Matiyu 10 - The Keyagana NT and 25 OT books

Yesuʼa apa vayaʼmo alino apateʼnigeʼa uʼnaya gemae

¹ Yesuʼa tuolofuʼa vayaʼmo geʼamo neʼafiya vayaʼaifeʼmo ge huʼnigeʼa eʼa maiʼnagenoʼaeʼmo hosu apaune vayaʼmo aliʼa hapafaiʼa apatalege muki alu kaita alu kaitaʼmo hapauʼnisiya vayaʼmo aliʼa hapageʼa apatege hisaya himamuʼapimo apamiʼniye.

² Ani tuolofuʼa apa vayaʼai apakiʼapimo haneʼniye. Hogote vekamo Saimoniʼmo mago alu agiʼamo Pitaʼagi aganaʼamoʼmo Eʼnaluʼagi Sepeti mafaʼnelaʼmo Yemisiʼagi aganaʼamoʼmo Yoniʼagi

³ Filipiʼagi Matolomiyuʼagi Tomasiʼagi Matiyuʼa takesi moni neʼaliya vekagi Afiyasi mafaʼnemo Yemisiʼagi Taʼniyasiʼagi

⁴ Saimoniʼmo gamani kavateʼmo yagaiʼa neʼapataya kavafeʼmo Seloti pati vekagi Yutasi Isakaliyoti kotega vekamo Yesu kutulu yaʼmo nesiya vekamogi huʼa ani vayaʼmae.

⁵ Yesuʼa ani tuolofuʼa vayaʼmo alino apatetenoʼaeʼmo, Yu nofi vayapatiʼmo oʼmaiʼnisaya vayaʼaitegaʼe Sameliya vayaʼaitegaʼeʼmo oʼviyo.

⁶ Isaleli vayapatiʼmo afela heʼnaya sipisipi vayaʼaitegageʼmo viyo.

⁷ Utapaeʼmo, Gotiʼa yagaino apatesiya kavaʼmo alagi hogoʼamo afole aigefeʼmo hiye, hutapa aeta hakalo huta hapa paiyo.

⁸ Kaita hapauʼnisiya vayaʼmo alita hapagetapa apatege falisaya vayaʼmo alita he titapa apatege lepolosi kaitaʼmo hapauʼnisiya vayaʼmo alita hapageta apatege hosu apaune vayaʼmo alita hapafaita apatalege hulitapa viyo. Nagaemo fiku lapa maeʼna lapamiʼnova kava hutapa fiku hapa maeta apamiyo.

⁹ Goli monimogi siluva monimogi ata leno sagalifa monimogi hutapa kutapifiʼmo ailita oʼviyo.

¹⁰ Vayaʼai aliʼyaʼmo neʼaliya vayaʼmo afaʼa maisaya yaʼapimo apamisaya kavaʼmo huʼa maiʼnayaʼmofeʼmo kutapimogi lole siotitapimogi lole sutapimogi hayopa kayotapimogi hutapa alinita oʼviyo.

¹¹ Lapakaemo mago alopa taonifiʼmofi aise taonifiʼmofi hutapa uta avaʼyi hutetapaeʼmo ina laʼmo lavalesiya kava huno maiʼniye, hutapa apafi getapa ani vekamo agetetapa noʼafiʼmo uta haita maime maime neʼutapaeʼmo ataleta viyo.

¹² Nopiʼmo uta nehaitapaeʼmo, alagepa hutapa maiyo, huta hapa paiyo.

¹³ Ani nopiʼmo lapavalesaya kava huʼa maiʼnisayana hisaya getapimoʼa apakaepiʼmo hanesigeʼa alagepa huʼa maigae. Alagi lapavalesaya vayaʼmo oʼmaiʼnisayana alagepa hutapa maiyo, huta hisaya getapimoʼmo halate aino atagi neno lapakaitapilegamo egaiye.

¹⁴ Mago vayaʼmogi aliʼa falu fala huʼa olapatege getapimo oʼafige hisayaʼmoʼmo ani vayaʼai noʼapifatiʼmofi taoniʼapifatiʼmofi hutapa ataleta ugefe nehutapaeʼmo lapaigopalegatiʼmo mumusopamo aita fopo hutaletapa apataleta viyo.

¹⁵ Lama ge lapa nepauve, huno, Gotiʼa agoti huno apatesiya afinaʼmo Gomola taonifiʼmo maiʼnaya vayaʼe Sotomi taonifiʼmo maiʼnaya vayaʼeʼmo hanageke yaʼmo aligayaʼmonanafa ani taonifiʼmo maiʼnaya vayaʼmogimo magoʼe huʼa aeʼa apaka seʼa lusi hanageke yaʼmo aligae.

¹⁶ Afiyo, huʼna, Nagaemo aliʼna lapatesugetapa sipisipigana huta afela kalamo maiʼnaya folagapiʼmo ugae. Nagaloʼyave anagaʼmogimo vayaʼmogi oʼapamagisayafeʼmo vase vase huʼa neʼvaya kava huta viyo. Kaugoʼyave namamogimo vayaʼmo ohapaeʼa afaʼa neʼmaiya kava huta maiyo.

