Matiyu 22 - The Keyagana NT and 25 OT books

Yesuʼa aʼmo lagaugefeʼmo lusi neʼyaʼmo kaeʼnaya kavafeʼmo aeno kalafefa gemo huʼniya gemae

^1-2 Halate Yesuʼa aeno kalafefa gemo huno hapa painoʼaeʼmo, Gotiʼa yagaino neʼapateya kavaʼmo haneʼniya kava huno mago ala kini vekamoʼmo mafaʼneʼamoʼmo aʼmo alisiyafeʼmo lusi neʼyaʼmo kaeʼniye.

³ Agaemo aliʼyaʼamo neʼaliya vayaʼmo alino apateʼnigeʼa uʼa eyo huno ge huʼniya vayaʼaifeʼmo hapa paiʼapaeʼmo, yahauve vekamoʼmo ago neʼyaʼmo kaeʼniyanagi eyo, huno huʼniye, huʼa hapa paiʼnayaʼmonanafa oʼafiʼnae.

⁴ Agaemo magoʼe huno aliʼyaʼamo neʼaliya vayaʼaifeʼmo, eyo huʼna ge huʼnova vayaʼaifeʼmo uta hapa paitapaeʼmo, neʼyaʼmo ago yagita huno maleʼniye. Alopa pulumakaʼe aikeli pulumakaʼeʼmo heno kae maleʼniyanagi aʼmo alisiya neʼyategamo eyo, huta hapa paiyo, huno hapa paiteno alino apateʼnigeʼa uʼa hapa paiʼnae.

⁵ Uʼa hapa paiʼnayaʼmonanafa geʼapimo oʼafiʼa atagu faeʼa u eʼa huʼnae. Mago vekamo hoyaʼalega uʼnigeno mago vekamo aliʼyaʼalega uʼniye.

⁶ Mago vayaʼamogi ala vekamo aliʼyaʼamo neʼaliya vayaʼmo apatafauʼa huʼa faipa huʼa apateteʼa kamiti apamagiʼnae.

⁷ Ala kini vekamoʼmo lusi kava huno aipamo leʼnigeno ati vayaʼamo alino apateʼnigeʼa uʼa vayaʼamo hapaeʼnaya vayaʼmo hapaeʼa hano huʼa apataleteʼa taoniʼapimo ata kaeʼa ataleʼnae.

⁸ Agaemo aliʼyaʼamo neʼaliya vayaʼaifeʼmo hapa painoʼaeʼmo, mafaʼneʼnimoʼaʼmo alisiyafeʼmo huʼnigeʼna yagita huʼnovaʼmonanafa eyo huʼna ge huʼnova vayaʼmo neʼyaʼnimo alisaya kava huʼa oʼmaiʼnae.

⁹ Alopa kateʼmo uta muki apakesaya vayaʼaifeʼmo hapa paitapaeʼmo, neʼyaʼmo nekaeyategamo eyo, huta hapa paiyo, huno hapa paiʼniye.

¹⁰ Ani kava huʼa aliʼyaʼamo neʼaliya vayaʼmogimo uʼa hosu vayaʼe alagepa vayaʼeʼmo apavaleli eʼa noʼafiʼmo apateʼnageʼa maiʼa kili paeʼnae.

¹¹ Ala kini vekamoʼmo neʼyateʼmo uʼa haiʼa maiʼnaya vayaʼmo apakesiyafeʼmo uno haino ageyana aʼmo neʼaliya afinaʼmo neʼvaiya agufa kukenamo oʼvaiʼniya vekamo uno haino maiʼnigeno agetenoʼaeʼmo,

¹² Veʼnimo, huno, haiya kava higeka aʼmo neʼaliya afinaʼmo neʼvaiya kukenamo oʼvaika haikeka maiʼnane, huno afi geʼnigenoʼaeʼmo geʼamo alagi ohaneʼniye.

¹³ Ala kini vekamoʼmo aliʼyaʼamo neʼaliya vayaʼaifeʼmo hapa painoʼaeʼmo, aiya ayateʼmo nofi kitetapa alinituta malaga hani kopiʼmo yaga auta ataleyo. Ani koteʼmo maisaya vayaʼmogimo aviʼya huge apavepiʼmo haniʼa agafu kige huʼa maigae, huno huʼniye, huno hapa paitenoʼaeʼmo,

¹⁴ Gotiʼa asole vayaʼaifeʼmo eyo huno ge huʼniyaʼmonanafa aise vayaʼmo lekana paino apateʼniye, huno hapa paiʼniye.

