Matiyu 15 - The Keyagana NT and 25 OT books

Yu vayaʼmogi apakinago vayaʼai geeʼmo huʼniya gemae

¹ Ani afinaʼmo Falasi vayaʼe keʼaepa gemo avoʼmo kaeʼa aliʼa apaya neʼmalaya vayaʼeʼmo Yulusalemu taonifatiʼmo Yesutegamo eʼapaeʼmo,

² na kava higeʼapaeʼmo gekamo neʼafiya vayaʼmogimo laginago vayaʼai geʼapimo amagiʼa neʼatalae. Vayatama vayaʼmogimo geʼapimo afiteʼa akame nosafa apayaʼmo sese osuʼneʼa neʼyaʼmo fiku aliʼa neʼnae, huʼa ha paiʼnageno

³ Yesuʼa hunoʼaeʼmo, ani kava hutapa alu gemo lapakinago vayaʼai gemo akame hisayafeʼmo na kava higetapaeʼmo Goti keʼaepa geʼamo amagita neʼatalae.

⁴ Gotiʼa hunoʼaeʼmo, Itatapi afotapimogimo hapao ke hetetapa geʼapimo afiteta akame hiyo. Itaʼapi afoʼapimogifeʼmo lifana huʼa apatesaya mafaʼne anagaʼaina kamitimo apamagiyo, huno huʼniyaʼmonanafa

^5-6 lapakaemo hutapaeʼmo, mago vekamoʼmo itaʼamofeʼmofi afoʼamofeʼmofi huno hana maesiyafeʼmo hunoʼaeʼmo, Gotiʼa agaiʼa yane, huno huteno itaʼamoʼmofi afoʼamoʼmofi huno, hana maeno oʼanamige hanao ke osege hugiye, hutapa nehae. Huta hutetapaeʼmo lapakaitapi getapigeʼmo akame hisayafeʼmo Goti geʼamo aeta ati nekae.

⁷ Aeta ati nekaya vayanagi afiyo, Aiyeyaʼa Gotitegati gemo alinineno aeno hakalo huno hapa paiʼniya gemoʼmo lapakaefekeʼmo alagi lama gemo haneʼniye.

⁸ Agaemo hunoʼaeʼmo, Mani vayaʼmogimo apavayaʼaletikeʼmo nahao ke heteʼa apaipa apakesaʼamo aliʼa nagaetegamo atalageno noʼmeyaʼmonanafa afagitegamo aliʼa atalageno neʼviye.

⁹ Nagaefeʼmo fikumo mono nehae. Aliʼa apaya neʼmalaya gemo ma mopafi geʼageʼmo haneʼniye, huno avoʼmo kae maleʼniye, huno hapa paiʼniye.

¹⁰ Yesuʼa muki vayaʼaifeʼmo eyo, huno ge huʼnigeʼa eʼa maiʼnagenoʼaeʼmo, lapakaemo afitetapaeʼmo afita aeto hiyo.

¹¹ Apavayafiʼmo neʼnaya neʼyaʼmoʼa alino hosu huno noʼapatefa apavayafatikeʼmo nehaya gemoʼa alino hosu huno neʼapate, huno hapa paiʼniye.

¹² Huno hapa paitegeʼa geʼamo neʼafiya vayaʼmo agaetegamo eʼa ha paiʼapaeʼmo, Falasi mono vayaʼmogi huʼnana gemo afiteʼapaeʼmo hosu apaipamo kaliʼnae, huka apakeʼnapiye, huʼa afi geʼnagenoʼaeʼmo,

¹³ muki yaʼamo kokuʼnapi afoʼnimoʼa ohakaleʼnisiya yaʼmo hafuʼyaʼaʼeʼmo alino vakaino atalegaiye.

¹⁴ Afaʼa apateyo. Apaulagamo ali huʼnigeʼa alu vayaʼmo kaʼmo aliʼa ho huʼa apavaleliʼa neʼvaya vayane. Mago aulagamo ali huʼnisiya vekamoʼmo alu vekamo aulagamo ali huʼnisiya vekamo ayateʼmo alino avalelino visiyana magokepiʼmo uʼana kelifiʼmo asagauʼana aigaʼae, huno hapa paiʼniye.

