Matiyu 21 - The Keyagana NT and 25 OT books

Yesuʼa Yulusalemu taonifiʼmo uno haino neʼvigeʼapaeʼmo haoke heʼnaya gemae

¹ Apakaemo Yulusalemu taoni haopaleʼmo eʼa avaʼyi huteʼapaeʼmo Metapesi taonimo Alifi aveleʼmo haneʼniya taonifiʼmo ago eʼa avaʼyi huteʼa Yesuʼa lole vekalaʼmo geʼamo neʼafiʼa vekalaʼmo alino anatetenoʼaeʼmo,

² lanaulagaleʼmo haneʼniya taonifiʼmo utana haiʼao. Haitana malage hutana agesaʼageno mago noki afumo itaʼamoʼe aikeliʼaʼeʼmo nofi aeʼana anateʼnaya nokilaʼmo maiʼnisaʼagetana anakegaʼae. Hatu maetana anavalelitana eʼao.

³ Mago vekamoʼmo ge huno lanafi gesigetanaeʼmo, Ala kava neʼmoʼa aliʼyaʼamo alisaʼafeʼmae, hutana ha paisaʼagenoʼaeʼmo malage huno alino anatesigeʼana egaʼae, huno hana paiʼniye.

⁴ Gotitegati gemo alinineno aeno hakalo huno hapa nepaiya vekamoʼmo huʼniya gemo afole aisiyafeʼmo ani kavaʼmo afole aiʼniye.

⁵ Mani gemoʼa hunoʼaeʼmo, Saiyoni taonifiʼmo maiʼnaya vayaʼaifeʼmo hunoʼaeʼmo, Ageyo, huno, alatapimo kini vekamo lapakaetegamo neʼe. Yagu yaga kavaʼmo nehiya vekamo maiʼneno aikeli noki afuleʼmo fai maiteno neʼe, huno huʼniye.

^6-7 Geʼamo neʼafiʼa vekalaʼmo Yesuʼa huʼniya gemo akame huʼana uʼana noki afumo aikeliʼaʼeʼmo anavaleliʼana eʼanaeʼmo kukenaʼanimo asagiʼana anakotofuleʼmo yakaiʼana anateʼnaʼageno Yesuʼa magoke nokileʼmo uno haino fai maiʼniye.

⁸ Asole vayaʼmogimo alapaʼage kukenaʼapimo asagiʼa aliʼa ataleʼa kateʼmo yakaime yakaime uʼnae.

⁹ Uʼa hogotege akame huʼa uge huʼnaya vayaʼmogimo huʼapaeʼmo, Nevini aginagomo agiʼaleʼmo alita asaga hiyo. Ala vekamo agiʼalefeʼmo neʼeya vekamo aulena vekamo maiʼniye. Anaga Goti ala agiʼaleʼmo alita asaga hiyo, huʼa alopa gefatiʼmo huʼnae.

¹⁰ Yesuʼa Yulusalemu taonimo kegiʼyafiʼmo uno haiʼnigeʼapaeʼmo muki taonifiʼmo maiʼnaya vayaʼmogi ageteʼa hapau aiʼa atete huteʼa, ina laʼae, huʼa ge huʼa apafi geʼnageʼapaeʼmo

¹¹ asole vayaʼmo akame huʼa eʼnaya vayaʼmogi huʼapaeʼmo, Yesuʼmo Galeliya kotega Nasalasa taonifi vekamo Gotitegati gemo alinineno aeno hakalo huno hapa nepaiya vekamae, huʼa hapa paiʼnae.

Yesuʼa alopa mono nopiʼmo uno haino maiʼniya gemae

¹² Yesuʼa Yu vayaʼai alopa mono nopiʼmo uno haino mago yaʼmo miya faige maketi huge huʼa maiʼnaya vayaʼmo alino hapa faino apataleʼniye. Alu nofi vayaʼai monimo aliteʼa Yu vayaʼai monimo neʼapamiya vayaʼai hiʼyalamuʼapimo alino agoʼya faino atalege namamo maketi nehaya vayaʼai siyaʼapimo alino agoʼya faino atalege huʼniye.

¹³ Agaemo hapa painoʼaeʼmo, avoʼmo kae maleʼniya gemoʼa hunoʼaeʼmo, vayaʼmogi noʼnieʼmo, nunumuʼmo nehaya none, huʼa hugae, huno avoʼmo kae maleʼniyaʼmonanafa lapakaemo kumaya neʼaliya vayaʼmo eʼa fala kiʼa neʼmaiya none, hutapa alita hamaleta ateʼnae, huno hapa paiʼniye.

