Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Mai'naya kavane 30 - The Keyagana NT and 25 OT books


Agaʼmo gemo huʼniya gemae

1 Agaʼmo yage mafaʼnemo maiʼneno Itiyoʼe Ukaliʼefeʼmo ina ge huno hana paiʼniye.

2 Muki vayaʼmogimo ago aeʼa naga seʼnageʼna alagi oʼafiʼnova vekamo maiʼnove. Vayaʼmogi afiʼa aeto nehaya kava huʼna afiʼna aeto osuʼnove.

3 Afiteʼna agesuva gemo alagepa huʼna noʼafuve. Nagaemo Aote vekamo ageʼna aeto nosuve.

4 Ina laʼmo kokuʼnapiʼmo uno haiteno emineʼniye. Ina laʼmo yasimo alino anupa hu maleʼneno ayapiʼmo aliʼniye. Ina laʼmo aniʼmo hiyapiʼmo maleteno hiyatetiʼmo kukenagana huno vaino aino ati kaeno ateʼniye. Ina laʼmo muki ma mopamo alino lokiya vaino ateʼnigeno haneʼniye. Ani kavaʼmo huʼniya vekamo agiʼamo ina laʼmae. Mafaʼneʼamo agiʼamo ina laʼmae. Agiʼamo afiʼnapiye.

5 Muki Goti geʼamo alagepa geʼageʼmo haneʼniye. Alagepa huno laha maegaiye, huʼa aliʼa amufa neʼamiya vayaʼai haleguʼapigana huno haneʼniye.

6 Kagaika gemo hapa nepaikaeʼmo, Goti geʼamae, huka osuvo. Fiku yanageno ge kahausigeʼapaeʼmo muki vayaʼmogimo aigofe vekae, huʼa hugae.

7 O Gotiyo, huʼna, lole kavatalafeʼmo ge huʼna kafi gegauve. Fiku yanageka osuguve, huka hisanageʼnaeʼmo oʼaliʼna faliguve.

8 Ma mopafi muki afa kavaʼe aigofe geʼeʼmo nagaetegatiʼmo alika afagitegamo yaga auka atalo. Kafu hisuva kavaʼmo osuge asole kagemi yaʼnimo hanesiya kavaʼmo osuge huvo. Na magi yaʼmo kamiguve, huka hisapi afaʼa namiyo.

9 Fiku yanageʼna asole yaʼmo alisuvana nakameʼyamo kamiteʼna, Ala kava neʼmo ina laʼmae, huʼna huge kafu huteʼna kumayaʼmo aliteʼnaeʼmo Gotiʼnimogae, huʼna nehuva kagikaleʼmo aliʼna afepi katege huguve.

10 Kagaemo aliʼyaʼmo afoʼamotegamo ukaeʼmo, aliʼyakamo neʼaliya vekamoʼmo hosu kavaʼmo huʼniye, huka akamelega gemo osuvo. Fiku yanageno lifanamo huno katesigekaeʼmo anonakaleʼmo hosu kavaʼmo aligane.

11 Mago aunale vayaʼmogimo afoʼapimogimo lifana huʼa apatege itaʼapimogimo aliʼa auleʼa oʼapatege nehae.

12 Mago nofi vayaʼmo hosu kavaʼapimo aeno kalopaeno oʼataleʼniyana apakaiʼapi apaulagaleʼmo hosu kavatimo ohaneʼnigeta kanale laipa lagesa vayaʼmo maiʼnone, huʼa nehae.

13 Mago nofi vayaʼmogimo apakaiʼapimo apakesamo afiʼapaeʼmo alagepa vayaʼmo maiʼneta alu vayaʼmo ago aeta apaka seta maiʼnone, huʼa apakesamo neʼafiye.

14 Mago nofi vayaʼmogi apaveʼmo haginagana huno apavayafiʼmo haneʼnigeʼa kagemi yaʼapimo ohaneʼniya vayaʼmo hapaeʼa nege kafu huʼnaya vayaʼmo hapaeʼa nege nehae.

15 Hiʼnoʼmoʼa kolaʼmo neʼneya kafamoʼmo lole a mafaʼneʼalaʼmo maiʼneʼanaeʼmo laʼamiyo, huʼana aukaya nehaʼae. Loleʼe loleʼe yaʼmo haneʼnaya yaʼmogimo alagi haiʼmo aliʼnone, huʼa nosae.

