Matiyu 16 - The Keyagana NT and 25 OT books

Yesufeʼmo kaune kavaʼmo hugeta ageno, huʼa huʼnaya gemae

¹ Mago Falasi mono vayaʼe Satiyusi mono vayaʼeʼmo Yesutegamo eʼa amalageka huʼapaeʼmo, kokuʼnapi himamukaletiʼmo alagena kavaʼmo hugeta ageno, huʼa ha paiʼnae.

² Yesuʼa geʼapileʼmo aeno atagaina huno hapa painoʼaeʼmo, yegemo uno lamino nefalegenoʼaeʼmo hiyaʼmoʼa alino haesa nehigetapa agetetapaeʼmo, egamo alagepa ko aligiye, huta nehae.

³ Yegemo haine neʼegenoʼaeʼmo kokuʼnategamo alino haniʼagekeʼmo nehigenoʼaeʼmo haesa koʼmo aligeta agetetapaeʼmo, hemenimo ko aigiye, hutapa nehae. Lapakaemo kokuʼnatega afole neʼaiya alagena kavaʼmo alita fako huta neʼagayaʼmonanafa hemenimo afole neʼaiya alagena kavaʼmo alita fako hutetapa afole aisiya kavaʼmo afaʼa noʼagae.

⁴ Hosu vayaʼmogimo Gotiʼapimoʼa ataleʼa kumai heʼa ugekana kava nehaya vayaʼmogi alagena kavaʼmo agesayafeʼmo nehayaʼmonanafa alagena kavaʼmo alino apave oligiyaʼmonanafa Gotitegati gemo alinineno aeno hakalo huno hapa nepaiya vekamo Yonaʼa huʼniya alagena kavaʼamo alino apave ligiye, huno hapa paiteno apataleno uʼniye.

Peleti maya falaovafiʼmo neʼataya yafeʼmo aeno kalafefa gemo huʼniya gemae

⁵ Geʼamo neʼafiya vayaʼmogimo ago apake kaniʼnigeʼa peleti mayamo oʼaliʼa ataleʼa ani kotuteʼmo sipifiʼmo uʼnae.

⁶ Yesuʼa hunoʼaeʼmo, Falasi mono vayaʼmogi peleti maya falaovafiʼmo neʼataya yaʼe Satiyusi mono vayaʼmogi peleti maya falaovafiʼmo neʼataya yaʼefeʼmo ehetapiye, huno hapa paiʼniye.

⁷ Apakaemo ge huge afige huʼapaeʼmo, lagaemo peleti mayamo oʼalita ago ataleta neʼonaʼmofeʼmo mani gemo nehiye, huʼa huʼnae.

⁸ Yesuʼa ge huge afige huʼnaya gemo afitenoʼaeʼmo, na kava higetapa peleti mayamo oʼaliʼnaya kavafeʼmo ge huge afige hulita neʼae. Aiseʼamo lapakesamo afita fatago nehae.

⁹ Asole afinaʼmo afiʼnayaʼmonanafa afita aeto osuʼnafiye. Nagaemo faefuʼa peleti mayafatiʼmo faefu tauseniʼa vayaʼmo apamiʼnogetapaeʼmo lapakaemo na magi hona yuvapafiʼmo alita maleta havaiteʼnopi hutapa ago lapake kaniʼnifiye.

¹⁰ Ani kava huʼna seveniʼa peleti mayafatiʼmo fo tauseniʼa vayaʼmo apamiʼnogetapaeʼmo lapakaemo na magi alopa hona yuvapafiʼmo alita maleta havaiteʼnopi hutapa ago lapake kaniʼnifiye.

¹¹ Peleti mayaeʼmo nosuvaʼmonanafa na kava higetapa oʼafiʼnae. Falasi mono vayaʼmogi peleti maya falaovafiʼmo neʼataya yaʼe Satiyusi mono vayaʼmogi peleti maya falaovafiʼmo neʼataya yaʼefeʼmo ehetapiye, huʼna lapa nepauve, huno hapa paiʼniye.

¹² Ani gemo afiteʼapaeʼmo peleti maya falaovafiʼmo neʼataya yafeʼmo osuʼnifa Falasi mono vayaʼmogi aliʼa apaya neʼmalaya geʼe Satiyusi mono vayaʼmogi aliʼa apaya neʼmalaya geʼefeʼmo ehetapiye, huno huʼniye, huʼa huʼnae.

Pitaʼa Yesufeʼmo Kalaisi vekamo maiʼnane, huno huʼniya gemae

¹³ Yesuʼa Sisaliya Filipai taoni haopalegamo uno maiʼnenoʼaeʼmo geʼamo neʼafiya vayaʼaifeʼmo, apakaemo vayaʼmogimo Vemo mafaʼneeʼmo ina laʼae, huʼa nehae, huno ge huno apafi geʼnigeʼapaeʼmo,

¹⁴ mago vayaʼamogi huʼapaeʼmo, Yoniʼa aniʼmo faleno neʼapateya vekamo maiʼniye, huʼa huge mago vayaʼamogi huʼapaeʼmo, Ilaiyaʼa maiʼniye, huʼa huge mago vayaʼamogi huʼapaeʼmo, Yelemaiyaʼa maiʼniye, huʼa huge mago vayaʼamogi huʼapaeʼmo, Gotitegati gemo alinineno aeno hakalo huno hapa nepaiya vekamo maiʼniye, huʼa huge nehae, huʼa ha paiʼnae.

