Mai'naya kavane 8 - The Keyagana NT and 25 OT books1 Afiteʼa neʼagaya kavaʼmoʼa mago alagepa a kanogana huno maiʼneno ge nehiye. 2 Agaemo avefiʼmo maiʼneno ge nehiye. Kataguneteʼmo he tino maiʼneno ge huge nehiye. 3 Agaemo taonile yafa kegiʼyaleʼmo maiʼneno ge nehiye. Taonile kegiʼyaleʼmo maiʼnenoʼaeʼmo ina ge huno ge nehiye. 4 O vemogitapae, huʼna, lapakaefeʼmo ge nehuve. Nagaemo muki ve mafaʼneʼaifeʼmo ge nehuve. 5 O mafaʼnegana huno apakesamo haneʼnigeʼa gemo noʼafiya vayaʼmogitapae, huʼna, alagepa kavaʼmo hisayafeʼmo lapakesa afi yaʼmo aliyo. Negi vayaʼmogitapae, huʼna, alagepa huta afisaya lapaipamo aliyo. 6 Hogote alagepa gemo lapa paiguvaʼmofeʼmo lapaketafo hutapa afiyo. Navayafatiʼmo fatago gemo afole aigiye. 7 Muki geʼaʼnimo lama geʼageʼmo haneʼniye. Nagaemo aigofe kavafeʼmo alagi oʼnahaiye. 8 Muki geʼaʼnimo fatago geʼageʼmo haneʼniye. Kayagi kayaga gemo osuge humi apatesiya agufa gemo osuge nehuve. 9 Alagepa huʼa apakesa neʼafiya vayaʼai apaulagaleʼmo aepaʼamo ha le yategamo afole aiʼniye. Alagepa huʼa afiʼnaya vayaʼmogimo aepaʼamo ago afiʼa aeto nehae. 10 Lapakaemo siluva yafaʼmo oʼalitapa aliʼna lapaya malesuva gemo aliyo. Goli yafaʼmo oʼalitapa afisaya gemo aliyo. 11 Afiteʼa neʼagaya kavaʼmoʼa lusi moniletiʼmo miya nefaiya yafaʼmo ago aeno aga seʼniye. Muki vayaʼmogimo nehapaiya yaʼmo afiteʼa agesaya kavatefeʼmo ina agufa yaʼmo haneʼniye. 12 Nagaemo afiteʼa neʼagaya kavaʼmo maiʼnove. Nagaemo alagepa kavaʼmo hisayafeʼmo apakesamo neʼafiya kavaʼapiʼeʼmo magokepi lokaeʼna neʼmauve. Nagaemo muki yaʼmo agege muki kavaʼmo alagepa huʼna aliʼna fako huge nehuve. 13 Ala kava nefeʼmo koli nehaya kavaʼmoʼa hosu kavafeʼmo nohapaiya kavaʼmae. Nagaemo ala apaki alisayafe hisaya kavanagi vayaʼmo aliʼa afepi apatesayafe hisaya kavanagi hosu kateʼmo neʼvaya kavanagi aigofe nehaya geʼenagi alagi huno oʼnahaiye. 14 Nagaemo geʼniletiʼmo alagepa huʼna aliʼna ho huʼna neʼapatove. Nagaemo afiteʼna ageʼnove. Nagaemo muki geʼamo afiʼnogeno lokiyaʼnimo haneʼniye. 15 Kini vekamo maiʼneʼa yagaiʼa neʼapataya vayaʼmo nagaetetiʼmo neʼyagaiye. Ala vayaʼapimogi fatago kavaʼmo hisayafeʼmo nagaetetiʼmo neʼyagaiye. 16 Nagaetetiʼmo neʼyagaiya vayaʼe agoti gemo neʼafiya vayaʼeʼmo yagaiʼa neʼapatae. 17 Nagaefeʼmo hapau apamopafiʼmo nehapaiya vayaʼaifeʼmo nahau nayamopafiʼmo neʼnahaiye. Apaya mukiki huʼa kahauya nehisaya vayaʼmogi nagegae. 18 Nagaemo kagemi yaʼapiʼe ala apakiʼapiʼeʼmo neʼapamuve. Fatago kavaʼniʼe hanege hanege huno hanesiya kagemi yaʼapiʼeʼmo neʼapamuve. 