Mai'naya kavane 9 - The Keyagana NT and 25 OT books

Alagepa a kanomoʼa nehiya kavafeʼmo huʼniya gemae

¹ Afiteʼa neʼagaya kavaʼmoʼa alagepa a kanogana huno maiʼneno noʼamo ki maleʼniye. Agaemo seveniʼa posi yosamo atala vaiʼniye.

² Agaemo afumo amagino kaeteno nofi alagafati aniʼmo alino haga aniʼmo hamaleno ateʼniye. Neʼyaʼmo faiʼa maiʼneʼa nesaya hiʼyalamuʼmo huʼniye.

³ Ani a kanomoʼa aliʼyaʼamo neʼaliya aʼne anagaʼmo alino apateʼnigeʼa uʼa taoni folagapiʼmo anagamo he tiʼa maiʼneʼa ge nehae.

⁴ Apakaemo huʼapaeʼmo, lapakesamo ohaneʼnigetapa gemo noʼafiya vayaʼmogitapae, huʼa, afiteʼa neʼagaya nopiʼmo etapa uta haiyo. Ani a kanomoʼa afiʼa aeto nosaya vayaʼaifeʼmo hapa painoʼaeʼmo,

⁵ Etapa peleti mayaʼnimo nege nofi alagafati aniʼmo nege hutapa maiyo.

⁶ Negi nagi kavaʼmo atalegenoʼao afaʼa maisaya yaʼmo aligayanagi. Afitapa aeto hisayafeʼmo alagepa kateʼmo viyo, huno hapa paiʼniye.

⁷ Mago vekamoʼmo himuʼnamu vekamo alino api aino atesiyafe hugiyana agaiʼamo avagage yaʼmo aligiye. Mago vekamoʼmo hosu vekaeʼmo hosu kava nehane, huno hugiyana hosu yaʼmo aligiye.

⁸ Himuʼnamu vekaeʼmo, hosu kavaʼmo nehane, huka osuvo. Fiku yanageno kagaefeʼmo alagi ohaugiye. Kagaemo afiteno neʼageya vekaeʼmo, hosu kavaʼmo nehane, huka ha paisanagenoʼaeʼmo kagaefeʼmo haugiye.

⁹ Kagaemo afiteno neʼageya vekamo alika aya malesanageno magoʼe huno afiteno agegaiye. Kagaemo fatago vekamo alika aya malesanageno afiʼniya kavaʼaleʼmo magoʼe huno afigiye.

¹⁰ Ala kava nefeʼmo koli nehaya kavaʼmoʼa afiteʼa agesaya kavaʼmo aepa nefaiya kavaʼmo haneʼniye. Aote vekamo ageʼnaya kavaʼmoʼa afiʼa aeto nehaya kavaʼmo haneʼniye.

¹¹ Nagaemo ma mopafiʼmo yatala afinaʼmo maisana yaʼmo kamiguve. Magoʼe kafugamo kamisugeka maigane.

¹² Afiteka agesana kavaʼmo alisanana kagaikamo alika auleka kategane. Himuʼnamu kavaʼmo hisanana kagaikamo kana yaʼmo alika kamigane.

Negi nagi a kanomoʼmo nehiya kavafeʼmo huʼniya gemae

¹³ Negi nagi a kanomoʼa avagage nosigeno alopa age aino ge nehiye. Agesamo ohaneʼnigenoʼaeʼmo ge noʼafiye.

¹⁴ Agaemo noʼamo kipateʼmo taoni folagapiʼmo anagaʼmo fai neʼmaiye.

¹⁵ Agaemo aliʼyaʼapileʼmo uʼeʼa nehaya vayaʼaifeʼmo ge nehiye.

¹⁶ Ina ge huno keya aeno ge hunoʼaeʼmo, Lapakesamo ohaneʼnigetapa ge noʼafiya vayanagi noʼnifiʼmo etapa haiteyo, huno hapa nepaiye. Ani a kanomoʼa afino aeto nosiya vekaeʼmo hunoʼaeʼmo,

¹⁷ Kumaya neʼaliya aniʼmoʼa haga nehiye. Fala kiʼa maiʼneʼa neʼnaya peleti mayamo kanale neʼyaʼmo haneʼniye, huno ha nepaiye.

¹⁸ Ha nepaiyaʼmonanafa ani vekamoʼa noʼafiʼmo faliʼnaya vayaʼmo neʼmaiye, huno oʼageʼniye. Noʼafiʼmo uʼa haiʼnaya vayaʼmo ata kopiʼmo uʼa lamiʼa maiʼnae, huno oʼageʼniye.