Maki 4 - The Keyagana NT and 25 OT books

Avina yaʼmo hakaleʼniya vekaeʼmo huʼniya gemae

¹ Halate Yesuʼa Galeliya kotega ani kotu agiʼnaleʼmo aepa faino alino apaya maleʼniye. Asole vayaʼmo agaetegamo eʼa aliʼa anupa huʼa maiʼnagenoʼaeʼmo sipifiʼmo uno haino fai maiʼniye. Sipimo anipiʼmo haneʼnigeʼa ani agiʼnaleʼmo maiʼnae.

² Agaemo magoʼe huno aeno kalafefa gefatiʼmo huno alino apaya malenoʼaeʼmo,

³ Afiyo, huno, mago vekamoʼmo avina yaʼmo hakalesiyafeʼmo hoyaʼalegamo uʼniye.

⁴ Avina yaʼmo yaga hume hume uʼnigenoʼaeʼmo mago avina yaʼmo kateʼmo asagauno aiʼnigeʼa namamogi eʼa neʼnae.

⁵ Mago avina yaʼmo yafa agotofuleʼmo aise mopamo haneʼniya yateʼmo asagauno aiʼniye. Aise mopamo haneʼniyaʼmofeʼmo malage huno hageʼniye.

⁶ Hageʼnigenoʼaeʼmo yegemoʼmo eno haineno neʼagegenoʼaeʼmo leno falu teʼniye. Hafuʼyamo oʼaeʼniyaʼmofeʼmo ago falu teʼniye.

⁷ Mago avina yaʼmo aufe nofiʼmo haneʼniya mopafiʼmo asagauno aiʼnigeno aufe nofiʼmoʼa hageno haiʼneno kino ati kaeʼnigeno alagamo oʼaeʼniye.

⁸ Mago avina yaʼmo alagepa mopafiʼmo asagauno aiteno hageno haineno alagamo aeʼniye. Tetiʼamo aege sigisitiʼamo aege vani hataletiʼamo aege huʼniye.

⁹ Gemo afisaya lapakesamo haneʼnisiyaʼmoʼmo ani gemo afiyo, huno hapa paiʼniye.

¹⁰ Yesuʼa agaiʼageʼmo maiʼnigeʼapaeʼmo geʼamo afiʼnaya vayaʼe tuolofuʼa vayaʼmo geʼamo neʼafiya vayaʼmogiʼeʼmo eʼa, ani aeka kalafefa ge huʼnana gemo aepaʼamo laha paiyo, huʼa afi geʼnagenoʼaeʼmo

¹¹ Gotiʼa yagaino apateʼniya kavafeʼmo ava gemo fala kiʼniya gemo aepaʼamo afisayafeʼmo ago alino lapamiʼniyaʼmonanafa malaga vayaʼaifeʼmo aeʼna kalafefa gefatiʼmo huʼna hapa nepauve.

¹² Agege agege huʼa maigayana ageʼa aeto osuge afige afige huʼa maigayana afiʼa aeto osuge huʼa maisayafeʼmo aeʼna kalafefa gemo huʼna hapa nepauve. Afiʼa aeto huteʼa aiʼa atagineʼa Gotitegamo esageno hosu kavaʼapimo afaʼa alino oʼatalesiyafeʼmo aeʼna kalafefa gemo huʼna hapa nepauve, huno hapa paiʼniye.

¹³ Hapa paitenoʼaeʼmo, ani aeʼna kalafefa ge huʼnova gemo aepaʼamo oʼafiʼnafiye. Ani aeʼna kalafefa ge huʼnova gemo aepaʼamo oʼafiʼnisayana haiya kava hutapa muki aeʼna kalafefa gemo huʼnova gemo aepaʼamo afigae.

¹⁴ Avina yaʼmo nehakaleya vekamoʼmo Goti geʼamo nehakale.

¹⁵ Mago avina yaʼmo kateʼmo asagauno aiʼniya avina yakana huʼa vayaʼmogi Goti geʼamo neʼafigenoʼaeʼmo Sataniʼa eno apaipafiʼmo hakaleʼniya gemo alinino neʼviye.

¹⁶ Mago avina yaʼmo yafa agotofuleʼmo asagauno aiʼniya avina yakana huʼa vayaʼmogi Goti geʼamo afiteʼapaeʼmo malage huʼa apamogaga neʼaiye.

¹⁷ Apamogaga neʼaiyaʼmonanafa hafuʼya oʼaeʼniyaʼmofeʼmo aise afinaʼmo maiʼnagenoʼaeʼmo hanageke kavaʼmo afole neʼaifi Goti geʼamo noʼafiya vayaʼmogi apaini huʼa neʼapatafi huʼa nehageʼapaeʼmo malage huʼa asagauʼa neʼaiye.

^18-19 Mago avina yaʼmo aufe nofi haneʼniya mopafiʼmo asagauno aiʼniya avina yakana huʼa mago vayaʼmogi Goti geʼamo afiteʼapaeʼmo ma mopafi kavafeʼmo hapausoli huge monimoʼa humi apateʼnigeno lusi kava huno hapauge magoʼe yaʼmo alisayafeʼmo hapaʼye huge huʼa maiʼnagenoʼaeʼmo ani kavaʼmoʼa Goti geʼamo ago aeno ati nekaegeno alagamo noʼae.

²⁰ Mago avina yaʼmo alagepa mopafiʼmo asagauno aiʼniya avina yakana huʼa mago vayaʼmogi Goti geʼamo afiteʼapaeʼmo aliʼa apaipafiʼmo neʼmalagenoʼaeʼmo tetiʼa alagamo aege sigisitiʼa alagamo aege vani hataletiʼa alagamo aege huʼa neʼmaiye, huno hapa paiʼniye.