19 Nagaepatiʼmo afole neʼaiya kavaʼnimo alagagana huno haneʼneno hogote goli yafaʼmo ago aeno aga seʼniye. Nagaepatiʼmo afole neʼaiya yaʼmoʼa siluva yafaʼmo ago aeno aga seʼniye. 20 Nagaemo fatago kavaʼmo kateʼmo neʼuve. Nagaemo alagepa huʼna aliʼna fako huʼna ageʼneʼna uʼneʼna nehuve. 21 Nagaefeʼmo hapau apayamopafiʼmo nehapaiya vayaʼmogi alopa kagemi yaʼapimo alisayafʼeʼmo ani kavaʼmo nehuve. Aliʼa neʼmalaya noʼapifiʼmo havai tesiyafeʼmae. 22 Ala kava neʼmoʼa aepa faiʼniya afinaʼmo nagaemo agaiʼa yaʼmae. Hogoteʼna maiʼnogeno akeyaʼvilagamo muki yaʼamo alo huʼniye. 23 Aepa ofaiʼniya afinatetiʼmo maiʼnogeno lekana paino nateʼniye. Ma mopamo ohaneʼnigeʼnaeʼmo hogoteʼna maiʼnove. 24 Ala kava neʼmoʼa solovala aniʼe muki anilafaʼeʼmo alo osuʼnenoʼaeʼmo hogoteno alino afole aino nateʼniye. 25 Ala kava neʼmoʼa muki alopa avemo alo osuge aise avemo alo osuge huʼnenoʼaeʼmo alino afole aino nateʼniye. 26 Ma mopamo alo osuge otu mopamo alo osuge mumusopa alo osuge huʼnigeʼnaeʼmo maiʼnove. 27 Agaemo kokuʼnaʼmo alo nehigeʼnaeʼmo agaeʼeʼmo maiʼnogeno alo huʼniye. Kokuʼnaʼmoʼa solovala aniʼmo faino vego huno ateʼnigeʼnaeʼmo maiʼnove. 28-30 Hiyaʼmo alo huge uno nelamiya aniʼmo lokiyaʼamo amige solovala aniʼmoʼa aeno aga sesiyafeʼmo ani agiʼnamo lekana paino atege ma mopamo hanesiya koʼmo lekana paige huʼnigeʼnaeʼmo nagaemo agaeʼeʼmo afaluʼamoʼnagana huʼna lokaeʼna maiʼneʼna muki yaʼmo ageʼna alo nehuva vekamo maiʼneʼna lokaeʼna maiʼnove. Muki afinaʼae afinaʼaeʼmo nagaefeʼmo amogaga aiʼnigeʼna aulagaleʼmo namogaga aiʼnove. 31 Ala kava neʼmoʼa ma mopamogi muki yaʼamogi huno alo huʼnigeʼnaeʼmo nagaemo ma mopafi maiʼnaya vayaʼaifeʼmo namogaga aiʼnove. Nagaemo ma mopafi mafaʼneʼamogifeʼmo namogaga aiʼnove. 32 Mafaʼneʼnimogitapae, huʼna, Geʼnimo akame nehaya vayaʼmo aliʼna auleʼna neʼapatovaʼmofeʼmo geʼnimo afiyo. 33 Lapakaemo aliʼna lapaya neʼmalova gemo afigenoʼao afiteta agesaya vayaʼmo hamalegae. Mani gelefeʼmo lapakameʼyamo oʼamiyo. 34 Nagaetegamo eʼa no kipateʼmo he tiʼa nagava maiʼneʼa geʼnimo neʼafiya vayaʼmo aulena vayaʼmo maiʼnae. 35 Kahauya huʼa neʼnagaya vayaʼmo afaʼa maisaya yaʼmo aligae. Apakaemo Ala kava neʼmoʼa fikumo hapa maeno apamisigeʼa aligae. 36 Nagaetegamo hosu kavaʼmo nehisiya vekamoʼmo agaiʼa aunemeʼamo alino hosu huno neʼate. Nagaefeʼmo nohapaiya vayaʼmo falisaya kavafeʼmo nehapaiye. |
© 2013, Wycliffe Bible Translators, Inc. All rights reserved.
Wycliffe Bible Translators, Inc.