Maki 10 - The Keyagana NT and 25 OT books

Yesuʼa aʼneʼapimo hapa faiʼa neʼapatalaya kavafeʼmo huʼniya gemae

¹ Yesuʼa ani kotetiʼmo atalenuno Yutiya kotegamo Yoneni aniʼmo lakaenuno maiʼnigeʼapaeʼmo asole vayaʼmo halate agaetega eʼa aliʼa anupa huʼa maiʼnageno nehiya agufa kavaʼmo huno alino apaya maleʼniye.

² Mago Falasi vayaʼmo agaetegamo eʼa amalageka huʼapaeʼmo, keʼaepa gemoʼa hunoʼaeʼmo, aʼnemo afaʼa hapa faiʼa atalegae, huno huʼnifi osuʼniye, huʼa afi geʼnae.

³ Yesuʼa hunoʼaeʼmo, Moseseʼa na agufa keʼaepa gemo lapamiʼniye, huno apafi geʼnigeʼapaeʼmo,

⁴ Moseseʼa hunoʼaeʼmo, mago vekamoʼmo aʼamo hafaino atalegefe hisiyaʼmoʼmo aʼamo hafaino atalesiya avoʼmo mago kaeno amiteno ha faino atalegaiye, huno huʼniye, huʼa huʼnagenoʼaeʼmo,

⁵ lapaipamo lokiya vaiʼniyaʼmofeʼmo Moseseʼa ani kavaʼmo hiyo, huno huʼniye.

⁶ Akeyaʼvilaga Gotiʼa muki yaʼmo alo huʼniya afinaʼmo ve kanomo alo huno ateteno a kanomo alo huno ateʼniye.

⁷ Ani kavaʼmo huʼniyaʼmofeʼmo ve kanomoʼmo itaʼafoʼalaʼmoganimo anatalenuno aʼaʼeʼmo lokaegaʼae.

⁸ Lole kanolaʼmoganimo magoke anakufamo aliʼana hamalegaʼae. Lole anakufamo ohanegaifa magoke anakufamo hanegaiye.

⁹ Gotiʼa alino lokaeno anateʼniya kanolapatiʼmo mago vayaʼmogimo aliʼa fako osisaya kavaʼmo haneʼniye, huno hapa paiʼniye.

¹⁰ Uno haino nopiʼmo maiʼnigeʼa geʼamo neʼafiya vayaʼmogi ani kavafeʼmo ge huʼa afi geʼnae.

¹¹ Afi geʼnagenoʼaeʼmo, mago vekamoʼmo aʼamo ataleteno alu aʼmo aliʼnisiyaʼmoʼmo aʼalegamo hosu kavaʼmo huteno kumai kavaʼmo huʼniye.

¹² Mago akanomoʼmo anauʼamoʼmo atalenuno alu veleʼmo maiʼnisiyaʼmoʼmo kumai kava huʼniye, huno hapa paiʼniye.

Yesuʼa mafaʼne anagaʼai apakufaleʼmo ayaʼmo maleʼneno, Gotiʼa lapa maeno, huno huʼniya gemae

¹³ Mago vayaʼmogimo Yesuʼa mafaʼne anagaʼai apakufaleʼmo ayaʼmo maleno apatesiyafeʼmo aise mafaʼne anagaʼmo apavaleliʼa Yesutega neʼageʼapaeʼmo geʼamo neʼafiya vayaʼmogi ge hapauʼnae.

¹⁴ Yesuʼa ani kavaʼmo agetenoʼaeʼmo hosu aipamo kaliʼnigeno geʼamo neʼafiya vayaʼaifeʼmo hunoʼaeʼmo, aise mafaʼne anagaʼmo apatafauta oʼapategeʼa nagaetegamo afaʼa esageʼna ani agufa mafaʼnegana vayaʼmo Gotiʼa yagaino neʼapateya koteʼmo haneʼniya yaʼmo apakaiʼapi yaʼmo haneʼniyaʼmofeʼmae.

¹⁵ Lama gemo lapa nepauve, huno, mago vekamoʼmo hunoʼaeʼmo Gotiʼa yagaino nategaiye, huno huteno aise mafaʼnegana huno oʼmaiʼnisiyaʼmoʼmo Gotiʼa yagaino apateʼniya kegiʼyafiʼmo afaʼa uno ohaigiye, huno hapa paiʼniye.

