Maki 14 - The Keyagana NT and 25 OT books

¹ Lole afinaʼmo utesigenoʼaeʼmo Yu vayaʼai Pasova hopa afinaʼmo aeno apafu noleya peleti mayamo neʼnaya afinaʼmo afole aisiyafe huʼniye. Mono huʼa neʼapataya vayaʼaiteʼmo yagaiʼa neʼapataya vayaʼe keʼaepa gemo avoʼmo kaeʼa aliʼa apaya neʼmalaya vayaʼmogiʼeʼmo kesi katetiʼmo uʼa Yesuʼa atafauʼa kamitimo amagisaya kafeʼmo kahauya huʼa maiʼnae.

² Maiʼneʼapaeʼmo, fiku yanageʼa neʼatafausunageʼapaeʼmo hopa afinaʼmogeʼa lagaemo lamagigayanagi oʼatafaigetao, huʼa huʼnae.

Mago akanomoʼmo Yesu agufaleʼmo uvelimo faleno ateʼniya gemae

³ Yesuʼa Metani taonifiʼmo Saimoniʼa lepolosi yaʼmo hauno hageʼniya vekamo nopiʼmo maiʼniye. Neʼyaʼmo neʼnegenoʼaeʼmo mago akanomoʼmo alagepa atumo neʼaiya uvelimo alopa monileʼyaʼmo aeno agaseʼniya uvelimo yafa kepi uvelimo alinineno ani uveli keʼmo aino atagi maleʼneno agenopafiʼmo lakino ateʼniye.

⁴ Mago vayaʼmo anifi maiʼnaya vayaʼmogimo ageteʼa apaipa leʼa ateteʼa apakaiʼapimo huʼapaeʼmo, na kava higeno alagepa atu neʼaiya uvelimo alinineno fiku lakino ateʼniye.

⁵ Ani uvelimo maketi huʼnonesinana tali hataleti kinamo aliteta kagemi yaʼapimo ohaneʼnisiya vayaʼaina aliniteta apamunesine, huʼa huteʼa ge hauʼnae.

⁶ Yesuʼa hunoʼaeʼmo, na kava higetapa kana yaʼmo alita neʼamiye. Nagaetegamo lusi kanale kavaʼmo huno neʼnate. Afaʼa ataleyo.

⁷ Kagemi yaʼapimo ohaneʼniya vayaʼmo muki afinaʼmo lapakaeʼeʼmo lokaeʼa neʼmaiyaʼmofeʼmo lapaisiya afinaʼmo apakaemo alagepa hutapa hapa maegayaʼmonanafa nagaemo muki afinaʼmo lapakaeʼeʼmo lokaeʼna oʼmaiguve.

⁸ Afaʼa huʼniyesina agufa kavaʼmo ago huno nateʼniye. Hogoteno nagufamo alino alo huno nateʼniyanageʼna falisugeʼapaeʼmo kanolufiʼmo kiʼa nategae. Kanolufiʼmo kiʼa natesayafeʼmo alagepa atu neʼaiya uvelimo faleno nateʼniye.

⁹ Lama gemo lapa nepauve, huno, vayaʼmogimo nava gemo mani alagepa faigoko geʼnimo aliʼniʼuʼa muki haopalegamo aeʼa hakalo huʼa hapa paisageʼa afisaya vayaʼmogimo mani aʼmoʼa huʼniya kavafeʼmo apakesa afisayafeʼmo ava gemo huʼa hapa paigae, huno hapa paiʼniye.

Yutasiʼa kutulu yaʼmo aliguve, huno huʼniya gemae

¹⁰ Hapa paitegenoʼaeʼmo Yutasiʼa geʼamo neʼafiya vekamo tuolofuʼa vayapati vekamo apataleno mono huʼa neʼapataya vayaʼaiteʼmo yagaiʼa apateʼnaya vayaʼaitegamo Yesuʼmo avaleno apamisiyafeʼmo uʼniye.

