Matiyu 1 - The Keyagana NT and 25 OT booksYesu Kalaisi aginago vayaʼai apakiʼapimo haneʼniya gemae ( Lu 3:23-28 ) 1 Yesu Kalaisiʼa Nevini aginago vekamo maiʼnigeno Neviniʼa Emalehamu aginago vekamo maiʼniye. Yesu Kalaisi aginago vayaʼai apakiʼapimo haneʼniye. 2 Emalehamuʼa Aisakiʼmo alino ateʼnigeno Aisakiʼa Yekopuʼmo alino ateʼnigeno Yekopuʼa Yutaʼe konagaʼamogiʼeʼmo alino apateʼnigeʼanaeʼmo 3 Yutaʼe Tamaʼeʼmo mago lagoʼya mafaʼnelaʼmo Pelesiʼe Silaʼeʼmo aliʼana anateʼnaʼae. Itaʼanimoʼmo Tamaʼmo maiʼniye. Pelesiʼa Hesaloniʼmo alino ateʼnigeno Hesaloniʼa Lamaʼmo alino ateʼnigeno 4 Lamaʼa Aminatapiʼmo alino ateʼnigeno Aminatapiʼa Nasoniʼmo alino ateʼnigeno Nasoniʼa Salimoniʼmo alino ateʼnigeʼanaeʼmo 5 Salimoniʼe Lehepiʼeʼmo Movasiʼmo aliʼana ateʼnaʼageʼanaeʼmo Movasiʼe Lutiʼeʼmo Ometiʼmo aliʼana ateʼnaʼageno Ometiʼa Yesiʼmo alino ateʼnigeno 6 Yesiʼa Neviniʼmo ala vekaʼapimo yagaino neʼapateya kini vekamo alino ateʼnigeʼana Neviniʼe hogoteno Yulaiyateʼmo maiʼniya a kanoʼeʼmo Salomoniʼmo aliʼana ateʼnaʼageno 7 Salomoniʼa Liyamovamuʼmo alino ateʼnigeno Liyamovamuʼa Amaisaʼmo alino ateʼnigeno Amaisaʼa Esaʼmo alino ateʼnigeno 8 Esaʼa Yehosafatiʼmo alino ateʼnigeno Yehosafatiʼa Yolamuʼmo alino ateʼnigeno Yolamuʼa Asaiyaʼmo alino ateʼnigeno 9 Asaiyaʼa Yotamiʼmo alino ateʼnigeno Yotamiʼa Enasiʼmo alino ateʼnigeno Enasiʼa Hesekaiyaʼmo alino ateʼnigeno 10 Hesekaiyaʼa Manasaʼmo alino ateʼnigeno Manasaʼa Emoniʼmo alino ateʼnigeno Emoniʼa Yosaiyaʼmo alino ateʼnigeno 11 Yosaiyaʼa Yekonaiyaʼe konagaʼamogiʼeʼmo kame vayaʼapimogi Isaleli vayaʼmo apavaleli uʼa Mamiloni kotegamo apateʼnaya afinaʼmo alino apateʼniye. 12 Kame vayaʼapimogimo apavaleli uʼa Mamiloni kotegamo apateʼnagenoʼaeʼmo Yekonaiyaʼa Siyalitiyeliʼmo alino ateʼnigeno Siyalitiyeliʼa Selamameliʼmo alino ateʼnigeno 13 Selamameliʼa Amaitaʼmo alino ateʼnigeno Amaitaʼa Elaiyakimiʼmo alino ateʼnigeno Elaiyakimiʼa Esoʼmo alino ateʼnigeno 14 Esoʼa Setokiʼmo alino ateʼnigeno Setokiʼa Ekimiʼmo alino ateʼnigeno Ekimiʼa Elaiyatiʼmo alino ateʼnigeno 15 Elaiyatiʼa Eliyesaʼmo alino ateʼnigeno Eliyesaʼa Mataniʼmo alino ateʼnigeno Mataniʼa Yekopuʼmo alino ateʼnigeno 16 Yekopuʼa Yosefeʼmo Maliya anauʼamoʼmo alino ateʼnigeno Maliyaʼa Yesuʼmo Gotiʼa lekana paino ateʼniya vekamo agiʼamo Kalaisiʼmo alino ateʼniye. 