Mai'naya kavane 6 - The Keyagana NT and 25 OT books

Mago kavaʼaeʼmo ehetapiye, huno huʼniya gemae

¹ Mafaʼneʼnimogae, huʼna, mago vekaeʼmo, nagaemo kagae kaimuʼyaleʼmo maiʼneʼna anonakaleʼmo miya faiʼna kategauve, huka ha paiʼnisanaʼmoʼmo

² gekaletiʼmo kagaikamo alika aneʼaifiʼmo heka kateʼnane. Kagaika gekaletiʼmo kalavusi huka kateʼnane.

³ Kagaemo kao vekamo aiyafiʼmo maiʼnanaʼmofeʼmo hatu maeka katesanafeʼmo kao vekalegamo uka kagikaleʼmo alika afepi ateteka afaʼa nato, huka ge huka afi go.

⁴ Afaʼa havaetaleka oʼmaika malage huka uvo.

⁵ Afela afumogiʼe namamogiʼeʼmo hapaesayafeʼmo nehageʼapaeʼmo ataleʼa apaune nehaya kava huka kao vekamo ayapatiʼmo aika ha faleka kaune ho.

⁶ Alagaʼmo nelahapaeya vayaʼmogitapae, huʼna, utapa kiʼnu anagaʼmogi kavaʼmo agetapa alagepa hutetapa afiteʼa neʼagaya kavaʼmo aliyo.

⁷ Kiʼnu anagaʼmogimo ala vekaʼapimo oʼmaige yagaino neʼapateya vekamo oʼmaige huʼnae.

⁸ Huʼniyaʼmonanafa asole neʼyaʼmo haneʼniya afinaʼmo kiʼnu anagaʼmogimo neʼyafeʼmo kafu hisaya afinafeʼmo aliniʼa uʼa alu aiʼa neʼmalae.

⁹ Alagaʼmo nelahapaeya vayane. Na magi afinaʼmo lapau kaletapa maigae. Hainu afinaʼmo lapaupatiʼmo he tigae.

¹⁰ Lapakaemo hutapaeʼmo, Magoʼe hutageʼmo lau kalegaune. Aise afinaʼmo maita hagalegesune, hutapa nehae.

¹¹ Mago koli yaʼmo aliʼa apamiteʼa kumaya neʼaliya vayaʼmogimo malage huʼa muki yaʼmo kumayaʼmo neʼaliya kava huno alagaʼmo nelahapaeya kavaʼmoʼa muki yatapimo malage huno hano hugiye.

¹² Hosu kavaʼmo nehaya vayaʼmogimo aliʼyaʼapimo ohaneʼnigeʼa maiʼneʼa hosu gemo nehae.

¹³ Apakaemo ge huʼa fala kiteʼapaeʼmo apaulagaletinagi apayatetinagi apaiyaletinagi huʼa avame name kavaʼageʼmo nehae.

¹⁴ Hosu kavaʼmo apaipafiʼmo havai teʼniye. Muki afinaʼmo hosu kavaʼageʼmo hisayafeʼmo apakesamo afiʼa aliʼa fako nehae. Apakaemo magokepi lokaeʼa oʼmaisayafeʼmo aliʼa fako huʼa neʼapatae.

¹⁵ Nehayaʼmofeʼmo malage huno alino hosu huno apatesiya kavaʼmo afole aigiye. Afole aisigeʼa alagepa huʼa maisaya kaʼmo alagi ohanegaiye.

¹⁶ Ala kava neʼmoʼa ani seveniʼa kavafeʼmo alagi ohauʼniye.

^17-19 Apakufamo apavaleliʼa haiteʼa hinuʼnamu gemo nehaya kavanagi apavayaletiʼmo aigofe gemo nehaya gegi vayaʼmo apayateti fikumo neʼapamagiya kavanagi hosu kavaʼmo hisayafeʼmo apaipafiʼmo apakesamo afiʼa aliʼa fako nehaya kavanagi apaiyaletiʼmo nagu nagu huʼa uʼa hosu kavaʼmo nehaya kavanagi agotileʼmo aigofe faigoko gemo nehaya kavanagi alagepa huʼa magokepi lokaeʼa maisayafeʼmo ohapauʼnigeʼa aliʼa fako huʼa neʼapataya kavafenagi huno alagi ohauʼniye.

