Matiyu 23 - The Keyagana NT and 25 OT books

Yesuʼa mono vayaʼai hosu kavaʼapieʼmo huʼniya gemae

¹ Ani afinaʼmo Yesuʼa aliʼa anupa huʼa maiʼnaya vayaʼe geʼamo neʼafiya vayaʼefeʼmo hapa painoʼaeʼmo,

² keʼaepa gemo avoʼmo kaeʼa aliʼa apaya neʼmalaya vayaʼe Falasi vayaʼmogiʼeʼmo Mosese aimuʼyaleʼmo maiʼneʼa keʼaepa gemo aliʼa apaya neʼmalayaʼmofeʼmo

³ muki nehaya geʼapimo afiteʼa akame hiyo. Akame hiyo, huʼa nehayaʼmonanafa apakaiʼapimo akame nosayaʼmofeʼmo nehaya kavaʼapimo akame osiyo.

⁴ Apakaemo kana yaʼageʼmo hayaeteʼa vayaʼai apakiʼnaleʼmo aliʼa kofiʼa neʼapatayaʼmonanafa apakaiʼapimo magoke apaya akoʼyaletiʼmo hapa maeʼa aliʼa asaga huʼa noʼapatae.

⁵ Apakaemo vayaʼmogi apakesayafeʼmo alu kava alu kavaʼmo nehae. Gotiʼa avoʼmo kae maleʼniya gemo aliʼa kesifiʼmo maleteʼa hapanileʼmo neʼmalaya aise kesimo alopa kesifiʼmo neʼmalae. Kukenaʼapimo atupaʼaleʼmo konali yaʼamo yatala yatala huʼa ae maleʼnae.

⁶ Alopa neʼyaʼmo neʼnayategamo ala apaki vayaʼmo neʼmaiya yateʼmo maisayafekeʼmo nehapaiye. Mono nokopiʼmo anagamo uʼa haiʼa maisayafekeʼmo nehapaiye.

⁷ Maketi kumateʼmo maiʼnaya vayaʼmogimo ge apamamaeteʼa amuse huʼa neʼapataya kavafekeʼmo nehapaiye. Ala tisa nene, Ala tisa nene, huʼa nehaya geeʼmo nehapaiye.

⁸ Nehapaiyaʼmonanafa lapakaefeʼmo, ala tisa nene, huʼa lapaki aesaya agufa kavatapimo ohaneʼniye. Ala tisa netapimo magoke vekatapimo maiʼnigetapaeʼmo lapakaemo magoke aiyaya konaga vayaʼmo maiʼnayaʼmofeʼmae.

⁹ Afotapimoʼmo magoke vekamo maiʼnenoʼaeʼmo kokuʼnapiʼmo maiʼniyaʼmofeʼmo ma mopafi vayaʼaifeʼmo, afotimogitapae, huta osiyo.

¹⁰ Kava netapimo magoke vekamo Kalaisiʼa maiʼniyaʼmofeʼmo lapakaefeʼmo, kava vayatimogitapae, huʼa lapaki aesaya agufa kavatapimo ohaneʼniye.

^11-12 Lapakaepatiʼmo hogote vekamoʼmo aliʼyaʼmo alisiya vekatapimo maino. Haiya vayaʼmogi apakiʼapileʼmo aliʼa asaga huʼnisafigeno apakiʼapileʼmo alino afepiʼmo apategaiye. Haiya vayaʼmogi apakiʼapileʼmo aliʼa afepi ateʼnisafigeno apakiʼapileʼmo alino asagauno apategaiye.

Yesuʼa aeʼa ati nekaya vayaʼaifeʼmo vaehae, huno huʼniya gemae

¹³ Keʼaepa gemo avoʼmo kaeta alita apaya neʼmalaya vayaʼmogitapaʼe Falasi mono vayaʼmogitapaʼeʼmo aeta ati nekaya vayane, huʼna, vaehae, Lapakaetegamo kage kage kavaʼmo afole aigiye. Gotiʼa yagaino neʼapateya kote kipateʼmo he tiʼa maiʼnaya vayaʼai apaulagaleʼmo kitamo kitapa neʼapatae. Lapakaitapimo uta nohaifa uʼa haisayafeʼmo nehaya vayaʼai kaʼmo akanitapa neʼapatae.