¹¹ Uno hapa painoʼaeʼmo, avaleliʼneʼna lapamiguve, huno huʼnigeʼapaeʼmo apamogaga aiteʼa, mago kutulu monimo hageta kamigune, huʼa huʼnagenoʼaeʼmo avalelinuno apamisiya kafeʼmo aepa faino kahauya huno maiʼniye.

Pasova neʼyaʼmo neʼnaya kavafeʼmo huʼniya gemae

¹² Yu vayaʼmogi aeno apafu noleya peleti mayamo neʼnaya hopa afinapatiʼmo hogote hopa afinaʼmo aikeli sipisipimo apamagiʼa Pasova neʼyaʼmo neʼnaya afinaʼmo afole aiʼniye. Afole aiʼnigeʼapaeʼmo Yesu geʼamo neʼafiya vayaʼmogi huʼapaeʼmo, Pasova neʼyaʼmo nesunafeʼmo haiyaʼalegamo uta alo hisune, huʼa afi geʼnae,

^13-14 Yesuʼa lole vekalaʼanifeʼmo hunoʼaeʼmo, alopa taonifiʼmo uta haitana ani keʼmo alinino neʼesiya vekaʼeʼmo fotu hutetanaeʼmo akame hutana viʼao. Lanakaemo uno haisiya nopi vekaeʼmo hutanaeʼmo, Tisa vekamoʼmo hunoʼaeʼmo, nagaeʼe geʼnimo neʼafiya vayaʼeʼmo Pasova neʼyaʼmo nesuna noʼmo haiyateʼmo haneʼniye, huno huʼniye, hutana afi geʼao.

¹⁵ Agaemo lana valelinuno haino anaga agotofule nopiʼmo aeno anagi malefa noʼmo alo hu maleʼniyanageno alino lana veligiye. Ani nopiʼmo Pasova neʼyaʼmo alo hiʼao, huno huteno alino anategeʼana uʼnaʼae.

¹⁶ Geʼamo neʼafiʼa vekalaʼmo taonifiʼmo uʼana Yesuʼa hana paiʼniya kavaʼmo huʼana ageteʼana Pasova neʼyaʼmo alo huʼnaʼae.

¹⁷ Yegemo uno lamino faleʼnigeʼapaeʼmo Yesuʼe tuolofuʼa vayaʼmo geʼamo neʼafiya vayaʼeʼmo eʼa nopiʼmo uʼa haiʼa maiʼnae.

¹⁸ Hiʼyalamuteʼmo maiʼneʼa neʼyaʼmo neʼneʼapaeʼmo Yesuʼa hunoʼaeʼmo, lama gemo lapa nepauve, huno, lapakaepatiʼmo mago vekamo nagaeʼeʼmo magokepi maiʼneno neʼyaʼmo neʼneya vekamoʼmo kame vayaʼmo navaleno apamigiye, huno hapa paiʼniye.

¹⁹ Hapa paiʼnigeʼapaeʼmo geʼamo neʼafiya vayaʼai apaipamoʼmo lusi kava huno kana huʼnigeʼa apamete apamete huʼa huʼapaeʼmo, nagaefeʼmo nehapiye, huʼa afi geʼnagenoʼaeʼmo,

²⁰ Lapakaepati vekamoʼmo peleti mayamo nagaeʼeʼmo magokepi maiʼneno alino yuvapafi anipiʼmo aeteno neʼniya vekamae.

²¹ Vemo mafaʼnemoʼmo Goti mukufiʼmo avoʼmo kae maleʼnaya kateʼmo afaʼa ugiyaʼmonanafa kutulu yaʼmo neʼniya vekalegamo lusi kava huno kage kage kavaʼmo afole aigiye. Itaʼamoʼmo alino oʼateʼniyesinana agaetefeʼmo kanale huʼniyesine, huno hapa paiʼniye.

Ala kava neʼmo kaveʼmo neʼnaya gemae

²² Neʼyaʼmo neʼneʼapaeʼmo Yesuʼa peleti mayamo alino auleno ateteno akaya heno geʼamo neʼafiya vayaʼaina apamitenoʼaeʼmo, manimona nagufaʼnimogi alita neyo, huno huʼniye.

