Maki 13 - The Keyagana NT and 25 OT books

Yesuʼa ma mopamo hano hisiya afinafeʼmo huʼniya gemae

¹ Yesuʼa Yu vayaʼai alopa mono nopatiʼmo uno nelamigenoʼaeʼmo mago vekamo geʼamo neʼafiya vekamoʼmo hunoʼaeʼmo, Tisao, ago, huno, kanale yafatetiʼmo alagepa nokoʼageʼmo ki maleʼnaya noʼmo haneʼniye, huno huteno amuse huʼniye.

² Yesuʼa hunoʼaeʼmo, alagepa nokoʼageʼmo ageʼnapiye. Magoke yafateʼmo akalo akalo huno ohanegaifa heʼa halagape vaiʼa muki yafaʼamo aiʼa atagu faeʼa aote aote huʼa atalegae, huno ha paiʼniye.

³ Agaemo Alifiʼaepa avefiʼmo uno haino fai maiʼnigenoʼaeʼmo Yu vayaʼai alopa mono noʼmo aulagaleʼmo haneʼnigeʼapaeʼmo Pitaʼagi Yemisiʼagi Yoniʼagi Etaluʼagi huʼa apakaiʼapigeʼmo maiʼneʼapaeʼmo,

⁴ hainu afinaʼmo afole aigiye. Afole aisiya alagena kavafeʼmo laha paiyo, huʼa afi geʼnae.

⁵ Yesuʼa aepa faino hapa painoʼaeʼmo, humi lapategayanagi ehetapiye, huno, alagepa hutapa yagaiyo.

⁶ Asole vayaʼmogimo nagiʼnimo aeteʼapaeʼmo, nagaemo Kalaisinaʼmo neʼove, huʼa huteʼa asole vayaʼaina humi apategae.

⁷ Lapaopaleʼmo kamemo hisaya kavafeʼmo ava ge hisagetapa afige afagitega kamemo hisaya kavafeʼmo ava gemo hisagetapa afige hutetapaeʼmo lapau aitetapa koli osiyo. Ani kavaʼmo afole aigiyaʼmonanafa hano hisiya afinaʼmo henagaʼageʼmo afole aigiye.

⁸ Mago nofi vayaʼmogi uʼa alu nofi vayaʼeʼmo kamemo hugae. Mago gamani vayaʼmogi uʼa alu gamani vayaʼeʼmo kamemo hugae. Imimamo aote aote huno alige kafu hu kavaʼmo afole aige hanageke kavaʼmo afole aige hugiyaʼmonanafa apakafu nekiya kavaʼmo saufamogeno afole aigiye.

⁹ Mago vayaʼmogimo lapatafauʼa kanisole vayaʼai agotileʼmo lapavaleliʼa uge alu mono nopi alu mono nopiʼmo lapamagige huteʼa gamani vayaʼaiteʼmo yagaiʼa neʼapataya vayaʼaitegaʼe yagaiʼa neʼapataya kini vayaʼai apaulagaleʼeʼmo uta nagiʼnilefeʼmo he ti netapa lama gemo hugae.

¹⁰ Hogoteʼa muki alu nofi vaya alu nofi vayaʼaifeʼmo nava gemo huʼa alagepa faigoko geʼnimo aeʼa hakalo huʼa hapa paiʼa hano hugae.

¹¹ Lapatafauteʼa agoti huʼa lapatesayafeʼmo lapavaleliʼuʼa apamisagetapaeʼmo hogoteta hutapaeʼmo, na agufa ge huta hugupi, hutapa osuta ani afinaʼmo Gotiʼa alino lapamisiya gemo hapa paiyo. Lapakaemo hapa opaigafa Aote Aunemeʼamoʼa hapa paigiye.

¹² Mago vayaʼmogi konagaʼapimo apamagisageʼa falisayafeʼmo apavaleʼa apamige mafaʼneʼapimo apavaleʼa apamige itaʼapi afoʼapimogimo apavaleʼa apamige hugae.

¹³ Muki vayaʼamogimo nagiʼnilefeʼmo lapakaefeʼmo apaini hugae. Hugayaʼmonanafa oʼataleʼa atafauʼa alagi huʼa maime maime neʼvisaya vayaʼaina hano hisiya afinaʼmo apakufamo alino katino apateteno hapau vaigiye.

¹⁴ Lekana nepaiya vayaʼmogitapamo mani gemo aepaʼamo alagepa huta afiyo. Lapakaemo agegayana lusi hosu yaʼmoʼa alino hano huno atalesiya agufa yaʼmo haneʼnisigetapa agegae. Neniyoʼa Gotitegati gemo alinineno aeno hakalo huno hapa nepaiya vekamoʼmo ani yafeʼmo avoʼmo kae maleʼniye. Ani agufa hosu yaʼmo ohaneʼnisiya nopiʼmo haneʼnisigetapa agetetapaeʼmo ataleta lapaune heyo. Yutiya kotega maiʼnisaya vayaʼmogi avelegamo apaune hetaleʼa uʼa haiʼa maiyo.

¹⁵ Inagi nokatomule maiʼnisaya vayaʼmogimo kagemi yaʼapimo aliniʼa visayafeʼmo uʼa lamiʼa noʼapifiʼmo uʼa ohaiyo.

¹⁶ Hoyaʼapifilaga maiʼnisaya vayaʼmogi saketiʼapimo aliʼa vaisayafeʼmo halate atagi neʼa oʼmeyo.

¹⁷ Vaehae, huʼna, ani afinaʼmo apaipa guʼe maiʼnisaya aʼne anagaʼe mafaʼnemo nu neʼapamisaya aʼne anagaʼeʼmo nahau huve.