¹⁷ Ehetapiye. Mago vayaʼmogi kalavusi huʼa lapateteʼa agotileʼmo lapavaleliʼuʼa mono noʼapifiʼmo nofi kayotetiʼmo lapamagigae.

¹⁸ Agotileʼmo lapavaleliʼuʼa lapatesagetapa gamani vayaʼai apaulagaleʼe kini vayaʼai apaulagaleʼeʼmo he titapa maiʼnetapa Yu nofi vayapatiʼmo oʼmaiʼnaya vayaʼaifeʼmo alagepa faigoko gemo aeta hakalo huta hapa paigae.

¹⁹ Agoti huʼa lapatesagetapaeʼmo na agufa gemo huteta haiya agufa gemo huta geʼapileʼmo aeta atagaina huta hapa paigune, hutetapa lapakesa alaʼamo oʼafiyo. Ani afinaʼmo afole aisigenoʼaeʼmo Goti Aunemeʼamoʼmo hapa paisaya gemo lapamigiye.

²⁰ Lapakaitapimo ani gemo afaʼa osugayaʼmonanafa afotapimo Aunemeʼamoʼmo lapavayafatiʼmo ge hugiye.

²¹ Vayaʼmogimo konagaʼapimo apamagisayafeʼmo apavaleʼa alu vayaʼai apayapiʼmo apamigae. Ani kava huʼa afoʼapimogimo mafaʼneʼapimo apavaleʼa apamigae. Ani kava huʼa mafaʼneʼapimogimo itaʼapi afoʼapimogimo apavaleli uʼa apamigae.

²² Muki vayaʼmogimo nagiʼnilefeʼmo apaini huʼa lapategayaʼmonanafa oʼataleta atafautapa alagi hutapa maime maime uta atupa afinaʼmo afole aisagenoʼaeʼmo Gotiʼa lapakufamo alino katino lapategaiye.

²³ Mago taonifatiʼmo apaini huʼa lapatesagetapaeʼmo ataletapa lapaune hetaletapa alu taonifiʼmo viyo. Lama ge lapa nepauve, huno, lapakaemo muki Isaleli vayaʼai taoniʼafi taoniʼafiʼmo uteta hutapa hano osuʼnisagenoʼaeʼmo Vemo mafaʼnemo eminegaiye.

²⁴ Alino apaya neʼmalegeʼa neʼafiya vayaʼmogimo alino apaya neʼmaleya vekamo aeʼa noʼagasae. Ani kava huno aliʼyaʼamo neʼaliya vekamoʼmo aliʼyaʼmo afoʼamoʼa aeno noʼagase.

²⁵ Mago vekamoʼmo alino aya neʼmaleya vekagana huno maiʼnisiyana kanalene. Ani kava huno mago aliʼyaʼamo neʼaliya vekamoʼa aliʼyaʼmo afoʼamokana huno maiʼnisiyana kanalene. Vayaʼmogimo afamo anaga aepa vekaeʼmo Satani agiʼamo Mielisemuligae huʼa huteʼa huʼa faipa huʼa neʼatesayana agae afamo anaga vayaʼaifeʼmo magoʼe huʼa huʼa faipa huʼa apategae.

Gotifekeʼmo koli hiyo, huno huʼniya gemae

²⁶ Hugayaʼmofeʼmo ma mopafi vayaʼaifeʼmo koli osiyo. Muki huʼa aeʼa ati nekaya kavaʼapimo alino afole aino apave lisigeʼa agegae. Muki huʼa fala nekiya geʼapimo afole yateʼmo huno afole aino hisigeʼa afigae.

²⁷ Hanipiʼmo lapa nepauva gemo ha le yateʼmo aeta hakalo huta hapa paiyo. Lapakaemo vase hutapa afiʼnaya gemo nokatoʼmuleʼmo uta haita maiʼnetapaeʼmo muki vayaʼaifeʼmo alopa gefatiʼmo aeta hakalo huta hapa paiyo.

²⁸ Apakaemo amega apakufaʼamo kamitimo apamagigayaʼmonanafa apakupi mafaʼneʼamo alagi oʼapamagisaya vayaʼaifeʼmo koli osiyo. Apakufaʼe apakupi mafaʼneʼeʼmo alino ata kopiʼmo yaga auno apatalesiya vekaekeʼmo koliʼamo hiyo.

²⁹ Ago ageʼnayana lole aise namalaʼmo magoke sagalifa moniletiʼmo miya nefaiyaʼmonanafa afotapimoʼmo afaʼa faligiye huno osisiyana magoke namamo faliteno mopafiʼmo asagauno oʼaigiye.

³⁰ Ani kava huno muki lapayokaʼmo magoke magoke huno lekana paino neʼage.

