Mai'naya kavane 5 - The Keyagana NT and 25 OT books

Hosu a kanoeʼmo huʼniya gemae

¹ Mafaʼneʼnimogae, huʼna, geʼnimo kagetafo huka afiyo. Kagetafo huka geʼnimo afiyo.

² Ani kavatetiʼmo alagepa kagesa afi yaʼmo afole aigiye, Muki hisana gekamoʼmo alagepa huno afiʼniya vekamoʼmo nehiya kegana huno afole aigiye.

³ Kumai kavaʼmo nehiya a kanomoʼmo haga kahausiya agufa gemo nehiyaʼmofeʼmo geʼnimo afiyo. Agaemo geʼaletiʼmo kagesa faiteno kayateʼmo aligiye.

⁴ Aligiyaʼmonanafa henagaʼamo kagaeteʼmo atu aigekana huno maigiye. Agaemo aluga alugaʼamo aveʼmo neʼneya naipekana huno maiʼneno kagaemo kaigiye.

⁵ Agaemo nefaliya kavategamo nelamiye. Neʼviya kaʼmo faliʼnaya vayaʼmo neʼvaya kaʼmo haneʼniye.

⁶ Lapakaemo afaʼa neʼmaiya yaʼmo neʼaliya kafeʼmo lapakesa afifi hutapa oʼmaisayafeʼmo ani a kanomoʼa alu kava alu kavaʼmo nehiye. Kavaʼamo alagi fala kiʼniyanagetapa afaʼa oʼagegae.

⁷ Inagi mafaʼneʼnimogitapae, huʼna, lapakaemo geʼnimo afitapa oʼataleyo.

⁸ Lapakaemo ani agufa a kanomo haopaleʼmo utapa hogo osiyo. Kipaʼalegamo oʼviyo.

⁹ Fiku yanagetapa alagepa lapakitapimo atalegae. Fiku yanageʼa hapau huʼa nolapataya vayaʼmogimo naipeletiʼmo lapaigae.

¹⁰ Fiku yanagetapa aliʼnaya yaʼmo atalesageʼa alu nofi vayaʼmogi aligae. Lokiya aliʼyaʼmo alitetapa aliʼnaya yaʼmo fiku alu vayaʼmogimo aligae.

¹¹ Henagaʼamo kaita lapausigeno lapayamufalagaʼage hisigetapa yulagefa aigae.

¹² Lapakaemo ina ge hutapa hugae. Nagaemo negi nagi huʼnove. Aliʼa naya malesaya kavafeʼmo alagi oʼnahauʼniye. Hosu kavaʼmo nehane, huʼa naha paiʼnageʼnaeʼmo ina agufa gemo huʼnae, huʼna huʼnove.

¹³ Aliʼa naya maleʼnaya vayaʼai geʼapimo akame osuʼnove. Aliʼa naya maleʼnayaʼmonanafa nagetafo huʼna oʼafiʼnove.

¹⁴ Hemenimo aliʼa anupa huʼa maiʼnaya vayaʼai folagapatiʼmo alagi afela hesuva afinaʼmo hogo huʼnigeʼna maiʼnove.

¹⁵ Kagaika ani keli kotupatikeʼmo aniʼmo he fika no. Kagaika meti aniʼmo uno nelamiya anitetikeʼmo no.

¹⁶ Fiku yanageno kagae aniʼmoʼa alu yapilaga uneno hugiye. Fiku yanageno taonifi alopa kateʼmo uno lamigiye.

¹⁷ Fiku yanageʼa mafaʼne anagakamo a kanomo vayaʼeʼmo maigayanagi kagaikaekeʼmo maisaya kavaʼmo haneʼniye.

¹⁸ Gotiʼa meti anikamo alino auleno ateno. Neya vekamo maiʼnekaeʼmo aliʼnana afeʼmo kamogaga aiyo.

¹⁹ Akamoʼa mago afela a memegana huno maiʼnisigeka muki afinaʼmo nuʼaeʼmo kamogaga aiganaʼmofeʼmo alu a kanoeʼmo kagesamo oʼafigane. Muki afinaʼmo akamoʼmo hau ayamopafiʼmo hauʼniya kavaʼamoʼmo kalavusi huno katesigeka maiyo.

²⁰ Mafaʼneʼnimogae, huʼna, na kava hinagenoʼaeʼmo kumai a kanomoʼa kalavusi huno kategaiye. Na kava hinagekaeʼmo alu vekamo a kanomo anu kigane.

²¹ Muki vayaʼai kavaʼapimo Ala kava neʼmo aulagaleʼmo haneʼniye. Agaemo muki vayaʼai kavaʼapimo alagepa huno alino fako huno neʼage.

²² Hosu vekamo hosu kavaʼamoʼmo aneʼai hanagigekana huno haneʼneno neʼatafaiye. Hosu kavaʼamoʼmo nofikana huno haneʼneno nofi aeno neʼate.

²³ Hauʼniya kavateʼmo yagaino noʼateyaʼmofeʼmo faligiye. Lusi kava huno negi nagi kavaʼmo nehiyaʼmofeʼmo afela hegaiye.