Matiyu 20 - The Keyagana NT and 25 OT books

Nofi hoyafiʼmo aliʼyaʼmo neʼaliya vayaʼaifeʼmo aeno kalafefa gemo huʼniya gemae

¹ Yesuʼa hunoʼaeʼmo, Gotiʼmo yagaino neʼapateya kavaʼmo haneʼniya kava huno mago nofi hoyamo afoʼamoʼmo kotilamiyapiʼmo uno vayaʼmo apavalelineno apatesigeʼa aliʼyaʼamo alisayafeʼmo uʼniye.

² Apakaemo, aliʼyakamo aliteta magoke afinaʼmo neʼaliya agufa monimo aligune, huʼa ha paiʼnageno, he kanalene, huno huteno alino apateʼnigeʼa nofi hoyaʼalegamo uʼnae.

³ Halate yegemo leno hakale huʼniya kanaleʼmo uno apakeyana taoni folagapiʼmo aliʼa anupa huʼa neʼmaiya yateʼmo mago vayaʼmo afaʼa he tiʼa maiʼnageno apaketenoʼaeʼmo,

⁴ lapakaeʼeʼmo nofi hoyaʼnifiʼmo uta magokepi aliʼyaʼmo aligeʼnao, kanale miyaʼmo lapamiguve, huno hapa paiʼnigeʼa uʼnae.

⁵ Ani kava huno felugakukuʼmo ani agufa kavaʼmo huge uneʼmo ani agufa kavaʼmo huge huʼniye.

⁶ Yegemo uno lamino falegefeʼmo huʼniya kanaleʼmo uno apakeyana taoni folagapiʼmo aliʼa anupa huʼa neʼmaiya yateʼmo mago vayaʼmo afaʼa he tiʼa maiʼnageno apaketenoʼaeʼmo, na kava higetapaeʼmo muki afinaʼmo afaʼa neʼmaiye, huno apafi geʼnigeʼapaeʼmo,

⁷ mago vekamoʼmo aliʼyaʼamo alisunafeʼmo olavaleʼnigeta afaʼa maiʼnone, huʼa huʼnagenoʼaeʼmo, lapakaeʼeʼmo uta nofi hoyaʼnifiʼmo aliʼyaʼmo aliyo, huno hapa paiʼniye.

⁸ Yegemo uno lamino falegefeʼmo huʼnigenoʼaeʼmo nofi hoyamo afoʼamoʼmo kava vekaeʼmo hunoʼaeʼmo, aliʼyaʼnimo neʼaliya vayaʼaifeʼmo ge hugeʼapao esageka henagaʼamo uʼa aliʼyaʼnimo aliʼnaya vayaʼmo miyaʼapimo apamiteka hogoteʼa uʼa aliʼyaʼmo aliʼnaya vayaʼmo miyaʼapimo apamiyo, huno ha paiʼniye.

⁹ Yegemo uno lamino falegefeʼmo huʼnigeno uno apavalelineno aliʼyaʼamo aliʼnaya yatefeʼmo apamete apamete huno magoke monimo apamite apamite huʼniye.

¹⁰ Hogoteʼa uʼa aliʼyaʼmo aliʼnaya vayaʼmo eʼapaeʼmo magoʼe hutageʼmo monimo aligune, huʼa apakesamo afiʼnayaʼmonanafa magoke agufa monimo apamiʼniye.

¹¹ Moniʼapimo aliteʼapaeʼmo nofi hoyamo afoʼamofeʼmo hagalu hagalu huʼa ge hauʼapaeʼmo,

¹² ani henaga uʼnaya vayaʼmogimo magoke afinaʼmo aliʼyaʼmo aliʼnageta lagaemo muki afinaʼmo yegemo nelalegeta aliʼyaʼmo aliʼnonaʼmonanafa magoke agufa miyaʼmo lamiʼnane, huʼa huʼnae.

¹³ Huʼa huʼnagenoʼaeʼmo mago vekaeʼmo, veʼnimo, huno, miyatapifatiʼmo nagaemo kumayaʼmo oʼaliʼnove. Magoke afinaʼmo neʼaliya agufa monimo aligune, huta huʼnayaʼmofeʼmo

¹⁴ miyakamo aliteka nokalegamo uvo. Henaga eʼnaya vayaʼeʼmo magoke agufa miyaʼmo apamisuvafeʼmo nahauʼniye.

¹⁵ Nagaiʼni yaʼmogeʼna apamisuva himamuʼnimo ohaneʼnifiye. Vaya nekauva vekamo maiʼnovaʼmofeʼmo kahaʼye nehifiye, huno ha paiʼniye.

¹⁶ Ani kava huʼa henaga vayaʼmo hogote vayaʼmo maigae. Hogote vayaʼmo henaga vayaʼmo maigae. Gotiʼa asole vayaʼaifeʼmo eyo huno ge huʼniyaʼmonanafa aise vayaʼmo lekana paino apateʼniye, huno hapa paiʼniye.

Yesuʼa faliteʼna halate he tiguve, huno hapa paiʼniya gemae

¹⁷ Yesuʼe geʼamo neʼafiya vayaʼeʼmo Yulusalemu taonifiʼmo magokepi lokaeliʼuʼa nehaiʼapaeʼmo Yesuʼmo tuolofuʼa vayaʼmo apaote apavalelino neʼunoʼaeʼmo,

¹⁸ Yulusalemu taonifiʼmo uta haigune. Ani taonifiʼmo kutulu yaʼmo alisiya vekamoʼmo Vemo mafaʼnemo avalelinuno mono huʼa neʼapataya vayaʼaiteʼmo yagaiʼa neʼapataya vayaʼe keʼaepa gemo avoʼmo kaeʼa aliʼa apaya neʼmalaya vayaʼeʼmo apamigiye. Apakaemo agoti huʼa ateteʼapaeʼmo faligiye, huteʼa

¹⁹ alu nofi vayaʼmogi apayapiʼmo avaleʼa apamisageʼa kigi huʼa atege nofi kayotetiʼmo amagige huteʼa malipu yosaleʼmo nili aiteʼa aliʼa he tiʼa ategae. Loleʼe magoʼe afinaʼmo maitesigeno halate alino he tino ategaiye, huno hapa paiʼniye.

