Matiyu 18 - The Keyagana NT and 25 OT books

Ina laʼmo hogote vekamo maiʼniye, huʼa huʼnaya gemae

¹ Ani afinaʼmo geʼamo neʼafiya vayaʼmogi Yesutegamo eʼapaeʼmo, ina laʼmo Gotiʼa yagaino neʼapateya vayapatiʼmo hogote vekamo maiʼniye, huʼa ge huʼa afi geʼnae.

² Yesuʼmo aise mafaʼneeʼmo ge huʼnigeno eʼnigenoʼaeʼmo apaulagaleʼmo alino he tino atetenoʼaeʼmo,

³ alagi lama ge lapa nepauve, huno, mafaʼnegana huno alino hamaleno olapateʼnisayaʼmoʼmo Gotiʼa yagaino neʼapateya kegiʼyafiʼmo uta ohaigae.

⁴ Mago vekamoʼmo agufamo alino afepi ateteno mani agufa mafaʼnegana huno maiʼnisiyana Gotiʼa yagaino neʼapateya vayapatiʼmo hogote vekamo maigiye.

⁵ Vayaʼmogi nagiʼnilefeʼmo mani agufa mafaʼnemo aliʼa falu fala huʼa neʼapatesayana ani kava huʼa aliʼa falu fala huʼa neʼnatae.

⁶ Mago vekamoʼmo mani agufa mafaʼnemoʼa nagaefeʼmo agesamo afino fatago nehiya mafaʼnemoʼmo hosu kavaʼmo hisiyafeʼmo ayate aliʼnisiyana lusi hanageke yaʼmo aligiye. Aligiyaʼmonanafa hogoteno ayate oʼaliʼnisigeʼapaeʼmo atafauʼa alopa yafateʼmo nofi aeteʼa lugoʼafiʼmo aeteʼa solovala anipiʼmo aliʼa yaga auʼa atalesagenoʼaeʼmo aise hanageke yaʼmo aligiye.

⁷ Vaehae, huʼna, apayate aligayaʼmonanafa apayate alisaya vayaʼmo lusi hanageke yaʼmo aliteʼa kage kage huʼa yulagefa aigae.

⁸ Magoke lapayaʼmoʼmofi magoke lapaiyamoʼmofi huno hosu kavaʼmo hisayafeʼmo lapayateʼmo neʼalisigetapaeʼmo heta hatagautapa ataleyo. Magoke lapayaʼmofi magoke lapaiyamofi huno haneʼnisigetapaeʼmo afaʼa maige maige hutapa maisayategamo uta haisayana kanale hugiye. Lole lapayatalaʼmofi lole lapaiyalaʼmofi huno haneʼnisiyaʼmoʼmo ata kopiʼmo alino yaga auno lapatalesigenoʼaeʼmo hosugiye.

⁹ Lapaulagamoʼmo hosu kavaʼmo hisayafeʼmo lapayate neʼalisigetapaeʼmo alita katita ataleyo. Magoke lapaulagamo hanesiyaʼmoʼmo afaʼa maige maige hutapa maisayategamo uta haitapa maisayana kanale hugiye. Lole lapaulagamo hanesiyaʼmoʼmo ata kopiʼmo alino yaga auno lapatalesigenoʼaeʼmo hosugiye.

Afela heʼniya sipisipieʼmo aeno kalafefa gemo huʼniya gemae

¹⁰ Ehetapiye, huno, aise mafaʼne anagaʼaifeʼmo ina agufa vayane, hutapa osiyo. Lapa nepauve, huno, yagaiʼa neʼapataya enisole vayaʼmogimo muki afinaʼmo kokuʼnapi afoʼnimo augosafiʼmo ageʼnae.

¹¹ Vemo mafaʼnemoʼmo afela heʼnaya vayaʼai apakufamo alino katino apatesiyafeʼmo emineʼniye.

¹² Na agufa lapakesamo neʼafiye. Vani hataletiʼa sipisipimo maiʼnisayapatiʼmo magoke sipisipimo apataleno uno afela hesiyaʼmoʼmo afoʼamoʼmo na agufa kava hugiye. Afaʼa maiʼnisaya sipisipi anagaʼamo apatalenuno kahauya huno agesiyafeʼmo avelegamo afaʼa uno ohaisifiye. Haʼao, afaʼa uno haigiye.