²³ Huno huteno kapumo alino Gotifeʼmo hao ke heteno apamiʼnigeʼa mukiʼamogimo ani kapufatiʼmo neʼnae.

²⁴ Agaemo hunoʼaeʼmo, mani kapufi aniʼmo kolaʼnimae. Gotiʼa mani kavaʼmo huguve, huno hu maleʼniya saufa kotalakemo afole aisiyafeʼmo muki asole vayaʼaitefeʼmo aiʼna lakiguve.

²⁵ Lama gemo lapa nepauve, huno, halate nofi alagafati aniʼmo oʼneʼna maime maime neʼvisugenoʼaeʼmo Gotiʼa yagaino apateʼniya kotetiʼmo saufa aniʼmo lapakaeʼeʼmo magokepi negaune, huno hapa paiʼniye.

²⁶ Apakaemo mono yokemo huteʼa kumatega uʼa lamiteʼa Alifiʼaepa avefiʼmo uʼa haiʼnae.

Yesuʼa Pitafeʼmo hunoʼaeʼmo, oʼageʼnova vekae, huka hugane, huno huʼniya gemae

²⁷ Yesuʼa hunoʼaeʼmo, Hemeni haniʼilagamo nagaetegamo afole aisiya kavatefeʼmo muki vayaʼamo ago asagautapa aigae. Goti Mukufiʼmo avoʼmo kae maleʼniya gemoʼmo ani kavafeʼmo hunoʼaeʼmo, Nagaemo sipisipileʼmo yagaino apateʼniya vekamo neʼamagisugeʼapaeʼmo sipisipi anagaʼamo atagu faeʼa apaune heʼa u eʼa hugae, huno huʼniye.

²⁸ Huʼniyaʼmonanafa kanolufatiʼmo halate alino he tino natesigeʼnaeʼmo Galeliya kotegamo uʼna hogo netesugetapa ugae, huno hapa paiʼniye.

²⁹ Pitaʼa hunoʼaeʼmo, muki vayaʼamo ago kataleʼa ugayaʼmonanafa nagaemo alagi kataleʼna oʼuguve, huno huʼnigenoʼaeʼmo,

³⁰ lama gemo kaha nepauve, huno, ani haniʼilagamo kokolemoʼmo lole afinaʼmo age oʼaiʼnisigekaeʼmo nagaefeʼmo loleʼe magoʼe afinaʼmo hukaeʼmo, oʼageʼnova vekae, huka hugane, huno ha paiʼnigenoʼaeʼmo

³¹ Pitaʼa magoʼe huno lokiya gefatiʼmo hunoʼaeʼmo, kagaeʼeʼmo magokepi faliguʼanageʼna alagi oʼageʼnova vekae, huʼna osuguve, huno huʼnigeʼapaeʼmo geʼamo neʼafiya vayaʼmo mukiʼamogimo ani agufa ge huʼnae.

Getesemani hoyafiʼmo uno nunumuʼmo huʼniya gemae

³² Apakaemo mago mopamo agiʼamo Getesemani mopaleʼmo uteʼapaeʼmo Yesuʼa geʼamo neʼafiya vayaʼaifeʼmo hunoʼaeʼmo, manile maiʼnigeʼnao nagaemo uʼna mugalega nunumuʼmo huguve, huno hapa paitenoʼaeʼmo apateteno

³³ Pitaʼagi Yemisiʼagi Yoniʼagi huno apavalelino uʼniye. Agaemo aepa faino lusi kava huno hau aitenoʼaeʼmo amoʼya aiʼnigeno

³⁴ hunoʼaeʼmo, hosu kavaʼmoʼa faino vego huno yagaino neʼnategeno naipamoʼmo lusi kava huno kana huʼnigeʼna falisuva naipamo nekaliye. Manileʼmo maiʼnetapa kava yagaita maiyo, huno hapa paiʼniye.

³⁵ Apatalenuno aise afagiʼaleʼmo mopafiʼmo asagauno aino agoʼya faiʼnenoʼaeʼmo hosu afinaʼmo faino kasalo paesiyafeʼmo nunumuʼmo huʼniye.