¹⁴ Keʼaepa gemo avoʼmo kaeta alita apaya neʼmalaya vayaʼmogitapaʼe Falasi mono vayaʼmogitapaʼeʼmo aetapa ati nekaya vayane, huʼna, vaehae, Lapakaetegamo kage kage kavaʼmo afole aigiye. Lapakaemo kogu aʼneʼaifeʼmo humi apatetetapa kagemi yaʼapimo alitetapa vayaʼmogi lapakesayafeʼmo yatala yatala nunumuʼmo nehae. Magoʼe huno kayoʼmo lapamigiye.

¹⁵ Keʼaepa gemo avoʼmo kaeta alita apaya neʼmalaya vayaʼmogitapaʼe Falasi mono vayaʼmogitapaʼeʼmo aeta ati nekaya vayane, huʼna, vaehae, Lapakaetegamo kage kage kavaʼmo afole aigiye. Magoke vekamoʼmo getapimo afiteno lapakame hisiyafeʼmo solovala aniʼmo lakaege muki mopafiʼmo umenitata huge hutapa neʼmaiye. He afaʼa afiguve huno hisiyaʼmoʼmo alitapa aya maleteta hosu kavatefeʼmo aeno lapaka seno ata kopiʼmo lamino maisiya vekamo alita hamaletapa neʼatae.

¹⁶ Lapaulagamo ali huʼnigetapa kaʼmo alita ho hulita neʼvaya vayane, huʼna, Lapakaetegamo kage kage kavaʼmo afole aigiye. Lapakaemo hutapaeʼmo, Mago vekamoʼmo, aote alopa mono nopatiʼmo alagi lama gemo nehuve, huno nehisiyana ani gemo osuno afaʼa atalesiya gemo haneʼniyaʼmonanafa aote alopa mono nopiʼmo goli yafatetiʼmo alagi lama gemo nehuve, huno nehisiyana ani gemo oʼataleno afaʼageʼmo hugiye, hutapa nehae.

¹⁷ Lapaulagamo ali huʼnigetapa negi nagi nehaya vayane, huʼna, Na agufa yaʼmoʼa aeno aga seno hogote yaʼmo haneʼniye. Mono nopiʼmo haneʼniya goli yafaʼmoʼa aote alopa mono noʼmo aeno agaseʼnifi aote hu maleʼniya mono noʼmoʼa aeno agaseʼniye.

¹⁸ Magoʼe gemo hutapaeʼmo, mago vekamoʼmo hunoʼaeʼmo, ofalinimo neʼmalaya hiʼyalamutetiʼmo alagi lama gemo nehuve, huno nehisiyana ani gemo osuno afaʼa atalegaiyaʼmonanafa hiʼyalamuteʼmo haneʼniya ofaliniletiʼmo alagi lama gemo nehuve, huno nehisiyana ani gemo afaʼa amagino oʼatalegaiye, hutapa nehae.

¹⁹ Lapaulagamo ali huʼniya vayane, huʼna, Na agufa yaʼmoʼa aeno aga seno hogote yaʼmo haneʼniye. Ofalinimoʼa aeno agaseʼnifi hiʼyalamuʼmoʼa ofalinimo aote hu maleʼniya hiʼyalamuʼmo aeno agaseʼniye.

²⁰ Ani kavatefeʼmo hiʼyalamutetiʼmo alagi lama gemo nehuve, huno nehisiya vekamoʼmo ani kava huno hiʼyalamutetiʼe muki hiʼyalamuteʼmo haneʼniya yatetiʼeʼmo alagi lama gemo nehuve, huno nehiye.

²¹ Aote alopa mono nopatiʼmo alagi lama gemo nehuve, huno nehisiya vekamoʼmo ani kava huno mono nopatiʼe aote mono nopiʼmo neʼmaiya netetiʼeʼmo alagi lama gemo nehuve, huno nehiye.