16 Ani loleʼe loleʼe kavaʼmo haneʼniyana faliʼa uʼa kanolufiʼmo neʼmaiya kavanagi mafaʼnemo aliʼa noʼapataya apaipamo kavanagi hau huʼniya mopamoʼmo magoʼe aniʼmo alisiya kavafeʼmo nehaiya kavanagi atamo nelenoʼaeʼmo alagiʼmo neleya kavanagi huno hano nosiya kavaʼmo haneʼniye.

17 Mago vekamoʼmo afoʼamofeʼmo huno faipa huno atege kigi yokalo gemo huge itaʼamo geʼamo akame hisiya kavafeʼmo akameʼyamo amige nehisiyaʼmoʼmo falisigeʼapaeʼmo hakikimogimo aulagamo haniʼa katiʼa negae.

18 Loleʼe loleʼe yaʼmogimo nehaya kavaʼmo ageteʼnaeʼmo nahau aiteʼna apakeʼna alagepa osuʼnove.

19 Ani loleʼe loleʼe kavaʼmo haneʼniyana hakikimo kokuʼnateʼmo halelino uneno nehiyana aiyakamo oʼagege nagaloʼyavemoʼmo yafa agotofuleʼmo uʼnigetaeʼmo aiyakamo oʼagege sipimo solovala anipiʼmo uʼnigetaeʼmo aiyakamo oʼagege vayaʼmogimo a mafaʼnemo apayateʼmo alisayafeʼmo uʼnaya kavaʼmo oʼagege nehune.

20 Kumai kavaʼmo nehaya aʼnemogimo neʼyaʼmo neteʼapaeʼmo apavayalegatiʼmo aliʼa kalo paeʼa ataleteʼapaeʼmo, nagaemo hosu kavaʼmo osuʼnove, huʼa nehae.

21 Loleʼe loleʼe kavaʼmo ma mopafiʼmo afole neʼaiya kavaʼmo hosu kavaʼmogeno mopamoʼmo alagi ohauʼnigeno atete nehiye.

22 Ani agufa kavaʼmo haneʼniyana aliʼyaʼmo neʼaliya vekamoʼmo kini vekamo nehamaleya kavanagi negi vekamoʼmo neʼyaʼmo neno amu nehiya kavanagi

23 ve anagaʼmogimo alisayafeʼmo nohapaiya a kanomo veleʼmo maisiya kavanagi aliʼyaʼmo neʼaliya a kanomoʼa aliʼyaʼmo itaʼamo aimuʼyaleʼmo neʼmaiya kavanagi huno haneʼniye.

24 Loleʼe loleʼe yaʼmo aise yagagi kafagi huʼa maiʼnayaʼmonanafa alagepa huʼa apakesamo neʼafiye.

25 Kiʼnu anagaʼmogimo lokiyaʼapimo ohaneʼniyana neʼyaʼapimo haneʼniya afinaʼmo neʼyaʼapieʼmo kafu hisaya afinaʼmo nesayafeʼmo haniliʼa uʼa alu aiʼa neʼmalae.

26 Vanume anagaʼmogimo lokiyaʼapimo ohaneʼniyana yafa kapiʼmo apano nekiye.

27 Akenu anagaʼmogimo kini vekaʼapimo oʼmaiʼniyaʼmonanafa magoke aiyaya huʼa magokepi haleliʼa neʼvae.

28 Kakana kafa anagaʼmogimo apayatetiʼmo kini vekamo nopiʼmo noʼapimo nekiye.

29 Loleʼe loleʼe yaʼmogi umenitata nehageʼapaeʼmo koliʼapimo nehuʼapaeʼmo apamogaga neʼaiye.

30 Ani loleʼe loleʼe yaʼmo maiʼnayana laiyoni anagaʼmo lokiyaʼapimo haneʼniyanageʼa koli huteʼa apaune nosae.

31 Mago vekamoʼmo hosileʼmo fai maiʼnigeno umenitata nehiya hosimo maige ve mememo umenitata nehiya meme maige kini vekamo aeʼa oʼaga senageno umenitata nehiya kini vekamo maige huʼa neʼmaiye.

32 Kagaemo negi kavaʼmo huteka kagikaleʼmo alika asaga hisanafe hisapi hosu kavaʼmo hisanafeʼmo kagesamo afisapi hukaeʼmo ge osuka afaʼa atalo.

33 Kagaemo pulumakamo nuʼanuʼamo alika afelo afalo hisanaʼmoʼmo matamo alino hamalegaiye. Kagaemo mago vekamo agoyamo aika atagisanagenoʼaeʼmo kolaʼamoʼmo hugiye. Ani kava huʼa vayaʼmogi apaipamo lesigeʼa kavetamo hisaya kavaʼmo afole aigiye.

© 2013, Wycliffe Bible Translators, Inc. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