¹⁶ Hapa paiteno mafaʼne anagaʼmo apavaleno asagauno apanu kiʼneno ayaʼmo maleno apateteno alino auleno apateʼniye.

Kagemi yaʼe vekaeʼmo huʼniya gemae

¹⁷ Yesuʼa ugefeʼmo kateʼmo neʼvigenoʼaeʼmo mago vekamo nagu nagu huno eno aleʼya faiʼnenoʼaeʼmo, Alagepa tisao, huno, maige maige huʼna maisuva yaʼmo alisuvafeʼmo na kavaʼmo hisuve, huno afi geʼnigenoʼaeʼmo

¹⁸ Yesuʼa hunoʼaeʼmo, na kava higekaeʼmo nagaefeʼmo alagepa tisao huka hane. Gotikeʼmo magokeʼageʼmo alagepa vekamo maiʼniye.

¹⁹ Keʼaepa gemo ago afiʼnanana vayaʼmo ohapao. Kumai kavaʼmo oso. Kumayaʼmo oʼaliyo. Aigofe gemo osuvo. Aigofe ge huteka kumayaʼmo oʼaliyo. Itaka afokamogani anaiyafiʼmo maiteka geʼanimo afiyo, huno huʼnigenoʼaeʼmo,

²⁰ Tisao, huno, neya mafaʼnemo maiʼnova afinatetiʼmo ani muki hana keʼaepa gemo akame hume hume eʼna hemenimo maiʼnove, huno huʼniye.

²¹ Yesuʼa agetenoʼaeʼmo agaefeʼmo hau ayamopafiʼmo hauʼnigenoʼaeʼmo, magoke kavakamoʼmo kanale osuʼniye. Muki keʼaepa gemo akame huteka uka haika hapaisanafeʼmo uka muki kagemiyakamo alinikuka maketi hugeʼa miya faitesageka alisana monimo alinikeka kagemi yaʼapimo ohaneʼnisiya vayaʼaina apamigenoʼao alopa kagemiyakamo kokuʼnapiʼmo haneno. Apamiteka eka nakame huvo, huno ha paiʼnigeno

²² afiʼniyaʼmonanafa alopa kagemiyaʼamo haneʼniyaʼmofeʼmo hosu augosa kaliteno aipamoʼmo kana huʼnigeno ataleno uʼniye.

²³ Yesuʼa geʼamo neʼafiya vayaʼmo aulu hapaeno apaketenoʼaeʼmo, Alopa kagemi yaʼapimo aliʼnisaya vayaʼmo Gotiʼa yagaino neʼapateya koteʼmo uʼa haisayafeʼmo lusi kava huno lokiya vaiʼniye.

²⁴ Geʼamo neʼafiya vayaʼmogimo ani gemo afiteʼapaeʼmo hapau aiteʼa atete huʼnae. Hapau aiʼnayaʼmonanafa Yesuʼa hunoʼaeʼmo, mafaʼneʼnimogitapae, huno, kagemi yaʼapieʼmo aliʼa amufa neʼamiya vayaʼmo Gotiʼa yagaino neʼapateya koteʼmo uʼa haisayafeʼmo lusi kava huno lokiya vaiʼniye.

²⁵ Kamo afumoʼmo nekaya kapiʼmo uno haino falesiyafeʼmo lokiya vaiʼniyaʼmonanafa mago kagemiyaʼe vekamoʼmo Gotiʼa yagaino neʼapateya kegiʼyafiʼmo uno haisiyafeʼmo magoʼe huno lokiya vaiʼniye, huno huʼnigeʼapaeʼmo

²⁶ lusi kava huʼa hapau aiteʼa apakaiʼapimo huʼapaeʼmo, ina lagimo maige maige huʼa maisaya yaʼmo aligae, huʼa huteʼa ge huge afige huʼa maiʼnae.

²⁷ Yesuʼa aulu hapaeno apaketenoʼaeʼmo, vayaʼmogimo ani kavaʼmo afaʼa osugayaʼmonanafa Gotikeʼmo ani kavaʼmo afaʼa hugiye, huno hapa paiʼniye.

