Mai'naya kavane 4 - The Keyagana NT and 25 OT books

Afitetapa agesaya kavaʼmo aliyo, huno huʼniya gemae

¹ Mafaʼneʼnimogitapae, huʼna, afotapimoʼna geʼnimo alagepa hutapa afiyo. Afitapa aeto hisayafeʼmo lapaipamo namiyo.

² Alagepa gemo aliʼna lapaya maleʼnovanagi keʼaepa geʼnimo ataletapa oʼviyo.

³ Afoʼnimoʼmo magoke mafaʼneʼamo mainageno itaʼnimoʼmo nagaefeʼmo hau ayamopafiʼmo hauʼniye.

⁴ Afoʼnimoʼmo alino naya malenoʼaeʼmo ani gemo huno alino naya maleʼniye. Geʼnimo atafauka alika kaipafiʼmo malo. Huvo, huʼna kaha paiʼnova gemo akame hisanana ofalika afaʼa maigane.

⁵ Afiteka agesana kavaʼmo aliyo. Afika aeto hisana kavaʼmo aliyo. Geʼnieʼmo kage okanika navayafati huʼnova gemo oʼafisanafeʼmo aika afe leka oʼmaiyo.

⁶ Ani alagepa huʼa afiteʼa ageʼnaya kavaʼmo mago alagepa a kanogana huno haneʼniye. Kagaemo ani a kanomo oʼatalesanaʼmoʼmo alagepa huno yagaino katesigeka maigane. Agaefeʼmo kahau kayamopafiʼmo kahauʼnisiyaʼmoʼmo alagepa huno yagaino kategaiye.

⁷ Afiteka ageʼnana kavaʼmo hogote kavaʼmo haneʼniye. Hogote kavaʼmo haneʼniyaʼmofeʼmo afiteka agesana kavaʼmo aliyo. Muki alu ya alu yaʼmo aliʼnekaeʼmo afika aeto hisana kavaʼeʼmo aliyo.

⁸ Kagaemo ani a kanomo ala agimo amisanagenoʼaeʼmo ala kagimo kamigiye. Anu kisanagenoʼaeʼmo kagikaleʼmo alino asaga huno kategaiye.

⁹ Ani a kanomoʼmo fikumo kaha maeno kamiteno kagenopaleʼmo konalimo alino kategaiye. Kini vayaʼmogi neʼmalaya agufa kakolitamo ha le konali kakolitamo maleno kategaiye.

Lole katalafeʼmo huʼniya gemae

¹⁰ Mafaʼneʼnimogae, huʼna, Geʼnimo afiteka aliyo, yatala afinaʼmo maigananagi.

¹¹ Afiteka agesana kateʼmo visanafeʼmo aliʼna kaya maleʼnove. Kayateʼmo aliʼna kavaleliʼna alagepa kateʼmo uʼnove.

¹² Ani kateʼmo visanaʼmoʼmo mago yaʼmoʼmo katafauno okategaiye. Ani kateʼmo nagu nagu huka visanaʼmoʼmo asagauka oʼaigane.

¹³ Alino kaya malesiya a kanomo atafauteka oʼatalo. Alagepa huka maisana kavaʼmo aepa a kanomo maiʼniyanagi yagaika ato.

¹⁴ Kagaemo hosu vayaʼai kateʼmo uka ohaiyo. Hosu kavaʼmo nehaya vayaʼai kateʼmo oʼuvo.

¹⁵ Ani agufa kateʼmo oʼuka ataleka afagiʼaleʼmo uka maiyo. Ataleka aika atagineka uvo.

¹⁶ Hosu vayaʼmogimo hosu kavaʼmo osisayana apauʼmo okalegae. Apakaemo mago vekamo hosu kavapiʼmo asagauno aino oʼateʼnisayana alagepa huʼa apauʼmo okalegae.

¹⁷ Hosu kavaʼapimoʼmo neʼyaʼapigana huno haneʼniye. Vayaʼmo apamagisaya kavaʼmo aniʼapigana huno haneʼniye.

^18-19 Hosu vayaʼai kateʼmo hani huʼniye. Asagauʼa aiʼnageno apaiyafiʼmo nehapaigeʼapaeʼmo na agufa yateʼmo laiyafiʼmo lahaeʼnifi huʼa oʼageʼnae. Oʼageʼnayaʼmonanafa yegemo netepiʼmo haineteno leme leme haineno magoʼe huno leno lokiya neʼviya kava huʼa fatago vayaʼmo neʼvaya kateʼmo magoʼe huʼa alagepa huʼa uʼa haiʼa hapaigae.

²⁰ Mafaʼnimogae, huʼna, geʼnimo kagetafo huka afiyo. Kagetafo huka geʼnimo afiyo.

²¹ Geʼnimo alagepa huka alika maiyo. Kaipafiʼmo alika maleʼneka yagaika maiyo.

²² Ani gemo kahauya huʼa ageʼa alisaya vayaʼmo ani geletiʼmo ofaliʼa afaʼa maigae. Kaita ohapausigeʼa alagepa huʼa maigae.

²³ Muki agufa kavakamo aepaʼamo kaipafatikeʼmo afole neʼaiyanagi hogote kavaʼmo huka kayamukiki huka kaipaleʼmo alagepa huka yagaika ato.

²⁴ Aigofe gemo kavayafatiʼmo osuvo. Muki alu hosu ge alu hosu gemo osuvo.

²⁵ Uguve, huka hisana katekeʼmo aulu heka agelika uvo. Alika migalega agege malega agege osuvo.

²⁶ Visana kafeʼmo alagepa huka kagesa afifi huka maiyo. Hisana kavaʼmo alika lokiya vaika ategeno haneno.

²⁷ Alagepa kaʼmo kaulagaleʼmo haneʼniyanagi hoga haopalega oʼuge lamaga haopalega oʼuge huvo. Hosu kavapiʼmo kaiyamo oʼaeka alika asagauvo.