¹⁵ Pitaʼa, aeka kalafefa gemo huʼnana gemo aepaʼamo laha paiyo, huno afi geʼnigenoʼaeʼmo,

¹⁶ asole afinaʼmo afiʼnayaʼmonanafa lapakaeʼeʼmo afita aeto nosafiye.

¹⁷ Neʼyaʼmo neʼnaya yaʼmoʼa apaipafiʼmo nelamigeʼapaeʼmo aifa leʼa neʼatalae, hutapa oʼafiʼnafiye.

¹⁸ Apavayafatiʼmo neʼyaʼmo afaʼa neʼa neʼnakaiyaʼmonanafa apaipafatiʼmo afole aiteno haineno apavayafatiʼmo afole neʼaiya gemokeʼmo alino hosu huno neʼapate.

¹⁹ Apaipafatiʼmo afole neʼaiya kavaʼmo haneʼniyana hosu apakesa neʼafiya kavaʼmo hanege vayaʼmo nehapaya kavaʼmo hanege kumai kavaʼmo hanege aʼnemo apayate neʼaliya kavaʼmo hanege kumayaʼmo neʼaliya kavaʼmo hanege aigofe gemo nehaya gemo hanege huʼa faipa huʼa neʼapataya gemo hanege huʼniye.

²⁰ Ani agufa kavaʼmokeʼmo alino hosu huno neʼapateyaʼmonanafa apayaʼmo sese osuʼneʼa neʼyaʼmo fiku aliʼa neʼnaya kavaʼmoʼa alino hosu huno noʼapate, huno hapa paiʼniye.

Agesamo afino fatago huʼniya a kanoeʼmo huʼniya gemae

²¹ Inagi Yesuʼa ani kotetiʼmo ataleno Taiya taonimo hanete Saitoni taonimo hanete huʼniya haopalegamo uʼniye.

²² Neʼvigenoʼaeʼmo mago Kenani nofi a kanomo ani haopalega maiʼniya a kanomo agaetega eno alopa gefatiʼmo, Ala kava neʼmo Nevini aginagomo, huno, kahau huka nato. Mago hosu aune vekamoʼa aʼmafaʼneʼnimo aipafiʼmo haino maiʼnenoʼaeʼmo alagi alino hosu huno neʼate, huno ha paiʼniyaʼmonanafa

²³ Yesuʼa geʼaleʼmo aeno atagaina huno ha opaiʼniye. Geʼamo neʼafiya vayaʼmo agaetegamo eʼa, Kahao ke honanagi lakame huno neʼeno keya keya hulino neʼeya a kanomo alika ha faitalegeno vino, huʼa ha paiʼnae.

²⁴ Yesuʼa, Gotiʼa naha painoʼaeʼmo, Yu nofi vayaʼmo afela heʼnaya sipisipi vayaʼalegageʼmo uvo, huno huteno alino nateʼnigeʼna emineʼnove, huno ha paiʼniye.

²⁵ Ani a kanomoʼmo eno aiyafiʼmo aleʼya faino ape huno maiʼnenoʼaeʼmo, Ala kava nene, huno, naha mao, huno huʼnigenoʼaeʼmo

²⁶ Nagaemo mafaʼnemogi peleti mayamo aliʼna kalamo apamisuvana kanale osugiye, huno ha paiʼnigenoʼaeʼmo,

²⁷ Ala kava nene, huno, he, lama gemo huʼnanaʼmonanafa nopiʼmo neʼmaiya kalamogi afoʼapimogimo hiʼyalamuteʼmo neʼyaʼmo neʼnagenoʼaeʼmo neʼya atupamo asagauno neʼaigeʼapaeʼmo kalamogi afaʼa neʼnaya yane, huno ha paiʼniye.

