Matiyu 11 - The Keyagana NT and 25 OT books

Yoniʼa aniʼmo faleno neʼapateya vekamoʼmo Yesutegamo alino apateʼnigeʼa uʼnaya gemae

¹ Yesuʼa tuolofuʼa vayaʼmo geʼamo neʼafiya vayaʼaifeʼmo mani kavaʼmo hiyo, huno hapa paino hano hutenoʼaeʼmo ani haopalegatiʼmo ataleno Galeliya kotega muki taoniʼafi taoniʼafiʼmo alino apaya malege aeno hakalo huno hapa paige hume hume visiyafeʼmo uʼniye.

² Yoniʼa kalavusifiʼmo maiʼnenoʼaeʼmo Kalaisiʼa huʼniya kavafeʼmo ava gemo afitenoʼaeʼmo geʼamo neʼafiya vayaʼmo alino apateʼnigeʼa agaetegamo uʼnae.

³ Uʼa Yesufeʼmo huʼapaeʼmo, Yoniʼa hunoʼaeʼmo, egaiye huno huʼniya vekamo kagaemofi alu vekaeʼmo agava maisune, huʼa ge huʼa afi geʼnae.

⁴ Yesuʼa hapa painoʼaeʼmo, Atagi netuta Yonifeʼmo muki afiʼnaya geʼe aliʼyaʼmo neʼalugeta nageʼnaya kavaʼniʼefeʼmo nava gemo hutapa ha paiyo.

⁵ Apaulagamo ali huʼniya vayaʼmo ageʼa ayakege apaiyamo hosuʼniya vayaʼmo alagepa huʼa uʼeʼa huge lepolosi kaitaʼmo hapauʼniya vayaʼmo alagepa apakufamo hanege apakesamo akaniʼniya vayaʼmogimo gemo alagepa huʼa afige faliʼnaya vayaʼmo he tige kagemi yaʼapimo ohaneʼniya vayaʼaifeʼmo alagepa faigoko gemo aeʼna hakalo huʼna hapa nepaugeʼa afige nehae, hutapa uta ha paiyo.

⁶ Nataleʼa oʼuʼa nagaefeʼmo alagi apakesamo afiʼa fatago nehaya vayaʼmo aulena vayaʼmo maiʼnae, huno hapa paiʼniye.

⁷ Yoni geʼamo neʼafiya vayaʼmo ataleʼa neʼvagenoʼaeʼmo Yesuʼa asole vayaʼmo aliʼa anupa huʼa maiʼnaya vayaʼaifeʼmo aepa faino Yonifeʼmo ava gemo huno hapa painoʼaeʼmo, Lapakaemo na agufa yaʼmo agesayafeʼmo kaʼme kotegamo uʼnae. Lapakaemo yasimoʼmo hopaleʼmo alisigenoʼaeʼmo uti uti aisiya yaʼmo agesayafeʼmo uʼnafiye.

⁸ Hopamo agesayafeʼmo oʼuʼnisayana na agufa vekamo agesayafeʼmo uʼnae. Lapakaemo alagepa kukenamo vaiʼniya vekamo agesayafeʼmo uʼnafiye. Haʼao alagepa kukenamo neʼvaiya vayaʼmo yagaiʼa neʼapataya vayaʼai nopikeʼmo maiʼnae.

⁹ Lapakaemo haiya agufa vekamo agesayafeʼmo uʼnae. Lapakaemo Gotitegati gemo alinineno aeno hakalo huno hapa nepaiya vekamo agesayafeʼmo uʼnafiye. He, lapakaemo Gotitegati gemo alini eʼa aeʼa hakalo huʼa hapa nepaiya vayaʼmo aeno apaka seʼniya vekamo agesayafeʼmo uʼnae.

¹⁰ Ani vekaeʼmo ava gemo hunoʼaeʼmo, nagaemo hogoteʼna apa vekaʼnimo aliʼna atesugeno uno hogoteteno kaʼmo valino kategaiye, huno avoʼmo kae maleʼniye.

