Mai'naya kavane 7 - The Keyagana NT and 25 OT books

¹ Mafaʼneʼnimogae, huʼna, geʼnimo alika vayaʼmogimo alopa monileʼmo neʼyagaiya kava huka yagaiyo.

² Nagaemo akame huvo, huʼna kaha nepauva gemo akame hisanana alagepa huka maigane. Kagaemo kaulagaleʼmo neʼyagaina kava huka geʼnileʼmo alagepa huka yagaiyo.

³ Geʼnimo kayapiʼmo aliʼneka nofitetiʼmo kiyo. Geʼnimo alika kaipafiʼmo avoʼmo kae malo.

⁴ Afiteka agesana kavafeʼmo nasaʼnimoʼae, huka huvo. Afika aeto hisana kavafeʼmo nafaluʼnimoʼae, huka huvo.

⁵ Kumai kavaʼmo nehiya a kanoʼeʼmo magokepi lokaeka oʼmaisanafeʼmae. Kagesamo faisiya gemo oʼafisanafeʼmae.

Kumai kavaʼmo nehiya a kano vemo huʼniya gemae

⁶ Mago afinaʼmo noʼnifiʼmo maiʼneʼnaeʼmo he tiʼna yasi katetiʼmo aulu heʼna kategamo ageʼnove.

⁷ Apakeʼnovana mago alagepa apakesa afi yaʼmo ohaneʼniya neya vayaʼmo umenitata nehageʼna apakeʼnove. Mago neya vekamo agesa afi yaʼmo alagi ohaneʼniye.

⁸ Ani neya vekamoʼmo kumai kavaʼmo nehiya a kanomo kipateʼmo uʼniye.

⁹ Yegemo uno lamino faleʼnigeno haniʼmo hugefeʼmo huʼnigenoʼaeʼmo kumai kavaʼmo nehiya a kanomo kateʼmo uʼniye.

¹⁰ Uʼnigeno mago a kanomo kumai aʼnemogimo neʼvaiya agufa kukenamo vaiteno ani vekamo agesamo faisiyafeʼmo eʼnigeʼana fotu huʼnaʼae.

¹¹ Ani a kanomoʼmo avagage osuge koli osuge huteno ge noʼafiya a kanomo eʼniye. Noʼafiʼmo maisiyafeʼmo alagi ohauʼniye.

¹² Muki afinaʼmo ve anagaʼmogimo agesayafeʼmo kateʼmo uneno huge maketileʼmo uneno huge muki haopalegamo uneno huge huno maiʼniye.

¹³ Ageʼnovana ani a kanomoʼa ani neya vekamo atafauno anu kiliʼneno haeno neʼniye. Avagage osigeno ani gemo huno ha paiʼniye.

¹⁴ Hemenimo nagaemo Gotifeʼmo mago kavaʼmo huguve, huʼna ha paiʼnove. Naipamo falu hisiya ofalinimo amiʼnogeno magokayaʼamo noʼnifiʼmo haneʼniye.

¹⁵ Haneʼniyaʼmofeʼmo noʼnimo ataleʼna kagaefeʼmo nayamukiki huʼna kahauya hulina eʼna kageʼnove.

^16-17 Nagaemo alagepa hipamo alo huʼna kateteʼna alagepa yaʼmo kofika havaesana yaʼmo maleteʼna alagepa atumo aisiya yaʼmo atagu fae maleʼnove.

¹⁸ Nagaeʼeʼmo egetaʼao. Utaʼa laʼamogaga aitaʼa yokalo leme leme neʼvisuʼageno kotigiye.

¹⁹ Anauʼnimoʼa ago afagi kotegamo uʼniye.

²⁰ Agaemo alopa monimo aliteno kaimo ala nehisigenoʼaeʼmo egaiye.

²¹ Ani a kanomoʼmo agesamo faiʼnigeno geʼamo akame huʼniye. Haga hauʼniya gemo huʼniya geletiʼmo aipamo huno alino he tino ateʼniye.

²² Ani neya vekamoʼa geʼamo afiteno malage huno akame huʼniye. Pulumakamo apamagisayafeʼmo apavaleliʼa neʼvaya kava huno uʼniye. Negi nagi vekamo kalavusi huʼa atesayafeʼmo avaleliʼa neʼvaya kava huno uʼniye.

²³ Ani neya vekamoʼmo kevemoʼa nahaegaiye, huno oʼageʼniye. Namamo umenifiʼmo uʼnageno neʼapatafaiya kava huʼniye. Agaemo faliguve, huno agesamo oʼafiʼniye.

²⁴ Inagi mafaʼne anagaʼmogitapae, huʼna, geʼnimo alagepa huta lapaketafo hutapa afiyo.

²⁵ Lapakaemo lapaipamo ateʼnigeno he tisigetapa ani agufa aʼne anagaʼmo apakame osiyo.

²⁶ Ani agufa aʼnemogi apayapatiʼmo asole vemo faliʼnae. Apakae apayapatiʼmo asole lokiya vemogi faliʼnae.

²⁷ Ani aʼneʼai notegamo uʼniya kaʼmoʼa faliʼnaya vayaʼai kanolulegamo uʼniye. Ani kateʼmo akame hutapa visayaʼmoʼmo ata kopiʼmo uta lamigae.