Mai'naya kavane 29 - The Keyagana NT and 25 OT books

¹ Gotiʼa asole afinaʼmo mago vekaeʼmo hosu kavaʼmo nehane, huno hisiya gemo noʼafisigenoʼaeʼmo malage huno alino agoʼya laga uno atalesigeno ha maesiya vekamo alagi oʼmaigiye.

² Fatago vayaʼmogi yagaiʼa apateʼnageʼapaeʼmo vayaʼmogimo apamogaga neʼaiyaʼmonanafa hosu vayaʼmogi yagaiʼa apatenageʼapaeʼmo vayaʼmogimo hosu apaipamo kaliteʼa yulagefa neʼaiye.

³ Afiteno agesiya gemo afisiyafeʼmo hauʼnisiya vekamoʼmo afoʼamoʼmo amogaga aisiya yaʼmo alino amigiyaʼmonanafa kumai kavaʼmo nehiya a kanoʼeʼmo magokepi lokaeno neʼmaiya vekamoʼmo kagemi yaʼamo fikumo alinino uno neʼatale.

⁴ Kini vekamoʼmo vayaʼaleʼmo fatago kavaʼaletiʼmo yagaino apatesiyaʼmoʼmo lokiya vaiʼa maigayaʼmonanafa hapa maesiya monimo neʼalisiya kini vekamoʼmo apatalesigeʼa asagauʼa aigae.

⁵ Haopaleʼmo maiʼneno yagaiʼniya vekaeʼmo huno haoke hesiya gegeʼmo nehiya vekamoʼmo aneʼaimo hanagi neʼmale.

⁶ Hosu vekamo agaiʼa hosu kavaʼamoʼmo aneʼaifiʼmo hegekana huno neʼatafaiyaʼmonanafa fatago vekamoʼmo amogaga aino yokemo hugiye.

⁷ Fatago vayaʼmogimo agoti nehuʼapaeʼmo kagemi yaʼapimo ohaneʼniya vayaʼaifeʼmo apakesamo neʼafiyaʼmonanafa hosu vayaʼmogimo kagemi yaʼapimo ohaneʼniya vayaʼaifeʼmo apakesamo noʼafiye.

⁸ Himuʼnamu gemo nehaya vayaʼmogimo apaipamo neleya kavaʼmo aliʼa he tiʼa neʼateyaʼmonanafa afiteʼa ageʼnaya vayaʼmogi Gotiʼa aipamo neleya kavaʼmo aliʼa aiʼa afe leʼa neʼatalae.

⁹ Afiteno ageʼniya vekamoʼmo negi vekamo agoti huno atesiyaʼmoʼmo negi vekamoʼmo aipamo lege kigi huge huno faipa huno atege hisigeʼanaeʼmo anaipamo falu osugiye.

¹⁰ Kamitimo apamagisayafeʼmo nehaya vayaʼmogimo vaiʼmo oʼaliʼniya vekaeʼmo nohapaiyaʼmonanafa fatago vayaʼmogimo ha maesayafeʼmo maiʼnae.

¹¹ Negi vekamoʼmo muki aipafiʼmo haneʼniya kavaʼamo alino afole aino neʼateyaʼmonanafa afiteno ageʼniya vekamoʼmo hauʼniya kavateʼmo alagepa huno yagaino neʼate.

¹² Yagaino neʼapateya vekamoʼmo aigofe gemo afisiyaʼmoʼmo aliʼyaʼamo neʼaliya vayaʼmo hosu vayaʼmo hamalegae.

¹³ Mago afinaʼmo kagemi yaʼapimo ohaneʼniya vayaʼe ani vayaʼmo aliʼa afepi neʼapataya vayaʼeʼmo eʼa magokepi lokaeʼa maiʼnagenoʼaeʼmo Ala kava neʼmoʼa apaulagamo alino ayakeno neʼapate.

¹⁴ Kini vekamoʼmo kagemi yaʼapimo ohaneʼniya vayaʼmo lama ge kavatetiʼmo alino fako huno neʼapatesiyaʼmoʼmo yagaino neʼapateya kavaʼamo hano osuno muki afinaʼmo hanege hanege huno hanegaiye.