¹⁴ Apaulagamo ali huʼniya vayaʼe apaiyamo hosuʼniya vayaʼeʼmo mono nopiʼmo agaetegamo eʼnageno alino alagepa huno apateʼniye.

¹⁵ Mono huʼa neʼapataya vayaʼaiteʼmo yagaiʼa neʼapataya vayaʼe keʼaepa gemo avoʼmo kaeʼa aliʼa apaya neʼmalaya vayaʼmogiʼeʼmo huʼniya kavaʼmo ageteʼa hapau aiʼnaya kavaʼmo agege mafaʼne anagaʼmogimo mono nopatiʼmo huʼapaeʼmo, Nevini aginagomo agiʼaleʼmo alita asaga hiyo, huʼa huʼnaya gemo afige huʼnagenoʼaeʼmo apaipamo leʼniye.

¹⁶ Apakaemo Yesufeʼmo, mafaʼne anagaʼmogi nehaya gemo afiʼnapiye, huʼa afi geʼnagenoʼaeʼmo, he afiʼnove. Goti gemoʼa hunoʼaeʼmo, aise mafaʼne anagaʼe nute mafaʼnemogiʼeʼmo kagikaleʼmo aliʼa asaga hisayafeʼmo alika apaya maleʼnane, huno huʼniya gemo lekana opaiʼnafiye, huno apafi geʼniye.

¹⁷ Apatalenuno Metani taonifiʼmo havaeʼniye.

Yesuʼa fiki yosaeʼmo ke hauʼnigeno falu teʼniya gemae

^18-19 Uno havaetenoʼaeʼmo kotilamiyapiʼmo taoni kateʼmo neʼvigenoʼaeʼmo aga teʼniye. Fiki yosamo ka agiʼnaleʼmo haneʼnigeno ageteno uno alagamo aeʼnisiyaʼaeʼmo ageʼniyana haitaʼageʼmo haneʼnigeno agetenoʼaeʼmo, alagamo alagi oʼaegane, huno huʼnigeno malage huno falu teʼniye.

²⁰ Geʼamo neʼafiya vayaʼmogimo ani kavaʼmo ageteʼapaeʼmo hapau aiteʼa, haiya kava higeno fiki yosamo malage huno falu teʼniye, huʼa ge huʼa afi geʼnae.

²¹ Yesuʼa hunoʼaeʼmo, Lama ge lapa nepauve, huno, lapakesamo afita fatago huʼnetapaeʼmo lole lapakesamo oʼafiʼnisayana fiki yosaeʼmo huʼnova agufa gemo afaʼa hugae. Ani kava hutapa mani aveeʼmo, nokamo atalekuka solovala anipiʼmo asagauka aiyo, hutapa hisageno uno asagauno aigiye.

²² Lapakesamo afita fatago hisayana nunumuʼmo huta afi gesaya yaʼmo afaʼa aligae.

Yesufeʼmo, aliʼyaʼmo alisanafeʼmo ina laʼmo alino kateʼniye, huʼa ge huʼa afi geʼnaya gemae

²³ Yesuʼa halate alopa mono nopiʼmo uno haino alino apaya neʼmalegeʼapaeʼmo mono huʼa neʼapataya vayaʼaiteʼmo yagaiʼa neʼapataya vayaʼe Yu vayaʼai vayatama vayaʼeʼmo agaetegamo eʼapaeʼmo, haiya agufa yakamo yagaisana yaʼmo aliʼnekaeʼmo mani kavaʼmo nehane. Ina laʼmo mani kavaʼmo huvo, huno kaha paiʼniye, huʼa ge huʼa afi geʼnageno

²⁴ Yesuʼa geʼapileʼmo aeno atagaina huno hapa painoʼaeʼmo, mago kavafeʼmo ge huʼna lapafi gegauve. Aeta atagaina hutapa naha paisageʼnaeʼmo haiya agufa alagena yaʼnimo yagaiʼnova yaʼmo aliʼneʼna mani kavaʼmo nehufi huʼna lapa paiguve. Yoniʼa aniʼmo faleno apatesiyafeʼmo haiyatetiʼmo alagena yaʼmo aliʼniye.

