Matiyu 14 - The Keyagana NT and 25 OT books

Yoniʼa aniʼmo faleno neʼapateya vekamo faliʼniya gemae

¹ Ani afinaʼmo Helotiʼa Galeliya koteʼmo yagaino neʼapateya gamani vekamoʼmo Yesufeʼmo ava gemo huʼnageno afiʼniye.

² Afitenoʼaeʼmo aliʼyaʼamo neʼaliya vayaʼaifeʼmo hapa painoʼaeʼmo, Agaemo Yoniʼa aniʼmo faleno neʼapateya vekamo maiʼniye. Ago amagiʼnogeno faliʼnigeʼa kiʼa ateʼnayatetiʼmo halate he tiʼniyaʼmofeʼmo lusi himamuʼaletiʼmo ani aliʼyaʼmo neʼaliye, huno hapa paiʼniye.

^3-4 Hogoteno Helotiʼa ina kavaʼmo huʼniye. Agaemo aganaʼamo Filipi aʼmo Helotiyasiʼmo aliʼnigeno Yoniʼa ha painoʼaeʼmo, aʼmo aliʼnana kavaʼmo keʼaepa gemo amagika ataleʼnane, huno ha paiʼniyaʼmofeʼmo Helotiʼa atafauno nofi kino ateteno kalavusi huno ateʼniye.

⁵ Helotiʼa Yoniʼmo kamitimo amagisiyafeʼmo huʼniyaʼmonanafa Yu vayaʼmogimo huʼapaeʼmo, Gotitegati gemo alinineno aeno hakalo huno hapa nepaiya vekamo maiʼniye, huʼa apakesamo afiʼnayaʼmofeʼmo vayaʼaifeʼmo koli huteno afaʼa ateʼniye.

⁶ Helotiʼa itaʼamoʼmo alino ateʼniya afinaʼmo halate afole aiʼnigeno neʼyaʼmo yagita huʼnigeʼa eʼa neʼyaʼmo neʼnageno Helotiyasi aʼmafaʼnemoʼmo muki vayaʼai apaulagaleʼmo ohageʼnigeno Helotiʼa lusi kava huno amuse huno ateʼniye.

⁷ Agaefeʼmo polomasi gemo ha painoʼaeʼmo, kahauʼnisiya yafeʼmo naha paigeʼnao, afaʼa kamiguve, huno huteno agoʼyamo ataleno ha paiʼniye.

⁸ Itaʼamoʼmo aʼmafaʼneʼaeʼmo ha paiʼniya gemo ha painoʼaeʼmo, Yoniʼa aniʼmo faleno neʼapateya vekamo lugoʼamo heka hatagauka agenopaʼamo alika yuvapafiʼmo malelikeka namiyo, huno ha paiʼnigeno

⁹ yagaino neʼapateya kini vekamoʼmo ani geeʼmo hau huʼniye. Hau huʼniyaʼmonanafa muki vayaʼai apaulagaleʼmo aʼmafaʼneʼaeʼmo agoʼyamo ataleno ha paiʼniyaʼmofeʼmo ati vekaeʼmo,

¹⁰ uka lugoʼamo hatagauka agenopaʼamo alinikeka amiyo, huno ha paiʼnigeno ati vekamoʼmo uno lugoʼamo hatagauʼniye.

¹¹ Agenopaʼamo alino yuvapafiʼmo maleteno alinineno ani aʼmafaʼnemo amiʼnigeno alininuno itaʼamoʼmo amiʼniye.

¹² Yoni geʼamo neʼafiya vayaʼmogimo eʼa agufaʼamo alini uʼa kiʼa ateteʼa uʼa Yesufeʼmo ha paiʼnae.

Yesuʼa faefu tauseniʼa vayaʼmo neʼyaʼmo apamiʼniya gemae

¹³ Yesuʼa ani gemo afitenoʼaeʼmo agaiʼageʼmo maisiyafeʼmo sipifiʼmo uʼa kaʼme kotegamo maiʼnae. Aniʼmo lakaeno uʼniye, huʼa huʼnageʼa afiteʼapaeʼmo asole vayaʼmo taoniʼafati taoniʼafatiʼmo eʼa akame huʼa visayafeʼmo ani agiʼnaleʼmo uʼnae.

¹⁴ Yesuʼa ani agiʼnaleʼmo eno avaʼyi hutenoʼaeʼmo sipifatiʼmo uno lamino apakeyana asole vayaʼmo eʼa maiʼnageno apaketenoʼaeʼmo lusi kava huno hau huno apateteno kaita hapauʼniya vayaʼmo alino hapageno apateʼniye.

¹⁵ Yegemo uno lamino falegefe huʼnigeʼapaeʼmo geʼamo neʼafiya vayaʼmo agaetegamo eʼapaeʼmo, mani koteʼmo kaʼme koteʼmo eta maiʼnonaʼmofeʼmo hani hugefe hiyanagi muki vayaʼmo alika apategeʼa uʼa taoniʼapifati taoniʼapifatiʼmo neʼyaʼapimo miya faiyo, huʼa ha paiʼnageno

¹⁶ Yesuʼa hunoʼaeʼmo, visaya kaʼmo ohaneʼniye. Neʼyaʼmo mani vayaʼmo apamiyo, huno hapa paiʼnigeʼapaeʼmo,

¹⁷ faefuʼa peleti mayaʼe lole noyamelaʼeʼmo aliʼnone, huʼa ha paiʼnae.