²⁸ Pitaʼa hunoʼaeʼmo, Afiyo, huno, muki kagemi yatimo ago ataleteta kakame huta uteta nehune, huno huʼnigenoʼaeʼmo

^29-30 lama gemo lapa nepauve, huno muki vayaʼmogimo nagaetefenagi alagepa faigoko gelefenagi huʼa noʼapimo atalege konagaʼapimogimo apatalege apasaʼapimogimo apatalege afoʼapimogimo apatalege itaʼapimogimo apatalege mafaʼneʼapimo apatalege aʼapimo apatalege aʼmafaʼneʼapimo apatalege hoyaʼapimo atalege huʼnisaya vayaʼmogimo hemenimo vani hataleti agufa yaʼmo aliteʼa noʼapigi konagaʼapigi apasaʼapimogiʼe itaʼapimogiʼenagi mafaʼneʼapigi hoyaʼapiʼenagi huʼa aligae. Aligayaʼmonanafa mago vayaʼmogi apakaetegamo hosu kavaʼmo hugayaʼmonanafa henagaʼamo afole aisiya afinaʼmo alagepa huʼa maige maige huʼa maisaya yaʼapimo aliteʼa maigae.

³¹ Maigayaʼmonanafa asole vayaʼmo hemenimo hogote vayaʼmo maiʼnaya vayaʼmogimo henaga vayaʼmo maisageʼa henaga maiʼnaya vayaʼmogimo hogote vayaʼmo maigae.

Yesuʼa faliteno he tisiya kavafeʼmo halate huʼniya gemae

³² Apakaemo Yulusale taoni kateʼmo neʼuʼapaeʼmo Yesuʼa uno hogotetegeʼa geʼamo neʼafiya vayaʼmo akame huʼa neʼuʼapaeʼmo apakesa alaʼamo afiteʼa hapau aiteʼa koli hume hume uʼnae. Yesuʼa kesi kateʼmo apavalelinuno halate agaetegamo afole aisiya kavafeʼmo hapa painoʼaeʼmo,

³³ Hemenimo lagaemo Yulusalemu taonifiʼmo neʼvisunagenoʼaeʼmo mago vekamoʼmo kutulu yaʼmo neteno Vemo mafaʼnemo avaleno mono huʼa neʼapataya vayaʼaiteʼmo yagaiʼa neʼapataya vayaʼe keʼaepa gemo avoʼmo kaeʼa aliʼa apaya neʼmalaya vayaʼeʼmo apamisigeʼa agoti huʼa ateteʼapaeʼmo, afaʼa faligiye, huʼa hisageʼa Yu nofi vayapatiʼmo oʼmaiʼnaya vayaʼai apayapiʼmo avaleʼa ategae.

³⁴ Atesageʼa huʼa faipa huʼa atege apaviʼna heʼa atege nofi kayotetiʼmo amagige huteʼa kamitimo amagigae. Loleʼe magoʼe afinaʼmo utesigeno halate he tigiye, huno hapa paiʼniye.

Yemisiʼe Yoniʼeʼmo ala vekalaʼmo maiguʼae, huʼana huʼnaʼa gemae

³⁵ Yemisiʼe Yoniʼeʼmo Sepeti mafaʼnelaʼmoganimo Yesutega eʼanaeʼmo, Tisao, huʼana, kafi gesuʼa kavaʼmo huka laʼatesanafekeʼmo laʼahauʼniye, huʼana afi geʼnaʼagenoʼaeʼmo,

³⁶ na agufa kavaʼmo huʼna lanategauve, huno anafi geʼnigeʼanaeʼmo,

³⁷ ha le konali yakamo aliteka fai maiʼnekaeʼmo yagaika apatesana afinaʼmo laʼagaepatiʼmo mago vekaeʼmo hukaeʼmo, eka lamaga nahaopaleʼmo fai maiyo, huka huteka mago vekaeʼmo hukaeʼmo, eka hoga nahaopaleʼmo fai maiyo, huka laʼaha paiyo, huʼana ha paiʼnaʼae.

³⁸ Yesuʼa hunoʼaeʼmo, na agufa kavafeʼmo afi nekoʼafi hutana oʼafiʼnaʼae, huno huteno, nesuva kapufatiʼmo afaʼa nesaʼafi hosu yatetiʼmo faleʼa natesaya yaʼmo afaʼa aligaʼafiye, huno aeno kalafefa gemo huno anafi geʼnigeʼanaeʼmo,

³⁹ he, afaʼa netetaʼa aliguʼae, huʼana huʼnaʼagenoʼaeʼmo he, huno, nesuva kapufatiʼmo netetana hosu yatetiʼmo faleʼa natesaya yaʼmo afaʼa aligaʼae.

