Mai'naya kavane 28 - The Keyagana NT and 25 OT books

¹ Mago vekamoʼmo hosu vayaʼmo apavegala noʼaefa apakaiʼapigeʼmo apaune nehayaʼmonanafa fatago vayaʼmogimo laiyonigana huʼa koli osuʼa neʼmaiye.

² Mago kotega maiʼnaya vayaʼmogimo gamani vayaʼai geʼapimo oʼafiʼa kamemo hisayaʼmoʼmo yagaiʼa apatesaya vayaʼmo asole vayaʼmo afole aite aite nehayaʼmonanafa afino aeto huteno ageʼniya vekamoʼmo alagepa huno yagaino apatesiyaʼmoʼmo koʼapimo alagepa huno hanege hanege huno hanegaiye.

³ Mago kagemi yaʼamo ohaneʼniya vekamoʼmo kagemi yaʼapimo ohaneʼniya vayaʼaina alino afepi neʼapateya kava huno alopa yasimo alige ko aige huʼnigenoʼaeʼmo neʼyaʼmo alino hosu huno neʼataleya kavakana huno haneʼniye.

⁴ Keʼaepa gemo akame nosaya vayaʼmogi hosu kavaʼmo nehaya vayaʼai apakiʼapileʼmo aliʼa asagauʼa neʼapatayaʼmonanafa keʼaepa gemo akame nehaya vayaʼmogi kame hugekana huʼa aeʼa apakasesayafeʼmo nehae.

⁵ Hosu vayaʼmogimo alagepa huʼa aliʼa fako huʼa apatesaya kavaʼmo haiya agufa kavaʼmo haneʼnifi huʼa oʼafiʼnayaʼmonanafa Ala kava neʼmo kahauya huʼa agesayafeʼmo nehaya vayaʼmogi muki kavaʼmo ageʼa aeto nehae.

⁶ Kagemi yaʼamo ohaneʼniya vekamoʼmo lama ge kavaʼmo nehisiyaʼmoʼmo kagemi yaʼamo haneʼniya vekamoʼmo kayagi kayaga kavaʼmo nehisiya vekamo ago aeno aga seʼniye.

⁷ Keʼaepa gemo akame nehiya mafaʼnemoʼmo gemo afino aeto nehiyaʼmonanafa muki afinaʼmo alopa yagita huʼa neʼnaya vayaʼmogi konagaʼapimo afoʼamoʼmo avagage yaʼmo alino neʼamiye.

⁸ Vayaʼmogimo anonamo aliʼnaya yatefeʼmo magoʼe monimo maleteʼa neʼapamiya vayaʼmogi alopa moniʼapimo atalesageno kagemi yaʼapimo ohaneʼniya vayaʼaifeʼmo hau huno neʼapateya vekamoʼmo aligiye.

⁹ Keʼaepa geʼaeʼmo aini nehiya vekamoʼmo nunumuʼmo nehiya geeʼmo ohauʼnigeno avenatuʼnaʼmo heno atalegekana huno neʼatale.

¹⁰ Mago vekamoʼmo fatago vayaʼmogimo alagepa kaʼmo ataleʼa hosu kateʼmo visayafeʼmo apayate alisiyaʼmoʼmo agaiʼamo kafi maleʼniya kelifiʼmo asagauno aigiyaʼmonanafa vaiʼmo oʼaliʼnisiya vekamoʼmo afoʼamomo Gotitegatiʼmo alagepa yaʼmo aligiye.

¹¹ Kagemi yaʼamo haneʼniya vekamoʼmo agaiʼa aulagaleʼmo afiteno ageʼniya vekamo maiʼniyaʼmonanafa kagemi yaʼamo ohaneʼniya vekamoʼmo afino aeto nehiya kavatetiʼmo kagemi yaʼamo haneʼniya vekamo kavaʼamo ageno alagepa huno alino fako nehiye.

¹² Fatago vayaʼmo afole neʼaigeʼapaeʼmo muki vayaʼmogimo apamogaga neʼaiyaʼmonanafa hosu vayaʼmo afole neʼaigeʼapaeʼmo muki vayaʼmo fala kiʼa neʼmaiye.

¹³ Hosu kavaʼapimo aeʼa ati nekaya vayaʼmo alagepa huʼa oʼmaigayaʼmonanafa hosu kavaʼapieʼmo Gotifeʼmo aeʼa hakalo huʼa ha nepaiya vayaʼaifeʼmo hau huno neʼapate.

