Mai'naya kavane 27 - The Keyagana NT and 25 OT books

¹ Lapakaemo henagaʼamo afole aisiya kavaʼmo oʼageʼnayaʼmofeʼmo egamo ani kavaʼmo huguve, ina kavaʼmo huguve, hutapa huteta himuʼnamu gemo osiyo.

² Alu vekamo ateʼnegenoʼa ala kagimo kamino. Fiku yanageka kagaikamo ala kagimo kamiganaʼmofeʼmae.

³ Yafaʼmoʼa lusi kava huno kana nehiya yaʼmo hanege kahaepamoʼmo lusi kava huno kana nehiya yaʼmo hanege huʼniyaʼmonanafa negi vekamoʼmo aipamo neleya kavaʼmoʼa magoʼe huno lusi kava huno kana nehiya yakana huno haneʼniye.

⁴ Apaipamo neleya vayaʼmogimo hapau huʼa oʼapateʼa apaipa nelegeʼa apaya mukiki huʼa vayaʼmo aeʼa neʼapaka sayaʼmonanafa aeʼa apaka seʼnaya vayaʼaifeʼmo hosu apaipamo nekaliya kavaʼmoʼa magoʼe huno aeno agaseʼniye.

⁵ Kagaefeʼmo hosu kavaʼmo huʼnane, huno nehiya vekamoʼmo kagaefeʼmo hauʼniyana ge nosiya vekamo ago aeno aga seʼniye.

⁶ Kao vekamoʼmo kamagisiya kavaʼmo kanale kavaʼmo haneʼniyaʼmonanafa kame vekamoʼmo humi katesiyafeʼmo kahaeno negaiye.

⁷ Neʼyaʼmo neno amu huʼniya vekamoʼmo lume anuveʼmo nohaiyaʼmonanafa aga teʼniya vekamoʼmo atu neheya neʼyafeʼmo haga nehiya neʼyane, huno nehiye.

⁸ Koʼamo ataleno umenitata nehiya vekamo namamoʼmo anoʼamo ataleno halelino uneno nehiya namagana huno maiʼniye.

⁹ Alagepa atumo neʼaiʼa yatalaʼmo galisiʼe uveliʼefeʼmo amuse nehuna kava huta lao vayaʼeʼmo alagepa huno laha maesiya geeʼmo amuse nehune.

¹⁰ Kagaemo kao vekaeʼmofi afokamo ao vekaeʼmofi huka kakameʼyamo oʼanamiyo. Kahaopaleʼmo maiʼniya vekamoʼmo afagitega maiʼniya konagakamoʼmo ago aeno aga seʼniyaʼmofeʼmo kana yaʼmo alisana afinaʼmo konagakamo nopiʼmo oʼuvo.

¹¹ Mafaʼneʼnimogae, huʼna, mago vekamoʼmo nagaepiʼmo gemo alino faino natesigeʼnaeʼmo geʼaleʼmo aeʼna atagaina huʼna ha paisuvafeʼmo afiteka agegeʼnao naipafiʼmo namogaga aino.

¹² Alagepa kavaʼmo hisiyafeʼmo ageʼniya vekamoʼmo hunoʼaeʼmo, Mani kateʼmo visuvana hosu kavaʼmo afole aigiye, huno agetenoʼaeʼmo ani kaʼmo ataleno uno fala nekiyaʼmonanafa negi vayaʼmogi oʼageʼa fikumo neʼvageʼapaemo kayoʼmo neʼapamiye.

¹³ Mago vekamoʼmo alu kotegatiʼmo eʼniya vekamo aimuʼyaleʼmo nagaemo maiguve, huno kaha paisiyaʼmoʼmo alapaʼage siotiʼamo aliyo. Ani kava huno vayaʼmo apayate neʼaliya hosu a kanomo aimuʼyaleʼmo nagaemo maiguve, huno kaha paisiyaʼmoʼmo anonaleʼmo kenaʼamo aliyo.

