muki vayaʼmo ago faliʼnaesinaʼmonanafa lekana paino apateʼniya vayaʼaitefeʼmo hanageke afinaʼmo alino hogo huno ategaiye.

²³ Ani afinaʼmo mago vayaʼmogi lapa paiʼapaeʼmo, Ageyo, huʼa, Kalaisiʼa manile maiʼniye, huʼa lapa paige mugalega maiʼniye, huʼa lapa paige hisagetapaeʼmo oʼafiyo.

²⁴ Mago vayaʼmogi, Kalaisiʼnamo maiʼnove, huʼa huge mago vayaʼmogi Gotitegati gemo aliniʼneʼna aeʼna hakalo huʼna hapa nepauva vekamo maiʼnove, huʼa huge huteʼa magoʼe huʼa noʼagaya agufa apaune kavaʼmo hugayaʼmofeʼmae. Lekana paino apateʼniya vayaʼmo humi apatesayafeʼmo hugayana afaʼa humi oʼapategae.

²⁵ Afiyo, huʼna, hogoteʼna ani gemo ago lapa paiʼnove.

²⁶ Mago vayaʼmogimo, Ageyo, huʼa, muga kaʼme kotegamo maiʼniye, huʼa lapa paigayanagi alagi oʼviyo. Mago vayaʼmogimo lapa paiʼapaeʼmo, Ageyo, huʼa, ani nopiʼmo fala kino maiʼniye, huʼa lapa paigayanagi alagi oʼafiyo.

²⁷ Alave huteno yegemo haine neʼeya kotegatiʼmo aeno ha leteno yegemo uno lamino nefaleya kotegamo aeno ha neleya agufa kavaʼmo nehisigeno Vemo mafaʼnemo eminesigeʼa muki vayaʼmogimo agegae.

²⁸ Afumo faliʼnigeʼapaeʼmo hakiki nama anagaʼmogimo haleli eʼa agufaʼaleʼmo hakaleteʼa aliʼa anupa huʼa neʼmaiye.

²⁹ Ani hanageke yaʼmo afole neʼaisigenoʼaeʼmo malage huno yegemo oleno hani nehisigenoʼaeʼmo kaimo olegaiye. Asole kanefiʼmo kokuʼnapatiʼmo asagauno neʼaisigeno kokuʼnapi neʼmaiya apaune vayaʼmogi atete hugae.

³⁰ Ani afinaʼmo Vemo mafaʼnemo eminesiya alagena kavaʼmo kokuʼnapiʼmo afole neʼaisigeʼapaeʼmo muki ma mopafi alu nofi vaya alu nofi vayaʼmogimo ageteʼapaeʼmo yulagefa aigae. Apakaemo agesayana Vemo mafaʼnemo kokuʼnapi hiya mopaleʼmo lokiyaʼaʼe ha le konali yaʼaʼeʼmo alinino eminesigeʼa agegae.

³¹ Mago enisole vekamoʼmo alopa gefatiʼmo pikuli nehisigenoʼaeʼmo agaemo enisole vayaʼamo alino apatesigeʼa ma mopamo loleʼe loleʼe atupaleʼmo uʼeʼa huʼa lekana paino apateʼniya vayaʼmo apavaleli eʼa aliʼa anupa huʼa apategae.

³² Fiki yosaeʼmo aeno kalafefa gemo huʼniya gemo afiyo. Yosa akopamo alino hegafa huteno saufa anupamo maleʼnigeta agetetapaeʼmo, yegemo lesiya afinaʼmo alagi hogo hiye, hutapa nehae.

³³ Ani kava huno muki ani kavaʼmo afole aisigetapa agetetapaeʼmo, ani kavafeʼmo laha paiʼniya afinaʼmo aepa faino alagi hogo hiye, huta lapakesamo afiyo.

³⁴ Lama ge lapa nepauve, huno, hemenimo muki maiʼnaya vayaʼmo ofaliʼnisageno muki mani agufa kavaʼmo afole aigiye.

³⁵ Kokuʼnaʼe mopaʼeʼmo hano hugiyaʼmonanafa geʼnimo alagi hano osuno afaʼa hanege hanege huno hanegaiye.