²² Kokuʼnategatiʼmo alagi lama gemo nehuve, huno nehisiya vekamoʼmo ani kava huno Gotiʼa yagaino neʼapateya siyatetiʼe siyaʼaleʼmo fai maiʼniya vekaletiʼeʼmo alagi lama gemo nehuve, huno nehiye.

²³ Keʼaepa gemo avoʼmo kaetapa alita apaya neʼmalaya vayanagi Falasi mono vayanagi hutapa aeta ati nekaya vayane, huʼna, vaehae, lapakaetegamo kage kage kavaʼmo afole aigiye. Lapakaemo keʼaepa gemo akame hisayafeʼmo hoyafati neʼyaʼmo aliniteta neʼmalaya yapatiʼmo teni huʼniya yaʼmo alita fako hutapa magoke yaʼmo Gotiʼmo neʼamiyaʼmonanafa hogote keʼaepa gemo aeno aga seʼniya keʼaepa geʼamo akame hisayafeʼmo vayaʼaitegamo fatago kavaʼmo osuge lahapau huta oʼapatege lama ge kavaʼmo osuge huʼnae. Ani kavaʼmo nehutapaeʼmo mago alu keʼaepa geʼeʼmo oʼataleyo.

²⁴ Lapaulagamo ali huʼnigetapa kaʼmo alita ho hulitapa neʼvaya vayane, huʼna, lapakaemo anipatiʼmo kamegaguʼmo alita hapafaita neʼatalayaʼmonanafa kamo afugefamo asagautapa neʼnakaiye.

²⁵ Keʼaepa gemo avoʼmo kaetapa alita apaya neʼmalaya vayanagi Falasi mono vayanagi hutapa aeta ati nekaya vayane, huʼna, vaehae, lapakaetegamo kage kage kavaʼmo afole aigiye. Kaputapimo agotofuʼalegaʼe yuvapatapimo agotofuʼalegaʼeʼmo sese nehayaʼmonanafa aguʼafilagamo kumayaʼmo neʼaliya kavatapiʼe lapaʼye nehiya kavatapiʼeʼmo haneʼniye.

²⁶ Lapaulagamo ali huʼniya Falasi mono vayaʼmogitapae, huʼna, hogotetapa kaputapimo aguʼafilagaʼe yuvapatapimo aguʼafilagaʼeʼmo sese higenoʼao agotofuʼalegaʼeʼmo alagepa huno haneno.

²⁷ Keʼaepa gemo avoʼmo kaetapa alita apaya neʼmalaya vayanagi Falasi mono vayanagi hutapa aeta ati nekaya vayane, huʼna, vaehae, lapakaetegamo kage kage kavaʼmo afole aigiye. Lapakaemo faliʼnaya vayaʼmo kiʼa apateteʼapaeʼmo yaveyave anitetiʼmo noʼaleʼmo faleʼa ati nekaya nokana huta maiʼnae. Ani agufa noʼmo agotofuʼalega kanale yaʼageʼmo haneʼniyaʼmonanafa noʼmo yuʼilagamo faliʼnaya vayaʼai apayamufamo havaitege kasaliʼnigeno atu neʼaiya yaʼmo havaitege huʼniye.

²⁸ Ani kava huʼa vayaʼmogimo amega lapakufaʼaleʼmo lapaketeʼapaeʼmo alagepa vayaʼmo maiʼnae, huʼa nelapakayaʼmonanafa lapaipafiʼmo aeta ati nekaya kavaʼe Goti keʼaepa geʼamo amagita neʼatalaya kavaʼeʼmo havaiteʼniye.

²⁹ Keʼaepa gemo avoʼmo kaetapa alita apaya neʼmalaya vayanagi Falasi mono vayanagi hutapa aeta ati nekaya vayane, huʼna, vaehae, lapakaetegamo kage kage kavaʼmo afole aigiye. Lapakaemo Gotitegati gemo alini eʼa aeʼa hakalo huʼa hapa paiʼnaya vayaʼmo apamagiʼnageʼa faliʼnaya vayaʼmo kiʼa apateʼnaya yateʼmo noʼmo kita apatege fatago vayaʼai kanoluleʼmo konali alita apatege nehae.