²⁸ Yesuʼa hunoʼaeʼmo, kagaemo magoʼe huka kagesamo afika fatago nehane. Nehanaʼmofeʼmo kahauʼniya kavaʼmo afaʼa huguve, huno ha paiteno ani afinaʼmo aʼmafaʼneʼamo aipafatiʼmo hosu aune vekamo alino hafaino ataleʼniye.

Yesuʼa alu kaita alu kaitaʼmo hapauʼniya vayaʼmo alino hapageno apateʼniya gemae

²⁹ Yesuʼa ani kotegatiʼmo ataleno Galeliya ani kotu agiʼnaleʼmo uteno avefiʼmo uno haino itopaleʼmo maiʼniye.

³⁰ Asole vayaʼmo apaiya hosuʼniya vayanagi apaulaga ali huʼniya vayanagi apaiya apayaʼmo kafafe kafafa huʼniya vayanagi apakemo noʼaiya vayanagi alu kaita alu kaitaʼmo hapauʼniya vayanagi huʼa apavaleliʼeʼa Yesu aiyafiʼmo apateʼnageno alino hapageno apateʼniye.

³¹ Ani asole vayaʼmo apakeʼnayana apakemo noʼaiya vayaʼmogimo apakemo aige apaiya apayaʼmo kafafe kafafa huʼniya vayaʼmo alagepa huʼa maige apaiyamo hosuʼniya vayaʼmo alagepa huʼa uʼeʼa huge apaulagamo ali huʼniya vayaʼmo apaulagamo ageʼa ayakege huʼnageʼa apaketeʼapaeʼmo hapau aiʼnae. Inagi Isaleli vayaʼai Gotiʼapimo agiʼaleʼmo aliʼa asaga huʼnae.

Yesuʼa fo tauseniʼa vayaʼmo neʼyaʼmo alino fako huno apamiʼniya gemae

³² Yesuʼa geʼamo neʼafiya vayaʼaifeʼmo ge huʼnigeʼa eʼnageno hapa painoʼaeʼmo, apakaemo loleʼe magoʼe afinaʼmo nagaeʼeʼmo magokepi lokaeʼa maiʼnagenoʼaeʼmo hemenimo neʼyaʼapimo ohaneʼnigeʼna nahau huʼna neʼapatove. Noʼapilegamo aliʼna apatesugeʼa visayategamo apaka tesigeno apaunena aisiya kavafeʼmo oʼnahauʼniye, huno hapa paiʼniye.

³³ Inagi geʼamo neʼafiya vayaʼmogi huʼapaeʼmo, kaʼme kotega eta maiʼnonaʼmofeʼmo haiyatetiʼmo neʼyaʼmo aliniteta fako huta mani asole vayaʼmo apamigune, huʼa ge huʼa afi geʼnae.

³⁴ Yesuʼa hunoʼaeʼmo, lapakaemo na magi peleti mayamo aliʼnae, huno apafi geʼnigeʼapaeʼmo, seveniʼa peleti mayagi magoke magokeʼamo aise noyamegi huno haneʼniye, huʼa ha paiʼnae.

³⁵ Agaemo asole vayaʼaifeʼmo hunoʼaeʼmo, eta mopaleʼmo itopaleʼmo maiyo, huno hapa paitenoʼaeʼmo

³⁶ seveniʼa peleti mayaʼe noyameʼeʼmo aliʼneno Gotifeʼmo haoke heteno akaya heno geʼamo neʼafiya vayaʼmo apamiʼnigeʼa muki vayaʼaina apamiʼnae. Muki vayaʼamogimo neʼa apamu huʼnae.

³⁷ Inagi geʼamo neʼafiya vayaʼmogi neʼya atupamo aliʼa seveniʼa alopa hona yuvapafiʼmo maleʼa havaiteʼnae.

³⁸ Ve anagaʼmo fo tauseniʼamogi neʼnayana apakaemo aʼne mafaʼneʼapiʼeʼmo lekana opaiʼnae.

³⁹ Netagenoʼaeʼmo Yesuʼa alino apategeʼa utageno sipifiʼmo uno haino Maganala haopalegamo uʼniye.