¹⁵ Agaemo apakaefeʼmo hunoʼaeʼmo, lapakaemo nagaefeʼmo, ina laʼnae, hutapa nehae, huno apafi geʼnigenoʼaeʼmo

¹⁶ Saimoni Pitaʼa geʼaleʼmo aeno atagaina hunoʼaeʼmo, Kalaisi vekamo maiʼnane. Maige maige huno neʼmaiya Goti mafaʼneʼamo maiʼnane, huno ha paiʼniye.

¹⁷ Yesuʼa ha painoʼaeʼmo, Saimoniyo Yona mafaʼneʼamogae, huʼna, Gotiʼa alino auleno kateʼniye. Mago ma mopafi vekamoʼmo alino kave oliʼnifa kokuʼnapi Afoʼnimoʼmo alino kave liʼnigeka nageka alagepa huʼnane.

¹⁸ Pitagamo maiʼnananageʼna siosiʼnimo ani yafateʼmo faiʼna ateteʼna kime kime neʼvisugeʼa vayaʼnimogi Satani lafi kegiʼya kitaʼamo aeʼa yakiʼa uʼa haigae.

¹⁹ Nagaemo Gotiʼa yagaino neʼapateya kote kiʼmo kamisugeka ma mopafi maiʼnekaeʼmo kita ki malesanagenoʼaeʼmo ani kava huno kokuʼnapi vekamoʼmo kita ki malegaiye. Ma mopafi maiʼnekaeʼmo kita yakisanana ani kava huno kokuʼnapi vekamoʼmo kita yaki malegaiye, huno ha paiteno

²⁰ geʼamo neʼafiya vayaʼaifeʼmo hapa painoʼaeʼmo, nagaefeʼmo Kalaisi vekamo maiʼniye, huta hapa opaiyo, huno hapa paiʼniye.

Yesuʼa faliteʼna he tiguve, huno hapa paiʼniya gemae

²¹ Yesuʼa ani afinatetiʼmo geʼamo neʼafiya vayaʼaifeʼmo aepa faino huno afole aino hapa painoʼaeʼmo, nagaemo Yulusalemu taonifiʼmo uʼna maiʼnisugeʼapaeʼmo vayatama vayanagi mono huʼa neʼapataya vayaʼaiteʼmo yagaiʼa neʼapataya vayanagi keʼaepa gemo aliʼa apaya neʼmalaya vayanagi huʼa lusi hanageke yaʼmo namiteʼa kamitimo namagigae. Loleʼe magoʼe afinaʼmo utesigeno halate alino he tino nategaiye, huno hapa paiʼniye.

²² Pitaʼa Yesuʼmo amasage huno avalelinuno ge haunoʼaeʼmo, Ala kava nene, huno, Gotiʼa hau huno kateno. Mani hana agufa kavaʼmo kagaeteʼmo alagi afole oʼaigiye, huno ge hauʼniye.

²³ Yesuʼa aino afe leno ha painoʼaeʼmo, Sataniyo, kaune ho. Kaʼnimo akanika natesanafeʼmo hane. Goti aipa agesamo oʼaliʼnapa ma mopafi vayaʼai apaipa apakesamo aliʼnane, huno ha paiʼniye.

²⁴ Huno ha paiteno Yesuʼa geʼamo neʼafiya vayaʼaifeʼmo hapa painoʼaeʼmo, mago vekamoʼmo nakame hisiyafeʼmo hauʼnisiyana agaiʼamo hauʼnisiya kavaʼmo ataleno agaiʼa malipu yosaʼamo alino kofilino nakame hino.

²⁵ Mago vekamoʼmo ma mopafi alagepa huno maisayafekeʼmo agesa neʼafisiyana alagepa huno neʼmaiya kavaʼamo atalegaiye. Mago vekamoʼmo nagaetefeʼmo alagepa huno neʼmaiya kavaʼamo ataleʼnisiyana alagepa huno maisiya yaʼmo aligiye.

²⁶ Mago vekamoʼmo muki ma mopafi yaʼmo aliʼnisigeno agupi mafaʼnemo afela hesiyaʼmoʼmo akamelegati magoʼe yaʼmo alisifiye. Haʼao oʼaligiye. Agupi mafaʼnemo afela heʼnisiyaʼmoʼmo na agufa miyatetiʼmo halate miya faino aligiye.

²⁷ Vemo mafaʼnemoʼmo afoʼamo ha le konali yaʼamo aliteno enisole vayaʼamogiʼeʼmo eminenoʼaeʼmo aliʼyaʼapilefeʼmo apamete apamete huno miyaʼapimo apamigiye.

²⁸ Lama ge lapa nepauve, huno, hemenimo mani kanaleʼmo maiʼnaya vayapatiʼmo mago vayaʼamo ofaliʼnisageno Vemo mafaʼnemo ala kini vekaʼapimo emineno yagaino apatesigeʼa agegae, huno hapa paiʼniye.