17 Ina kava huʼa Emalehamu mafaʼnelupatiʼmo afole aiʼnaya aginago vayaʼmo fotiniʼa vayaʼmo afole aiteʼa faliteʼa hume hume neʼagenoʼaeʼmo henagaʼamo Neviniʼa afole aiʼniye. Neviniʼa afole aitegeʼa ina kava huʼa fotiniʼa aginago vayaʼmo afole aiteʼa faliteʼa hume hume neʼageʼapaeʼmo Mamiloni kotegamo apavaleli uʼa apateʼnageʼa maiʼnae. Mamiloni kotega maiʼnaya afinatetiʼmo ina kava huʼa fotiniʼa aginago vayaʼmo afole aiteʼa faliteʼa hume hume neʼagenoʼaeʼmo Kalaisiʼa ina kava huno afole aiʼniye. Maliyaʼa Yesu Kalaisiʼmo alino ateʼniya gemae ( Lu 2:1-7 ) 18 Yesu Kalaisiʼa itaʼamoʼmo alino ateʼniya kavaʼmo ina kavaʼmo huno afole aiʼniye. Yosefeʼa Maliyaʼmo lekana pai maleʼniyaʼmonanafa agaeʼeʼmo magokepi lokaeʼana ohavaeʼnaʼagenoʼaeʼmo aote Aunemeʼamoʼmo aipaguʼmo amiʼnigeno ageʼniye. 19 Yosefeʼa Maliyaʼmo lekana pai maleʼniya vekamo alagepa vekamo maiʼniyaʼmofeʼmo agesamo afinoʼaeʼmo, ava gemo hisugeno avagage hisiyafeʼmo oʼnahauʼniyanageʼna afaʼa ategauve, huno agesamo afiʼniye. 20 Agesamo afiteno alagamuna ageyana Ala kava neʼmo enisole vekamo agaetegamo emineʼnigeno ageʼniye. Enisole vekamoʼmo ha painoʼaeʼmo, Nevini aginago vekamo Yosefeyo, huno, aote Aunemeʼamoʼmo aipaguʼmo amiʼniyaʼmofeʼmo akamo Maliyaʼa alisanafeʼmo koli osuvo. 21 Agaemo ve mafaʼnemo alino atesigenoʼaeʼmo ani mafaʼnemoʼmo vayaʼamo hosu kavapatiʼmo apakufamo alino katino apategaiyaʼmofeʼmo agiʼamo Yesuʼae huka ato, huno ha paiʼniye. 22 Ala kava neʼmoʼa agaetegati gemo alinineno aeno hakalo huno hapa nepaiya vekamo avayafatiʼmo huʼniya gemo alagi afole aisiyafeʼmo ani kavaʼmo afole aiʼniye. 23 Agaemo hapa painoʼaeʼmo, Veʼeʼmo magokepi lokaeno ohavaeʼnisiya aʼmafaʼnemoʼa aipaguʼeʼmo maiteno ve mafaʼnemo alino ategaiye. Agiʼamo Imaniyuveliʼae huʼa aegae, huno avoʼmo kae maleʼniye. Imaniyuveliʼae agimo aepaʼamo Gotiʼa lagaeʼeʼmo magokepi lokaeno neʼmaiye. 24 Yosefeʼa aupatiʼmo he tino enisole vekamoʼmo ha paiʼniya gemo akame huno uno Maliyaʼmo aliʼniyaʼmonanafa 25 agaeʼeʼmo magokepi lokaeno ohavaeno aote maime maime neʼegenoʼaeʼmo mafaʼnemo alino ateʼniye. Yosefeʼa mafaʼneʼamo agiʼamo Yesuʼae, huno ateʼniye. |
© 2013, Wycliffe Bible Translators, Inc. All rights reserved.
Wycliffe Bible Translators, Inc.