¹⁴ Muki afinaʼmo Ala kava nefeʼmo koli nehiya vekamoʼmo Goti aulagaleʼmo alagepa huno maiʼniyanageno afaʼa amogaga aigiyaʼmonanafa aipamo alino lokiya vaino neʼateya vekamoʼmo hanageke kavapiʼmo asagauno aigiye.

¹⁵ Kagemi yaʼapimo ohaneʼniya vayaʼaiteʼmo alagepa huno yagaino noʼapateya vekamo alopa gefatiʼmo age neʼaiya laiyonigana huno maige vayaʼmo nehapaeya afela meyagana huno maige huʼniye.

¹⁶ Afino aeto osuʼneno yagaino neʼapateya vekamoʼmo vayaʼmo lusi kava huno alino afepi neʼapateya vekamo maiʼniyaʼmonanafa ma mopafi yafeʼmo agaiʼamo haʼye nehiya kavafeʼmo alagi ohauʼniya vekamoʼmo afaʼa maisiya yaʼamo alino yatala huno ategaiye.

¹⁷ Mago vekamoʼmo alu vekamo kamitimo amagisiya vekamo aune hetaleno uno ive kelifiʼmo uno lamigiye. Fiku yanageno mago vekamoʼmo ha maegaiye.

¹⁸ Gotiʼa vaiʼmo noʼalisiya vekamo agufamo alino katino ategaiyaʼmonanafa himuʼnamu kavaʼmo nehisiya vekamo malage huno asagauno aigiye.

¹⁹ Agaiʼamo mopafiʼmo hoyamo alino neʼvaiya vekamoʼmo asole neʼyaʼmo aligiyaʼmonanafa aepaʼamo ohaneʼniya kavaʼmo akame nehiya vekamo kafu huge huge huno maigiye.

²⁰ Geʼamo akame huno alagepa aliʼyaʼmo neʼaliya vekamoʼmo asole aulena yaʼmo aligiyaʼmonanafa malage huno kagemi yaʼamo alisiyafeʼmo hauʼnisiya vekamo kayoʼmo amigiye.

²¹ Apakiʼapieʼmo apakesamo afige aliʼnaya yafeʼmo apakesamo afige alu ya alu yaʼapieʼmo apakesamo afige nehiya kavaʼmo kanale kavaʼmo nosae. Ani agufa kavaʼmo nehaya vayaʼmogi aise miyaʼmo alisayafeʼmo hosu kavaʼmo afaʼa hugae.

²² Malage huno kagemi yaʼamo hanesiya vekamo hamalesiyafeʼmo nehaiya vekamoʼmo ageno haʼye nehiye. Henagaʼamo kafu huguve, huno agesamo noʼafiye.

²³ Mago vekamoʼmo alu vekaeʼmo hosu kavaʼmo huʼnane, huno huʼniya vekamoʼmo alu vekaeʼmo huno haoke hesiya agufa gegeʼmo nehisiya vekamoʼmo ago aeno agaseʼniyanageno henagaʼamo magoʼe huno haoke hegaiye.

²⁴ Mago vekamoʼmo afoʼamo yaʼmo kumayaʼmo neʼalinoʼaeʼmo, hosu kavaʼmo osuʼnove, huno nehisiya vekamoʼmo muki yaʼmo alino hosu huno neʼataleya vekamo afaluʼamoʼmo maiʼniye.

²⁵ Himuʼnamu kavaʼmo nehiya vekamoʼmo kaveta nehaya kavaʼmo alino afole aino neʼateyaʼmonanafa Ala kava nefeʼmo, naha maegaiye, huno alino amufa neʼamiya vekamo alagepa huno maigiye.

²⁶ Nagaiʼnimo afaʼa naha maegauve, huno agaiʼamo alino amufa neʼamiya vekamo negi vekamo maiʼniyaʼmonanafa afiteno ageʼniya kavaʼmo nehiya vekamo hosu kavapatiʼmo avalelino uno haigiye.

²⁷ Kagemi yaʼapimo ohaneʼniya vayaʼaina fikumo apamisiya vekamo kafu osugiyaʼmonanafa hapa maesiyafeʼmo ohauʼnigeno oʼapakeno aulagamo fali kaeno noʼapamiya vekamo magoʼe huno lifana huno atesiya kavaʼmo agaeteʼmo afole aigiye.

²⁸ Hosu vayaʼmo afole neʼaigeʼapaeʼmo vayaʼmo fala kiʼa neʼmaiyaʼmonanafa hano hisayaʼmoʼmo fatago vayaʼmo afaʼa alagepa huʼa maigae.