¹³ Alagi lama ge lapa nepauve huno, Kahauya huno ageno avateʼnisiyana naeti naeniʼamo afaʼa maiʼnaya sipisipiʼaeʼmo aiseʼamo amogaga neʼainoʼaeʼmo afela heʼniya sipisipiʼaeʼmo magoʼe huno lusi kava huno amogaga aigiye.

¹⁴ Ani kava huno kokuʼnapi afotapimoʼmo mani agufa aise mafaʼnefatiʼmo magoke mafaʼnemo alagi afela osegaiye, huno hu maleʼniye, huno hapa paiʼniye.

Konagaʼapimogi hosu kavaʼapimo aliʼa api aiʼa neʼapataya kavafeʼmo huʼniya gemae

¹⁵ Konagakamoʼmo kagaetegamo hosu kavaʼmo huʼnisiyaʼmoʼmo agaetega uka lanakaitanigeʼmo maiʼnetanaeʼmo ha maeka hosu kavaʼamo alika aveliyo. Gekamo afisiyana agufamo alika katika ategane.

¹⁶ Gekamo oʼafisigekaeʼmo magoke vekamofi lole vekalaʼmofi huka anavalelika agaetegamo uvo. Agoti hugefeʼmo lole vekalaʼmofi loleʼe magoʼe vayaʼmogimofi huʼa apavayafatiʼmo hisaya gemo afiteʼapaeʼmo aliʼa fako hisageno lama gemo afole aigiye.

¹⁷ Agaemo anavalelika visana vekalaʼani geʼanimo oʼafisigekaeʼmo siosi vayaʼaifeʼmo hapa paiyo. Agaemo siosi vayaʼai geʼapimo oʼafisigekaeʼmo Goti geʼamo noʼafisaya vayaʼaitegaʼe takesi monimo neʼaliya vayaʼaitegaʼeʼmo nehana kava huka agaetega huvo, huno huteno,

¹⁸ Alagi lama ge lapa nepauve, huno, ma mopafi maiʼnetapaeʼmo kitamo ki malesayana ani kava huno kokuʼnapi vekamoʼmo kitamo ki malegaiye. Kitamo yaki malesayana ani kava huno kokuʼnapi vekamoʼmo kitamo yaki malegaiye.

¹⁹ Mani kavatefeʼmo magoʼe gemo lapa nepauve, huno, Hainu afinaʼmo lapakaepatiʼmo lole vekalaʼmoganimo mago kavafeʼmo nunumuʼmo huʼanaeʼmo laʼamiyo huʼana magoke anaipa anakesamo aliʼneʼana huʼnisaʼana kokuʼnapi afoʼnimoʼmo afaʼa hana maeno anamigiye.

²⁰ Nagiʼnilefeʼmo lole vekalaʼmofi loleʼe magoʼe vayaʼmofi huno alino anupa huno apateʼnisageʼnaeʼmo nagaemo apakae folagapiʼmo maiʼnove, huno hapa paiʼniye.

Aliʼyaʼmo neʼaliya vekamoʼmo hau huno oʼateʼniya gemae

²¹ Mago afinaʼmo Pitaʼa Yesutegamo eno ha painoʼaeʼmo, Ala kava nene, huno, konagaʼnimoʼmo nagaetegamo hosu kavaʼmo hisigeʼnaeʼmo na magi afinaʼmo hosu kavaʼamo aliʼna atalete atalete hisuve. Seveniʼa afinaʼmo aliʼna atalesufiye, huno afi geʼniye.

²² Yesuʼa ha painoʼaeʼmo, haʼao, huno, seveniʼa afinaʼmo hosu kavaʼamo alika oʼataleka seveni tamisi sevetiʼa afinaʼmo hosu kavaʼamo alika atalo.

²³ Ani kava hisaya kavaʼmo haneʼniyaʼmofeʼmo mago kini vekamoʼmo huʼniya kava huno Gotiʼa yagaino apategaiye. Kini vekaʼapimoʼa aliʼyaʼamo neʼaliya vayaʼai anonaʼapilefeʼmo alino alagepa huno avoʼmo kaeʼniye.