³⁶ Nunumuʼmo hunoʼaeʼmo, Afoʼnimogae, huno, kagaemo muki kavaʼamo huguve huka hisana kavaʼmo afaʼa hugane. Mani kapumo nagaetegatiʼmo alika atalo. Ani ge huʼna huvaʼmonanafa nagaemo nahauʼni kavaʼmo osuka kagaemo kahauʼnisiya kavaʼmo afaʼa huvo, huno nunumuʼmo huʼniye.

³⁷ Nunumuʼmo huteno atagineno eno apakeyana loleʼe magoʼe vayaʼmo geʼamo neʼafiya vayaʼmo apau kaleʼa maiʼnageno apaketenoʼaeʼmo Pitafeʼmo hunoʼaeʼmo, Saimoniyo, huno, kau kaleʼnapiye. Magoke aovamo afaʼa yagaika oʼmaiʼnapiye, huno afi geʼniye.

³⁸ Apakaefeʼmo hunoʼaeʼmo, lapamalageka hisiya kavapiʼmo uta haita ofalesayafeʼmo yagaita maiʼnetapa nunumuʼmo hiyo. Lapaunelapameʼmoʼa hunoʼaeʼmo, afaʼa hugune, huno nehiyaʼmonanafa amega lapakufamoʼa hisayafeʼmo lokiya noʼvaiye, huno hapa paiʼniye.

³⁹ Halate apatalenuno hogoteno huʼniya agufa gemo huno nunumuʼmo huʼniye.

⁴⁰ Huteno atagi neneno apakeyana apau mai mai huʼnigeʼapa apau kaleʼa maiʼnageno apakeʼnigeʼapaeʼmo, haiya agufa gemo husupi, huʼa apakesamo oʼafiʼnae.

⁴¹ Loleʼe magoʼe afinaʼmo halate atagineno eno hunoʼaeʼmo, maita falu hutapageʼmo lapau kaletapa maiʼnafiye. Haiʼmae. Ani afinaʼmo ago afole aiyanagi ageyo, huno, apakaemo Vemo Ma faʼnemo avaleliʼuʼa hosu vayaʼai apayapiʼmo atesayafeʼmo neʼae.

⁴² He tita vigetao. Ageyo, huno, nagae kutulu yaʼmo neʼniya vekamo ago neʼe, huno hapa paiʼniye.

Yesuna atafauʼa ayatalateʼmo nofi kiʼa ateʼnaya gemae

⁴³ Yesuʼa ani gemo nehigenoʼaeʼmo Yutasiʼmo tuolofuʼa vayapati vekamo geʼamo neʼafiya vekaʼe asole vayaʼeʼmo naipe alige kayoʼmo alige huliʼa eʼnae. Mono huʼa neʼapataya vayaʼaiteʼmo yagaiʼa apateʼnaya vayanagi keʼaepa gemo avoʼmo kaeʼa aliʼa apaya neʼmalaya vayanagi vayatama vayanagi huʼa aliʼa apateʼnageʼa eʼnae.

⁴⁴ Kutulu yaʼmo neʼniya vekamo hogotenuno alagena kavaʼmo hisiyafeʼmo hunoʼaeʼmo, uʼna haeʼna nesuva vekamo ani vekamogi uta atafauta avalelita viyo, huno hapa paiʼniye.

⁴⁵ Yutasiʼa uno avaʼyi hutenoʼaeʼmo Yesutega uno, Tisao, huno huteno haeno neʼniye.

⁴⁶ Haeno neʼnigeʼapaeʼmo uʼa Yesuʼa atafauʼnae.

⁴⁷ Neʼatafagenoʼaeʼmo agaeʼe he tino maiʼniya vekamoʼmo naipemo asagino mono huʼa neʼapataya vayaʼaiteʼmo hogote vekamo yagaino apateʼniya vekamo aliʼyaʼamo neʼaliya vekamo agesamo heno lafe huno ataleʼniye.

⁴⁸ Yesuʼa hapa painoʼaeʼmo, vaya apamagiteʼa kumayaʼmo neʼaliya vayaʼaina kalavusi huʼa apatesayafeʼmo naipe alige kayoʼmo alige huliʼa neʼaya agufa kavaʼmo huta alinita nagaetegamo neʼafiye.