¹⁴ Mago vekamoʼmo alopa gefatiʼmo ao vekaeʼmo hunoʼaeʼmo, Gotiʼa alino auleno kateno, huno hisigenoʼaeʼmo ao vekamoʼmo, Gotiʼa lifana huno kateno, huno nagaefeʼmo huʼniye, huno agesamo afigiye.

¹⁵ Anauʼamoʼeʼmo ge neʼvaia a kanomo ko neʼaigenoʼaeʼmo muki afinaʼmo aniʼmo lape tape huno asagauno neʼaiya anikana huno maiʼniye.

¹⁶ Mago vekamoʼmo ani a kanoʼeʼmo ge neʼvaiʼa gemo vayaʼmogimo oʼafisayafeʼmo aliʼna fala kiʼna atalegauve, huno hisiya vekamo yasimo alino fala kino atesiya vekagana huno maige alagepa atumo neʼaiya uvelimo alino fala kino atesiyafeʼmo ayapiʼmo alige nehiya vekagana huno maiʼniye.

¹⁷ Vayaʼmogimo kaneʼa akoʼya hisayafeʼmo aeniletiʼmo aenileʼmo kume nekanaya kava huno mago vekamoʼmo ao vekamo naepegana huno maiʼnigeno geʼaletiʼmo kuʼme kanegekana huno ha nepaiye.

¹⁸ Mago vekamoʼmo alagamo neʼaeya yosaleʼmo yagaisiyana ani yosamo alagamo afaʼa negaiye. Ani kava huno mago vekamoʼmo aliʼyaʼmo afoʼamo aliʼyaʼamo alagepa huno neʼalisiyaʼmoʼmo aliʼyaʼmo afoʼamoʼmo agiʼaleʼmo alino asagauno ategaiye.

¹⁹ Mago vekamoʼmo ani kotuteʼmo agaiʼa augosamo haneʼnigeno ageʼniya kava huno mago vekamoʼmo agaiʼa aipagi alu vekamo aipamogi huno magoke agufa anaipamo haneʼniye.

²⁰ Ata kopiʼe alino apagoʼya lagauno apataleʼnigeʼa uʼa neʼmaiya koteʼeʼmo kili nopaya kava huno vayaʼmogi alagiʼmo ageʼnove, huʼa nosae.

²¹ Vayaʼmogimo goli yafaʼmo atafiʼmo kaeʼa neʼagae. Ani kava huʼa siluva yafaʼmo yuvapafiʼmo maleʼneʼa atafiʼmo kaeʼa neʼagae. Ani kava huʼa vayaʼmogimo ala apakimo neʼapamiya kavatetiʼmo apamalageka huno neʼapake.

²² Kagaemo negi vekamo amagiganaʼmonanafa negi kavaʼamo aipafatiʼmo alika oʼatalegane.

²³ Kagaemo sipisipi anagakaʼe meme anagakaʼeʼmo alagepa huʼa maisayafeʼmo kaya mukiki huka yagaika apato.

²⁴ Na kava hinagekaeʼmo ani kavaʼmo hugane. Kagemi yakamo muki afinaʼmo hanege hanege huno nohaneya kava huʼa kini vayaʼmo maige maige huʼa noʼmaiye.

²⁵ Kahaumo haino yatala nehisigekaeʼmo hatagauka ataleʼnegeno saufa kahaumo hainesigeka aise avefatiʼmo alika nokafiʼmo malegane.

²⁶ Sipisipimo ayokaʼmo lagauka kukenamo alo hugane. Mago memekamo maketi hisanageʼa miya faisageka monimo alika mopamo miya faigane.

²⁷ Memekamo nu anuʼamo lapaika kagaikaʼe afamo anagakaʼeʼmo nege aliʼyakamo neʼaliya saufa a mafaʼne anagaʼmo netapa apamige huvo.