Takesi monimo neʼmalaya kavafeʼmo huʼniya gemae

¹⁵ Falasi mono vayaʼmo uʼa aliʼa anupa huʼa maiʼneʼapaeʼmo, na agufa geletiʼmo amalageka hisunageno ge nehisigeta atafausune, huʼa huteʼa ge huge afige huʼa maiʼnae.

¹⁶ Apakaemo geʼapimo neʼafiya vayaʼe Heloti geʼamo akame nehaya vayaʼeʼmo aliʼa apateʼnageʼa agaetegamo uʼapaeʼmo, Tisao, huʼa, ago kageʼnonana alagi lama geʼageʼmo nehana vekamo maiʼneka Goti geʼamo akame hisaya kavafeʼmo lama geletiʼmo alika apaya neʼmalane. Muki vayaʼaifeʼmo koli osuka muki vayaʼaitegamo magoke agufa kavaʼageʼmo nehana vekamo maiʼnane.

¹⁷ Maiʼnanaʼmofeʼmo yagaino nelateya gamani vekamo Sisaʼmo takesi monimo amisupi oʼamisune. Kagaemo na agufa yane, huka kagesamo neʼafine, huʼa afi geʼnae.

¹⁸ Yesuʼa hosu apaipa apakesa afiʼnaya kavaʼapimo ago apaketenoʼaeʼmo, aeta ati nekaya vayaʼmogitapae, huno, na kava higetapaeʼmo aneʼai hanagita natafaugefeʼmo nehae.

¹⁹ Takesi nehaya monimo alita nave liyo, huno hapa paiʼnigeʼa mago laga monimo aliʼa ave liʼnae.

^20-21 Agaemo loka huno apafi geʼniye. Mani laga monileʼmo ina la augosaʼe agiʼeʼmo avoʼmo kae maleʼnaya agiʼe augosaʼeʼmo haneʼniye, huno apafi geʼnigeʼapaeʼmo Sisa augosaʼe agiʼeʼmo haneʼniye, huʼa ha paiʼnageno Yesuʼa, he, huno, haneʼniyaʼmofeʼmo Sisa yaʼamo Sisaʼmo amitetapa Goti yaʼamo Gotiʼmo amiyo, huno hapa paiʼniye.

²² Ani gemo afiteʼapaeʼmo hapau aiteʼa ataleʼa uʼnae.

Faliʼnaya vayaʼmo he tisaya kavafeʼmo ge huʼa afi geʼnaya gemae

²³ Ani afinaʼmo mago Satiyusi mono vayaʼmo Yesutegamo eʼnae. Apakaemo faliʼnaya vayaʼaifeʼmo he otigae, huʼa apakesamo neʼafiya vayane.

²⁴ Apakaemo huʼapaeʼmo, Tisao, huʼa, Moseseʼa alino apaya malenoʼaeʼmo, mago vekamoʼmo a aliteno mafaʼnemo alino oʼateno ago falitesigenoʼaeʼmo aganaʼamoʼmo koguʼamo aliteno faliʼniya vekamo aimuʼyaleʼmo mafaʼnemo alino apategaiye, huno hapa paiʼniye.

²⁵ Mago afinaʼmo seveniʼa konaga anagaʼmo maiʼnae. Nepuʼapimoʼa aʼmo aliteno mafaʼnemo alino oʼateno falitegenoʼaeʼmo aganaʼamoʼmo koguʼamo aliʼniye.

²⁶ Aganaʼamoʼeʼmo ani kava huno falitegeno agae akamelegati konagaʼamogiʼeʼmo ani kava huʼa falime falime uʼa seveniʼa konagamo alagi faliʼa hano huʼnae.

^27-28 Falitagenoʼaeʼmo henagaʼamo a kanomo faliʼniye. Seveniʼa konagamogi aliʼnayaʼmofeʼmo faliʼnayatetiʼmo he tisaya afinaʼmo haiya vekamo aʼmo maigiye, huʼa afi geʼnae.

²⁹ Yesuʼa hapa painoʼaeʼmo, lapakaemo Goti Mukufi gemo oʼafige Goti lokiyaʼamo oʼagege huʼnayaʼmofeʼmo ika ika lapakesamo neʼafiye.

³⁰ Faliʼnaya vayaʼmo he tiʼapaeʼmo aʼmo oʼalige veleʼmo oʼmaige hugayaʼmonanafa kokuʼnapi enisole vayakana huʼa maigae.

