Matiyu 17 - The Keyagana NT and 25 OT books

Kalaisiʼa aeto agufa agufamo alino hamaleʼniya gemae

¹ Sigisiʼa afinaʼmo utegeno Yesuʼa Pitaʼe konagaʼalaʼmoganimo Yemisiʼe Yoniʼenagi huno yatala avefiʼmo apavalelino uno haino apakaiʼapigeʼmo apaote maiʼnae.

² Apaulagaleʼmo aeto agufa agufamo alino hamaleʼniye. Augosafatiʼmo yegegana huno leʼnigeno kukenaʼalegatiʼmo ha le yakana huno yaveyaveʼage huʼniye.

³ Malage huʼana Moseseʼe Ilaiyaʼeʼmo apaulagaleʼmo afole aiteʼana Yesuʼeʼmo kege huʼana maiʼnageʼa apakeʼnae.

⁴ Pitaʼa Yesufeʼmo hunoʼaeʼmo, Ala kava nene, huno, manile maisunana kanale hugiye. Kahauʼnisiyaʼmoʼmo manile loleʼe magoʼe yasi noʼmo kigune. Kagae noʼmo kite Mosese noʼmo kite Ilaiya noʼmo kite hugune, huno ha nepaigenoʼaeʼmo

⁵ mago hiyaʼmo aeno ha leʼniya hiyaʼmoʼa kino apati kaeʼnigeno mago gemo hiyapatiʼmo hunoʼaeʼmo, mani vekaeʼmo nahau nayamopafiʼmo neʼnahaiya mafaʼneʼnimo maiʼniye. Agaefeʼmo lusi kava huʼna amuse huʼna neʼatovanagi geʼamo alagepa huta afiyo, huno huʼnigeʼa

⁶ afiteʼapaeʼmo geʼamo neʼafiya vayaʼmo apaugosalegatiʼmo apagoʼya faiteʼa aiʼa ati kaeʼa maiʼneʼa lusi kava huʼa koli huʼnae.

⁷ Yesuʼa eno apame alitenoʼaeʼmo koli osuta he tiyo, huno hapa paiʼniye.

⁸ Aliʼa maku huʼa agayana mago vayaʼmo oʼmaiʼnageno Yesuʼa agaiʼageʼmo maiʼnigeʼa ageʼnae.

⁹ Avefatiʼmo ataleʼuʼa nelamiʼapaeʼmo Yesuʼa hapa painoʼaeʼmo, ageʼnaya kavafeʼmo mago vayaʼaifeʼmo hapa opaitapa afaʼa maime maime viyo. Vemo mafaʼnemo kanolufatiʼmo alino he tino atetesigetapaeʼmo hapa paigae, huno hapa paiʼniye.

¹⁰ Geʼamo neʼafiya vayaʼmogi ge huʼa afi geʼnae, na kava higeʼapaeʼmo keʼaepa gemo avoʼmo kaeʼa aliʼa apaya neʼmalaya vayaʼmogi, Ilaiyaʼa hogoteno eminegaiye, huʼa nehae, huʼa ge huʼa afi geʼnagenoʼaeʼmo,

¹¹ He, lama gemo huʼnae. Ilaiyaʼa halate alagepa huʼa maisayafeʼmo eno alino alagepa huno apategaiyaʼmonanafa

¹² Ilaiyaʼa ago eʼniyana ageʼa aeto osuʼneʼa hapauʼniya kavaʼmo akame huʼa ago amagiʼnae. Ani kava huʼa Vemo mafaʼnelegamo hosu kavaʼmo hugae, huno hapa paiʼniye.

¹³ Geʼamo neʼafiya vayaʼmogi ani gemo afiteʼapaeʼmo, Yoniʼa aniʼmo faleno neʼapateya vekaeʼmo nehiye, huʼa apakesamo afiʼnae.

Kalaisiʼa mago mafaʼnemo aipafatiʼmo hosu aune vekamo alino hafaino ataleʼniya gemae

¹⁴ Apakaemo asole vayaʼmo eʼa aliʼa anupa huʼa maiʼnayategamo halate neʼvagenoʼaeʼmo mago vekamoʼmo Yesutegamo eno aleʼya faino maiʼnenoʼaeʼmo,

¹⁵ Ala kava nene, huno, mafaʼneʼnieʼmo kahau huka ato. Negi nagi kavaʼmo nehigeno agufamo alagepa huno nohane. Muki afinaʼae afinaʼaeʼmo atafiʼmo asagauno aige anipiʼmo asagauno aige nehiye.