⁴⁹ Nagaemo muki afinaʼae afinaʼaeʼmo lapakaeʼeʼmo magokepi maiʼneʼna alopa mono nopiʼmo aliʼna apaya maleʼna maiʼnova afinaʼmo oʼnatafauʼnae. Oʼnatafauʼnayaʼmonanafa Goti Mukufiʼmo avoʼmo kae maleʼnaya gemo alagi afole aigefe hiye.

⁵⁰ Ani gemo hutegeʼapaeʼmo muki geʼamo neʼafiya vayaʼmo ataleʼa apaune heʼnae.

^51-52 Mago neya vekamoʼmo yave yave kukenaʼageʼmo vailiʼniya vekamoʼmo Yesuʼa akame huno neʼvigeʼapaeʼmo neya vayaʼmogimo atafauʼa kukena yaʼamo asagiʼa alitageno agufalagaʼagekeʼmo ataleno aune heno uʼniye.

Kanisole vayaʼmogimo agoti huʼa ateʼnaya gemae

⁵³ Apakaemo Yesuʼa avaleliʼuʼa mono huʼa neʼapataya vayaʼaiteʼmo hogote vekamo yagaino neʼapateya vekamo nopiʼmo uʼa haiʼnae. Muki vayaʼamo mono huʼa neʼapataya vayaʼaiteʼmo yagaiʼa neʼapataya vayanagi vayatama vayanagi keʼaepa gemo avoʼmo kaeʼa aliʼa apaya neʼmalaya vayaʼnagi huʼa maiʼnae.

⁵⁴ Pitaʼa apamasa hulinuno mono huʼa neʼapataya vayaʼaiteʼmo hogote vekamo yagaino neʼapateya vekamo no kumateʼmo uno haino kava neʼyagaiya ati vayaʼeʼmo ataleʼmo loto huʼa maiʼnae.

⁵⁵ Mono huʼa neʼapataya vayaʼaiteʼmo yagaiʼa neʼapataya vayaʼe kanisole vayaʼmogiʼeʼmo Yesuna amagisageno falisiya gemo afisayafeʼmo kahauya huʼnayana oʼafiʼnae.

⁵⁶ Asole vayaʼmogimo aigofe faigoko gemo huʼnayaʼmofeʼmo magoke agufa gemo osuʼnafa alu ge alu gemo huʼnageʼapaeʼmo amagisageno falisiya gemo alagi oʼafiʼnae.

⁵⁷ Huʼnageʼapaeʼmo mago vayaʼamogi he tiʼa Yesufeʼmo aigofe gemo huʼnae.

⁵⁸ Apakaemo huʼapaeʼmo, afiʼnonageno alopa mono noʼmo vayaʼmogi apayatetiʼmo ki maleʼnaya nofeʼmo heʼna halagape vaiteʼna loleʼe magoʼe afinaʼmo utesigeʼna vayaʼmogi okisaya agufa kavaʼmo huʼna kiguve, huno huʼnigeta afiʼnone, huʼa huʼnayaʼmonanafa

⁵⁹ apakaemo alu ge alu gemo huʼnae.

⁶⁰ Hutagenoʼaeʼmo mono huʼa neʼapataya vayaʼaiteʼmo hogote vekamo yagaino neʼapateya vekamoʼmo ani vayaʼai apaulagaleʼmo he tino Yesufeʼmo hunoʼaeʼmo, magoke gemo aeka atagaina huka osugapiye. Haiya agufa faigoko gemo kagaetegamo nehae, huno afi geʼnigenoʼaeʼmo

⁶¹ geʼaleʼmo aeno atagaina huno osuno afaʼa maiʼniye. Halate mono huʼa neʼapataya vayaʼaiteʼmo yagaino neʼapateya vekamoʼmo hunoʼaeʼmo, Kalaisigamo aliʼa auleʼa neʼataya vekamo mafaʼneʼamo maiʼnapiye, huno afi geʼnigenoʼaeʼmo

⁶² he, maiʼnove. Lapakaemo agegayana Vemo Mafaʼnemo Lokiyaʼaʼe Vekamo lamaga haopaleʼmo fai maiʼneno he tino hiyapiʼmo eminesigetapa agegae, huno huʼniye.