⁴⁰ Aligaʼaʼmonanafa nagaemo lamaga nahaopaleʼmo fai maige hoga nahaopaleʼmo fai maige hutana fai maiʼao huʼna hisuva gemo nagaiʼni yaʼmo ohaneʼniye. Gotikeʼmo ago alo huno anateʼniya vekalakeʼmo alino anamigiye, huno hana paiʼniye.

⁴¹ Naya loleʼa vayaʼmo geʼamo neʼafiya vayaʼmogi ani gemo afiteʼapaeʼmo Yemisiʼe Yoniʼeʼmo apaipa leʼa anateʼnae.

⁴² Yesuʼa ge huʼnigeʼa eʼnagenoʼaeʼmo, Yu nofi vayapati oʼmaiʼnaya vayaʼaiteʼmo yagaiʼa neʼapataya vayaʼmogi aliʼa afepi apateteʼa yagaiʼa neʼapatae. Ina kava huʼa ala apaki vayaʼmogi ina kava hiyo ma kava hiyo, huʼa nehae.

⁴³ Nehayaʼmonanafa lapakaemo ina kavaʼmo osisaya kavaʼmo haneʼniye. Lapakaepatiʼmo mago vekamoʼmo, ala nagi vekamo maigesuve, huno huʼnisiyana kayo kayo vekatapimo maino.

⁴⁴ Lapakaepatiʼmo mago vekamoʼmo, hogote vekamo maigesuve, huno huʼnisiyana kalavusi aliʼyaʼmo aliteno kayo kayo vekatapimo maino.

⁴⁵ Ani kavatefeʼmo Vemo mafaʼnemo agaeteʼmo kayo kayo huʼa atesaya vekamo maisiyafeʼmo eminoʼmeʼnifa kayo kayo vekaʼapimo maiʼneno agufaʼaletiʼmo miya faino apateteno hatu maeno apatesiyafeʼmo emineʼniye, huno hapa paiʼniye.

Yesuʼa mago aulaga ali huʼniya vekamo alino ayakeno ateʼniya gemae

⁴⁶ Apakaemo Yeliko taonifiʼmo uʼa avaʼyi huʼnae. Yesu geʼamo neʼafiya vayaʼe asole vayaʼeʼmo Yeliko kotega ataleʼa akame huʼa uʼnageno Matimiyasiʼa Timiyasi mafaʼnemo aulaga ali huʼniya vekamo ka agiʼnaleʼmo fai maiʼneno monieʼmo aukaya huno maiʼniye.

^47-48 Mago vayaʼmogi huʼapaeʼmo, Yesuʼa Nasalasa vekamo neʼe, huʼa huʼnaya gemo afitenoʼaeʼmo aepa faino ge hunoʼaeʼmo, Yesuo, huno, Nevini aginagomo kahau huka nato, huno huʼnigeʼapaeʼmo asole vayaʼmogi huʼapaeʼmo, ge osuka afaʼa maiyo, huʼa ge hauʼnayaʼmonanafa magoʼe magoʼe huno ge hunoʼaeʼmo, Nevini aginagomo, huno, kahau huka nato, huno ge huge huge huno maiʼniye.

⁴⁹ Yesuʼa eno he tino maiʼnenoʼaeʼmo, ani vekaeʼmo ke higeno nagaetegamo eno, huno huʼnigeʼa aulaga ali huʼniya vekaeʼmo huʼapaeʼmo, kaipamo lokiya vaika kato. Kagaefeʼmo ge nehigi he tiyo, huʼa huʼnageno

⁵⁰ alonokuʼmo asagino ataleteno malage huno aeno hailo huno he tino Yesutegamo eʼniye.

⁵¹ Yesuʼa hunoʼaeʼmo, na kavaʼmo huʼna katesuve, huno afi geʼnigeno aulaga ali huʼniya vekamoʼmo hunoʼaeʼmo, Tisao, huno, naulagamo alika ayakeka nato, huno huʼnigenoʼaeʼmo,

⁵² kagesa afika fatago huʼnana kavakamoʼmo alino ayakeno kateʼnigi afaʼa uvo, huno huʼnigeno malage huno aulagamo ageno yaketeno kateʼmo akame huno uʼniye.