¹⁵ Lapakaemo mafaʼnetapiyeʼmo, hosu kavaʼmo huʼnane, hutapa hapa paitetapa hopa kayotetiʼmo apamagisayaʼmoʼmo mafaʼnetapimogi afiteʼa agegayaʼmonanafa apaketapa apatalesayaʼmoʼmo itaʼapimogimo apavagage yaʼmo aliʼa apamigae.

¹⁶ Hosu vayaʼmo magoʼe magoʼe huʼa afole aisayaʼmoʼmo hosu kavaʼmo magoʼe magoʼe huno afole aigiyaʼmonanafa fatago vayaʼmogimo apakesayana asagauʼa aisageʼa apakegae.

¹⁷ Mafaʼnetapimo alitapa api aitapa apategenoʼao lapaipamoʼmo falu hino. He, lapakaemo mafaʼnetapieʼmo hapaoke hegae.

¹⁸ Gotiʼa alino apave lisiyafeʼmo geʼamo alino oʼapamiʼnigeno geʼamoʼmo nofi aeno oʼapateʼnigeʼa magoʼe magoʼe huʼa hosu kavaʼmo hugayaʼmonanafa keʼaepa gemo alagepa huno akame nehiya vekamoʼmo amogaga aino maigiye.

¹⁹ Hosu aliʼyaʼmo neʼaliya vayaʼmogimo aliʼa api aiʼa apatesaya gemo oʼafigae. Geʼapimo afigayaʼmonanafa afaʼa akame osugae.

²⁰ Mago afinaʼmo vayaʼmogimo negi vekamo afaʼa ha maegayaʼmonanafa agesamo oʼafiʼneno malage huno fikumo ge nehiya vekamo ha oʼmaegae.

²¹ Kagaemo aliʼyakamo neʼaliya mafaʼnemo aise mafaʼnemo maiʼniya afinatetiʼmo yagaika oʼateʼneka muki hauʼniya yaʼmo alika amisanaʼmoʼmo henagaʼamo kagaika mafaʼnemo maigiye.

²² Aipamo malage huno neleya vekamoʼmo kavetamo nehaya kavaʼmo alino afole aino neʼate. Aipamo leʼnigeno lusi kava huno ayamufamo neʼvaleya vekamoʼmo asole hosu kavaʼmo nehiye.

²³ Mago vekamoʼmo agaiʼaeʼmo amogaga neʼaisiyana agiʼaleʼmo aliʼa afepi ategayaʼmonanafa ina agufa vekamo maiʼnove, huno agesamo neʼafiya vekamo ala agiʼamo hano osuno afaʼa hanegaiye.

²⁴ Kumayaʼmo neʼaliya vekamo afaluʼamoʼmo agaiʼamo alagepa huno maisiyafeʼmo ohauʼniye. Agotileʼmo agoʼyamo ataleteno alagi lama gemo nehuve, huno huʼniyana afaluʼamoʼeʼmo huʼnaʼa kavafeʼmo aeno hakalo nosiye.

²⁵ Vayaʼaifeʼmo koli nehaya kavaʼmoʼmo aneʼaifiʼmo hegekana huno apatafaugiyaʼmonanafa Ala kava neʼmoʼa laha maegaiye, huʼa aliʼa amufa neʼamiya vayaʼmo alagepa huʼa maigae.

²⁶ Asole vayaʼmogimo yagaino neʼapateya vekaeʼmo hapa maesiyafeʼmo ge huʼa afi nekayaʼmonanafa Ala kava neʼmoʼa agaiʼageʼmo alagepa huno hapa maeteno alino fako huno neʼapate.

²⁷ Fatago vayaʼmogimo aigofe vayaʼaifeʼmo ohapauʼnigeʼa apavenatuʼnaʼmo heʼa atalegekana huʼa neʼapatalae. Hosu vayaʼmogimo fatago vayaʼaifeʼmo ohapauʼnigeʼa apavenatuʼnaʼmo heʼa atalegekana huʼa neʼapatalae.