³¹ Faliʼnaya vayaʼmo he tisaya kavafeʼmo Gotiʼa lapa paiʼniya gemo mukuʼafiʼmo haneʼniyana lekana paita oʼafiʼnafiye.

³² Gotiʼa hunoʼaeʼmo, Emalehamu Gotiʼamoʼnamo maiteʼna Aisiki Gotiʼamoʼnamo maiteʼna Yekopu Gotiʼamoʼnamo maiteʼna huʼnove, huno huʼniye. Agaemo faliʼnaya vayaʼai Gotiʼapimoʼmo oʼmaiʼnifa afaʼa neʼmaiya vayaʼai Gotiʼapimoʼmo maiʼniye, huno hapa paiʼniye.

³³ Muki vayaʼmogi ani alino apaya maleʼniya gemo afiteʼapaeʼmo hapau aiʼnae.

Hogote keʼaepa geʼaeʼmo huʼniya gemae

³⁴ Mago Falasi vayaʼmo Yu monote yagaiʼnaya vayaʼmo Yesutegamo eʼa aliʼa anupa huʼa maiʼnae.

³⁵ Maiʼneʼapaeʼmo apakaepatiʼmo mago vekamoʼmo keʼaepa gemo alagepa huno afiʼneno alino apaya neʼmaleya vekamoʼmo amalageka huno ge huno afi gesiyafeʼmo hunoʼaeʼmo,

³⁶ Tisao, huno, muki keʼaepa gefatiʼmo hogote keʼaepa gemo aeno aga seʼniya keʼaepa gemo haiya gemo haneʼniye, huno afi geʼniye.

³⁷ Yesuʼa, Ala kava neʼmo Gotikamofeʼmo muki kaipafatinagi muki kagupi mafaʼnefatinagi muki kagesa afi yakafatinagi huno kahaino.

³⁸ Mani keʼaepa gemo hogote gemo haneʼneno muki keʼaepa geʼamo ago aeno aga seʼniye.

³⁹ Napa tu keʼaepa geʼe napa vani keʼaepa geʼeʼmo magoke agufa gelaʼmo haneʼniye. Napa tu keʼaepa gemoʼa hunoʼaeʼmo, kagaikaeʼmo kahau kayamopafiʼmo nekahaiya kava huka kahaopaleʼmo maiʼnaya vayaʼaifeʼmo kahau kayamopafiʼmo kahaino.

⁴⁰ Mani lole keʼaepa gelaʼmoʼa muki keʼaepa gemogi Gotitegati gemo alini eʼa aeʼa hakalo huʼa hapa nepaiya vayaʼai gemoʼagi huno aepaʼalaʼmo haneʼniye, huno ha paiʼniye.

Kalaisi vekamo ina la mafaʼnemo maiʼniye, huno apafi geʼniya gemae

⁴¹ Yesuʼa aliʼa anupa huʼa maiʼnaya Falasi mono vayaʼaifeʼmo ge huno apafi geʼniye.

⁴² Kalaisi vekaeʼmo haiya agufa lapakesamo neʼafiye, huno huteno, ina la mafaʼnemo maiʼniye, huta lapakesamo neʼafiye, huno apafi geʼnigeʼapaeʼmo,

⁴³ Nevini mafaʼnelupatiʼmo aginago vekamo maiʼniye, huʼa huʼnagenoʼaeʼmo, Nevini aginagomo maiʼnisiyaʼmoʼmo haiya kava higeno Neviniʼa Goti Aunemeʼamoʼa alino amiʼniya geʼaletiʼmo Kalaisi vekaeʼmo hunoʼaeʼmo, kava neʼnie, huno huʼniye.

⁴⁴ Neviniʼa ani geeʼmo hunoʼaeʼmo, Ala kava neʼmoʼa Ala kava neʼnieʼmo hunoʼaeʼmo, lamaga nahaopaleʼmo faika maime maime neʼugeʼna kamekamo apamagisugeʼa kaiya afeʼalumelaga maigae, huno huʼniye.

⁴⁵ Neviniʼa Kalaisi vekaeʼmo kava neʼnie, huno huʼniyaʼmofeʼmo haiya kava huno ma mopafi aginago vekaʼamo maiʼniye, huno apafi geʼnigeʼa

⁴⁶ geʼaleʼmo aeʼa atagaina huʼa ha paisaya agufa geʼapimo alagi ohaneʼniye. Ani afinatetiʼmo koli huʼnayaʼmofeʼmo magoʼe huʼa loka huʼa afi okeʼnae.