Kumai kavaʼmo osiyo, huno huʼniya gemae

²⁰ Mafaʼneʼnimogae, huʼna, afokamoʼnamo afiyo, huʼna nehuva geʼe itakamo keʼaepa geʼeʼmo amagika oʼatalo.

²¹ Ani geʼanimo alika kaipafiʼmo nofi kigekana huka malege alika lugokafiʼmo nofiʼmo huka aligekana huka alige huka maiyo.

²² Umenitata hisana afinaʼmo ani gemoʼmo kaʼmo alino kave ligiye. Kau kalesana afinaʼmo ani gemoʼmo kagaemo yagaino kategaiye. He tisanagenoʼaeʼmo ani gemoʼmo kaha paigiye.

²³ Afiyo, huno huʼniya gemoʼmo lamugana huno haneʼniye. Keʼaepa gemoʼmo ha le yakana huno haneʼniye. Ani gemoʼmo alino api aino katesigeka alagepa huka maisana yaʼmo alisana kaʼmo alino kave ligiye.

²⁴ Ani gemoʼmo kumai kavaʼmo nehiya a kanolegamo oʼvisanafeʼmo ge nehiye. Kagesamo faisiya gemo oʼafisanafeʼmo ge nehiye.

²⁵ Alagepa agufaeʼmo ageka kahaʼye osuvo. Fiku yanageno aulagaletiʼmo aulu kahaeteno kayateʼmo aligiye.

²⁶ Mago vekamoʼmo kumai kavaʼmo nehiya a kanoʼeʼmo magokepi lokaeno maisiyana neʼyaʼmo miya faisiya moniʼamo hano hugiye. Afela afumo hapaesayafeʼmo apavegala neʼaya kava huno vegala aeno alopa monileʼyaʼmo aeno agaseʼniya aunemeʼamo aligiye.

²⁷ Mago vekamoʼmo ata hokanufamo faino kateno anu kisiyana oʼalegaifiye.

²⁸ Mago vekamoʼmo ata hokanufaleʼmo aiyamo aeno uneno hisiyana oʼalegaifiye.

²⁹ Alu vayaʼai aʼneʼeʼmo magokepi lokaeʼa havaesaya vayaʼmogimo ani agufa kavaʼmo hugae. Alu vekamo aʼeʼmo magokepi lokaeka havaesanana lusi kava huka vaiʼmo aligane.

³⁰ Mago vekamoʼmo aga tesigenoʼaeʼmo neʼyaʼmo kumaya alino nesigeʼapaeʼmo vayaʼmogi huʼa faipa huʼa oʼategae.

³¹ Ani huʼniya kavaʼmo agesayana agoti huʼa atesageno ani huʼniya kavaʼmo anonaʼalefeʼmo asole yaʼmo apamigiye. Muki noʼafiʼmo haneʼnisiya yaʼamo alagi apamino hano hugiye.

³² Hugiyaʼmonanafa a kanoʼeʼmo kumai kavaʼmo huʼnisiya vekamoʼmo ika ika kavaʼmo huteno negi nagi kavaʼmo hugiye. Agaiʼamo alino hosu huno ategaiye.

³³ Vayaʼmogimo ageteʼa amagisagenoʼaeʼmo hosu agimo aliteno avagage hugiye. Hosu agimo alagi hano osugiye.

³⁴ Muki vayaʼmogimo alu vayaʼmogi aʼapiʼeʼmo magokepi lokaeʼa havaeʼnaya vayaʼaifeʼmo lusi kava huno apaipamo nele. Ani kavaʼmo anonaʼapilefeʼmo apamisayafeʼmo afaʼa apakeʼa oʼapatalegae.

³⁵ Ani a kanomo anauʼamoʼmo miyaʼamo oʼaligiye. Asole yaʼmo fikumo amisigenoʼaeʼmo aipamoʼmo alagi falu osugiye.