¹¹ Lama ge lapa nepauve, huno, Yoniʼa aniʼmo faleno neʼapateya vekamoʼmo muki ma mopafi vayaʼmo ago aeno apaka seʼniyaʼmonanafa Gotiʼa yagaino neʼapateya kegiʼyafiʼmo maiʼnaya vayapatiʼmo henaga vekamoʼmo Yoniʼmo ago aeno aga seʼniye.

¹² Yoniʼa aeno hakalo huno hapa paiʼniya afinatetiʼmo afela heʼnaya vayakana huʼa apaya mukiki nehaya vayaʼmogi Gotiʼa yagaino neʼapateya koteʼmo apaya mukiki huʼa uʼa haite haite huʼa hemeniʼeʼmo uʼa nehaiye.

¹³ Hogoteʼa muki vayaʼmogi Gotitegati gemo aliniʼeʼa aeʼa hakalo huʼa hapa nepaiya vayaʼe Moseseʼeʼmo afole aisiya kavafeʼmo ava gemo hume hume neʼagenoʼaeʼmo Yoniʼmo afole aiʼniye.

¹⁴ Apakaemo huʼapaeʼmo, Ilaiyaʼa hogoteno afole aigiye, huʼa avoʼmo kae maleʼnaya geeʼmo lapakesamo afita fatago huteta maiʼnisayana Yonifeʼmo agaemae, hutapa agegae.

¹⁵ Lapakaemo gemo afisaya lapakesamo haneʼnisiyaʼmoʼmo afiyo.

¹⁶ Hemenimo maiʼnaya vayaʼmo na agufa vayaʼmo maiʼnafigeʼna lapa paigesuve. Apakaemo mafaʼnemogi kigi yokalo hisayafeʼmo maketi kumateʼmo itopaleʼmo neʼmaiya mafaʼnegana huʼa maiʼnae. Mago mafaʼne anagaʼmogi mago mafaʼne anagaʼaifeʼmo,

¹⁷ Lagaemo ogefage yokemo huʼnonaʼmonanafa olapauʼnigetapa omo ohageʼnae. Faiyosago yokemo huʼnonaʼmonanafa olapauʼnigeta yulagefa oʼaiʼnae, huʼa nehae.

¹⁸ Yoniʼa eno neʼyaʼe aniʼeʼmo oʼneno mosino maiʼnigeʼapaeʼmo ohapauʼnigeʼa hosu aune vekamo aipafiʼmo maiʼniye, huʼa huʼnae.

¹⁹ Vemo mafaʼnemoʼmo eno neʼyaʼe aniʼeʼmo neno maiʼnigeʼapaeʼmo ohapauʼnigeʼa lusi neʼyaʼe aniʼeʼmo neʼneya afayaʼe vekamo maiʼniye, huʼa nehae. Takesi moni neʼaliya vayaʼe hosu vayaʼeʼmo apao vekamo maiʼniye, huʼa nehayaʼmonanafa Goti mafaʼneʼamogimo alagepa huno ageteno afiʼniya kavafeʼmo, alagepa kavaʼmo nehiye, huʼa nehae.

Muki taoniʼafi taoniʼafiʼmo maiʼnaya vayaʼmogi apakesamo afiʼa fatago osuʼnaya vayaʼaifeʼmo huʼniya gemae

²⁰ Yesuʼa muki umenitata huʼniya taoniʼafi taoniʼafiʼmo asole noʼagaya agufa lokiya aune kavaʼmo huʼniyaʼmonanafa apaipamo aliʼa afe oleʼnayaʼmofeʼmo ani afinaʼmo aepa faino ge hapauʼniye.