¹⁸ Yasi alisiya afinaʼmo lapaune osesayafeʼmo nunumuʼmo hiyo.

¹⁹ Ani afinaʼmo afole aisiya hanageke yaʼmoʼa hogoteno afole aiʼniya hanageke yaʼmo Gotiʼa ma mopamo alo huʼniya afinatetiʼmo afole aime aime eʼniya hanageke yanagi muki afole aisiya hanageke yanagi huno ago aeno aga seno afole aigiye.

²⁰ Ala kava neʼmoʼa ani agufa hanageke afinaʼmo alino hogo huno oʼateʼniesinana muki vayaʼamo ago faliʼnaesinaʼmonanafa lekana paino apateʼniya vayaʼaitefeʼmo ani hanageke afinaʼmo aliʼna hogo huʼna ategauve, huno agesamo afiʼniye.

²¹ Mago vayaʼmogimo huʼapaeʼmo, Ageyo, huʼa, Kalaisiʼa manile maiʼniye, huʼa huge, ageyo, huʼa, mugalega maiʼniye, huʼa huge hisagetapaeʼmo, lama gemo nehae, hutapa lapakesamo oʼafiyo.

²² Mago vayaʼmogi huʼapaeʼmo, Kalaisiʼna maiʼnove, huʼa huge Gotitegati gemo aliniʼneʼna aeʼna hakalo huʼna hapa nepauva vekamo maiʼnove, huʼa huge huteʼa noʼagaya apaune kavaʼmo huteʼa ago lekana paino apateʼniya vayaʼaifeʼmo humi apatesayafeʼmo hugayaʼmonanafa afaʼa humi oʼapategae.

²³ Nagaemo muki afole aisiya kavafeʼmo ago lapa paiʼnovanagi alagepa huta kava yagaiyo.

Vemo mafaʼnemo henagaʼamo eminegaiye, huno huʼniya gemae

²⁴ Ani afinaʼmo lusi hanageke yaʼmo afole aitesigenoʼaeʼmo yegemo olege kaimo olege hugiye.

²⁵ Muki kanefiʼamo kokuʼnapatiʼmo aino atafaino sagauno aigiye. Kokuʼnapi haneʼniya yaʼamoʼmo atete nehisigenoʼaeʼmo aino atagu faeno atalegaiye.

²⁶ Neʼatalesigeʼapaeʼmo agesayana Vemo mafaʼnemoʼmo ha le konali yaʼamo aliteno himamuʼaʼeʼmo hiyateʼmo eminesigeʼa agegae.

²⁷ Agaemo enisole vayaʼamo alino apatesigeʼa ma mopamo loleʼe loleʼe atupaleʼe kokuʼna atupaleʼeʼmo uʼeʼa huʼa lekana paino apateʼniya vayaʼamo apavaleli eʼa aliʼa anupa huʼa apategae.

²⁸ Figi yosaeʼmo aeʼna kalafefa gemo huguvanagi afitetapaeʼmo ageta aeto hiyo. Figi yosamoʼa ausisi aeteno anupa neʼmalegetapaeʼmo saufa kafugamo lamigefe hiye, hutapa nehae.

²⁹ Ina kava hutapa lapa paiʼnova gemo afole aisigetapaeʼmo ani afinaʼmo alagi hogo hiye, hutapa hiyo.

³⁰ Lama gemo lapa nepauve, huno, hemeni afinaʼmo maiʼnaya vayapatiʼmo ofaliʼnisageno muki lapa nepauva kavaʼmo afole aigiye.

³¹ Kokuʼnaʼe ma mopaʼeʼmo hano hugiyaʼmonanafa geʼnimo alagi hano osuno hanege hanege huno hanegaiye.

Hainu afinaʼmo afole aisifi huno huʼniya gemae

³² Na afinapi na kanalepi huʼa muki vayaʼamogimo oʼafiʼnae. Kokuʼnapi enisole vayaʼmogiʼe Mafaʼneʼamoʼeʼmo oʼafiʼnayaʼmonanafa Afoʼamokeʼmo afiʼniye.

³³ Hainu afinaʼmofi hutapa oʼafiʼnayaʼmofeʼmo ehetapiye, huʼna, kava yagaita maiʼnetapa nunumuʼmo hutapa maiyo.

³⁴ Ina kavakana huno haneʼniyanagi afiyo. Mago no aepa vekamo ataleno afagi kotega ugefe hunoʼaeʼmo aliʼyaʼamo neʼaliya vayaʼaifeʼmo hapa painoʼaeʼmo, muki yaʼnileʼmo yagaitapa nateyo, huno huteno alino fako huno apaote apaote huno yagaino apateʼniye. Agaemo kipaʼaleʼmo neʼyagaiya vekaeʼmo alagepa huka kava yagaika maiyo, huno ha paiʼniye.

³⁵ Ina kava hutapa kava yagaitapa maiyo. Lapakaemo no aepa vekamo hainu afinaʼmo uneʼmo esifi felugakukuʼmo esifi kokole age neʼaiya agufa afinaʼmo esifi gotilamisiyapiʼmo esifi hutapa oʼafiʼnayaʼmofeʼmae.

³⁶ Alagepa hutapa kava yagaita maiyo, fiku yanageno malage huno eno lapakesiyana lapau kaleʼnisageno lapakegaiye.

³⁷ Lapa nepauva agufa gemo huʼna muki vayaʼaifeʼmo kava yagaita maiyo, huʼna hapa nepauve, huno hapa paiʼniye.