⁶³ Huʼnigeno mono huʼa neʼapataya vayaʼaiteʼmo yagaino neʼapateya vekamoʼmo afitenoʼaeʼmo agaiʼa yatala kukenaʼamo alino apake aino ataleteno, magoʼe vayaʼmogi eʼa faigoko gemo huʼa laha paisageta afisuna gemo ohane.

⁶⁴ Gotifeʼmo lifana huno ateʼniya gemo ago afiʼnagi na kavafeʼmo lapakesa afiye, huno apafi geʼnigeʼapaeʼmo muki vayaʼmogi huʼapaeʼmo, hosu gemo huʼniyanageno afaʼa faligiye, huʼa huʼnae.

⁶⁵ Mago vayaʼamogi aepa faiʼa apaviʼna heʼa atege augosafiʼmo lavolavoletiʼmo kiʼa aiʼa atikaeʼa ateʼneʼa siki kayoʼmo amagiteʼapaeʼmo, ina laʼmo kamagiʼnifigi kaune gemo huka laha paiyo, huʼa huge huge huʼa maiʼnae. Ati vayaʼmogimo lusi kava huʼa amagiʼnae.

Pitaʼa Yesufeʼmo oʼageʼnova vekae, huno huʼniya gemae

⁶⁶ Pitaʼa kumateʼmo afelaga maiʼnigenoʼaeʼmo mono huʼa neʼapataya vayaʼaiteʼmo hogote vekamo yagaino neʼapateya vekamo aliʼyaʼamo neʼaliya aʼmafaʼnemo eʼniye.

⁶⁷ Eno ageyana Pitaʼa ataleʼmo loto huno maiʼnigeno aulu haeno ageno alagepa huʼnenoʼaeʼmo, kagaemo Nasalasa taonifi vekamo Yesuʼeʼmo neʼmaina vekae, huno huʼnigenoʼaeʼmo

⁶⁸ haʼao, nehana gemo noʼafugi na agufa kavafe ani gemo nehapi huʼna oʼafuve, huno huteno no folagapiʼmo uʼeʼa nehaya kateʼmo uno maiʼnigeno kokolemoʼmo age aiʼniye.

⁶⁹ Aliʼyaʼmo neʼaliya aʼmafaʼnemoʼa ageteno halate anile maiʼnaya vayaʼaifeʼmo hunoʼaeʼmo, apakaepati vekamo maiʼniye, huno huʼnigeno

⁷⁰ Pitaʼa halate magoʼe gemo hunoʼaeʼmo, oʼageʼnove, huno huʼniye. Aise afinaʼmo utegeʼa anileʼmo he tiʼa maiʼnaya vayaʼmogimo Pitafeʼmo huʼapaeʼmo, lama gemo hune, huʼa, alu kagemo neʼainageta afiʼnonaʼmofeʼmo Galeliya kotega vekamo maiʼnane. Galeliya kotega vekamo maiʼnanaʼmofeʼmo apakaepati vekamo maiʼnane, huʼa huʼnageno

⁷¹ Pitaʼa hunoʼaeʼmo, lama ge nosisuvana Gotiʼa lifana huno nategaiye. Anagatiʼmo alagi lama ge nehuvana oʼageʼnova vekae, huno hapa paiʼniye.

⁷² Hapa nepaigenoʼaeʼmo kokolemoʼmo lole afinaʼmo age aiʼnigenoʼaeʼmo Yesuʼa Pitafeʼmo hogoteno ha painoʼaeʼmo kokolemoʼmo lole afinaʼmo age oʼaiʼnisigekaeʼmo nagaefeʼmo loleʼe magoʼe afinaʼmo oʼageʼnova vekae, huka hugane, huno ha paiʼniya geeʼmo agesa afino ho huteno aviʼyaʼmo huʼniye.