Hainu afinaʼmo afole aisifi, huno huʼniya gemae

³⁶ Hainu afinaʼmofi na kanaleʼmofi huʼa muki vayaʼamogimo alagi oʼafiʼnae. Kokuʼnapi enisole vayaʼmogiʼe Mafaʼneʼamoʼeʼmo alagi oʼafiʼnayaʼmonanafa muki yaʼmo Afoʼamokeʼmo afiʼniye.

³⁷ Novaʼa maiʼniya afinaʼmo ma mopafi vayaʼmo maiʼnaya agufa kavakeʼmo huʼa maiʼnisageno Vemo mafaʼnemo eminegaiye.

³⁸ Alopa aniʼmo oseʼnigeʼapaeʼmo neʼyaʼmo nege aniʼmo nege aʼmo alige aʼmafaʼnemo lagauliʼa uge nehagenoʼaeʼmo Novaʼa sipifiʼmo uno haiʼniye.

³⁹ Apakaemo alopa aniʼmo hegaiye, huʼa apakesamo oʼafiʼa fikugeʼmo maime maime neʼvagenoʼaeʼmo aniʼmo heteno muki vayaʼamo aniʼmoʼa alinino uʼniye. Ani agufa kavakeʼmo huʼa maiʼnisagenoʼaeʼmo Vemo mafaʼnemo eminegaiye.

⁴⁰ Ani afinaʼmo lole vekalaʼmo hoyafiʼmo maiʼnisaʼageʼapaeʼmo mago vekamo avaleliʼuteʼa mago vekamo ateʼa ugae.

⁴¹ Lole atalaʼmo magokepi lokaeʼana aliʼyaʼmo neʼalisaʼageʼapaeʼmo mago a kanomo avaleliʼuteʼa mago a kanomo ateʼa ugae.

⁴² Ani kava hugayaʼmofeʼmo kava yagaita maiyo. Hainu afinaʼmo Ala kava netapimo eminesifi hutapa oʼafiʼnayaʼmofeʼmo yagaita maiyo.

⁴³ Afiyo, huʼna, no aepa vekamoʼmo hainu afinaʼmo kumaya neʼaliya vekamo egaifi, huno agesamo afiʼniyesinana yagaino maiʼnisigeno eno noʼamo aeno yakino kumaya oʼaliʼniyesinaʼmofeʼmo

⁴⁴ yagaita maiyo. Lapakaemo, hemenimo emiʼnoʼmegaiye, hutapa hisaya afinakeʼmo Vemo mafaʼnemo eminegaiyaʼmofeʼmo yagaita maiyo.

Alagepa aliʼyaʼmo neʼaliya vekaʼe hosu aliʼyaʼmo neʼaliya vekaʼefeʼmo huʼniya gemae

^45-46 Haiya vayaʼmogi aliʼyaʼapimo oʼataleʼa alige alige huʼa neʼmaiya vayane. Aliʼyaʼmo afoʼamoʼmo aliʼyaʼamo neʼaliya vayaʼaiteʼmo yagaino apatesiyafeʼmo lekana paino ateteno, neʼyaʼmo aligefe hisaya afinaʼmo alika fako huka apamiyo, huno ha paiteno uteno atagi nenoʼeno agesiyana aliʼyaʼamo oʼataleno aliʼyaʼmo neʼaliya vekamoʼmo aulena vekamo maiʼniye.

⁴⁷ Lama ge lapa nepauve, huno, aliʼyaʼmo afoʼamoʼmo muki kagemi yaʼaleʼmo yagaisiyafeʼmo alino he tino ategaiyaʼmonanafa

⁴⁸ aliʼyaʼamo neʼaliya hosu vekamoʼmo, aliʼyaʼmo afoʼamoʼmo yatala afinaʼmo maiʼniye, huno agesa afiteno

⁴⁹ agaeʼeʼmo magokepi lokaeʼa aliʼyaʼmo neʼaliya vayaʼmo aepa faino apamagiteno lusi aniʼmo neteʼa negi nagi nehaya vayaʼeʼmo aniʼmo neno maiteno

⁵⁰ agesa afino alo huno oʼmaiʼnisiya afinaʼmo aliʼyaʼmo afoʼamoʼmo atagi neno egaiye.

⁵¹ Enoʼaeʼmo naipeletiʼmo folagapatiʼmo heno apalo atiteno aeʼa ati nekaya vayaʼmo maiʼnayategamo alino atesigeno uno aviʼya huge avepiʼmo hanino agafu kige huno maigiye.