³⁰ Lapakaemo hutapaeʼmo, laginago vayaʼmo maiʼnaya afinaʼmo maiʼnonesinana apakaeʼeʼmo magokepi Gotitegati gemo alini eʼa aeʼa hakalo huʼa hapa nepaiya vayaʼmo oʼapamagiʼnonesine, hutapa nehae.

³¹ Ani gemo hutetapaeʼmo Gotitegati gemo alini eʼa aeʼa hakalo huʼa hapa paiʼnaya vayaʼmo kamitimo apamagiʼnaya vayaʼai apakinago vayaʼmo lagaemo maiʼnone, hutapa lapakaitapieʼmo mani agufa faigoko gemo nehae.

³² Lapakinago vayaʼmogi ani hosu kavaʼmo aliʼa aepa faiʼnayanagi kanalenagi ani agufa hosu kavaʼmo hulitutapa huta hano hiyo.

³³ Nagaloʼyave vayanagi nagaloʼyave afamo anaga vayane, huʼna, Gotiʼa agoti huno lapatetenoʼaeʼmo, hosu vayaʼmo maiʼnae, huno hisigetapa ata kopiʼmo uta lamigae. Haiya kava hutapa faita kasalo paegae.

³⁴ Ani kavatefeʼmo nagaemo Gotitegati gemo alini eʼa aeʼa hakalo huʼa hapa nepaiya vayanagi afiteʼa ageʼnaya vayanagi aliʼa apaya neʼmalaya vayanagi huʼna aliʼna apatesugeʼa lapakaetegamo ugae. Lapakaemo mago vayaʼmo apamagige mago vayaʼmo malipu yosaleʼmo nili aitetapa alita he tita apatege mago vayaʼmo mono notapifiʼmo nofi kayotetiʼmo apamagige mago vayaʼmo taoniʼafi taoniʼafiʼmo vegala aege hugae.

³⁵ Ani kava hugayaʼmofeʼmo muki vayaʼmo hapaeʼnaya kavatetiʼmo vaiʼmo lapamigiye. Fatago vekamo Evoʼmo haege hosu kavaʼmo osuʼnaya vayaʼmo hapaeme hapaeme ege Melekaiya mafaʼnemo Sekalaiyaʼmo alopa mono noʼe ofalini nehaya hiʼyalamuʼeʼmo haneʼnaʼa folagapiʼmo kamitimo amagige huʼnae.

³⁶ Lama ge lapa nepauve, huno, ani hapaeʼnaya kavatefeʼmo muki hemenimo afaʼa maiʼnaya vayaʼmo kayoʼmo lapamigiye, huno hapa paiʼniye.

Yulusalemu taonifiʼmo maiʼnaya vayaʼaifeʼmo hau huno apateʼniya gemae

³⁷ Yulusalemu taoniyo, Yulusalemu taoniyo, huʼna, Gotiʼa agaetegati gemo alini eʼa aeʼa hakalo huʼa hapa nepaiya vayaʼmo alino apateʼnigeʼa neʼagekaeʼmo kamitimo apamagige apa vayaʼmo yafa kayotetiʼmo apamagige nehane. Kokolemogimo apanaʼaumo apavaleliʼeʼa hapakufiʼmo apati kaeʼa neʼmaiya kava huʼna muki afinaʼae afinaʼaeʼmo mafaʼnekamo apavaleliʼneʼna hapau vaisuvafeʼmo nahauʼniyaʼmonanafa okahauʼniye.

³⁸ Afiyo, huʼna, ani afinatetiʼmo kotapimo no atufaʼageʼmo hanegaiye.

³⁹ Ani afinatetiʼmo oʼnageta maime maime neʼutapaeʼmo, Ala kava neʼmo agiʼalefeʼmo neʼeya vekamo aulena vekamo maiʼniye. Hutapa nehisageʼnaeʼmo egauve, huno huʼniye.