¹⁸ Yesuʼa hunoʼaeʼmno, aliniteta namiyo, huno hapa paitenoʼaeʼmo

¹⁹ muki vayaʼaifeʼmo kahauleʼmo itopale maiyo, huno hapa paiteno faefuʼa peleti mayaʼe lole noyamelaʼeʼmo aliʼneno alino maku huno kokuʼnapi ageʼneno alino auleno ateteno peleti mayamo akaya heno geʼamo neʼafiya vayaʼmo apamiʼnigeʼa muki vayaʼaina apamiʼnae.

²⁰ Muki vayaʼamogimo neʼa apamu huteʼapaeʼmo ataleʼnaya neʼyaʼmo atupaʼamo geʼamo neʼafiya vayaʼmogimo aliʼa tuolofuʼa hona yuvapafiʼmo maleʼnae.

²¹ Ani neʼyaʼmo neʼnaya vayaʼmo faefu tauseniʼa agufa ve anagaʼmogimo neʼnae. Na magi aʼne anagaʼe mafaʼne anagaʼmogiʼeʼmo neʼnafi huʼa lekana opaiʼnae.

Yesuʼa ani agotofuleʼmo eʼniya gemae

²² Yesuʼa muki vayaʼmo neʼyaʼmo ago apamiʼnigeʼa netagenoʼaeʼmo Yesuʼa geʼamo neʼafiya vayaʼaifeʼmo hapa painoʼaeʼmo, sipifiʼmo uta hogoʼneteyo, huno hapa paiteno muki vayaʼaifeʼmo, notapilegamo he tita viyo, huno hapa paiʼniye.

²³ Hapa paitenoʼaeʼmo nunumuʼmo hisiyafeʼmo agaiʼageʼmo aise avefiʼmo uno haino maiʼniye. Hani hugefeʼmo huʼniya kanaleʼmo agaiʼageʼmo maiʼnigeno

²⁴ sipimo ani kotu folagapiʼmo afagiʼaleʼmo neʼvigenoʼaeʼmo sipimo uʼniya kategatiʼmo yasimo alinineno sipimo atafauno ateʼniye.

²⁵ Kotiti agufa afinaʼmo Yesuʼa apakaetegamo ani agotofuleʼmo eʼniye.

²⁶ Neʼegeʼapaeʼmo geʼamo neʼafiya vayaʼmogi agayana ani agotofuleʼmo eʼnigeʼa ageteʼapaeʼmo alopa gefatiʼmo ge huʼapaeʼmo, afene, huʼa huteʼa lusi kava huʼa koli huteʼa kagekage huʼnae.

²⁷ Yesuʼa hunoʼaeʼmo, nagaekeʼmo neʼogi koli osuta lokiya vaitapa maiyo, huno hapa paiʼniye.

²⁸ Hapa paiʼnigeno Pitaʼa hunoʼaeʼmo, Ala kava nene, huno, kagaemo neʼesanaʼmoʼmo ge hugeʼnao ani agotofuleʼmo vino, huno huʼnigenoʼaeʼmo, eno, huno huʼniye.

²⁹ Pitaʼa sipifatiʼmo ataleno ani agotofuleʼmo Yesutegamo neʼunoʼaeʼmo

³⁰ lusi kava huno yasimo aliʼnigeno koli huteno anipiʼmo alino lapanegefeʼmo nehunoʼaeʼmo, Ala kava nene, huno, nagufamo alika katika nato, huno alopa gefatiʼmo ge huʼniye.

³¹ Yesuʼa malage huno eno ayateʼmo alino he tino atetenoʼaeʼmo, aiseʼamo kagesamo afika fatago nehana vekagi na kava higekaeʼmo lole kagesamo neʼafine, huno ha paiʼniye.

^32-33 Sipifiʼmo uʼana nehaiʼagenoʼaeʼmo yasimo oʼaliʼnigeʼa sipifiʼmo maiʼnaya vayaʼmogimo ani kavaʼmo ageteʼa agaefeʼmo mono huteʼapaeʼmo, alagi Goti mafaʼneʼamo maiʼnane, huʼa ha paiʼnae.

³⁴ Magokepi lokaeʼa Genesaleti haopalega uʼa avaʼyi huʼnageʼa

³⁵ ageteʼapaeʼmo, Yesuʼmae, huʼa huteʼa muki haopalegamo aliʼa apateʼnageʼa uʼa hapa paiʼnageʼa muki alu kaita alu kaitaʼmo hapauʼniya vayaʼmo Yesutegamo apavaleliʼa eʼnae.

³⁶ Apakaemo huʼapaeʼmo, kahao ke honanageta kukenakamo atupaʼaleʼmo ame alisunafekeʼmo lahauʼniye, huʼa huʼnagenoʼaeʼmo, he, kanalene, huno huteno muki ame aliʼnaya vayaʼmo kaitaʼapimo alino hapageno apateʼnigeʼa alagepa huʼa maiʼnae.