¹⁶ Gekamo neʼafiya vayaʼaitegamo avaleliʼna eʼnogeʼapaeʼmo aliʼa ha faiʼa oʼataleʼnae, huno ha paiʼniye.

¹⁷ Yesuʼa muki vayaʼaifeʼmo, lapakesamo afita fatago nosageno lapaipamo kanale huno ohaneʼniya vayane. Asole afinaʼmo lapakaeʼeʼmo maiʼnovana lapakesamo afita fatago nosae. Na magi afinaʼmo lapakeʼna lapatalegauve. Nagaetegamo avalelita eyo, huno hapa paiteno

¹⁸ Yesuʼa hosu aune vekaeʼmo ke hauʼnigeno ani mafaʼnemo aipafatiʼmo ataleno lamino uʼnigeno ani afinatetiʼmo alagepa huno maiʼniye.

¹⁹ Geʼamo neʼafiya vayaʼmo Yesuʼa agaiʼageʼmo maiʼniyategamo eʼapaeʼmo, na kava higetaeʼmo afaʼa alita ha faita oʼataleʼnone, huʼa afi geʼnae.

²⁰ Yesuʼa hapa painoʼaeʼmo, aiseʼamo lapakesamo afita fatago nehayaʼmofeʼmae. Lama ge lapa nepauve, huno, lapakesamo afita fatago huʼnaya kavatapimoʼa aise avina yaʼmo masateti avina yakana huno haneʼnisiyana lapakaemo mani aveeʼmo, manileʼmo ataleka mugagayaga uvo, hutapa hisageno ugiye. Osisaya agufa kavaʼmo afaʼa hugae.

²¹ Nunumuʼmo nehuʼapaeʼmo neʼyaʼmo mo sisayana ani agufa hosu apaune vayaʼmo afaʼa aliʼa hapa faiʼa apatalegae. Alu kavatetiʼmo aliʼa hapa faiʼa oʼapatalegae.

²² Mago afinaʼmo geʼamo neʼafiya vayaʼeʼmo Galeliya kotegamo eʼa aliʼa anupa huʼa maiʼneʼapaeʼmo Yesuʼa hapa painoʼaeʼmo, apakaemo Vemo mafaʼnemo kutulu yaʼmo aliteʼa avaleliʼuʼa vayaʼai apayapiʼmo ategae.

²³ Apayapiʼmo atesageʼa amagisageno faliteno loleʼe magoʼe afinaʼmo maitesigeno alino he tino ategaiye, huno hapa paiʼnigeʼapaeʼmo geʼamo neʼafiya vayaʼmo lusi kava huno apaipamoʼmo kana huʼniye.

Mono notefeʼmo monimo takesi huʼniya gemae

²⁴ Yesuʼe geʼamo neʼafiya vayaʼeʼmo Kapeneyamu taonifiʼmo eʼnageʼapaeʼmo alopa mono notefeʼmo monimo takesi neʼaliya vayaʼmogi Pitategamo eʼa, tisa netapimoʼa mono notefeʼmo monimo takesi nehifiye, huʼa afi geʼnagenoʼaeʼmo, he nehiye, huno hapa paiʼniye.

²⁵ Pitaʼa nopiʼmo uno haiʼnigenoʼaeʼmo Yesuʼa hogoteno ge huno afi geʼniye, Saimoniyo, huno, na agufa kagesamo neʼafine. Ma mopafiʼmo yagaiʼa neʼapataya ala vayaʼapimogi haiya vayaʼaitetiʼmo kagemi yatefeʼmo neʼaliya takesiʼe apakilefeʼmo neʼaliya takesiʼeʼmo neʼaliye. Mafaʼneʼapiletiʼeʼmo neʼalifi alu kotega vayaʼaitetiʼeʼmo neʼaliye, huno afi geʼnigenoʼaeʼmo,

²⁶ alu kotega vayaʼaitetiʼeʼmo neʼaliye, huno ha paiʼnigeno, he, mafaʼneʼapimo afaʼa apatalesageʼa maigae.

²⁷ Mafaʼneʼamo maiʼnovaʼmonanafa fiku yanagetaʼa monimo oʼmalesuʼana apaipamoʼmo hosugiye. Kagaemo ani kotutegamo uka lamika anipiʼmo hukumo yaga auka maleʼnekaeʼmo hogoteka alisana noyamemo avayafiʼmo laga monimo haneʼnisigeka agegananagi nagaeʼe kagaeʼeʼmo apamisuʼa monimo haneʼnegaiyanagi alinikuka alopa mono notefeʼmo takesi neʼaliya vayaʼmo nagae takesi moniʼe kagaika takesi moniʼeʼmo apamiyo, huno ha paiʼniye.