Yemisiʼe Yoniʼeʼmo ala vekalaʼmo maigesuʼae, huʼana huʼnaʼa gemae

²⁰ Sepeti mafaʼnelaʼe itaʼanimoʼeʼmo Yesutega eʼapaeʼmo itaʼanimoʼmo eno aleʼya faiʼnenoʼaeʼmo kahao ke hove, huno huʼnigeno

²¹ Yesuʼa hunoʼaeʼmo, na agufa yafeʼmo kahauʼniye, huno afi geʼnigeno itaʼanimoʼmo hunoʼaeʼmo, alaʼapimo maiʼneka yagaika apatesanageʼanaeʼmo kagaeʼeʼmo lokaeʼana maiʼneʼanaeʼmo mago mafaʼneʼnimoʼmo lamaga kahaopaleʼmo fai maisigeno mago mafaʼneʼnimoʼmo hoga kahaopaleʼmo fai maisigeno hisaʼafeʼmo nahauʼniyanagi he kanalene, huʼna anategauve, huka naha paiyo, huno ge huno afi geʼniye.

²² Yesuʼa hunoʼaeʼmo, na agufa yafeʼmo ge huta afi nekopi huta oʼafiʼnae. Aise afinaʼmo utesigeʼna kapufi aniʼmo nesuva agufa kava hutana ani kapufi aniʼmo afaʼa negaʼafiye, huno anafi geʼnigeʼanaeʼmo, afaʼa negauʼae, huʼana ha paiʼnaʼae.

²³ Ha paiʼnaʼagenoʼaeʼmo, he, alagi lama gemo nehaʼae. Nagaemo nesuva kapufatiʼmo afaʼa negaʼaʼmonanafa lamaga nahaopaleʼmo maige hoga nahaopaleʼmo maige hisaʼafeʼmo nagae yaʼmo ohaneʼniye. Afaʼa ge osuguvaʼmonanafa afoʼnimoʼmo maisaʼafeʼmo alo huno lanateʼniye, huno hana paiʼniye.

²⁴ Teniʼa vayaʼmo geʼamo neʼafiya vayaʼmogimo ani gemo afiteʼapaeʼmo lole konagalaʼanifeʼmo apaipamo leʼa anateʼnaʼae.

²⁵ Yesuʼa mukiʼaeʼmo ge huʼnigeʼa eʼnagenoʼaeʼmo, lapakaemo ago afiʼnayana alu nofi vayaʼaiteʼmo yagaiʼa neʼapataya vayaʼmogimo lusi kava huʼa yagaiʼa neʼapatae. Ani kava huʼa ala vayaʼapimogi himamuʼapiletiʼmo yagaiʼa neʼapatae.

²⁶ Lapakae folagapatiʼmo mani agufa kavaʼmo afaʼa osisaya kavaʼmo haneʼniye. Lapakaepatiʼmo mago vekamoʼmo alatapimo maigesuve, huno huʼnisiyaʼmoʼmo aliʼyaʼmo alisiya vekatapimo maino.

²⁷ Mago vekamoʼmo hunoʼaeʼmo, hogote vekamo maigesuve, huno nehisiyaʼmoʼmo aliʼyatapiʼmo alisiya vekamo maino.

²⁸ Vemo mafaʼnemo ani kava huno vayaʼmogi ha maeʼa yagaiʼa atesayafeʼmo emiʼnoʼmeʼnifa hapa maeno yagaino apateteno muki asole vayaʼaitefeʼmo falino miya faino hatu maeno apatesiyafeʼmo emineʼniye, huno hapa paiʼniye.

Yesuʼa anaulagamo ali huʼniya vekalaʼmo alino ayakeno anateʼniya gemae

²⁹ Yeliko taonifatiʼmo ataleʼa uʼnageʼapaeʼmo asole vayaʼmo eʼa Yesuʼmo akame huʼa uʼnae.

³⁰ Anaulagamo ali huʼniya vekalaʼmo ka agiʼnaleʼmo itopaleʼmo maiʼnaʼageʼapaeʼmo, Yesuʼmo neʼe, huʼa huʼnaya gemo afiteʼanaeʼmo, Ala kava neʼmo Nevini aginagomo kahau huka laʼato, huʼana alopa gefatiʼmo ge huʼnaʼae.

³¹ Asole vayaʼmogi ke hanauteʼanaeʼmo, ge osutana afaʼa maiʼao, huʼa hana paiʼnayaʼmonanafa magoʼe huʼana alopa gefati ge huʼanaeʼmo, Ala kava neʼmo Nevini aginagomo kahau huka laʼato, huʼana ge huʼnaʼae.

³² Yesuʼa ani gemo afiteno anataleno oʼuʼnifa uno he tino maiʼnenoʼaeʼmo, na agufa kava huʼna lanatesuvafeʼmo nehaʼae, huno anafi geʼnigeʼanaeʼmo,

³³ Ala kava nene, huʼana, laʼaulagatiʼamo alika ayakeka laʼato, huʼana ha paiʼnaʼagenoʼaeʼmo

³⁴ Yesuʼa hau huno anateteno anaulagalateʼmo ayaʼmo maleʼneno alino ayakeno anateʼnigeʼana ageʼana yaketeʼana akame huʼana uʼnaʼae.