Lamu kanifeʼmo huʼniya gemae

²¹ Hapa paitenoʼaeʼmo, lamufiʼmo kani aeʼa kaeteʼapaeʼmo paketimo afepiʼmo malege hipagapiʼmo malege nehafiye. Haʼao hiʼyalamutekeʼmo neʼmalae.

²² Muki yaʼamo fala kino haneʼniyanageno henagaʼamo afole aigiye. Muki yaʼamo aino ati kae maleʼniyanageno henagaʼamo ha le yategamo afole aigiye.

²³ Ge neʼafisaya lapakesamo haneʼnisiyaʼmoʼmo ani gemo afiyo.

²⁴ Gemo neʼafitapaeʼmo, na agufa gemo neʼafufi hutapa alagepa hutapa lapakesamo afiyo. Afitetapaeʼmo lapaipa lapakesamo neʼamisagenoʼaeʼmo Gotiʼa ina kava huno lapamigiye. Alagepa hutapa neʼafisayana magoʼe huno alino lapamigiye.

²⁵ Aliʼnaya vayaʼaina magoʼe huno alino apamigiye. Oʼaliʼnisaya vayaʼai apayapatiʼmo aiseʼamo aliʼnisaya yaʼmo hapafaleno atalegaiye, huno hapa paiʼniye.

²⁶ Hapa paitenoʼaeʼmo, Ina kava huno Gotiʼa yagaino apateʼniya kava huno mago vekamoʼmo avina yaʼmo hoyafiʼmo nehakale.

²⁷ Haniʼilagamo havaege felugamo umenitata huge nehigenoʼaeʼmo avina yaʼmo nehageyaʼmonanafa ageno aeto nosiye.

²⁸ Mopamokeʼmo ani agufa aliʼyaʼmo neʼaligeno neʼyaʼmo afole neʼaiye. Hogoteno yosaʼageʼmo hagetenoʼaekeʼmo haitaʼamo afole aitegeno neʼyaʼamo afole neʼaiye.

²⁹ Neʼyaʼamo nelegenoʼaeʼmo ani vekamoʼmo naipeletiʼmo heno hatagauno neʼaliye, huno hapa paiʼniye.

Masiteti avina yafeʼmo huʼniya gemae

³⁰ Hapa paitenoʼaeʼmo, ina kava huno Gotiʼa yagaino apateʼniya kavaʼmo na agufa kavakana huno haneʼniye. Ani kavafeʼmo haiya aune gemo hisune.

³¹ Ina kava huno mago vekamoʼmo aise avina yaʼmo agiʼamo masiteti avina yaʼmo hakaleʼniye. Muki avina yaʼamo alopa avina yaʼmo haneʼniyaʼmofeʼmo ani aise avina yaʼmo ago aeno aga seʼniye.

³² Aise avina yaʼmo haneʼniyaʼmonanafa fai maleʼnigenoʼaeʼmo hagenuno haino alopa hetenoʼaeʼmo muki neʼyaʼamo ago aeno aga seno akopamo aeʼnigeʼa nama anagaʼmogimo akopaʼamo ulinapiʼmo apanoʼmo nekiye, huno hapa paiʼniye.

³³ Yesuʼa magoʼe huno ani agufa aeno kalafefa gefatiʼmo afaʼa afisayafeʼmo aeno hakalo huno hapa paiʼniye.

³⁴ Aeno kalafefa geʼageʼmo huno hapa paiʼniyaʼmonanafa agaiʼageʼmo maiʼnenoʼaeʼmo geʼamo neʼafiya vayaʼaifekeʼmo ani gemo aepaʼamo hapa paiʼniye.

Yesuʼa yasiʼe aniʼeʼmo hano hiʼao, huno huʼniya gemae

³⁵ Ani afinaʼmo uneʼamo Yesuʼa geʼamo neʼafiya vayaʼaifeʼmo hapa painoʼaeʼmo, mugagayaga faliga vigetao, huno huʼniye.

³⁶ Huno huʼnigeʼa muki vayaʼamo apataleʼa Yesuʼa maiʼniya sipifiʼmo uʼa haiʼa maiteʼapa avaleliʼa uʼnae. Neʼvagenoʼaeʼmo mago alu sipimo uʼnigeʼa lokaeliʼa uʼnae.

³⁷ Neʼvagenoʼaeʼmo lusi kava huno yasimo aliteno aniʼmo aino holakau holakau huno eno haineno sipifiʼmo havaiteʼnigeno aeno lapanegefe huʼniye.

³⁸ Yesuʼa sipimo akamelegamo afita aiteno havaeno maiʼniye. Geʼamo neʼafiya vayaʼmogi hauneʼa ateteʼapaeʼmo, tisao, huʼa, lagaemo hogoʼamo aniʼmo negesunagi lagaefeʼmo kagesa noʼafipiye, huʼa ha paiʼnae.

³⁹ He tino yasieʼmo ge hauteno anifeʼmo ha painoʼaeʼmo, hano huvo, huno huʼnigeno yasimo hano huʼnigeno aniʼmo afaʼa haneʼniye.

⁴⁰ Yesuʼa geʼamo neʼafiya vayaʼaifeʼmo hunoʼaeʼmo, na kava higetapa lusi kava huta koli nehae. Na kava higetapa nagaefeʼmo lapakesamo afita fatago nosae, huno hapa paiʼnigeʼapaeʼmo

⁴¹ lusi kava huʼa koli huteʼa apakaiʼapimo ge huge afige huʼapaeʼmo, na agufa vekamo maiʼniye. Yasimoʼe aniʼmoʼeʼmo geʼamo afiʼnaʼae, huʼa huʼnae.