²⁵ Gotiʼa lekana paino ateʼnifi ma mopafi vayaʼmogi lekana paiʼa ateʼnae, huno apafi geʼnigeʼa apakaiʼapimo ge huge afige huʼapaeʼmo, lagaemo kokuʼnategatiʼmo aliʼniye, huta hisunagenoʼaeʼmo, kokuʼnategatiʼmo aliʼnisigetapaeʼmo na kava higeta geʼaeʼmo lama gemo huʼniye, hutapa osuʼnae, huno laha paigiye.

²⁶ Hugiyaʼmofeʼmo ma mopafi vayaʼmogimo lekana paiʼa ateʼnae, huta hisunana vaehae asole vayaʼmogi huʼapaeʼmo, Gotitegati gemo alinineno aeno hakalo huno hapa nepaiya vekae, huʼa nehayaʼmofeʼmo apakaefeʼmo koli hune, huʼa huʼnae.

²⁷ Huʼa huteʼa Yesufeʼmo huʼapaeʼmo, oʼafiʼnone, huʼa ha paiʼnagenoʼaeʼmo ani kava huʼna haiya agufa alagena yaʼnimo yagaiʼnova yaʼmo aliʼneʼna ani agufa kavaʼmo nehufi huʼna lapa opaiguve, huno hapa paiʼniye.

Lole mafaʼnelaʼanifeʼmo aeno kalafefa gemo huʼniya gemae

²⁸ Yesuʼa Yu monote neʼyagaiya vayaʼaifeʼmo hunoʼaeʼmo, hemenimo hisuva geʼnieʼmo na yane hutapa lapakesamo afigae. Mago vekamoʼmo lole mafaʼneʼalaʼmo maiʼnaʼae. Agaemo yege mafaʼneʼaeʼmo ha painoʼaeʼmo, mafaʼneʼnimo, huno, hemenimo uka nofi hoyaʼnifiʼmo aliʼyaʼmo aliyo, huno ha paiʼnigenoʼaeʼmo

²⁹ oʼuguve, huno huteno henagaʼamo alu aipa agesamo afiteno uʼniye. Afoʼanimoʼmo aganaʼamofeʼmo ani agufa gemo huʼnigenoʼaeʼmo,

³⁰ ala vekae, huno, he afaʼa uguve, huno huʼniyaʼmonanafa oʼuʼniye.

³¹ Haiya mafaʼnemoʼmo afoʼamo geʼamo afiʼniye, huno apafi geʼnigeʼapaeʼmo, yege mafaʼneʼamoʼae, huʼa ha paiʼnae. Yesuʼa hunoʼaeʼmo, lama ge lapa nepauve, huno, takesi moni neʼaliya vayaʼe kumai kavaʼmo nehaya aʼnemogiʼeʼmo aeʼa lapaka seʼa uʼa hogoteʼa Gotiʼa yagaino neʼapateya kopiʼmo uʼa nehaiye.

³² Yoniʼa lapakaetegamo eno alagepa kavaʼmo hisaya kavafeʼmo ago alino lapave liʼnigetapa ageʼnayaʼmonanafa lapakesamo afita fatago osuʼnageʼapaeʼmo takesi moni neʼaliya vayaʼe kumai kavaʼmo nehaya aʼnemogiʼeʼmo apakesamo afiʼa fatago huʼnae. Mani kavaʼapimo lapakaemo ago ageʼnayaʼmonanafa lapaipamo alita afe oletapa Yoni geʼaeʼmo lapakesamo afita fatago osuʼnae, huno hapa paiʼniye.

Hosu vayaʼmogi nofi hoyaleʼmo yagaiʼnaya kavafeʼmo aeno kalafefa gemo huʼniya gemae

³³ Yesuʼa hunoʼaeʼmo, magoʼe gemo huʼna aeʼna kalafefa gefatiʼmo huguvanagi afiyo, huno hapa paiʼniye. Mago mopa aepa vekamoʼmo nofi hoyamo vaiteno kegiʼya hu maleteno nofi alagamo aeʼa lata paisaya kelimo kafi maleteno yatala noʼmo nofi hoyaleʼmo yagaisaya vayaʼai noʼmo ki maleʼniye. Agaemo mago vayaʼmogi hoyaʼaleʼmo yagaiʼa ateʼnisageno atagi neno enoʼaeʼmo alino fako huno mago nofi alagaʼamo agaiʼamo alisigeʼa apakaemo mago nofi alagaʼamo alisayafeʼmo apavaleno apateteno afagi kotegamo uʼniye.