³¹ Lapakaemo asole nama anagaʼmo ago aeta apaka setapa maiʼnayaʼmofeʼmo koli osiyo.

³² Muki vayaʼai apaulagaleʼmo nagiʼnimo neʼaya vayaʼai apakiʼapimo kokuʼnapi Afoʼnimo aulagaleʼmo aegauve.

³³ Aegauvaʼmonanafa vayaʼai apaulagaleʼmo nagaefeʼmo huʼapaeʼmo, oʼageʼnona vekae, huʼa nehisaya vayaʼaifeʼmo kokuʼnapi Afoʼnimo aulagaleʼmo olapakeʼnova vayane, huʼna hapa paiguve.

Nagaefekeʼmo hogoteno lahapaino, huno hapa paiʼniya gemae

³⁴ Nagaefeʼmo hutapaeʼmo, muki vayaʼmo alagepa huʼa yuna heʼa magokepi lokaeʼa maisayafeʼmo emineʼniye, hutapa lapakesamo neʼafifiye. Haʼao, alagepa huʼa magokepi lokaeʼa maisayafeʼmo emiʼnoʼmeʼnofa kame huʼa apatesageʼa kame huʼa apatesageʼa huʼa maisayafeʼmo emiʼneʼnove.

³⁵ Mafaʼneʼapimogimo afoʼapimogiʼeʼmo kame hisageʼa aʼmafaʼneʼapimogimo itaʼapimogiʼeʼmo kame hisageʼa apanofeloʼapimogimo anekalo apanofeloʼapimogiʼeʼmo kame hisageʼa huʼa maisayafeʼmo emiʼneʼnove.

³⁶ Mago vayaʼmogimo afamo anagaʼapiʼeʼmo kame kame huʼa maigae.

³⁷ Mago vayaʼmogimo itaʼapi afoʼapimogifekeʼmo hogoteno hapau apayamopafiʼmo hapauʼnisigeʼa nagaefeʼmo henagaʼamo hapau apayamopafiʼmo hapauʼnisiyana vayaʼnimo maisaya agufa kavaʼmo huʼa oʼmaiʼnae. Ani kava huʼa mago vayaʼmogimo mafaʼneʼapieʼmofi aʼmafaʼneʼapieʼmofi huno hogoteno hapau apayamopafiʼmo hapauʼnisigeʼa nagaefeʼmo henagaʼamo hapau apayamopafiʼmo hapauʼnisiyana vayaʼnimo maisaya agufa kava huʼa oʼmaiʼnae.

³⁸ Mago vayaʼmogimo malipu yosaʼapimo aliʼa kofiliʼeʼa nakame huʼa noʼvisayana vayaʼnimo alagi maisaya agufa kavaʼmo huʼa oʼmaiʼnae.

³⁹ Ma mopafiʼmo alagepa hutageʼmo maigune, huʼa apakesamo neʼafisaya vayaʼmo alagepa huʼa neʼmaiya kavaʼapimo alagi hano hugiye. Mago vayaʼmogimo nagiʼnilefeʼmo ma mopafiʼmo alagepa huʼa neʼmaiya kavaʼapimo atalesayana alagepa huʼa maisaya yaʼmo aligae.

Alagepa miyaʼapimo alisaya vayaʼaifeʼmo huʼniya gemae

⁴⁰ Mago vayaʼmogimo lapakaemo aliʼa falu fala huʼa nelapatesayana ani kava huʼa nagaeʼeʼmo aliʼa falu fala huʼa neʼnatae. Ani kava huʼa nagaemo aliʼa falu fala huʼa neʼnatesaya vayaʼmogimo alino nateʼnigeʼna emiʼnenova vekaeʼmo aliʼa falu fala huʼa neʼatae.

⁴¹ Gotitegati gemo alinineno aeno hakalo huno hapa nepaiya vekamo neʼegenoʼaeʼmo mago vekamo Gotitegati gemo alinineno aeno hakalo huno hapa nepaiya vekamo maiʼniyaʼmofeʼmo alino falu fala huno neʼatesiyana Gotitegati gemo alini eʼa aeʼa hakalo huʼa hapa nepaiya vayaʼmogi alisaya agufa miyaʼamo apakaeʼeʼmo magokepiʼmo aligiye. Goti aulagaleʼmo fatago vekamo neʼegenoʼaeʼmo mago vekamo Goti aulagaleʼmo fatago vekamo maiʼniyaʼmofeʼmo alino falu fala huno neʼatesiyana fatago vayaʼmogi alisaya agufa miyaʼamo apakaeʼeʼmo magokepiʼmo aligiye.

⁴² He lama ge lapa nepauve, huno, mago vekamoʼmo afa vekamoʼmo nakame nehiya vekamo agetenoʼaeʼmo nakame nehiya vekamo maiʼniyaʼmofeʼmo lanitani aniʼmo hefino amisiyana miyaʼamo alagi aligiye, huʼna lapa nepauve, huno hapa paiʼniye.