²⁴ Aepa faino alino alagepa huno avoʼmo nekaegeʼapaeʼmo

²⁵ mago alopa tauseni moni anonaʼamo haneʼniya vekamo agaetegamo avaleliʼa eʼnae. Moniʼamo alagi ohaneʼniyaʼmofeʼmo kava vekaʼamoʼmo hapa painoʼaeʼmo, ani vekagi aʼagi mafaʼneʼagi muki kagemi yaʼagi hutapa aliteta apavalelituta maketi higeʼapao miya faitesagetapaeʼmo moniʼamo aliniteta anonaʼnilefeʼmo namiyo, huno hapa paiʼniye.

²⁶ Aliʼyaʼamo neʼaliya vekamoʼmo ani gemo afitenoʼaeʼmo mopafiʼmo asagauno aiteno aleʼya faino maiʼnenoʼaeʼmo, muki anonakalefeʼmo afaʼa kamiguvanagi kaipamoʼmo falu huʼninageʼnao, huno huʼniye.

²⁷ Huʼnigenoʼaeʼmo kava vekaʼamoʼmo hau huno ateteno, afaʼa ato, huno ha paiteno anonaʼamo afaʼa ataleʼniye.

²⁸ Aliʼyaʼamo neʼaliya vekamo neʼvigenoʼaeʼmo magokepi lokaeʼana aliʼyaʼmo neʼaliʼa vekamo aise moni anonaʼamo haneʼniya vekamo eʼnigeno agetenoʼaeʼmo anu kiliʼneno lugoʼaleʼmo atafauʼnenoʼaeʼmo, anonaʼnilefeʼmo monimo alinikeka namiyo, huno ha paiʼniye.

²⁹ Magokepi lokaeʼana aliʼyaʼmo neʼaliʼa vekamoʼmo ani gemo afitenoʼaeʼmo aiyafiʼmo asagauno aiteno aleʼya faino maiʼnenoʼaeʼmo, kaipamoʼmo falu huʼninageʼnao, huno, anonakalefeʼmo afaʼa kamiguve, huno ha paiʼniyaʼmonanafa

³⁰ geʼamo oʼafino kalavusi huno atetenoʼaeʼmo, maime maime neʼukaeʼmo namisanageʼnaekeʼmo kalavusifatiʼmo hatu maeʼna kategauve, huno ha paiʼniye.

³¹ Aliʼyaʼamo neʼaliya vayaʼmogimo ani kavaʼmo ageteʼapaeʼmo lusi kava huno apaipamoʼmo kana huʼnigeʼapaeʼmo uʼa kava vekaʼapieʼmo muki ani ageʼnaya kavafeʼmo ava gemo huʼa ha paiʼnae.

³² Kava vekaʼapimoʼmo aliʼyaʼamo neʼaliya vekaeʼmo ge huʼnigeno eʼnigenoʼaeʼmo, hosu aliʼyaʼmo neʼalina vekamogae, huno, nagaefeʼmo aukaya huka ge huʼnanageʼnaeʼmo lusi kava huʼna alopa anonakamo afaʼa ataleʼnove.

³³ Nagaemo nahau huʼna kateʼnova kava huka magokepi lokaetana aliʼyaʼmo neʼaliʼa vekaeʼmo kahau huka atesana kavaʼmo haneʼniye, huno ha paiteno

³⁴ aipamo leno ateteno kayoʼmo amisageno agafu kisiyafeʼmo avaleno kalavusi vayaʼaiteʼmo yagaiʼa neʼapataya vayaʼai apayapiʼmo ateteno, kalavusifiʼmo maime maime neʼukaeʼmo muki anonaʼanilefeʼmo namisanageʼnaekeʼmo hatu maeʼna kategauve, huno ha paiʼniye.

³⁵ Yesuʼa ani gemo hapa paitenoʼaeʼmo, lapakaemo lapaipafatiʼmo konagatapimogi hosu kavaʼapimo alita oʼatalesayana kokuʼnapi Afoʼnimoʼmo kini vekaʼapimoʼmo huʼniya agufa kavaʼmo lapakaetegamo hugiye, huno hapa paiʼniye.