³⁴ Nofi alagamo ago afu leʼnigenoʼaeʼmo agaemo aliʼyaʼamo neʼaliya vayaʼmogi nofi alaga hetamaʼamo alisayafeʼmo alino apateʼnigeʼa hoyaʼaleʼmo neʼyagaiya vayaʼaitegamo uʼnae.

³⁵ Apakaemo vayaʼamo apatafauteʼa mago vekamo amagige mago vekamo kamitimo amagiʼnageno falige mago vekamo yafa kayotetiʼmo amagige huʼnae.

³⁶ Halate agaemo mago alu vayaʼmo aliʼyaʼamo neʼaliya vayaʼmo magoʼe huno alino apateʼnigeʼa uʼnageʼapaeʼmo apakaetegamo magoke agufa kavakeʼmo huʼnae.

³⁷ Henagaʼamo mafaʼneʼamo alino atetenoʼaeʼmo, mafaʼneʼnimo geʼamo afaʼa afigae, huno huʼniye.

³⁸ Eʼnigeʼa hoyaʼaleʼmo yagaiʼnaya vayaʼmogi ageteʼapaeʼmo, ani mafaʼneʼamoʼmo afoʼamo hoyamo aligiye. Amagisunageno falitesigeta agaemo alisiya hoyamo lagaemo aligune, huʼa huteʼa

³⁹ atafauʼa aliniʼuʼa malaga yaga auʼa ataleʼneʼa kamitimo amagiʼnae.

⁴⁰ Hoyamo afoʼamoʼmo enoʼaeʼmo hoyaʼaleʼmo neʼyagaiya vayaʼaitegamo na agufa kavaʼmo hugiye, huno apafi geʼnigeʼapaeʼmo,

⁴¹ agaemo alagi alino hosu huno apateteno ani vayaʼmo apamagigiye. Agaemo alu vayaʼmo apavaleno apatesigeʼa hoyaʼaleʼmo yagaiʼneʼa nofi alagamo afu lesigeʼapaeʼmo lagiʼa maleʼneʼa amigae, huʼa huʼnae.

⁴² Yesuʼa hunoʼaeʼmo, lapakaemo mago Goti gemo avoʼmo kae maleʼniya gemo lekana opaiʼnafiye. Ani gemoʼa hunoʼaeʼmo, Yafatetiʼmo no nekiya vayaʼmogimo mago no nekiya yafafeʼmo huʼapaeʼmo, afa yafane, huʼa huteʼa aliʼa ataleʼnayaʼmonanafa kanale hogote kona yafaʼmo afole aiʼniye. Ala kava neʼmoʼa mani kavaʼmo alino afole aino ateʼnigeta ageteta lahau aitetaeʼmo, vae, huta, alagepa kavaʼmo huʼniye, huta huʼnone, huno huʼniye.

⁴³ Inagi ani kavafeʼmo lapa nepauve, huno, Lapakaemo Gotiʼa yagaino neʼapateya kopiʼmo magoʼe hutapa aliʼyaʼmo oʼaligae. Lapayapatiʼmo lapa faleno hoyaʼaleʼmo alagepa huʼa yagaiʼa ateʼneʼa nofi alagamo lagiʼa amisaya vayaʼmo apamigiye.

⁴⁴ Vayaʼmo mani yafateʼmo asagauʼaiʼa apagoʼya faisageno aino afiʼneno aise aise hugiye. Mani yafaʼmo haiya vayaʼaiteʼmo asagauno aisifigeno kamitimo apamagino aino latapaino mumusopagana huno apatalegaiye, huno hapa paiʼniye.

⁴⁵ Mono huʼa neʼapataya vayaʼaiteʼmo yagaiʼa neʼapataya vayaʼe Falasi vayaʼmogiʼeʼmo Yesuʼa aeno kalafefa gemo huʼniya gemo afiteʼapaeʼmo, lagaefeʼmo huʼniye, huʼa huʼnae.

⁴⁶ Apakaemo kalavusi huʼa atesayafeʼmo huʼnayaʼmonanafa asole vayaʼmogi huʼapaeʼmo, Gotitegati gemo alinineno aeno hakalo huno hapa nepaiya vekae, huʼa huʼnayaʼmofeʼmo koli huʼnae.