²¹ Kolasini taonifiʼmo maiʼnaya vayaʼmogitapae, huʼna, vaehae, huʼna, Metasaita taonifiʼmo maiʼnaya vayaʼmogitapae, huʼna, vaehae. Taonitapifiʼmo noʼagaya agufa lokiya naune kavaʼmo huʼnova agufa kavaʼmo Taiya taonifiʼe Saitoni taonifiʼeʼmo mago vayaʼmogi huʼnaesinana akeyaʼvilagamo apaipamo ago aliʼa afe leteʼa hosu kogu kukenamo vaiteʼa laʼnefamo faleʼnaesine.

²² Lapa paiʼnaeʼmo agoti huno apatesiya afinaʼmo Taiya taonifiʼe Saitoni taonifiʼeʼmo maiʼnaya vayaʼmogi aise hanageke yaʼmo aligayaʼmonanafa lapakaemo magoʼe hutapa lusi hanageke yaʼmo aligae.

²³ Kapeneyamu taoniyo, huʼna, kokuʼnapiʼmo alino asagauno lapatesigetapa uta haigafiye. Haʼao, ata kopikeʼmo uta lamigae. Taonitapifiʼmo noʼagaya agufa lokiya naune kavaʼmo huʼnova agufa kavaʼmo mago vayaʼmogi Sotomi taonifiʼmo huʼnaesinana Sotomi taonimo afaʼa haneme haneme eno hemeniʼeʼmo afaʼa haneʼniyesine.

²⁴ Lapa paiʼnaeʼmo, Gotiʼa agoti huno apatesiya afinaʼmo Sotomi taonifiʼmo maiʼnaya vayaʼmogi hanageke yaʼmo aligayaʼmonanafa lapakaemo magoʼe hutapa lusi hanageke yaʼmo aligae, huno hapa paiʼniye.

Yesutegamo eʼa maiʼa haga lesaya kavafeʼmo huʼniya gemae

²⁵ Ani afinaʼmo Yesuʼa nunumuʼmo hunoʼaeʼmo, Afo, huno, Kokuʼnapiʼe ma mopafiʼeʼmo neʼyagaina Ala kava neʼmogae, huʼna, ageteʼa afiʼnaya vayaʼe sukulu huʼnaya vayaʼmogiʼeʼmo ani kavaʼmo alagi oʼagesayafeʼmo alika fala ki maleʼnanaʼmonanafa aise mafaʼne anagaʼmo alika apave liʼnanaʼmofeʼmo kahao ke nehove.

²⁶ He, Afo, huʼna, kagaemo ani kahauʼniya kavaʼmo afaʼa nehane.

²⁷ Afoʼnimoʼmo aliʼyaʼamo alisuvafeʼmo muki yaʼamo namiʼniye. Muki vayaʼmogimo mafaʼneʼamo nageʼa alagepa osuʼnayaʼmonanafa Afoʼnimokeʼmo nageno alagepa huʼniye. Muki vayaʼmogimo afoʼnimoʼmo ageʼa alagepa osuʼnayaʼmonanafa nagaemo ageʼna alagepa huʼneʼna nahauʼnigeʼna ageʼneʼna aliʼna apave liʼnova vayaʼmogiʼeʼmo ageʼa alagepa huʼa agege huʼnone.

²⁸ Muki vayaʼmo alagaʼmo lapaege kana yaʼmo alige huta neʼmaiya vayaʼmo nagaetegamo egeʼnao maitapa haga lesaya yaʼmo lapamiguve.

²⁹ Nagaemo yuna naipa vekamo maiʼneʼna yagu yaga kavaʼmo nehuvaʼmofeʼmo aliʼyaʼnimo alitetapa aliʼna lapaya malesuva gemo afige afige hutapa maiyo, lapaipamoʼmo kanale hisigeno lapakupi mafaʼnemo maino haga legaiye.

³⁰ Hiyo, huʼna lapa paisuva gemo lokiya gemo ohaneʼniyaʼmofeʼmo aliʼna kofiʼna lapatesuva kana yaʼmoʼa kanamo olapaugiye.