Mai'naya kavane 31 - The Keyagana NT and 25 OT books

Kini vekamo Lemuveliʼa huʼniya gemae

¹ Kini vekamo Lemuveliʼmo itaʼamoʼmo alino aya maleʼnenoʼaeʼmo ani ge huno ha paiʼniye.

² Mafaʼneʼnimogae, huʼna, aliʼna kateʼnova mafaʼneʼnimo maiʼnanageʼnaeʼmo nunumuʼmo huʼna kateʼnova mafaʼneʼnimo maiʼnane.

³ Kagaemo aʼne anagaʼeʼmo yokalomo leteka lokiyakamo oʼapamiyo. Ani agufa aʼne anagaʼmogimo kini vayaʼmo aliʼa hosu huʼa neʼapatayaʼmofeʼmae.

⁴ Lemuveliyo, huʼna, Kini vayaʼmogimo nofi alagafati aniʼmo noʼnaya kavaʼmo hanege lokiya aniʼmo noʼnaya kavaʼmo hanege huʼniye.

⁵ Fiku yanageʼa ani agufa aniʼmo nesayaʼmoʼmo keʼaepa gemo apake kanisigeʼa kana yaʼmo alisaya vayaʼmo alagepa huʼa aliʼa fako huʼa oʼapategae.

⁶ Faligefeʼmo hisaya vayaʼmogimo lokiya aniʼmo afaʼa negae. Kana yaʼmo aliʼnaya vayaʼmogimo afaʼa negae.

⁷ Apakaemo afaʼa neteʼa kana yaʼmo aliʼnaya kavafeʼmo apake kanigiye.

⁸ Kagaemo apakaiʼapimo hapa maesiya gemo osisaya vayaʼmo hapa maeka ge huvo. Apamagigune, huʼa hisaya vayaʼmo hapa maeka ge huvo.

⁹ Alagepa huka alika fako huteka kagemi yaʼapimo ohaneʼniya vayaʼe alagepa huʼa noʼmaiya vayaʼeʼmo alagepa huka hapa maeka alika fako huvo.

¹⁰ Ina lagimo alagepa kavaʼmo nehisaya aʼne anagaʼmo apakegae. Ani agufa aʼne anagaʼmogimo alopa miyatetiʼmo miya nefaiya yafaʼmo ago aeʼa aga seʼnae.

¹¹ Ani agufa a kanomo anauʼamoʼmo alino amufa neʼamiyanageno kafu osuno alagepa huno maigiye.

¹² Maiʼnenoʼaeʼmo muki afinaʼmo anauʼamoʼmo hanageke yaʼmo alino oʼamino ha maegaiye.

¹³ Agaemo alagepa nofiʼmo kahauya huno ageno aliteno kukenaʼapimo alo nehunoʼaeʼmo amogaga neʼaiye.

¹⁴ Sipimoʼmo kagemi yaʼmo alinino neʼeya kava huno afagi kotegatiʼmo uno neʼyaʼmo alinino neʼe.

¹⁵ Agaemo kotilamiyapiʼmo he tino afamo anagaʼamogi neʼyaʼmo nekae. Mago hetamamo alino aliʼyaʼamo neʼaliya aʼne anagaʼmo neʼapamiye.

¹⁶ Agaemo miya faisiyafe huʼniya mopamo ageno alagepa hutenoʼaekeʼmo miya nefaiye. Aliʼyaʼmo aliʼniya yatetiʼmo akamelega moniʼaletiʼmo nofi avinamo miya faino nofi hoyamo alino vaiʼniye.

¹⁷ Mago afinaʼmo alagaʼmo ohaeʼnigeno ayamukiki huno haise vose huno lokiya vaino aliʼyaʼmo neʼaliye.

¹⁸ Alagepa yaʼmo alo huteno haniʼilagamo aliʼyaʼmo neʼaliye.

¹⁹ Ani agufa a kanomoʼmo nofiʼmo alo huge kukena yaʼmo aege nehiye.

²⁰ Agaemo kagemi yaʼapimo ohaneʼniya vayaʼmo apamige kafu nehaya vayaʼmo hapa maege nehiye.

²¹ Alagepa kukenamo afamo anagaʼamo vaino neʼapateyaʼmofeʼmo yasi huge ko aige nehigenoʼaeʼmo afamo anagaʼamo yasi hapauge ko apaige hugiye, huno agesamo noʼafiye.

²² Alagepa palaketiʼmo alo huteno agaiʼamo hogote kukena yaʼmo neʼvaiye.

²³ Vayatama vayaʼmogimo anauʼamoʼmo ala agimo amiʼnae. Anauʼamoʼmo vayatama vayaʼeʼmo magokepi lokaeno neʼmaiya vekamo maiʼniye.

²⁴ Ani a kanomoʼmo mapalumo alo huge kanale hogote kukenamo aege huteno maketi nehiye.

²⁵ Lokiyaʼaʼe ala agiʼaʼeʼmo kukenagana huno vaiʼniye. Afole aisiya kavafeʼmo afaʼa amogaga aigiye.

²⁶ Agaemo afiteno ageʼniya gemo nehiye. Vase huno hau ayamopafiʼmo hauʼnigenoʼaeʼmo hapa maesiya agufa gemo nehiye.

²⁷ Agaemo afamo anagaʼamogi kavaʼapileʼmo alagepa huno yagaino neʼapate. Alagaʼmo ohaeʼnigeno aliʼyaʼmo neʼaliye.

²⁸ Mafaʼne anagaʼamogimo amuse huʼa atageno anauʼamoʼeʼmo ala agiʼamo amiteno ani ge huno nehiye.

²⁹ Asole aʼne anagaʼmogi alagepa kavaʼmo nehayaʼmonanafa kagaemo ago aeka apaka seʼnane, huno nehiye.

³⁰ Mago aʼnemogimo alagepa gemo nehayaʼmonanafa alagepa geʼapiletiʼmo humi neʼapatae. Alagepa apakufamo ina agufa apakufamo haneʼniyaʼmonanafa Ala kava nefeʼmo koli nehisiya a kanomo ala agiʼamo amigae.

³¹ Alagepa kavaʼalefeʼmo lapakesamo afitetapa ala agiʼamo amiyo. Ateʼnigenoʼao agaiʼamo alagepa aliʼyaʼmo aliteno ala agiʼamo alino.